ވޯލްޑް ކަޕް: އާޖެންޓީނާ 2-1 އޮސްޓްރޭލިއާ (ފުލްޓައިމް)

މެޗުގެ އުސްލިއަތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-1 ގެ ނަތީޖާއަކުން އާޖެންޓީނާ ކުރީގައި އޮވެގެން. އާޖެންޓީނާ ކުއާޓާއަށް.

'90+7 - އޮސްޓްރޭލިއާގެ ނުރައްކަލެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ގަރަންގް ކުއޯލް ފޮނުވާލި ހަމަލާ، އާޖެންޓީނާގެ ކީޕަރު އެމިލިއާނޯ މާޓިނޭޒް ވަނީ ހުޝިޔާރުކަމާއެކު މަތަކޮށްފައި.

'90+4 - އާޖެންޓީނާއަށް އިތުރު ފުރުސަތެއް. މެސީ ދިން ބޯޅައަކުން ޕެނަލްޓީ އޭރިއާ ތެރެއިން ލައުޓާރޯ މާޓިނޭޒް ފޮނުވާލި ހަމަލާ، އޮސްޓްރޭލިއާގެ ކީޕަރު މެތިއު ރަޔަން ވަނީ މަތަކޮށްފައި.

'90+4 - އާޖެންޓީނާގެ ހަމަލާއެއް. ޕެނަލްޓީ އޭރިއާ ތެރެއިން މެސީ ފޮނުވާލި ހަމަލާ، އޮސްޓްރޭލިއާގެ ގޯލާ އަމާޒުވެފައެއް ނުވޭ.

'90+3 - އާޖެންޓީނާއަށް އިތުރު ހުސް ފުރުސަތެއް. ޕެނަލްޓީ އޭރިއާ ތެރޭ ހުސްކޮށް ހުރެ ލައުޓާރޯ މާޓިނޭޒް ފޮނުވާލި ހަމަލާ، އޮސްޓްރޭލިއާގެ ކީޕަރު މެތިއު ރަޔަން ވަނީ މަތަކޮށްފައި.

ދެވަނަ ހާފުގެ އިތުރު ވަގުތުގެ ގޮތުގައި ހަތް މިނެޓުގެ ކުޅުން ދައްކައިފި.

'89 - އާޖެންޓީނާއަށް ހުސް ފުރުސަތެއް. މެސީ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ލައުޓާރޯ މާޓިނޭޒް ފޮނުވާލި ހަމަލާ، އޮސްޓްރޭލިއާގެ ގޯލާ އަމާޒުވެފައެއް ނުވޭ.

'81 - އޮސްޓްރޭލިއާއަށް ރަނގަޅު ފުރުސަތެއް. އާޖެންޓީނާގެ ހަތަރު ކުޅުންތެރިއެއްގެ ކައިރިން ނައްޓާލުމަށްފަހު ޕެނަލްޓީ އޭރިއާ ވަދެ، ބެހިޗް ފޮނުވާލި ހަމަލާ، އާޖެންޓީނާގެ ޑިފެންޑަރު ލިސެންޑްރޯ މާޓިނޭޒް ވަނީ ދިފާއުކޮށްފައި.

'80 - އާޖެންޓީނާ އިން އިތުރު ދެ ބަދަލު. މޮލީނާގެ ބަދަލުގައި ގޮންގާލޯ މޮންޓިއޭލް އަދި މެކް އެލިސްޓާގެ ބަދަލުގައި ކުޅެން ނުކުތީ ގޮންޒާލޯ މޮންޓިއޭލް.

'76 - އޮސްޓްރޭލިއާ އިން ގޯލެއް ޖަހައި، ފަރަގު ކުޑަކޮށްފި. އެ ގޯލަކީ އާޖެންޓީނާގެ އެންޒޯ ފެނާންޑޭޒް އަތުން ބައިކޮޅަށް ވަން ގޯލެއް. ޕެނަލްޓީ އޭރިއާ ބޭރުން އޮސްޓްރޭލިއާގެ ކްރެއިގް ގުޑްވިން ފޮނުވާލި ހަމަލާ، ގޯލުގެ ތެރެއަށް ވަދެފައިވަނީ އާޖެންޓީނާގެ އެންޒޯ ފެނާންޑޭޒްގެ ގައިގައި ޖެހިފައި.

'72 - އޮސްޓްރޭލިއާ އިން ތިން ބަދަލެއް. ޑޫކް އާއި ލެކީ އަދި ޑެގެނެކްގެ ބަދަލުގައި ކުޅެން ނުކުތީ ޖެމީ މެކްލެރަން އާއި ފްރޭން ކަރަޗިޗް އަދި މެވިއެން ކުއޮލް.

'71 - އާޖެންޓީނާ އިން ދެ ބަދަލެއް. އަލްވަރޭޒާއި އަކޫނިއާގެ ބަދަލުގައި ކުޅެން ނުކުތީ ނިކޮލަސް ޓަގްލިއަފީކޯ އާއި ލައުޓާރޯ މާޓިނޭޒް.

'66 - މެސީ ހަމަލާއެއް. ޕެނަލްޓީ އޭރިއާ ބޭރުން އޭނާ ފޮނުވާލި ހަމަލާ، އޮސްޓްރޭލިއާގެ ގޯލާ އަމާޒުވެފައެއް ނުވޭ.

'65 - އާޖެންޓީނާގެ ނުރައްކަލެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، މެސީ ހަމަލާއެއް ފޮނުވާލުމުގެ ކުރިން މިލޮސް ޑެގެނެކް ވަނީ ދިފާއުކޮށްފައި.

'58 - އޮސްޓްރޭލިއާ އިން ދެ ބަދަލެއް. މެކްގްރީގެ ބަދަލުގައި ކްރެއިގް ގުޑްވިން އަދި ބަކުސްގެ ބަދަލުގައި އައިޑިން ހުރޫސްޓިޗް.

'57 - އާޖެންޓީނާ އިން އިތުރު ގޯލެއް ޖަހައި ލީޑު ފުޅާކޮށްފި. އޮސްޓްރޭލިއާގެ ކީޕަރު މެތިއު ރަޔަންއަށް ޕެނަލްޓީ އޭރިއާ ތެރެއިން ހެދުނު ގޯހަކުން އާޖެންޓީނާއަށް އެ ގޯލު ކާމިޔާބުކޮށްދިނީ ޖޫލިއަން އަލްވަރޭޒް.

'51 - އާޖެންޓީނާގެ ހަމަލާއެއް. މެކް އަލިސްޓާ ދިން ބޯޅަ، ޕެނަލްޓީ އޭރިއާ ބޭރުން މެސީއަށް ރަނގަޅަށް ފޮނުވާލެވޭ ގޮތެއް ނުވި. އެ ބޯޅަ، އޮސްޓްރޭލިއާގެ ކީޕަރު މެތިއު ރަޔަން ވަނީ ފަސޭހަކަމާއެކު ހޯދާފައި.

'50 - އާޖެންޓީނާ އިން ބަދަލެއް. ގޮމޭޒްގެ ބަދަލުގައި ކުޅެން ނުކުތީ ލިސެންޑްރޯ މާޓިނޭޒް.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން އާޖެންޓީނާ ކުރީގައި އޮވެގެން. މިއީ ވޯލްޑް ކަޕްގެ ނޮކްއައުޓް ބުރެއްގެ މެޗެއްގައި މެސީ ޖެހި ފުރަތަމަ ގޯލު.

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

'38 - އަކޫނިއާއަށް ކުރި ފައުލަކާ ގުޅިގެން އޮސްޓްރޭލިއާގެ މިލޮސް ޑެގެނެކްއަށް ރީނދޫ ކާޑެއް.

'35 - އާޖެންޓީނާ އިން ގޯލެއް ޖަހައި ލީޑު ހޯދައިފި. އެލެކްސިސް މެކް އަލިސްޓާ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އާޖެންޓީނާއަށް އެ ގޯލު ކާމިޔާބުކޮށްދިނީ އެޓީމުގެ ކެޕްޓަން ލިއޮނެލް މެސީ. އޭނާ ފޮނުވާލި ހަމަލާ އަމާޒުވީ އޮސްޓްރޭލިއާ ގޯލުގެ ތިރީ ކަނަކަށް.

'31 - މެޗުގައި އާޖެންޓީނާ ކެޕްޓަން މެސީގެ ނުރައްކަލެއް އަދި ނުފެނޭ. އޭނާ އަތުން ފަސޭހައިން ބޯޅަ ގެއްލޭކަން ފާހަގަކޮށްލެވޭ.

'17 - ޕެނަލްޓީ އޭރިއާ ބޭރުން އާޖެންޓީނާގެ އަލެހެންޑްރޯ ގޮމޭޒް ފޮނުވާލި ހަމަލާ، އޮސްޓްރޭލިއާގެ ގޯލާ އަމާޒެއް ނުވި.

'15 - މާކޮސް އަކޫނިއާއަށް ކުރި ފައުލަކާ ގުޅިގެން އޮސްޓްރޭލިއާގެ ޖެކްސަން އާވައިންއަށް ރީނދޫ ކާޑެއް.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ގިނަ ވަގުތު ބޯޅަ ހިފަހައްޓައިގެން ކުޅެމުންދިޔައީ އާޖެންޓީނާ. ނަމަވެސް އެއްވެސް ޓީމެއްގެ ހަމަލާއެއް އަދި ނުފެނޭ.

'10 - އޮޓަމެންޑީ ދިން ބޯޅަ، ޕެނަލްޓީ އޭރިއާ ތެރެއިން އާޖެންޓީނާ ފޯވަޑް ޖޫލިއަން އަލްވަރޭޒަށް ކޮންޓްރޯލެއް ނުވި.

މެޗުގެ ކުޅުން ފަށައިފި. ކިކްއޯފް ކުރީ އޮސްޓްރޭލިއާ އިން.