ވޯލްޑް ކަޕް: ނެދަލޭންޑްސް 2-0 ގަތަރު (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-0 ގެ ނަތީޖާއަކުން ނެދަލެންޑްސް ކުރީގައި އޮވެގެން. ނެދަލެންޑްސްއަށް ވަނީ ގްރޫޕުގެ އެއްވަނައިގެ ގޮތުގައި ގަދަ 16 އިން ޖާގައެއް ލިބިފައި.

'90+2 - ނެދަލެންޑްސްގެ ނުރައްކާތެރި ހަަމަލާއެއް. ޕެނަލްޓީ އޭރިއާ ބޭރުން ބާގްހައުސް ފޮނުވާލި ހަމަލާ އަމާޒުވީ ގަތަރު ގޯލުގެ ހުރަސްދަނޑިއަށް.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'88 - ގަތަރުގެ ހަމަލާއެއް. އަކްރަމް އަފީފް ދިން ބޯޅައަކުން ޕެނަލްޓީ އޭރިއާ ބޭރުން ޕެޑްރޯ މިގޭލް ފޮނުވާލި ހަމަލާ ގޯލާ އަމާޒުވެފައެއް ނުވޭ.

'87 - ނެދަލެންޑްސް އިން ބަދަލެއް. ޑި ޔޮންގްގެ ބަދަލުގައި ކުޅެން ނުކުތީ ޓެއިލާ.

'85 - ގަތަރުން ވެސް ދެ ބަދަލު. އަބްދުލްއަޒީޒް ހާތިމް އާއި އިސްމާއިލް މުހައްމަދުގެ ބަދަލުގައި ކުޅެން ނުކުތީ އަހްމަދު އަލާ އާއި މުސާބް ކިދީރް.

'83 - ނެދަލެންޑްސް އިން އިތުރު ދެ ބަދަލު. ގަކްޕޯގެ ބަދަލުގައި ވޫޓް ވެގްހޯސްޓް، އަދި ޑި ރޫންގެ ބަދަލުގައި ކުޅެން ނުކުތީ ޓެއުން ކޫޕްމައިނާސް.

'73 - ނެދަލެންޑްސްގެ ނުރައްކަލެއް. ޕެނަލްޓީ އޭރިއާ ތެރެއަށް ވަނުމަށްފަހު ގަކްޕޯ ފޮނުވާލި ހަމަލާ، ގަތަރު ޑިފެންޑަރު އަބްދުލްކާރިމް ހަސަން ވަނީ ދިފާއުކޮށްފައި. އެ އަބްދުލްކާރިމް ހަސަން ފައިގައި ޖެހި ގޯލާ ދިމާއަށް ދިޔަ ބޯޅަ، ގަތަރުގެ ކީޕަރު މެޝާލް ބާޝަމް ވަނީ މަތަކޮށްފައި.

'68 - ކްލާސަން ދިން ބޯޅައަކުން ޕެނަލްޓީ އޭރިއާ ތެރެއިން ނެދަލެންޑްސްގެ ބާގްހައުސް، ގަތަރުގެ ގޯލުގެ ތެރެއަށް ބޯޅަ ފޮނުވާލި ނަމަވެސް، ވީއޭއާރަށް ބެލުމަށްފަހު ރެފްރީ ނިންމީ ގޯލެއް ނޫން ކަމަށް. އެ ގޯލު ބަލައިގެންފައި ނުވަނީ އޭގެ ކުރިން ނެދަލެންޑްސް ގަކްޕޯގެ އަތުގައި ބޯޅަ ޖެހުމުން.

'66 - ނެދަލެންޑްސް އިން ދެ ބަދަލެއް. ކްލާސަން އާއި ޑިޕާއީގެ ބަދަލުގައި ކުޅެން ނުކުތީ ސްޓީވަން ބާގްހައުސް އާއި ވިންސެންޓް ޖެންސެން.

'65 - ގަތަރުން ތިން ބަދަލެއް. އާސިމް މަޑިބޯ އާއި އަލްމޮއެޒް އަލީ އާއި ހަސަން އަލް ހޭޑޯސްގެ ބަދަލުގައި ކުޅެން ނުކުތީ ކަރީމް ބުޑިއާފް އާއި މުހައްމަދު މުންތާރީ އަދި އަލީ އަސާދް.

'50 - ނެދަލެންޑްސް އިން އިތުރު ގޯލެއް ޖަހައި ލީޑު ހޯދައިފި. ނެދަލެންޑްސްއަށް އެ ގޯލު ކާމިޔާބުކޮށްދިނީ ފްރެންކީ ޑި ޔޮންގް. އޭނާ އެ ގޯލު ޖެހީ ޑޭވީ ކްލާސަން ނަގައިދިން ހުރަހަކުން މެމްފިސް ޑިޕާއީ ފޮނުވާލި ހަމަލާ، ގަތަރުގެ ކީޕަރު ބާޝަމް މަތަކުރުމާއެކު ޕެނަލްޓީ އޭރިއާ ތެރެއިން ލިބުނު ރީބައުންސް ބޯޅައިން

'49 - އިސްމާއިލް މުހައްމަދު ނަގައިދިން ހުރަސް، ޕެނަލްޓީ އޭރިއާ ތެރެއިން ގަތަރު ކުޅުންތެރިޔަކަށް ލިބުމުގެ ކުރިން ނެދަލެންޑްސް ޑިފެންޑަރު ނޭތަން އަކޭ ދިފާއުކޮށްފި.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން ނެދަލެންޑްސް ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'44 - ގަތަރުން އަންނަނީ ފުރުސަތުތަކެއް ތަނަވަސްކުރުމަށް މަސައްކަތްކުރަމުން. ނުރައްކާތެރި ހުރަސްތަކެއް ފެނުނު ނަމަވެސް ރަނގަޅު ފުރުސަތެއް އަދި ލިބިފައެއް ނުވޭ.

'29 - ގަތަރުގެ ހަމަލާއެއް. ޕެނަލްޓީ އޭރިއާ ބޭރުން އިސްމާއިލް މުހައްމަދު ފޮނުވާލި ހަމަލާ އަމާޒުވީ ނެދަލެންޑްސް ކީޕަރު ނޮޕާޓްއާ ދިމާއަށް.

'26 - ނެދަލެންޑްސް އިން ގޯލެއް ޖަހައި ލީޑު ހޯދައިފި. ޑޭވީ ކްލާސަން ދިން ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ފޮނުވާލި ހަމަލާއަކުން ނެދަލެންޑްސްއަށް އެ ގޯލު ކާމިޔާބުކޮށްދިނީ ކޯޑީ ގަކްޕޯ. އޭނާގެ ހަމަލާ އަމާޒުވީ ގަތަރު ގޯލުގެ ތިރީ ކަނަކަށް. އެ ގޯލަކީ މި ވޯލްޑް ކަޕްގައި އޭނާ ކާމިޔާބުކުރި ތިންވަނަ ގޯލު.

'24 - އަކްރަމް އަފީފް ނަގައިދިން ހުރަސް، ގަތަރުގެ ޕެޑްރޯ މިގޭލްއަށް ލިބުމުގެ ކުރިން ޕެނަލްޓީ އޭރިއާ ތެރެއިން ނެދަލެންޑްސް ކެޕްޓަން ވާޖިލް ވެން ޑައިކް ދިފާއުކޮށްފި.

'15 - ނެދަލެންޑްސްގެ ނުރައްކަލެއް. ޕެނަލްޓީ އޭރިއާ ބޭރުން ފްރޭންކީ ޑި ޔޮންގް ފޮނުވާލި ހަމަލާ، ނެދަލެންޑްސްގެ ޑޭވީ ކްލާސަންގެ ފައިގައި ޖެހި ވަނީ ބްލޮކްވެފައި. އެ ބޯޅަ އަނބުރާ ލިބިފައިވަނީ ނެދަލެންޑްސް ފޯވަޑް މެމްފިސް ޑިޕާއީއަށް. ނަމަވެސް ހުސްކޮށް ހުރެ އޭނާ ފޮނުވާލި ހަމަލާ، ގަތަރުގެ ގޯލާ އަމާޒުވެފައެއް ނުވޭ.

'12 - ބްލިންޑް ދިން ބޯޅަ، ޕެނަލްޓީ އޭރިއާ ތެރެއިން ނެދަލެންޑްސްގެ ޑަމްފްރީސްއަށް ލިބުމުގެ ކުރިން ގަތަރުގެ ޑިފެންޑަރުން ދިފާއުކޮށްފި.

'4 - ނެދަލެންޑްސްއަށް ފުރުސަތެއް. ޕެނަލްޓީ އޭރިއާ ތެރެއިން ޑެލީ ބްލިންޑް ފޮނުވާލި ހަމަލާ، ގަތަރުގެ ކީޕަރު މެޝާލް ބާޝަމް ވަނީ މަތަކޮށްފައި. ރީބައުންސް ބޯޅައިން ބްލިންޑް ފޮނުވާލި ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށް.

މެޗުގެ ކުޅުން ފަށައިފި. ކިކްއޯފް ކުރީ ނެދަލެންޑްސް އިން.