ވޯލްޑް ކަޕް: އިންގްލެންޑް 3-0 ސެނެގާލް (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 3-0 ގެ ނަތީޖާއަކުން އިންގްލެންޑް ކުރީގައި އޮވެގެން. އިންގްލެންޑް ކުއާޓާއަށް.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'82 - އިންގްލެންޑުން އިތުރު ބަދަލެއް. ހެންޑަސަންގެ ބަދަލުގައި ކުޅެން ނުކުތީ ކެލްވިން ފިލިޕްސް.

'76 - އިންގްލެންޑުން ދެ ބަދަލެއް. ބެލިންހަމް އާއި ސްޓޯންސްގެ ބަދަލުގައި މޭސަން މައުންޓާއި އެރިކް ޑަޔާ.

'76 - އިންގްލެންޑް ކެޕްޓަން ހެރީ ކޭންއަށް ކުރި ފައުލަކާ ގުޅިގެން ސެނެގާލް ކެޕްޓަން ކަލިދޫ ކޫލިބަލީއަށް ރީނދޫ ކާޑެއް.

'74 - ސެނެގާލްގެ ނުރައްކަލެއް. ޕަޕް މަޓާ ސާ ފޮނުވާލި ހިލޭ ޖެހުން ދިޔައީ އިންގްލެންޑް ގޯލުގެ އަރިމަތީ ދަނޑި ކައިރިން ބޭރަށް.

'72 - ސެނެގާލުން ބަދަލެއް. ބޫލާޔޭ ޑިއާގެ ބަދަލުގައި ކުޅެން ނުކުތީ ފަމަރާ ޑިއެދިއޫ.

'65 - އިންގްލެންޑުން ދެ ބަދަލެއް. ފޮޑެން އާއި ސަކާގެ ބަދަލުގައި ކުޅެން ނުކުތީ ޖެކް ގްރީލިޝް އާއި މާކަސް ރަޝްފޯޑް.

'57 - އިންގްލެންޑުން ތިން ގޯލުގެ ލީޑެއް ހޯދައިފި. ފޮޑެން ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ބުކާޔޯ ސަކާ. މިއީ މިފަހަރުގެ ވޯލްޑް ކަޕްގައި އޭނާ ޖެހި ތިންވަނަ ގޯލު.

'56 - އިންގްލެންޑްގެ ނުރައްކަލެއް. ޕެނަލްޓީ އޭރިއާ ބޭރުން ހެރީ ކޭން ފޮނުވާލި ބާރު ހަމަލާ، ސެނެގާލްގެ ކީޕަރު އެޑުއާޑް މެންޑީ ވަނީ މަތަކޮށްފައި.

ސެނެގާލުން ދެވަނަ ހާފަށް ނުކުތީ ތިން ބަދަލަކާއެކު. އެންޑިއާޔޭ އާއި ޑިއާޓޭ އަދި ސީސްގެ ބަދަލުގައި ކުޅެން ނުކުތީ ބަމްބާ ޑިއެންގާއި ޕާޕް ގޭ އަދި ޕާޕް ސާ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-0 ގެ ނަތީޖާއަކުން އިންގްލެންޑް ކުރީގައި އޮވެގެން.

'45+3 - އިންގްލެންޑުން އިތުރު ގޯލެއް ޖަހައި ލީޑު ފުޅާާކޮށްފި. ކައުންޓާ އެޓޭކެއްގައި ފިލް ފޮޑެން ދިން ބޯޅައަކުން، ޕެނަލްޓީ އޭރިއާ ތެރެއިން ފޮނުވާލި ބާރު ހަމަލާއަކުން އެޓީމުގެ ކެޕްޓަން ހެރީ ކޭން. އެ ގޯލު ޖެހުމުގައި ވެސް ބެލިންހަމްގެ ދައުރު ފާހަގަކޮށްލެވޭ. މިއީ މި ވޯލްޑް ކަޕްގައި ކޭން ޖެހި ފުރަތަމަ ގޯލު.

'41 - އިންގްލެންޑަށް ހުސް ފުރުސަތެއް. ބުކާޔޯ ސަކާ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ، ކެޕްޓަން ހެރީ ކޭން ފޮނުވާލި ހަމަލާ ދިޔައީ ސެނެގާލް ގޯލުގެ ހުރަސް ދަނޑިމަތިން ބޭރަށް.

'39 - އިންގްލެންޑުން ގޯލެއް ޖަހައި ލީޑު ހޯދައިފި. ޖޫޑް ބެލިންހަމް ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ޖޯޑަން ހެންޑަސަން.

'31 - ސެނެގާލްގެ ނުރައްކާތެރި ހަމަލާއެއް. އިސްމާއިލާ ސާ ދިން ރީތި ބޯޅައަކުން، ޕެނަލްޓީ އޭރިއާ ތެރެއިން ބޫލާޔޭ ޑިއާ ފޮނުވާލި ހަމަލާ، އިންގްލެންޑްގެ ކީޕަރު ޖޯޑަން ޕިކްފޯޑް ވަނީ ހުޝިޔާރުކަމާއެކު މަތަކޮށްފައި.

'23 - ސެނެގާލަށް ރަނގަޅު ފުރުސަތެއް. ހެރީ މެގުއާ އަތުން ގެއްލުނު ބޯޅައަކުން ޕެނަލްޓީ އޭރިއާ ތެރެއިން ބޫލާޔޭ ޑިއާ ފޮނުވާލި ހަމަލާ، އިންގްލެންޑް ޑިފެންޑަރު ޖޯން ސްޓޯންސް ވަނީ ބްލޮކްކޮށްފައި. ޑިއާގެ ހަމަލާ ބްލޮކްކުރުމާއެކު ޕެނަލްޓީ އޭރިއާ ތެރެއިން ލިބުނު ބޯޅައިން އިސްމާއިލާ ސާ ފޮނުވާލި ހަމަލާ ދިޔައީ އިންގްލެންޑް ގޯލުގެ ހުރަސް ދަނޑިމަތިން ބޭރަށް.

'21 - އިންގްލެންޑަށް ރަނގަޅު ފުރުސަތެއް. ފިލް ފޮޑެން ނަގައިދިން ކޯނަރަކުން، ޕެނަލްޓީ އޭރިއާ ތެރޭ ހުރެ ޖޯން ސްޓޯންސް ބޮލުން ފޮނުވާލި ހަމަލާ، ސެނެގާލްގެ ގޯލާ އަމާޒުވެފައެއް ނުވޭ.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ގިނަ ވަގުތު ބޯޅަ ހިފަހައްޓައިގެން ކުޅެމުންދިޔައީ އިންގްލެންޑުން. ނަމަވެސް އިންގްލެންޑަށް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ. ދެ ޓީމަށް ވެސް އަދި ހަމަލާއެއް ފޮނުވައިލެވިފައެއް ނުވޭ.

'5 - ސެނެގާލްގެ ބޫލާޔޭ ޑިއާ ބޯޅަ ހިފައިގެން ޕެނަލްޓީ އޭރިއާ ތެރެއަށް ވަން ނަމަވެސް، އިންގްލެންޑްގެ ހެރީ މެގުއާ އާއި ޖޯންސް ސްޓޯންސްގެ ޕްރެޝަރާ ގުޅިގެން އޭނާއަށް އެ ބޯޅައިން ނުރައްކާކުރެވޭ ގޮތެއް ނުވި.

މެޗުގެ ފުރަތަމަ ހާފުގެ ކުޅުން ފަށައިފި. ކިކްއޯފް ކުރީ ސެނެގާލުން.