English Edition Dhivehi Edition

ގަތަރު ވޯލްޑް ކަޕް 2022

ވޯލްޑް ކަޕް: ފްރާންސް 2-0 މޮރޮކޯ (ފުލްޓައިމް)

15 Dec 07:15

މެޗުގެ އުސްއަލިތައް:

މޮރޮކޯއިން ފެށީ އެޓީމުގެ ސްޓައިލްގައި ފަހަތަށް ސަމާލުކަން ދީގެން
ފުރަތަމަ ހާފު ވަރުގަދަކޮށް ފެށީ ފްރާންސުން، އެޓޭކްތައް ފެނުނީވެސް އެޓީމުގެ ފަރާތުން
ފަސްވަނަ މިނެޓުގައި ހެނާންޑޭޒްގެ ގޯލުން ފްރާންސް ލީޑު ނެގި
އޭގެ ފަހުން ޖިރޫގެ ދެ ހަމަލާއެއް ފެނުނު، އޭނާގެ ފުރަތަމަ ހަމަލާ ބޭރަށް ދިޔައިރު، އަނެއް ހަމަލާ އަމާޒުވީ ދަނޑިއަށް
މެޗުގެ ކުރީކޮޅުގައި މޮރޮކޯ ކެޕްޓަން ސައިސްއަށް އަނިޔާވެ ބާލަން ޖެހުނު
މޮރޮކޯގެ ނުރައްކާވެސް ފުރަތަމަ ހާފްގައި ފެނުނު، އުނާހީ ފޮނުވާލި ހަމަލާ މަތަކުރީ ލޮރިސް
ހާފު ނިމެން ދަނިކޮށް މޮރޮކޯ ޑިފެންޑަރު ޔަމީގް އޯވަހެޑެއްގައި ޖެހި ބޯޅަ އަމާޒުވީ ދަނޑިއަށް
ދެވަނަ ހާފްގެ ކުރީކޮޅުގައިވެސް މޮރޮކޯއިން ނުރައްކާ ކުރި
ފްރާންސް ޑިފެންސަށް ޕްރެޝަރު ކޮށްލި ނަމަވެސް، އެޓީމަށް މަދުވީ ނުރައްކާތެރި ހަމަލާއެއް
މޮރޮކޯއިން ފުރުސަތުތައް ނަގާލުމުގެ ފައިދާ ނަގައި، ފްރާންސް މަޑުމަޑުން އަނެއްކާވެސް ކުރިއަށް ޖެހުނު
ފްރާންސަށް ލީޑު ފުޅާކޮށްދިނީ ބަދަލަކަށް ނުކުތް މުއާނީ، މުއާނީ ގޯލް ޖެހީ ކުޅެން ނުކުމެ ލިބުނު ފުރަތަމަ ބޯޅައިން
ފްރާންސް ފައިނަލްގައި ނުކުންނާނީ އާޖެންޓީނާއާ ދެކޮޅަށް
ފްރާންސަށް ތަށި ދިފާއުކުރުމުގެ ފުރުސަތު އޮތް އިރު، އެ މެޗު އޮންނާނީ އާދީއްތަ ދުވަހުގެ ރޭ

15 Dec 06:55

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-0 ގެ ނަތީޖާއަކުން ފްރާންސް ކުރީގައި އޮވެގެން. ފްރާންސް ފައިނަލަށް.

15 Dec 06:54

'90+4 - މޮރޮކޯގެ ނުރައްކަލެއް. އެޒަލްޒޫލީ ދިން ބޯޅައަކުން ޕެނަލްޓީ އޭރިއާ ތެރެއިން އުނާހީ ފޮނުވާލި ހަމަލާ، ގޯލު ލައިން މަތިން ފްރާންސް ޑިފެންޑަރު ޖޫލުސް ކޫންޑޭ ވަނީ ދިފާއުކޮށްފައި.

15 Dec 06:49

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

15 Dec 06:40

'79 - ފްރާންސުން ގޯލެއް ޖަހައި ލީޑު ފުޅާކޮށްފި. މާކަސް ތުރާމް ދިން ބޯޅައަކުން ކިލިއާން އެމްބާޕޭ ފޮނުވާލި ހަމަލާ، އަބްދޭ އަޒަލްޒޫލީގެ ފައިގައި ޖެހި ބްލޮކްވުމާއެކު ލިބުނު ރީބައުންސް ބޯޅައިން، ޕެނަލްޓީ އޭރިއާ ތެރޭ ހުސްކޮށް ހުރެ ފޮނުވާލި ހަމަލާއަކުން ފްރާންސަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ރެންޑަލް ކޮލޯ މުއާނީ.

15 Dec 06:37

'79 - ފްރާންސް އިން ވެސް ބަދަލެއް. ޑެމްބެލޭގެ ބަދަލުގައި ކުޅެން ނުކުތީ ކޮލޯ މުއާނީ.

15 Dec 06:36

'78 - މޮރޮކޯ އިން ބަދަލެއް. އަމާލާގެ ބަދަލުގައި ކުޅެން ނުކުތީ އެޒަލްޒޫލީ.

15 Dec 06:30

'71 - ފްރާންސަށް ފުރުސަތެއް. ގްރީޒްމަން ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، މާކަސް ތުރާމް ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

15 Dec 06:28

'69 - ފްރާންސްގެ ހަމަލާއެއް. ކޫންޑޭ ދިން ބޯޅައަކުން ޕެނަލްޓީ އޭރިއާ ތެރެއިން އެމްބާޕޭ ފޮނުވާލި ބާރު ހަމަލާ، މޮރޮކޯގެ ޑިފެންޑަރުން ވަނީ ބްލޮކްކޮށްފައި.

15 Dec 06:25

'66 - މޮރޮކޯ އިން ދެ ބަދަލެއް. އެން ނެސީރީ އާއި ބޫފާލްގެ ބަދަލުގައި އަބްދުއްރައްޒާގް ހަމްދުﷲ އާއި ޒަކަރިއާ އަބޫކްލާލް.

15 Dec 06:24

'65 - ފްރާންސް އިން ބަދަލެއް. ޖިރޫގެ ބަދަލުގައި ކުޅެން ނުކުތީ މާކަސް ތުރާމް.

15 Dec 06:16

'57 - މޮރޮކޯގެ އިތުރު ނުރައްކަލެއް. އޫނާހީ ދިން ބޯޅަ، ފްރާންސްގެ ޕެނަލްޓީ އޭރިއާ ތެރޭ ހުސްކޮށް ހުރި ހަކީމީއަށް ރަނގަޅަށް ކޮންޓްރޯލު ކުރެވިފައެއް ނުވޭ.

15 Dec 06:14

'52 - މޮރޮކޯގެ ނުރައްކަލެއް. ޔަހިއާ އަތިޔަތަﷲ ދިން ބޯޅަ، ގޯލު ކުރިމަތިން ޔޫސުފް އެން ނަސީރީއަށް ލިބުމުގެ ކުރިން ފްރާންސް ޑިފެންޑަރު އިބްރާހިމާ ކޮނާޓޭ ވަނީ ދިފާއުކޮށްފައި.

15 Dec 06:13

ދެވަނަ ހާފަށް މޮރޮކޯ އިން ނުކުތީ ބަދަލަކާއެކު. މަޒްރާއީގެ ބަދަލުގައި ކުޅެން ނުކުތީ ޔަހިއާ އަތިޔަތަﷲ.

15 Dec 06:09

މެޗުގެ ދެވަނަ ހާފުގެ ކުޅުން ފަށައިފި.

15 Dec 05:52

ފުރަތަމަ ހާފުގެ އުސްއަލިތައް:

މޮރޮކޯއިން ފެށީ އެޓީމުގެ ސްޓައިލްގައި ފަހަތަށް ސަމާލުކަން ދީގެން
ފުރަތަމަ ހާފު ވަރުގަދަކޮށް ފެށީ ފްރާންސުން، އެޓޭކްތައް ފެނުނީވެސް އެޓީމުގެ ފަރާތުން
ފަސްވަނަ މިނެޓުގައި ހެނާންޑޭޒްގެ ގޯލުން ފްރާންސް ލީޑު ނެގި
އޭގެ ފަހުން ޖިރޫގެ ދެ ހަމަލާއެއް ފެނުނު، އޭނާގެ ފުރަތަމަ ހަމަލާ ބޭރަށް ދިޔައިރު، އަނެއް ހަމަލާ އަމާޒުވީ ދަނޑިއަށް
މެޗުގެ ކުރީކޮޅުގައި މޮރޮކޯ ކެޕްޓަން ސައިސްއަށް އަނިޔާވެ ބާލަން ޖެހުނު
މޮރޮކޯގެ ނުރައްކާވެސް ފުރަތަމަ ހާފްގައި ފެނުނު، އުނާހީ ފޮނުވާލި ހަމަލާ މަތަކުރީ ލޮރިސް
ހާފު ނިމެން ދަނިކޮށް މޮރޮކޯ ޑިފެންޑަރު ޔަމީގް އޯވަހެޑެއްގައި ޖެހި ބޯޅަ އަމާޒުވީ ދަނޑިއަށް

15 Dec 05:48

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން ފްރާންސް ކުރީގައި އޮވެގެން.

15 Dec 05:46

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

15 Dec 05:45

'44 - މޮރޮކޯގެ ނުރައްކާތެރި ހަމަލާއެއް. ކޯނަރެއްގެ ތެރެއިން ލިބުނު ބޯޅައަކުން އޯވަހެޑަކުން ޖަވާދް އެލް ޔަމީގް ފޮނުވާލި ހަމަލާ އަމާޒުވީ ފްރާންސް ގޯލުގެ އަރިމަތީ ދަނޑިއަށް.

15 Dec 05:42

15 Dec 05:40

'40 - ފްރާންސްގެ ނުރައްކަލެއް. ގްރީޒްމަން ނަގައިދިން ކޯނަރަކުން ޕެނަލްޓީ އޭރިއާ ތެރެއިން ރަފައެލް ވަރާން ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

15 Dec 05:38

'36 - ފްރާންސަށް ރަނގަޅު ދެ ފުރުސަތެއް. އޯރެލިއެން ޗުއަމެނީ ދިން ބޯޅައަކުން ޕެނަލްޓީ އޭރިއާ ތެރެއިން ކިލިއާން އެމްބާޕޭ ފޮނުވާލި ހަމަލާ، ގޯލަށް ވަންނަން ދަނިކޮށް، މޮރޮކޯ ޑިފެންޑަރު ޖަވާދް އެލް ޔާމިގް ވަނީ ދިފާއުކޮށްފައި. ރީބައުންސް ބޯޅަ ލިބުމާއެކު ޗުއަމެނީ ދިން ބޯޅައިން ޕެނަލްޓީ އޭރިއާ ތެރެއިން އޮލިވިއާ ޖިރޫ ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

15 Dec 05:33

'32 - އެލް ޔާމިގް ދިން ބޯޅަ، ޕެނަލްޓީ އޭރިއާ ތެރެއިން މޮރޮކޯ ފޯވަޑް އެން ނަސީރީއަށް ލިބުމުގެ ކުރިން ފްރާންސް ޑިފެންޑަރު އިބްރާހިމާ ކޮނާޓޭ ދިފާއުކޮށްފި.

15 Dec 05:27

'27 - ތިއޯ ހެނާންޑޭޒަށް ކުރި ފައުލަކާ ގުޅިގެން މޮރޮކޯގެ ސޮފިއާން ބޫފާލްއަށް ރީނދޫ ކާޑެއް.

15 Dec 05:21

'21 - މޮރޮކޯ އިން ބަދަލެއް. އަނިޔާއަކާ ގުޅިގެން ކެޕްޓަން ރޯމަން ސައިސްގެ ބަދަލުގައި ކުޅެން ނުކުތީ ސަލީމް އަމާލާ.

15 Dec 05:18

'18 - ފްރާންސްގެ ނުރައްކަލެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، އޮލިވިއާ ޖިރޫ ފޮނުވާލި ބާރު ހަމަލާ އަމާޒުވީ މޮރޮކޯ ގޯލުގެ އަރިމަތީ ދަނޑިއަށް.

15 Dec 05:17

'17 - މޮރޮކޯއަށް ރަނގަޅު ފުރުސަތެއް. ޕެނަލްޓީ އޭރިއާ ތެރޭ ހުސްކޮށް ހުރެ، ހަކީމް ޒިޔެޗް ފޮނުވާލި ހަމަލާ، ފްރާންސްގެ ގޯލާ އަމާޒުވެފައެއް ނުވޭ.

15 Dec 05:11

'10 - މޮރޮކޯގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން އަޒެއްދީން އޫނާހީ ފޮނުވާލި ހަމަލާ، ގޯލުގެ ތިރީ ކަނަކަށް އަމާޒުވާން ދަނިކޮށް، ފްރާންސް ކީޕަރު ހޫގޯ ލޮރިސް ވަނީ ހުޝިޔާރުކަމާއެކު މަތަކޮށްފައި.

15 Dec 05:06

'5 - ފްރާންސުން ގޯލެއް ޖަހައި ލީޑު ހޯދައިފި. އެންޓޮއިން ގްރީޒްމަން ދިން ބޯޅައަކުން ކިލިއާން އެމްބާޕޭ ފޮނުވާލި ދެ ހަމަލާއެއް ބްލޮކްވުމާއެކު ލިބުނު ރީބައުންސް ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަަމަލާއަކުން ފްރާންސަށް އެ ގޯލު ކާމިޔާބުކޮށްދިނީ ތިއޯ ހެނާންޑޭޒް. ޕެނަލްޓީ އޭރިއާ ތެރެއިން ހެނާންޑޭޒަށް ބޯޅަ ލިބުނު އިރު، އޭނާ ހުރީ ވަރަށް ހުސްކޮށް.

15 Dec 05:00

މެޗުގެ ކުޅުން ފަށައިފި، ކިކްއޯފް ކުރީ މޮރޮކޯ އިން.

ގަތަރު ވޯލްޑް ކަޕް 2022ގެ ސެމީ ފައިނަލުގައި ފްރާންސާއި މޮރޮކޯ ވާދަކުރާ މެޗުގެ ލައިވް ބްލޮގަށް "ވަން" ގެ ކިޔުންތެރިންނަށް މަރުހަބާ!

ދެޓީމުން ސެމީއަށް ކުރި ދަތުރު

ފްރާންސް

އެންމެފަހުގެ ޗެމްޕިއަން ފްރާންސް ގްރޫޕް ސްޓޭޖުގައި އޮސްޓްރޭލިއާއާއި ޑެންމާކް ބަލިކުރި
އެޓީމުން ބަދަލުތަކާއެކު ނުކުތް މެޗުގައި ޓިއުނީޝިއާ ބަލިކުރި
ގަދަ 16 ގައި ފްރާންސް ވަނީ ޕޮލެންޑް ބަލިކޮށްފައި
ފްރާންސަށް މުބާރާތުގައި އެންމެ މޮޅަށް ކުޅެމުން ދަނީ އެމްބާޕޭ
އޭނާ ވަނީ މިހާތަނަށް ފަސް ގޯލް މި ވޯލްޑް ކަޕްގައި ޖަހައިފައި
ފްރާންސް ސެމީއަށް ދިޔައީ ކުއާޓާގައި އިންގްލެންޑް ބަލިކޮށްފައި
އެ މެޗުން ފްރާންސް މޮޅުވީ 2-1 އިން
ފްރާންސްއަކީ އެންމެފަހުގެ ދުނިޔޭގެ ޗެމްޕިއަނުން

މޮރޮކޯ

މޮރޮކޯއަކީ މިފަހަރު ވޯލްޑް ކަޕްގައި ގިނަ ބަޔަކު ހައިރާން ކޮށްލި ޓީމެއް
ގްރޫޕް ސްޓޭޖު ފުރަތަމަ މެޗުގައި ކްރޮއޭޝިއާއާ އެއްވަރުކުރި
އަދި ބެލްޖިއަމް 2-0 އިން ބަލިކޮށް، މޮރޮކޯ ގަދަ 16 ޔަގީން ކުރީ ކެނެޑާ ބަލިކޮށްފައި
އެ ގްރޫޕްގެ އެއްވަނަ ޓީމުގެ ގޮތުގައި
މޮރޮކޯ ގަދަ 16 ގައި ޕެނަލްޓީގައި ސްޕެއިން ކަޓުވާލި
މޮރޮކޯގެ ތާރީހުގައި ފުރަތަމަ ވޯލްޑް ކަޕް ކުއާޓާ ފައިނަލްގައި ޕޯޗުގަލް ބަލިކޮށް ސެމީއަށް ދިޔަ
މޮރޮކޯއަކީ ވޯލްޑް ކަޕްގެ ސެމީ ފައިނަލްގައި ކުޅޭ އެފްރިކާގެ ފުރަތަމަ ގައުމު

ކޯޗުންގެ ބަސް

މޮރޮކޯ - ވަލީދު ރަކްރާކީ

"އަހަރެމެން މިކުޅެނީ ދުނިޔޭގެ ޗެމްޕިއަނުންނާ ދެކޮޅަށް. ދުނިޔޭގެ ފެންވަރުގެ އެތައް ކުޅުންތެރިންނަކާ ދެކޮޅަށް. އަދި އެހާމެ މޮޅު ކޯޗަކާވެސް ދެކޮޅަށް. އެކަމަކު ފުދިގެން ތިބެ މެޗަށް ނުކުންނަ ވިސްނުމެއް ނުގެންގުޅޭނަން. ބޭނުންވަނީ ހިތްވަރު ދައްކައި ފްރާންސްވެސް މާޔޫސްކޮށްލަން. ވޯލްޑް ކަޕް ފައިނަލަށް ދާން ނުވިސްނަންވީ ކީއްވެ؟ އެ ހުވަފެން ދެކުމަކުން ގެއްލޭނެ އެއްޗެއް ނެތް. ޓީމުން އެކަމަށް ބޭނުންވެފަ މިއޮތީ. އެކަމަކުވެސް މޮރޮކޯއަކީ ފެވަރިޓުން ނޫންކަން އަހަންނަށް އެނގޭ. އެހެންވިޔަސް ވަރަށް ކޮންފިޑެންސާއެކު މިތިބީ. އަހަރެމެން ބޭނުންވަނީ ފައިނަލް، އެއީ އެފްރިކާއާއި އަރަބި ދުނިޔޭގެވެސް ހައްގުގައި،"

ފްރާންސް - ޑިޑިއޭ ޑިޝޭމްޕްސް

"މޮރޮކޯގެ ޑިފެންސަކީ ވޯލްޑް ކަޕްގެ އެންމެ ވަރުގަދަ ޑިފެންސް. އަހަރެމެންނަށް ގޯލެއް ޖެހުމަށް މޮރޮކޯގެ ޑިފެންސް ފޫއަޅުވައިލެވެނޭ ގޮތެއް ހޯދަން ޖެހޭނެ. އެކަމަކު ސަމާލުކަން ދޭން އޮތީ މޮރޮކޯގެ ޑިފެންސަށް އެކަންޏެއް ނޫން. އެޓީމު އެހެން ހުރިހާ ގޮތަކުންވެސް ވަރަށް ވަރުގަދަ. އެހެން ނޫންނަމަ ސެމީއަކަށް ނާންނާނެ. އަހަރެންގެ ސްކޮޑުގެ ނަތީޖާއަކީއަކީވެސް ހައިރާންވާން ޖެހޭ ކަމެއް ނޫން. މި ޓީމުގެ ތަފާތު އަހަންނަށް ފެނިފައި އޮތީ، ޓީމު އެކުވެ އުޅޭ އުޅުން. ބައެއް ކުޅުންތެރިންނަކީ އެންމެ ތަޖުރިބާކާރު ކުޅުންތެރިން ނޫން ނަމަވެސް، ތަޖުރިބާކާރު ކުޅުންތެރިންނާއެކު ޓީމު އޮތީ ތަފާތު ރޫހެއްގައި. ނަތީޖާއިން ދައްކުވައިދެނީ ޓީމުގެ އެކުވުން،"