ވޯލްޑް ކަޕް: ނެދަލޭންޑްސް 2-2 އާޖެންޓީނާ (3-4)

މެޗުގެ އުސްއަލިތައް:

ޕެނަލްޓީގައި 4-3 އިން ނެދަލެންޑްސް ބަލިކޮށް، އާޖެންޓީނާ ސެމީއަށް.

އާޖެންޓީނާގެ ލައުޓާރޯ މާޓިނޭޒްގެ ޕެނަލްޓީ ކާމިޔާބުކޮށްފި.

ނެދަލެންޑްސްގެ ލޫކް ޑި ޔޮންގްގެ ޕެނަލްޓީ ކާމިޔާބުކޮށްފި.

އާޖެންޓީނާގެ އެންޒޯ ފެނާންޑޭޒްގެ ޕެނަލްޓީ ބޭރަށް.

ނެދަލެންޑްސްގެ ވެގްހޯސްޓްގެ ޕެނަލްޓީ ކާމިޔާބުކޮށްފި.

އާޖެންޓީނާގެ މޮންޓިއާލްގެ ޕެނަލްޓީ ކާމިޔާބުކޮށްފި.

ނެދަލެންޑްސްގެ ކޫޕްމައިނާސްގެ ޕެނަލްޓީ ކާމިޔާބުކޮށްފި.

އާޖެންޓީނާގެ ޕެރޭޑޭސްގެ ޕެނަލްޓީ ކާމިޔާބުކޮށްފި.

ނެދަލެންޑްސްގެ ބާގްހައުސް ފޮނުވާލި ޕެނަލްޓީ ވެސް އާޖެންޓީނާ ކީޕަރު އެމިލިއާނޯ މާޓިނޭޒް މަތަކޮށްފި.

އާޖެންޓީނާ ކެޕްޓަން ލިއޮނެލް މެސީގެ ޕެނަލްޓީ ކާމިޔާބުކޮށްފި.

ނެދަލެންޑްސް ކެޕްޓަން ވާޖިލް ވެން ޑައިކްގެ ޕެނަލްޓީ، އާޖެންޓީނާގެ ކީޕަރު އެމިލިއާނޯ މާޓިނޭޒް މަތަކޮށްފި.

އިތުރު ވަގުތުގެ ފަހު 15 މިނެޓުގެ ކުޅުން ވެސް ނިންމާލައިފި. ދެ ޓީމު 2-2 އިން އެއްވަރުވެފައިވުމުން، ނަތީޖާ ނެރުމަށް ދެން ދާނީ ޕެނަލްޓީ ޝޫޓްއައުޓަށް.

'120+1 - އާޖެންޓީނާގެ އެންޒޯ ފެނާންޑޭޒްގެ އިތުރު ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން އޭނާ ފޮނުވާލި ބާރު ހަމަލާ އަމާޒުވީ ނެދަލެންޑްސް ގޯލުގެ އަރިމަތީ ދަނޑިއަށް.

'120 - އާޖެންޓީނާގެ އިތުރު ހަމަލާއެެއް. ޕެނަލްޓީ އޭރިއާ ބޭރުން މެސީ ފޮނުވާލި ހަމަލާ، އާޖެންޓީނާގެ ޑިފެންޑަރެއް ގައިގައި ޖެހި ވަނީ ބޭރުވެފައި.

'119 - އާޖެންޓީނާއަށް ރަނގަޅު ފުރުސަތެއް. ޕެނަލްޓީ އޭރިއާ ބޭރުން ލައުޓާރޯ މާޓިނޭޒް ފޮނުވާލި ހަމަލާ، ނެދަލެންޑްސްގެ ކީޕަރު ނޮޕާޓް ވަނީ މަތަކޮށްފައި.

'117 - އާޖެންޓީނާއަށް އިތުރު ފުރުސަތެއް. ޑި މާރިއާ ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ، ޖާމަން ޕެޒެލާ ބޮލުން ފޮނުވާލި ހަމަލާ، ނެދަލެންޑްސް ގޯލާ އަމާޒުވެފައެއް ނުވޭ.

'115 - އާޖެންޓީނާގެ އިތުރު ނުރައްކަލެއް. ޕެނަލްޓީ އޭރިއާ ބޭރުން އެންޒޯ ފެނާންޑޭޒް ފޮނުވާލި ހަމަލާ، ވެގްހޯސްޓްގެ ފައިގައި ޖެހި، ދިޔައީ ނެދަލެންޑްސް ގޯލުގެ ހުރަސްދަނޑި މަތިން ބޭރަށް.

'114 - އާޖެންޓީނާއަށް ހުސް ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން އެންޒޯ ފެނާންޑޭޒް ފޮނުވާލި ހަމަލާ، ނެދަލެންޑްސް ކެޕްޓަން ވަނީ ދިފާއުކޮށްފައި.

'113 - ނެދަލެންޑްސް އިން ވެސް ބަދަލެއް. ގަކްޕޯގެ ބަދަލުގައި ކުޅެން ނުކުތީ ލޭންގް.

'111 - އާޖެންޓީނާ އިން ބަދަލެއް. ލިސާންޑްރޯ މާޓިނޭޒްގެ ބަދަލުގައި ކުޅެން ނުކުތީ އެންހެލް ޑި މަރީއާ.

'110 - އާޖެންޓީނާގެ ހަމަލާއެއް. ޕެނަލްޓީ އޭރިއާ ބޭރުން މެސީ ފޮނުވާލި ހަމަލާ، ނެދަލެންޑްސްގެ ގޯލާ އަމާޒުވެފައެއް ނުވޭ.

އިތުރު ވަގުތުގެ ފަހު 15 މިނެޓުގެ ކުޅުން ފަށައިފި.

އާޖެންޓީނާ އިން ބަދަލެއް. މޮލީނާގެ ބަދަލުގައި ކުޅެން ނުކުތީ މޮންޓިއާލް.

އިތުރު ވަގުތުގެ ފުރަތަމަ 15 މިނެޓުގެ ކުޅުން ނިންމާލައިފި.

'104 - މެސީ ނަގައިދިން ހިލޭ ޖެހުން، ނެދަލެންޑްސްގެ ޕެނަލްޓީ އޭރިއާ ތެރެއިން އޮޓަމެންޑީއަށް ލިބޭ ގޮތެއް ނުވި.

އިތުރު ވަގުތުގެ ފުރަތަމަ 15 މިނެޓުގެ ކުޅުން ފަށައިފި.

މެޗުގެ ދެވަނަ ހާފުގެ ކުޅުން ނިންމާލައިފި. ދެ ޓީމު ވެސް 2-2 ގެ ނަތީޖާއަކުން އެއްވަރުވެފައިވުމުން ދެން ކުޅޭނީ އިތުރު ވަގުތުގެ ދެ ހާފް.

'90+11 - ނެދަލެންޑްސް އިން ގޯލެއް ޖަހައި ނަތީޖާ ހަމަހަމަކޮށްފި. ހިލޭ ޖެހުމުން ކޫޕްމައިނާސް ޖައްސާލި ބޯޅައަކުން، ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ނެދަލެންޑްސްއަށް އެ ގޯލު ކާމިޔާބުކޮށްދިނީ އެޓީމުގެ ފުރަތަމަ ގޯލު ވެސް ކާމިޔާބުކޮށްދިން ވެގްހޯސްޓް.

ދެވަނަ ހާފުގެ އިތުރު ވަގުތުގެ ގޮތުގައި ދިހަ މިނެޓުގެ ކުޅުން ދައްކައިފި.

'87 - މެސީއަށް ކުރި ފައުލަކާ ގުޅިގެން ނެދަލެންޑްސްގެ ބާގްހައުސްއަށް ރީނދޫ ކާޑެއް.

'85 - ނެދަލެންޑްސްގެ ނުރައްކާތެރި ހަމަލާއެއް. ލޫކް ޑި ޔޮންގް ދިން ބޯޅައަކުން ޕެނަލްޓީ އޭރިއާ ތެރެއިން ބާގްހައުސް ފޮނުވާލި ބާރު ހަމަލާ، އާޖެންޓީނާގެ ޑިފެންޑަރުން ވަނީ ބްލޮކްކޮށްފައި.

'83 - ނެދަލެންޑްސް އިން ގޯލެއް ޖަހައި ފަރަގު ކުޑަކޮށްފި. ސްޓީވަން ބާގްހައުސް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން ނެދަލެންޑްސްއަށް އެ ގޯލު ކާމިޔާބުކޮށްދިނީ ވޫޓް ވެގްހޯސްޓް.

'81 - އާޖެންޓީނާ އިން އިތުރު ބަދަލެއް. އަލްވަރޭޒްގެ ބަދަލުގައި ކުޅެން ނުކުތީ ލައިޓާރޯ މާޓިނޭޒް.

'78 - ނެދަލެންޑްސް އިން ވެސް ބަދަލެއް. ޑިޕާއީގެ ބަދަލުގައި ވޫޓް ވެގްހޯސްޓް.

'78 - އާޖެންޓީނާ އިން ދެ ބަދަލެއް. އަކޫނާ އާއި ރޮމޭރޯގެ ބަދަލުގައި ކުޅެން ނުކުތީ ޖާމަން ޕެޒެލާ އާއި ނިކޮލަސް ޓަގްލިއަފީކޯ.

'73 - ޕެނަލްޓީ ކާމިޔާބުކޮށް، އާޖެންޓީނާއަށް ލީޑު ފުޅާކޮށްދިނީ ކެޕްޓަން ލިއޮނެލް މެސީ. އެ ގޯލާއެކު މެސީ މިވަނީ ވޯލްޑް ކަޕްގައި އާޖެންޓީނާއަށް އެންމެ ގިނަ ގޯލު ކާމިޔާބުކުރި ގެބްރިއަލް ބަޓިސްޓޫޓާގެ ރެކޯޑާ އަރައި ހަމަކޮށްފައި. މެސީ އަދި ބަޓިސްޓޫޓާ ވެސް ވަނީ ވޯލްޑް ކަޕް ދިހަ ގޯލު ކާމިޔާބުކޮށްފައި.

'71 - ޕެނަލްޓީ އޭރިއާ ތެރެއިން މާކޮސް އަކޫނާއަށް ނެދަލެންޑްސްގެ ޑެންޒެލް ޑަމްފްރީޒް ކުރި ފައުލަކާ ގުޅިގެން އާޖެންޓީނާއަށް ޕެނަލްޓީއެއް.

'66 - އާޖެންޓީނާ އިން ބަދަލެއް. ޑި ޕޯލްގެ ބަދަލުގައި ކުޅެން ނުކުތީ ލިއާންޑްރޯ ޕަރޭޑޭސް.

'64 - ނެދަލެންޑްސް އިން ބަދަލެއް. ބްލިންޑްގެ ބަދަލުގައި ކުޅެން ނުކުތީ ލޫކް ޑި ޔޮންގް.

'63 - މެސީ ފޮނުވާލި ހިލޭ ޖެހުން ނުރައްކާ. އޭނާގެ ހިލޭ ޖެހުން، ނެދަލެންޑްސް ގޯލުގެ ހުރަސްދަނޑި ކައިރިން ބޭރަށް.

'61 - މެސީއަށް ވެން ޑައިކް ކުރި ފައުލަކާ ގުޅިގެން ނުރައްކާ ހިސާބަކުން އާޖެންޓީނާއަށް ހިލޭ ޖެހުމެއް.

'51 - ޑި ޕޯލް ދިން ބޯޅަ، ޕެނަލްޓީ އޭރިއާ ތެރެއިން އާޖެންޓީނާ ކެޕްޓަން ލިއޮނެލް މެސީއަށް ލިބުމުގެ ކުރިން ނެދަލެންޑްސްގެ ކީޕަރު ނޮޕާޓް ކުރިއަށް ނުކުމެ ބޯޅަ ހޯދައިފި.

ނެދަލެންޑްސް އިން ދެވަނަ ހާފަށް ނުކުތީ ދެ ބަދަލަކާއެކު. ބާގްވައިންގެ ބަަދަލުގައި ސްޓީވަން ބާގްހައުސް، އަދި ޑެ ރޫންގެ ބަދަލުގައި ކުޅެން ނުކުތީ ޓެއުން ކޫޕްމައިނާސް.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން އާޖެންޓީނާ ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.

'45 - ބޯޅައިގައި އަތްލުމުން އާޖެންޓީނާ ޑިފެންޑަރު ކްރިސްޓިއަން ރޮމޭރޯއަށް ރީނދޫ ކާޑެއް.

'44 - ޑަމްފްރީސްއަށް ކުރި ފައުލަކާ ގުޅިގެން އާޖެންޓީނާގެ މޯކޮސް އަކޫނާއަށް ރީނދޫ ކާޑެއް. އާޖެންޓީނާ، ސެމީ ފައިނަލަށް ދަތުރުކޮށްފި ނަމަ، އަކޫނާއަށް އެ މެޗުގައި ނުކުޅެވޭނެ.

'35 - އާޖެންޓީނާ އިން ގޯލެއް ޖަހައި ލީޑު ހޯދައިފި. ކެޕްޓަން ލިއޮނެލް މެސީ ދިން ރީތި ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އާޖެންޓީނާއަށް އެ ގޯލު ކާމިޔާބުކޮށްދިނީ ނަހުއެލް މޮލީނާ. އޭނާ ފޮނުވާލި ހަމަލާ އަމާޒުވީ ނެދަލެންޑްސް ގޯލުގެ ތިރީ ކަނަކަށް.

'33 - އާޖެންޓީނާގެ ހަމަލާއެއް. މެކް އަލިސްޓާ ދިން ބޯޅައަކުން ޑި ޕޯލް ފޮނުވާލި ހަމަލާގައި ބާރެއް ނެތް، އެ ބޯޅަ ނެދަލެންޑްސްގެ ކީޕަރު ނޮޕާޓް ވަނީ ފަސޭހަކަމާއެކު ހޯދާފައި.

'24 - ނެދަލެންޑްސްގެ ހަމަލާއެއް. މެމްފިސް ޑިފާއީ ދިން ބޯޅައަކުން، ޕެނަލްޓީ އޭރިއާ ތެރެއިން ސްޓީވަން ބާގްވައިން ފޮނުވާލި ހަމަލާ، އާޖެންޓީނާގެ ގޯލާ އަމާޒުވެފައެއް ނުވޭ.

'22 - އާޖެންޓީނާގެ ހަމަލާއެއް. ޕެނަލްޓީ އޭރިއާ ބޭރުން ކެޕްޓަން ލިއޮނެލް މެސީ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށް.

'16 - ޑެންޒެލް ޑަމްފްރީސް ނަގައިދިން ހުރަސް، އާޖެންޓީނާގެ ޕެނަލްޓީ އޭރިއާ ތެރެއިން ޑެލީ ބްލިންޑްގެ ބޮލުގައި ލައްވައެއް ނުލި.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ދެ ޓީމުގެ ފަރާތުން ވެސް ފެންނަނީ ދާދި ހަމަހަމަ ކުޅުމެއް. ދެ ޓީމަށް ވެސް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

މެޗުގެ ކުޅުން ފަށައިފި. ކިކްއޯފް ކުރީ ނެދަލެންޑްސް އިން.