ވޯލްޑް ކަޕް: ޕޯޗުގަލް 2-0 އުރުގުއާއީ (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-0 ގެ ނަތީޖާއަކުން ޕޯޗުގަލް ކުރީގައި އޮވެގެން. މޮޅާއެކު ޕޯޗުގަލް ގަދަ 16 އަށް.

'90+8 - ޕޯޗުގަލަށް ހުސް ފުރުސަތެއް. ޕެނަލްޓީ އޭރިއާ ތެރޭ ވަރަށް ހުސްކޮށް ހުއްޓައި ލިބުނު ބޯޅައަކުން ފެނާންޑޭޒް ފޮނުވާލި ހަމަލާ، އުރުގުއާއީގެ ކީޕަރު ރޮޗޭ ވަނީ މަތަކޮށްފައި.

ދެވަނަ ހާފުގެ އިތުރު ވަގުތުގެ ގޮތުގައި ދައްކާފައިވަނީ ނުވަ މިނެޓު.

'90+3 - ޕެނަލްޓީ ކާމިޔާބުކޮށް، ޕޯޗުގަލުން ލީޑު ފުޅާކޮށްފި. ޕޯޗުގަލްގެ ޕެނަލްޓީ ކާމިޔާބުކޮށްދިނީ އެޓީމުގެ ފުރަތަމަ ގޯލު ވެސް ކާމިޔާބުކޮށްދިން ބްރޫނޯ ފެނާންޑޭޒް.

'90 - ޕެނަލްޓީ އޭރިއާ ތެރެއިން ހިމެނޭޒްގެ އަތުގައި ބޯޅަ ޖެހުނުތޯ ބެލުމަށް ވީއޭއާރަށް ބެލުމަށްފަހު ޕޯޗުގަލަށް ޕެނަލްޓީއެއް ދީފި.

'86 - އުރުގުއާއީ އިން ބަދަލެއް. އޮލިވޭރާގެ ބަދަލުގައި ކުޅެން ނުކުތީ ވިނާ.

'82 - ޕޯޗުގަލުން ތިން ބަދަލު. ފީލިކްސް އާއި ރޮނާލްޑޯ އާއި ވިލިއަމް ކަވާލިއޯގެ ބަދަލުގައި ކުޅެން ނުކުތީ މެތައުސް ނުނޭސް އާއި ގޮންކާލޯ ރާމޯސް އަދި ޖޮއާއޯ ޕަލްހީނިއޯ.

'79 - އުރުގުއާއީއަށް ހުސް ފުރުސަތެއް. ވަލްވާޑޭ ދިން ރީތި ބޯޅައަކުން ޕެނަލްޓީ އޭރިއާ ތެރެއިން ޑި އަރަކޭސްޓާ ފޮނުވާލި ހަމަލާ، ޕޯޗުގަލްގެ ކީޕަރު ޑިއޯގޯ ކޮސްޓާ ވަނީ މަތަކޮށްފައި.

'78 - އުރުގުއާއީއަށް ރަނގަޅު ފުރުސަތެއް. ޑި އަރަކޭސްޓާ ނަގައިދިން ހުރަހަކުން ޕެނަލްޓީ އޭރިއާ ތެރެއިން ސުއަރޭޒް ފޮނުވާލި ހަމަލާ ޕޯޗުގަލްގެ ގޯލާ އަމާޒުވެފައެއް ނުވޭ.

'75 - އުރުގުއާއީގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން ގޮމޭޒް ފޮނުވާލި ހަމަލާ އަމާޒުވީ ޕޯޗުގަލް ގޯލުގެ އަރިމަތީ ދަނޑިއަށް.

'73 - އުރުގުއާއީ އިން ދެ ބަދަލެއް. ނުނޭޒް އާއި ކަވާނީގެ ބަދަލުގައި ކުޅެން ނުކުތީ ގޮމޭޒް އާއި ލުއިސް ސުއަރޭޒް.

'69 - ޕޯޗުގަލުން ބަދަލެއް. ރުބެން ނެވޭސްގެ ބަދަލުގައި ކުޅެން ނުކުތީ ރަފައެލް ލިއާއޯ.

'62 - އުރުގުއާއީ އިން ދެ ބަދަލެއް. ވެސީނޯގެ ބަދަލުގައި ޑި އަރަސްކޭޓާ އަދި ގޮޑިންގެ ބަދަލުގައި ކުޅެން ނުކުތީ ޕެލިސްޓްރީ.

'60 - އުރުގުއާއީގެ ހަމަލާއެއް. ޕެނަލްޓީ އޭރިއާ ބޭރުން ނުނޭޒް ފޮނުވާލި ހަމަލާގައި ބާރެއް ނެތް، ޕޯޗުގަލް ކީޕަރު ޑިއޯގޯ ކޮސްޓާ ވަނީ އެ ބޯޅަ ފަސޭހަކަމާއެކު ހޯދާފައި.

'58 - އުރުގުއާއީއަށް ފުރުސަތެއް. ޑާވިން ނުނޭޒް ނަގައިދިން ހުރަހަކުން ޕޯޗުގަލް ޕެނަލްޓީ އޭރިއާ ތެރެއިން ކަވާނީގެ ފައިގައި ރަނގަޅަށް ލައްވާލާ ގޮތެއް ނުވި.

'54 - ޕޯޗުގަލުން ގޯލު ޖަހައި ލީޑު ހޯދައިފި. ޕޯޗުގަލަށް އެ ގޯލު ކާމިޔާބުކޮށްދިނީ ބްރޫނޯ ފެނާންޑޭޒް. ފެނާންޑޭޒް ނަގައިދިން ބޯޅައަށް ޕެނަލްޓީ އޭރިއާ ތެރެއިން ކްރިސްޓިއާނޯ ރޮނާލްޑޯ ވެސް މަސައްކަތްކުރި. ނަމަވެސް އެ ބޯޅަ ގޯލަށް ވަދެފައިވަނީ ރޮނާލްޑޯގެ ބޮލުގައި ނުޖެހި.

'52 - ޕޯޗުގަލްގެ ނުރައްކާތެރި ހަމަލާއެއް. ބެނާޑޯ ސިލްވާ ދިން ބޯޅައަކުން ޕެނަލްޓީ އޭރިއާ ތެރެއިން ފީލިކްސް ފޮނުވާލި ހަމަލާ، އުރުގުއާއީގެ ގޯލާ އަމާޒުވެފައެއް ނުވޭ.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ޕޯޗުގަލް އަދި އުރުގުއާއީއަށް ވެސް ގޯލެއް ނުޖެހި އެއްވަރުވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'42 - ޕޯޗުގަލުން ބަދަލެއް. އަނިޔާއަކާ ގުޅިގެން ނޫނޯ މެންޑޭޒްގެ ބަދަލުގައި ކުޅެން ނުކުތީ ރަފައެލް ގުރޭރޯ.

'38 - ވަރޭލާއަށް ކުރި ފައުލަކާ ގުޅިގެން ރުބެން ނެވޭސްއަށް ރީނދޫ ކާޑެއް.

'32 - އުރުގުއާއީގެ ނުރައްކަލެއް. މެދު ރޮނގުން ބޯޅަ ހިފައިގެން ޕޯޗުގަލް ޑިފެންޑަރުން ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއަށް ވަދެ، ބެންޓަންކޫރް ފޮނުވާލި ހަމަލާ، ޕޯޗުގަލް ކީޕަރު ޑިއޯގޯ ކޮސްޓާ ވަނީ މަތަކޮށްފައި.

'25 - ޕޯޗުގަލުން ގިނަ ވަގުތު ބޯޅަ ހިފަހައްޓައިގެން، އުރުގުއާއީގެ ގޯލަށް ނުރައްކާކުރުމަށް ފުރުސަތެއް ހޯދުމަށް ދަނީ މަސައްކަތްތަކެއް ކުރަމުން. ނަމަވެސް، އުރުގުއާއީގެ ގޯލާ އަމާޒުކޮށް އަދި ހަމަލާއެއް ފޮނުވާލެވިފައެއް ނުވޭ.

'18 - ރޮނާލްޑޯ ފޮނުވާލި ހިލޭ ޖެހުން، އުރުގުއާއީ ވޯލްގައި ތިބި ކުޅުންތެރިން ގައިގައި ޖެހި ބްލޮކްވެއްޖެ.

'16 - ޕޯޗުގަލުގެ ނުރައްކަލެއް. ޕެނަލްޓީ އޭރިއާ ބޭރުން ޖޮއާއޯ ފީލިކްސް ފޮނުވާލި ހަމަލާ، އުރުގުއާއީ ޑިފެންޑަރު ހިމެނޭޒް ވަނީ ބްލޮކްކޮށްފައި.

'12 - އުރުގުއާއީއަށް ފުރުސަތެއް. ވަލްވާޑޭ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، ހިމެނޭޒް ބޮލުން ފޮނުވާލި ހަމަލާ ދިޔައީ ޕޯޗުގަލް ގޯލުގެ ހުރަސް ދަނޑިމަތިން ބޭރަށް.

'8 - ޕެނަލްޓީ އޭރިއާ ބޭރުން ބްރޫނޯ ފެނާންޑޭޒް ފޮނުވާލި ހަމަލާ، އުރުގުއާއީގެ ގޯލާ އަމާޒެއް ނުވި.

'6 - ރުބެން ޑިއާޒްއަށް ކުރި ފައުލަކާ ގުޅިގެން އުރުގުއާއީގެ ބެންޓަންކޫރްއަށް ރީނދޫ ކާޑެއް.

މެޗުގެ ކުޅުން ފަށައިފި. ކިކްއޯފް ކުރީ އުރުގުއާއީ އިން.