ވޯލްޑް ކަޕް: ކްރޮއޭޝިއާ 0-0 ބެލްޖިއަމް (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ ކްރޮއޭޝިއާ އަދި ބެލްޖިއަމަށް ވެސް ގޯލެއް ނުޖެހި އެއްވަރުވެގެން. އެ ނަތީޖާއާއެކު ކްރޮއޭޝިއާއަށް ވަނީ ގަދަ 16 ގެ ޖާގައެއް ލިބިފައި. ނަމަވެސް ބެލްޖިއަމަށް ވަނީ ފުރުސަތު ގެއްލިފައި.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'90 - ބެލްޖިއަމަށް ހުސް ފުރުސަތެއް. ތޯގަން ހަޒާޑް ނަގައިދިން ބޯޅަ، ޕެނަލްޓީ އޭރިއާ ތެރޭ ހުސްކޮށް ހުރި ލުކާކޫއަށް ލިބުނު ނަމަވެސް އޭނާއަށް ނިންމައިނުލެވުނު.

'87 - ބެލްޖިއަމުން ބަދަލެއް. މުނިއޭގެ ބަދަލުގައި ކުޅެން ނުކުތީ އެޑެން ހަޒާޑް.

'67 - ކްރޮއޭޝިއާއަށް ރަނގަޅު ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން މޮޑްރިޗް ފޮނުވާލި ހަމަލާ، ބެލްޖިއަމްގެ ކީޕަރު ކޯޓުވާ ވަނީ މަތަކޮށްފައި.

'67 - ކޮވަސިޗްއަށް ކުރި ފައުލަކާ ގުޅިގެން ބެލްޖިއަމްގެ ޑެންޑޮންކާއަށް ރީނދޫ ކާޑެއް.

'64 - ކްރޮއޭޝިއާ އިން ދެ ބަދަލެއް. ކްރަމަރިޗާއި ލަވާޔާގެ ބަދަލުގައި ކުޅެން ނުކުތީ ޕަސަލިޗް އާއި ޕެޓްކޮވިޗް.

'62 - ބެލްޖިއަމްގެ އިތުރު ނުރައްކަލެއް. ޑި ބްރޭނާ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުސްކޮށް ހުރެ، ލުކާކޫ ބޮލުން ފޮނުވާލި ހަމަލާ، ކްރޮއޭޝިއާގެ ގޯލާ އަމާޒުވެފައެއް ނުވޭ.

'60 - ބެލްޖިއަމަށް ހުސް ފުރުސަތެއް. ޑި ބްރޭނާ ދިން ބޯޅައަކުން ކަރަސްކޯ ފޮނުވާލި ހަމަލާ، ކްރޮއޭޝިއާގެ ޔުރަނޮވިޗް ދިފާއުކުރުމާއެކު ލިބުނު ރީބައުންސް ބޯޅައިން، ޕެނަލްޓީ އޭރިއާ ތެރޭ ހުސްކޮށް ހުރެ ބެލްޖިއަމް ފޯވަޑް ލުކާކޫ ފޮނުވާލި ހަމަލާ އަމާޒުވީ ކްރޮއޭޝިއާ ގޯލުގެ އަރިމަތީ ދަނޑިއަށް.

''58 - ބެލްޖިއަމުން ބަދަލެއް. ޓްރޮސާޑްގެ ބަދަލުގައި ކުޅެން ނުކުތީ ތޯގަން ހަޒާޑް.

'55 - އަނެއްކާވެސް ކްރޮއޭޝިއާއަށް ފުރުސަތެއް. ޕެނަލްޓީ އޭރިއާ ތެރެއިން ލޫކާ މޮޑްރިޗް ފޮނުވާލި ހަމަލާ ވެސް ބެލްޖިއަމް ކީޕަރު ކޯޓުވާ ވަނީ މަތަކޮށްފައި.

'54 - ކްރޮއޭޝިއާގެ އިތުރު ނުރައްކަލެއް. ކޮވަސިޗް ދިން ބޯޅައަކުން ޕެނަލްޓީ އޭރިއާ ތެރެއިން މާސެލޯ ބްރޮޒޮވިޗް ވަނީ މަތަކޮށްފައި.

'50 - ކްރޮއޭޝިއާގެ ނުރައްކާތެރި ހަމަލާއެއް. ޕެނަލްޓީ އޭރިއާ ތެރެއިން މަޓިއޯ ކޮވަސިޗް ފޮނުވާލި ހަމަލާ، ބެލްޖިއަމްގެ ކީޕަރު ތިބޯ ކޯޓުވާ ވަނީ ހުޝިޔާރުކަމާއެކު މަތަކޮށްފައި.

'48 - ބެލްޖިއަމަށް ރަނގަޅު ފުރުސަތެއް. ހުރަހަކުން ޕެނަލްޓީ އޭރިއާ ތެރޭ ހުރެ، ލުކާކޫ ބޮލުން ފޮނުވާލި ހަމަލާ، ކްރޮއޭޝިއާގެ ކީޕަރު ޑޮމިނިކް ލިވަކޮވިޗް ވަނީ މަތަކޮށްފައި.

ދެވަނަ ހާފަށް ބެލްޖިއަމުން ނުކުތީ ބަދަލަކާއެކު. މާޓެންސްގެ ބަދަލުގައި ކުޅެން ނުކުތީ ރޮމެލޫ ލުކާކޫ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ބެލްޖިއަމް އަދި ކްރޮއޭޝިއާއަށް ވެސް ގޯލެއް ނުޖެހި އެއްވަރުވެގެން.

'45+2 - ކްރޮއޭޝިއާއަށް ފުރުސަތެއް. ޕެނަލްޓީ އޭރިއާ ބޭރުން ޔުރަނޮވިޗް ފޮނުވާލި ހަމަލާ، ބެލްޖިއަމްގެ ގޯލާ އަމާޒުވެފައެއް ނުވޭ.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'39 - މިހާރު ދެ ޓީމުގެ ފަރާތުން ފެންނަނީ ދާދި ހަމަހަމަ ކުޅުމެއް. ދެ ޓީމުން ވެސް މަސައްކަތްތަކެއް ކުރި ނަމަވެސް، ގޯލު ޖަހާނެ ރަނގަޅު ފުރުސަތެއް ތަނަވަސްކުރުމަށް އުނދަގޫތަކަކާ ކުރިމަތިވޭ.

މި ގްރޫޕުގައި ކުޅޭ އަނެއް މެޗުގައި ބައްދަލުކުރަނީ މޮރޮކޯ އާއި ކެނެޑާ. އެ މެޗުގައި މިވަގުތު 2-0 ގެ ނަތީޖާއަކުން ކުރީގައި އޮތީ މޮރޮކޯ. މިހާރު ޕޮއިންޓް ތާވަލުގައި މޮރޮކޯ އޮތީ އެއްވަނައިގައި. ދެވަނައިގައި ކްރޮއޭޝިއާ އަދި ތިންވަނައިގައި ބެލްޖިއަމް. ފުލުގައި އޮތީ ކެނެޑާ.

'18 - ވީއޭއާރަށް ބެލުމަށްފަހު ރެފްރީ ނިންމީ އޮފްސައިޑެއް ކަމަށް. އެހެންކަމުން ކްރޮއޭޝިއާއަށް ޕެނަލްޓީ ދީފައެއް ނުވޭ. އޮފްސައިޑް މަގާމެއްގައި ހުރީ ކްރޮއޭޝިއާ ޑިފެންޑަރު ޑެޖާން ލޮވްރެން.

ޕެނަލްޓީ ފޮނުވާލުމުގެ ކުރިން ރެފްރީ ވީއޭއާރަށް ބަލަނީ. ރެފްރީ ވީއޭއާރުގެ އެހީ ހޯދަނީ މޮޑްރިޗް ހިލޭ ޖެހުން ނަގައިދިން އިރު، ކްރޮއޭޝިއާގެ ކުޅުންތެރިޔަކު އޮފްސައިޑް މަގާމެއްގައި ހުރިތޯ ބެލުމަށް.

'15 - ކްރޮއޭޝިއާއަށް ޕެނަލްޓީއެއް. އެ ޕެނަލްޓީ ދީފައިވަނީ ޕެނަލްޓީ އޭރިއާ ތެރެއިން ކްރަމަރިޗްއަށް ބެލްޖިއަމްގެ ކަރަސްކޯ ކުރި ފައުލަކާ ގުޅިގެން.

'14 - ބެލްޖިއަމްގެ އިތުރު ނުރައްކަލެއް. ކެވިން ޑި ބްރޭނާ ދިން ރީތި ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ މާޓެންސް ފޮނުވާލި ހަމަލާ، ކްރޮއޭޝިއާގެ ގޯލާ އަމާޒުވެފައެއް ނުވޭ.

މި މެޗުގައި ބެލްޖިއަމްގެ ކެޕްޓަން އެޑެން ހަޒާޑް ފެށީ ބެންޗުން. މިވަގުތު ކެޕްޓަންގެ ދައުރު އަދާކުރަނީ ކެވިން ޑި ބްރޭނާ.

'11 - ބެލްޖިއަމްގެ ނުރައްކަލެއް. ޑްރައެސް މާޓެންސް ދިން ބޯޅައަކުން ޕެނަލްޓީ އޭރިއާ ތެރެއިން ކަރަސްކޯ ފޮނުވާލި ހަމަލާ، ކްރޮއޭޝިއާގެ ޖޮސިޕް ޔުރަނޮވިޗް ވަނީ ބްލޮކްކޮށްފައި.

'1 - ކްރޮއޭޝިއާ އިން ނުރައްކާތެރި ހަމަލާއެއް. ޕެނަލްޓީ އޭރިއާ ތެރެއަށް ވަނުމަށްފަހު، ޕެރިސިޗް ފޮނުވާލި ހަމަލާ، ބެލްޖިއަމް ގޯލާ އަމާޒުވެފައެއް ނުވޭ.

މެޗުގެ ކުޅުން ފަށައިފި.