ވޯލްޑް ކަޕް: އިރާން 0-1 އެމެރިކާ (ފުލް ޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި. އެމެރިކާއިން މެޗު ކާމިޔާބުކުރީ 1-0 ގެ ނަތީޖާއަކުން. އެ ނަތީޖާއާއެކު އެމެރިކާއިން ވަނީ ގަދަ 16 ޔަގީން ކޮށްފައި.

'90+9 - އިރާން ކުޅުންތެރިން ރެފްރީ ވަށާލި ނަމަވެސް ރެފްރީ ވީއޭއާރް ބަލައި ނިންމީ ޕެނަލްޓީއެއްް ނޫން ކަމަށް.

'90+8 - އިރާންގެ ނުރައްކާތެރި ހަމަލާއެއް. ޕެނަލްޓީ އޭރިއާ ތެރެއަށް އައި ބޯޅައެއްގައި ތެރާމީއާއި ކާޓާ-ވިކާސް ބޯޅައަށް ކުރި މަސައްކަތުގައި ކުރިއަށް ދިޔަ ބޯޅަ ސާފުކޮށްލީ ޒިމަމެން. އެ ނުރައްކަލުގައި ކާޓާ ތެރާމީއަށް ފައުލް ކުރިތޯ ވީއޭއާރް ބެލި. ރެފްރީ ނިންމީ ޕެނަލްޓީއެއް ނޫން ކަމަށް.

'90+6 - އިރާންގެ ޖަލާލީއަށް ރީނދޫ ކާޑު. އޭނާއަށް ރެފްރީ ކާޑު ދެއްކީ މުސާއަށް ކުރި ފައުލަކުން.

'90+3 - އިރާނުގެ ނުރައްކާތެރި ހަމަލާއެއް. އިރާނުގެ ހިލޭ ޖެހުމަކުން ޕޮއުރަލިންގާންޖީ ބޮލުން ޖެހި ބޯޅަ ގޯލާ އަމާޒުނުވެ ދިޔައީ ކިރިޔާ.

'90+1 - ފަހު ހާފުގެ އިތުރު ވަގުތުގެ ގޮތުގައި ނުވަ މިނެޓް ދައްކައިފި.

'82 - އިރާންގެ ނުރައްކަލެއް. ހިލޭ ޖެހުމެއްގެ ތެރެއިން ލިބުނު ފުރުސަތުގައި އިރާނުން ހުރަސްކުރި ބޯޅަ ދިފާއުކުރަން އެމެރިކާއަށް އުނދަގޫތަކަކާ ކުރިމަތިވި. އެ ބޯޅަ ޓާނާ ދިފާއުކުރީ ގޯލުގެ ރޮނގުމަތިން ކަހަލަ ގޮތަކަށް. ޓާނާ އަތުގައި ބޯޅަ ޖެހުނު ކަމަށް އިރާން ކުޅުންތެރިން ޝަކުވާކުރި.

ބެންޗުން މާ ބޮޑަށް ޝަކުވާކުރުމުން ބެންޗްގައި ހުރި ކަނާނިޒަދެގެންއަށް ރެފްރީ ރީނދޫ ކާޑުވެސް ދެއްކި.

'82 - އަނެއްކާވެސް އެމެރިކާގެ ދެބަދަލެއް. ޒިމަމަންއާއި މޯ ކުޅެން ނުކުތީ ވެއާއާއި ޑެސްޓްގެ ބަދަލުގައި. އެމެރިކާއިން މަސައްކަތް ކުރަނީ ލީޑް ދަމަހައްޓަން.

'79 - އިރާނަށްވެސް ބަދަލެއް. ހޮލިޒާދޭގެ ބަދަލުގައި ކުޅެން ނުކުތީ އަންސަރީފާޑް.

'78 - އެމެރިކާގެ ބަދަލެއް. ސާޖަންޓް ފައިގެ ކުޑަހުޅަށް ލިބުނު އަނިޔާއާ ގުޅިގެން އޭނާ ބާލައިފި، ބަދަލުގައި ކުޅެން ނުކުތީ ރައިޓް.

''77 - އިރާންގެ ހޮސައިނީއަށް ރީނދޫ ކާޑު. އޭނާއަށް ރެފްރި ކާޑު ދެއްކީ އާރޮންސަންއަށް ކުރި ފައުލަކަށް.

'65 - އިރާންގެ ނުރައްކަލެއް. އެމެރިކާގެ ޑިފެންސް ވަރަށް ބޮޑަށް ހުޅުވިގެން ދިޔަ ގަޑީގައި އަރިމަތިން ނެގި ބޯޅައަށް ތެރާމީ ކުރިއަށް އެރި އިރު، އޭނާ ފައިގައި ބޯޅަ ލައްވައެއް ނުލި. އެ ބޯޅަ ފަހުން ގޮއްޑޯސްއަށް ލިބުނު ނަމަވެސް އޭނާ ފޮނުވާލީ ބޭރަށް.

'52 - އިރާނަށް ފުރުސަތެއް. އަރިމަތިން ހުރަސްކުރި ބޯޅައަށް ގޮއްޑޯސް ފުއްމައިގެން އަރައި ބޮލުން ޖެހި ނަމަވެސް ގޯލަށް ސީދާކޮށްލެވޭ ގޮތެއް ނުވި.

'48 - އެމެރިކާގެ ހަމަލާއެއް. އާރޮންސަން ދެ ޑިފެންޑަރުން ކައިރިން ނައްޓާލައި، ފޮނުވާލި ބޯޅަ ދިޔައީ އިރާން ކީޕަރު އަތަށް.

ދެވަނަ ހާފަށް އެމެރިކާއާއި އިރާނުންވެސް ބަދަލެއް. އެމެރިކާގެ ޕުލިސިޗްގެ ބަދަލުގައި ކުޅެން ނުކުތީ އާރޯންސޮން. އިރާނުންގެ ސަރްދާރު އަޒުމޫންގެ ބަދަލުގައި ކުޅެން ނެރުނީ ސަމާން ގޮއްޑޯސް.

ދެވަނަ ހާފުގެ ކުޅުން ފަށައިފި. ކުޅުން ފެށީ އެމެރިކާއިން.

ފުރަތަމަ ހާފްގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިމިއްޖެ.

' 45+7 - އެމެރިކާއިން ގޯލަށް ބޯޅަ ވައްދާލި ނަމަވެސް ރެފްރީ ނިންމީ އޮފްސައިޑް ކަމަށް. ކުރިއަށް ދުއްވާލި ބޯޅައަށް ބާރު ދުވެލީގައި ގޮސް ވެއާ ނިންމާލީ ގޯލްގެ ކަނަށް. ވީއޭއާރް ބެލުމުގެ ކުރިންވެސް ލައިންސްމަން ވަނީ އޮފްސައިޑަށް ދިދަ ނަގާފައި.

45+2 - އިރާނުގެ ބަދަލެއް. މުހައްމަދީއަށް އަނިޔާވެ، އޭނާގެ ބަދަލުގައި ކަރިމީ ކުޅެން ނުކުމެއްޖެ.

'45+1 - ފުރަތަމަ ހާފުގެ އިތުރު ވަގުތުގެ ގޮތުގައި ފަސް މިނެޓް ދައްކައިފި.

ގޯލު ޖަހަން އުޅުމުގެ ތެރޭގައި އަނިޔާވެ ޕުލިސިޗަށް ފަރުވާ ދޭން ޖެހިފައިވޭ. މިހާރު އޭނާ ވަނީ އަނބުރާ ކުޅެން ނުކުމެފައި.

ޕުލިސިޗްގެ ގޯލުގައި އެންމެ ބޮޑު ރޯލެއް އަދާކުރީ ވިންގް ބެކް ޑެސްޓް. ފަހަތުން ކުރިއަށް ވައްޓާލި ބޯޅައަށް އޭރިއާ ތެރެއަށް ވަދެ ޑެސްޓް ބޮލުން ޖައްސާލި ބޯޅަ ޕުލިސިޗަށް ލިބުނީ އޭރިއާ ތެރެއިން. އޭނާ ފަސޭހަކަމާއެކު ބޯޅަ ގޯލަށް ވައްދާލި.

'38 - އެމެރިކާއިން ގޯލް ޖަހައި ލީޑު ނަގައިފި. އެމެރިކާއަށް ގޯލު ޖަހައިދިނީ ކްރިސްޓިއަން ޕުލިސިޗް.

'33 - އެމެރިކާއަށް އިތުރު ފުރުސަތެއް. ސާޖަންޓް އޭރިއާ ތެރެއިން ބޯޅަ ކޮންޓްރޯލްކޮށްލައި، ޖައްސާލި ޕާހުގައި ވެއާއަށް ހުސްކޮށް ގޯލަށް ފޮނުވާލަން ލިބުނު. އޭނާގެ ބާރު ހަމަލާ ދިޔައީ މަތިން ބޭރަށް.

'28 - އެމެރިކާއަށް ހުސް ފުރުސަތެއް. އަރިމަތިން ޕުލިސިޗް ހުރަސްކުރަން މަސައްކަތް ކުރި ބޯޅަ އިރާން ޑިފެންޑަރު ފައިގައި ޖެހި މިސްރާބު ބަދަލުވެގެން ލިބުނީ ޓިމޮތީ ވެއާއަށް. އިރާން ކީޕަރު އެކަނި އޮއްވާ ވެއާ ބޮލުން ޖެހި ބޯޅައިގައި މާ ބޮޑު ބާރެއް ނެތް.

'21 - އިރާންގެ ކައުންޓާ އެޓޭކް ހަމަލާއެއް. ފަހަތުން ކުރިއަށް ވައްޓާލި ބޯޅައެއް ތެރާމީ ހޯދައި އޭރިއާ ތެރެއަށް ވަދެ ސަރުދާރު އަޒްމޫނަށް ޖައްސާލަން މަސައްކަތް ކުރި. އެ ބޯޅަ ދިފާއުކުރީ އެމެރިކާ ޑިފެންޑަރު ރީމް.

'18 - އެމެރިކާގެ ނުރައްކާތެރި ހުރަހެއް. ޑެސްޓް އަރިމަތިން ނަގައިދިން ހުރަސް ޕަންޗުކޮށްލީ ކީޕަރު ބެއިރަންވާންޑް. އެމެރިކާ ކުރިއަށް ޖެހި ކުޅެމުންދާ އިރު، އިރާން ވިސްނަނީ ކައުންޓާ އެޓޭކަށް.

މިރޭގެ މެޗަށް އިރާންގެ ގޯލްކީޕަރު ބެއިރަންވާންޑް ނުކުމެފައި ވަނީ އެންމެފަހުން ކުޅުނު މެޗުގައި ރެސްޓް ކުރުމަށްފަހު. އޭނާ ރެސްޓް ކުރަން ޖެހުނީ އިރާނުން ފުރަތަމަ ކުޅުނު މެޗުގައި މޫނަށް އަނިޔާވުމުން. ބެއިރަންވާންޑަށް ލިބުނު އަނިޔާއަކީ ބޮލުގެ އަނިޔާއަކަށްވުމުން ފީފާގެ އުސޫލު ދަށުން އެއް މެޗު ބެންޗުގައި މަޑުކުރަން ޖެހުނު.

'12 - އެމެރިކާއަށް ފުރުސަތެއް. މުސާ އޭރިއާ ތެރެއަށް ހުރަސްކޮޅި ބޯޅައަށް އަރައި، ޕުލިސިޗް ބޮލުން ޖެހި ބޯޅަ އަމާޒުވީ ސީދާ ކީޕަރު އަތަށް.

'10 - އެމެރިކާގެ ހަމަލާއެއް. ރޮބިންސަން އަރިމަތިން ނެގި ހުރަސް، އޭރިއާ ބޭރުގައި ހުރި މުސާ ކޮންޓްރޯލްކޮށް ފޮނުވާލި ވޮލީ ދިޔައީ ހުރަސްދަނޑިމަތިން ބޭރަށް.

މެޗުގެ ފުރަތަމަ ފަސްވަރަކަށް މިނެޓްގައި ފެންނަނީ އެމެރިކާއިން ގިނަ ވަގުތު ބޯޅަ ގެންގުޅެގެން ކުޅެމުންދާ މަންޒަރު. މެޗު ފެންނަނީ ޕްރެޝަރު މެޗެއްގެ ގޮތުގައި. އިރާންގެ ސަޕޯޓަރުން ސްޓޭޑިއަމްގައި ގިނަކޮށް ފާހަގަވެގެންދާ އިރު، މިހާތަނަށް ސަޕޯޓަރުންގެ އަޑު ވަރަށް ބާރުކަން ފާހަގަވޭ.

މެޗުގެ ކުޅުން ފަށައިފި. މެޗު ފެށީ އިރާނުން.