ވޯލްޑް ކަޕް: މޮރޮކޯ 1-0 ޕޯޗުގަލް (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. ޕޯޗުގަލްގެ މައްޗަށް މޮރޮކޯ އިން ކުރި ހޯދީ 1-0 ގެ ނަތީޖާއަކުން. ވޯލްޑް ކަޕްގެ ތާރީހުގައި ސެމީ ފައިނަލަށް ދަތުރުކުރި ފުރަތަމަ ޓީމަކަށް މޮރޮކޯ. ރޮނާލްޑޯ އާއި ޕޯޗުގަލްގެ ވޯލްޑް ކަޕް ދަތުރު ނިމުމަކަށް.

'90+7 - ޕޯޗުގަލަށް ހުސް ފުރުސަތެއް. ރަފައެލް ލިއާއޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، ޕެޕޭ ބޮލުން ފޮނުވާލި މޮރޮކޯގެ ގޯލާ އަމާޒުވެފައެއް ނުވޭ.

'90+6 - މޮރޮކޯއަށް ހުސް ފުރުސަތެއް. ހުސްކޮށް ހުރެ ޕެނަލްޓީ އޭރިއާ ތެރެއަށް ވަނުމަށްފަހު، އަބޫކްލާލް ފޮނުވާލި ހަމަލާ، ޕޯޗުގަލުގެ ކީޕަރު ޑިއޯގޯ ކޮސްޓާ ވަނީ މަތަކޮށްފައި.

'90+3 - މޮރޮކޯގެ ޗެޑީރާއަށް ދެވަނަ ރީނދޫ ކާޑަކާއެކު ރަތް ކާޑެއް ދައްކައިފި. އޭނާއަށް ދެވަނަ ރީނދޫ ކާޑެއް ދައްކާފައި މިވަނީ ފުރަތަމަ ރީނދޫ ކާޑު ދެއްކިތާ ދެ މިނެޓުގެ ތެރޭގައި.

ދެވަނަ ހާފުގެ އިތުރު ވަގުތުގެ ގޮތުގައި އަށް މިނެޓުގެ ކުޅުން ދައްކައިފި.

'90 - ޕޯޗުގަލަށް ރަނގަޅު ފުރުސަތެއް. ޕެނަލްޓީ އޭރިއާ ބޭރުން ރޮނާލްޑޯ ފޮނުވާލި ހަމަލާ، މޮރޮކޯގެ ކީޕަރު ބޯނޯ ވަނީ މަތަކޮށްފައި.

'83 - ޕޯޗުގަލްގެ ނުރައްކާތެރި ހަމަލާއެއް. ރޮނާލްޑޯ ދިން ބޯޅައަކުން ޕެނަލްޓީ އޭރިއާ ބޭރުން ޖޮއާ ފީލިކްސް ފޮނުވާލި ހަމަލާ، މޮރޮކޯ ގޯލުގެ މަތީ ކަނަކަށް އަމާޒުވާން ދަނިކޮށް ކީޕަރު ބޯނޯ ވަނީ ހުޝިޔާރުކަމާއެކު މަތަކޮށްފައި.

'82 - މޮރޮކޯ އިން ދެ ބަދަލެއް. ބޫފާލް އާއި ޒިޔެޗްގެ ބަދަލުގައި ކުޅެން ނުކުތީ ޒަކަރިއާ އަބޫކްލާލް އާއި ޔަހްޔާ ޖަބްރޭން.

'79 - ޕޯޗުގަލުން ބަދަލެއް. ޑިއޯގޯ ޑަލޮޓްގެ ބަދަލުގައި ކުޅެން ނުކުތީ ރިކާޑޯ ހޯޓާ.

'70 - ރަފައެލް ލެއާއޯއަށް ކުރި ފައުލަކާ ގުޅިގެން މޮރޮކޯގެ އަޝްރަފް ޑާރީއަށް ރީނދޫ ކާޑެއް.

'69 - ޕޯޗުގަލުން ދެ ބަދަލެއް. ގޮންސާލޯ ރާމޯސް އާއި އޮޓާވިއޯގެ ބަދަލުގައި ކުޅެން ނުކުތީ ރަފައެލް ލެއާއޯ އާއި ވިޓީނީއާ.

'65 - މޮރޮކޯ އިން ދެ ބަދަލެއް. އަމާލާ އާއި އެން ނެސީރީގެ ބަދަލުގައި ކުޅެން ނުކުތީ ވާލިދް ޗެޑީރާ އާއި ބަދްރު ބެނޫން.

'64 - ޕޯޗުގަލްގެ އިތުރު ނުރައްކަލެއް. ބެނާޑޯ ސިލްވާ ދިން ބޯޅައަކުން ޕެނަލްޓީ އޭރިއާ ބޭރުން ބްރޫނޯ ފެނާންޑޭޒް ފޮނުވާލި ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށް.

'58 - ޕޯޗުގަލްގެ ނުރައްކަލެއް. އޮޓާވިއޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ގޮންސާލޯ ރާމޯސް ބޮލުން ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

'57 - މޮރޮކޯ އިން ބަދަލެއް. އަނިޔާއަކާ ގުޅިގެން ކެޕްޓަން ރޯމަން ސައިސްގެ ބަދަލުގައި ކުޅެން ނުކުތީ އަޝްރަފް ޑާރީ.

'56 - މޮރޮކޯގެ ހަމަލާއެއް. އެން ނެސީރީ ދިން ބޯޅައަކުން ޕެނަލްޓީ އޭރިއާ ބޭރުން އަޒެއްދިން އޫނާހީ ފޮނުވާލި ހަމަލާ، ޕޯޗުގަލްގެ ގޯލާ އަމާޒުވެފައެއް ނުވޭ.

'52 - ޕޯޗުގަލުން ދެ ބަދަލެއް. ގެރޭރޯގެ ބަދަލުގައި ޖޮއާ ކަންސެލޯ، އަދި ރުބެން ނެވޭސްގެ ބަދަލުގައި ކުޅެން ނުކުތީ ކްރިސްޓިއާނޯ ރޮނާލްޑޯ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން މޮރޮކޯ ކުރީގައި އޮވެގެން.

'45+3 - މޮރޮކޯއަށް ހުސް ފުރުސަތެއް. ޕެނަލްޓީ އޭރިއާ ތެރެއަށް ވަނުމަށްފަހު އަތިއަތަﷲ ފޮނުވާލި ބާރު ހަމަލާ، ޕޯޗުގަލްގެ ގޯލާ އަމާޒުވެފައެއް ނުވޭ.

'44 - ޕޯޗުގަލްގެ ނުރައްކާތެރި ހަމަލާއެއް. ޕެނަލްޓީ އޭރިއާގެ އަރިމަތިން ބްރޫނޯ ފެނާންޑޭޒް ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށް.

'42 - މޮރޮކޯ އިން ގޯލެއް ޖަހައި ލީޑު ހޯދައިފި. ޔަހްޔާ އަތިއަތަﷲ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން މޮރޮކޯއަށް އެ ގޯލު ޔޫސުފް އެން ނެސީރީ. އެ ގޯލު ޖެހި އިރު، ޕޯޗުގަލް ކީޕަރު ޑިއޯގޯ ކޮސްޓާގެ ގޯސް ފާހަގަކުރެވުނު.

'39 - ޕޯޗުގަލުން ހަމަލާއެއް. ގެރޭރޯ ނަގައިދިން ހުރަހަކުން ޕެނަލްޓީ އޭރިއާ ތެރެއިން ފީލިކްސް ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

'34 - މޮރޮކޯއަށް ރަނގަޅު ފުރުސަތެއް. ޔަހްޔާ އަތިއަތަﷲ ދިން ބޯޅައަކުން ޕެނަލްޓީ އޭރިއާ ތެރެއިން ސެލީމް އާމަލާ ފޮނުވާލި ހަމަލާ ދިޔައީ ޕޯޗުގަލް ގޯލުގެ ހުރަސް ދަނޑި މަތިން ބޭރަށް.

'31 - ޕޯޗުގަލްގެ ނުރައްކަލެއް. ޕެނަލްޓީ އޭރިއާ ބޭރުން ޖޮއާ ފީލިކްސް ފޮނުވާލި ބާރު ހަމަލާ، މޮރޮކޯގެ ޑިފެންޑަރު ޖަވާދް އެލް ޔާމިގް ވަނީ ބްލޮކްކޮށްފައި.

'26 - މޮރޮކޯގެ ހަމަލާއެއް. ޒިޔެޗް ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، އެން ނެސީރީ ބޮލުން ފޮނުވާލި ހަމަލާ، ޕޯޗުގަލްގެ ގޯލާ އަމާޒުވެފައެއް ނުވޭ.

'18 - މޮރޮކޯގެ ހަމަލާއެއް. ޕެނަލްޓީ އޭރިއާ ބޭރުން ހަކީމް ޒިިޔެޗް ފޮނުވާލި ހަމަލާ، ޕޯޗުގަލްގެ ގޯލާ އަމާޒުވެފައެއް ނުވޭ.

'13 - ޕޯޗުގަލްގެ ހަމަލާއެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ރަފައެލް ގެރޭރޯ ފޮނުވާލި ބާރު ހަމަލާ، މޮރޮކޯގެ ޑިފެންޑަރުން ވަނީ ބްލޮކްކޮށްފައި.

މިއަދުގެ މެޗު ވެސް ޕޯޗުގަލް ކެޕްޓަން ކްރިސްޓިއާނޯ ރޮނާލްޑޯ ފެށީ ބެންޗުން. އޭނާގެ ބަދަލުގައި ފުރަތަމަ 11 އިން ފެންނަނީ ގަދަ 16 ގައި ސްވިޒަލެންޑާ ދެކޮޅަށް ކުޅުނު މެޗުގައި ހެޓްރިކެއް ފުރިހަމަކުރި ގޮންސާލޯ ރާމޯސް.

'7 - މޮރޮކޯގެ ނުރައްކަލެއް. ހަކީމް ޒިޔެޗް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ ޔޫސުފް އެން ނަސީރީ ބޮލުން ފޮނުވާލި ހަމަލާ ދިޔައީ ޕޯޗުގަލް ގޯލުގެ ހުރަސް ދަނޑިމަތިން ބޭރަށް.

'5 - ޕޯޗުގަލަށް ހުސް ފުރުސަތެއް. ބްރޫނޯ ފެނާންޑޭޒް ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، ޖޮއާ ފީލިކްސް ބޮލުން ފޮނުވާލި ހަމަލާ، މޮރޮކޯ ކީޕަރު ޔަސީން ބޯނޯ ވަނީ ހުޝިޔާރުކަމާއެކު މަތަކޮށްފައި.

މެޗުގެ ކުޅުން ފަށައިފި. ކިކްއޯފް ކުރީ ޕޯޗުގަލުން.