ވޯލްޑް ކަޕް: ސްޕެއިން 1-1 ޖަރުމަނު (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. ސްޕެއިނާއި ޖަރުމަނުގެ މެޗު ނިމިގެންދިޔައީ 1-1 ގެ ނަތީޖާއަކުން ދެ ޓީމު އެއްވަރުވެގެން.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'90 - ޕެނަލްޓީ އޭރިއާ ތެރެއިން ސްޕެއިން ފޯވަޑް މޮރާޓާ ނުރައްކާކުރުމުގެ ކުރިން ޖަރުމަން ޑިފެންޑަރު ޝްލޮޓާބެކް ދިފާއުކޮށްފި.

'87 - ޖަރުމަނުން އިތުރު ބަދަލެއް. ރާމްގެ ބަދަލުގައި ކުޅެން ނުކުތީ ނިކޯ ޝްލޮޓާބެކް.

'85 - ޖަރުމަނުން ބަދަލެއް. ގްނާބްރީގެ ބަދަލުގައި ކުޅެން ނުކުތީ ހޮފްމަން.

'83 - ޖަރުމަނުން ގޯލެއް ޖަހައި ނަތީޖާ ހަމަހަމަކޮށްފި. މުސިއާލާ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ބާރު ހަމަލާއަކުން ޖަރުމަނަށް އެ ގޯލު ކާމިޔާބުކޮށްދިނީ ދެވަނަ ހާފުގައި ކުޅެން ނުކުތް ފުލްކްރުގް.

'82 - ސްޕެއިނުން ބަދަލެއް. އަލްބާގެ ބަދަލުގައި ކުޅެން ނުކުތީ އަލަހެންޑްރޯ ބަލްޑޭ.

'73 - ޖަރުމަނަށް ހުސް ފުރުސަތެއް. ޕެނަލްޓީ އޭރިއާ ތެރެއިން ހުސްކޮށް ހުރެ، މުސިއާލާ ފޮނުވާލި ހަމަލާ، ސްޕެއިންގެ ގޯލްކީޕަރު ސިމޮން ވަނީ ހުޝިޔާރުކަމާއެކު މަތަކޮށްފައި.

'72 - ޖަރުމަނަށް ފުރުސަތެއް. މުސިއާލާ ދިން ބޯޅައަކުން ޕެނަލްޓީ އޭރިއާ ތެރެއިން ޖަރުމަންގެ ފުލްކްރިގަށް ރަނގަޅަށް ފޮނުވާލެވޭ ގޮތެއް ނުވި.

'70 - ޖަރުމަނުން ތިން ބަދަލެއް. ގުންޑޮގަން އާއި ކޭހްރާ އަދި މުލާގެ ބަދަލުގައި ކުޅެން ނުކުތީ ލެރޯއީ ސާނޭ އާއި ނިކްލަސް ފުލްކްރުގް އަދި ލެރޯއީ ސާނޭ.

'66 - ސްޕެއިނުން ދެ ބަދަލެއް. އަސެންސިއޯ އާއި ގަވީގެ ބަދަލުގައި ކުޅެން ނުކުތީ ކޮކޭ އަދި ނީކޯ ވިލިއަމްސް.

'65 - ސްޕެއިނަށް އިތުރު ފުރުސަތެއް. އޮލްމޯ ދިން ބޯޅައަކުން ޕެނަލްޓީ އޭރިއާ ބޭރުން އަސެންސިއޯ ފޮނުވާލި ހަމަލާ، ޖަރުމަންގެ ގޯލާ އަމާޒުވެފައެއް ނުވޭ.

'62 - ސްޕެއިނުން ގޯލެއް ޖަހައި ލީޑު ހޯދައިފި. ޖޯޑީ އަލްބާ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ސްޕެއިނަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް އަލްވާރޯ މޮރާޓާ.

'60 - އޮލްމޯއަށް ކުރި ފައުލަކާ ގުޅިގެން ޖަރުމަންގެ ކިމިކްއަށް ރީނދޫ ކާޑެއް.

'59 - ސްޕެއިންގެ ހަމަލާއެއް. އޮލްމޯ ދުރުން ފޮނުވާލި ހަމަލާ އަމާޒުވީ ޖަރުމަން ކީޕަރު ނޯޔާއާ ދިމާއަށް.

'56 - ޖަރުމަނަށް ހުސް ފުރުސަތެއް. ސްޕެއިންގެ ކީޕަރު ސިމޮންއަށް ހެދުނު ގޯހަކުން، ގުންޑޮގަން ދިން ބޯޅައަކުން ޕެނަލްޓީ އޭރިއާ ތެރެއިން ޖަރުމަންގެ ޖޯޝުއާ ކިމިކް ފޮނުވާލި ހަމަލާ، ކީޕަރު ސިމޮން ވަނީ ހުޝިޔާރުކަމާއެކު މަތަކޮށްފައި.

ޖަރުމަނުން ދެވަނަ ހާފު ފެށީ ވަރުގަދަކޮށް. ނަމަވެސް ހާފުގެ ފުރަތަމަ ފަސް މިނެޓުގެ ތެރޭގައި ޖަރުމަނަށް ސްޕެއިންގެ ގޯލަށް ނުރައްކާކުރެވިފައެއް ނުވޭ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ސްޕެއިން އަދި ޖަރުމަނަށް ވެސް ގޯލެއް ނުޖެހި އެއްވަރުވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

'44 - ޖަރުމަނަށް ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ޖަރުމަން ޑިފެންޑަރު ރުޑިގާ ފޮނުވާލި ބާރު ހަމަލާ، ސްޕެއިންގެ ކީޕަރު އުނައީ ސިމޮން ވަނީ މަތަކޮށްފައި.

'44 - މުސިއާލާއަށް ކުރި ފައުލަކާ ގުޅިގެން ސްޕެއިންގެ ކެޕްޓަން ބުސްކެޓްސްއަށް ރީނދޫ ކާޑެއް. މެޗުގައި ޖަރުމަންގެ ޒުވާން މިޑްފީލްޑަރު މުސިއާލާގެ ފަރާތުން ރަނގަޅު ކުޅުމެއް އަދި ނުފެނޭ.

'40 - ޖޯޝުއާ ކިމިޗް ނަގައިދިން ހިލޭ ޖެހުމަކުން ޕެނަލްޓީ އެރިއާ ތެރޭ ހުރެ، ޖަރުމަން ޑިފެންޑަރު އެންޓޯނިއޯ ރުޑިގާ ފޮނުވާލި ހަމަލާ ސްޕެއިންގެ ގޯލުގެ ތެރެއަށް ވަން ނަމަވެސް، ވީއޭއާރުން ދެއްކީ ރުޑިގާ އޮފްސައިޑް މަގާމެއްގައި ހުރި ކަމަށް.

'37 - ފެރާން ޓޮރޭސްއަށް ކުރި ފައުލަކާ ގުޅިގެން ޖަރުމަންގެ ކެހްރާއަށް ރީނދޫ ކާޑެއް.

'36 - ސްޕެއިންގެ ނުރައްކަލެއް. ކޯނަރެއްގެ ތެރެއިން ޕެނަލްޓީ އޭރިއާ ތެރޭ ހުރި ސްޕެއިންގެ ފެރާން ޓޮރޭސް ފޮނުވާލި ހަމަލާ، ޖަރުމަންގެ ޖަމާލް މުސިއާލާ ވަނީ ބްލޮކްކޮށްފައި.

'35 - ލަޕޯޓް ދިން ރީތި ބޯޅައަކުން ޕެނަލްޓީ އޭރިއާ ތެރެއިން އޮލްމޯ ނުރައްކާކުރުމުގެ ޖަރުމަންގެ ސޫލޭ ދިފާއުކޮށްފި.

'33 - ކައުންޓާ އެޓޭކެއްގައި އޮލްމޯ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ، ސްޕެއިންގެ ފެރާން ޓޮރޭސް ފޮނުވާލި ހަމަލާ، ޖަރުމަން ގޯލުގެ ހުރަސް ދަނޑިމަތިން ބޭރަށް. އޮލްމޯ ހުރީ ވެސް އޮފްސައިޑް މަގާމެއްގައި.

'32 - ޖަރުމަނުން އަންނަނީ މަޑުމަޑުން މެޗުގެ ތެރެއަށް ވަދެ، ސްޕެއިންގެ ގޯލަށް ނުރައްކާކުރުމަށް ފުރުސަތުތައް ތަނަވަސްކުރުމަށް މަސައްކަތްކުރަމުން.

'26 - ޖަރުމަން ކީޕަރު މެނުއެލް ނޯޔާގެ ގޯހެއް. އޭނާގެ މިސް ޕާހުން ލިބުނު ފުރުސަތަކުން ޕެނަލްޓީ އޭރިއާ ތެރެއިން ސްޕެއިންގެ ފެރާން ޓޮރޭސް ފޮނުވާލި ހަމަލާ، ޖަރުމަން ޑިފެންޑަރު ރާމް ވަނީ ބްލޮކްކޮށްފައި.

'25 - ޖަރުމަނުގެ ހަމަލާއެއް. ސްޕެއިންގެ ކީޕަރު އުނައީ ސިމޮންގެ މިސް ޕާހަކުން، ޕެނަލްޓީ އޭރިއާ ބޭރުން ޖަރުމަނުގެ ސާޖް ނާބްރީ ފޮނުވާލި ހަމަލާ ދިޔައީ ސްޕެއިން ގޯލުގެ އަރިމަތީ ދަނޑި ކައިރިން ބޭރަށް.

'23 - ބާސެލޯނާއަށް ކުޅެމުން އަންނަ ސްޕެއިންގެ ޒުވާން ދެ މިޑްފީލްޑަރުން، ގަވީ އާއި ޕެޑްރީގެ ކޮމްބިނޭޝަން ރަނގަޅު. އެ ދެ ކުޅުންތެރިން އަތުން ބޯޅަ ހޯދުމަށް ޖަރުމަނަށް އުނދަގޫތަކަކާ ކުރިމަތިވޭ.

'22 - ސްޕެއިންގެ ނުރައްކަލެއް. ޕެނަލްޓީ އޭރިއާ ބޭރުން ޖޯޑީ އަލްބާ ފޮނުވާލި ބާރު ހަމަލާ ދިޔައީ ޖަރުމަން ގޯލުގެ އަރިމަތީ ދަނޑި ކައިރިން ބޭރަށް.

މެޗުގެ ފުރަތަމަ 20 މިނެޓުގެ ތެރޭގައި ރަނގަޅަށް ކުޅެ، ނުރައްކާކޮށް ފެނިފައިވަނީ ސްޕެއިން. ޖަރުމަންގެ ފަރާތުން އަދި ހަމަލާއެއް ނުފެނޭ. ސްޕެއިނުން އަވަސްކޮށް ޕްރެސް ކުރާތީ ޖަރުމަނަށް ބޯޅަ ހިފަހައްޓައިގެން ކުޅުމަށް އުނދަގޫތަކެއް ކުރިމަތިވޭ.

ސްޕެއިންގެ ފަރާތުން ފެންނަނީ ކޮސްޓަ ރީކާއާ ދެކޮޅަށް ކުޅުނު މެޗުގައި ވެސް ފެނުނު އެޓީމުގެ ރަސްމީ ކުޅުން. ގިނަ ވަގުތު ބޯޅަ ހިފަހައްޓައިގެން ކުޅޭ ސްޕެއިން ފެންނަނީ ނުރައްކާކޮށް.

'7 - ސްޕެއިންގެ ނުރައްކާތެރި ހަމަލާއެއް. ރީތި ކުޅުމަކާއެކު، ޕެނަލްޓީ އޭރިއާ ބޭރުން ޑެނީ އޮލްމޯ ފޮނުވާލި ބާރު ހަމަލާ، ޖަރުމަން ކީޕަރު މެނުއެލް ނޯޔާ ވަނީ މަތަކޮށްފައި. އެ ބޯޅަ، ޖަރުމަން ގޯލުގެ ހުރަސްދަނޑީގައި ވެސް ޖެހުނު.

'5 - ގަވީ ދިން ބޯޅަ، ޖަރުމަން ޕެނަލްޓީ އޭރިއާ ބޭރުން ސްޕެއިންގެ މާކޯ އަސެންސިއޯއަށް ރަނގަޅަށް ކޮންޓްރޯލު ކުރެވޭ ގޮތެއް ނުވި.

މެޗުގެ ކުޅުން ފަށައިފި. ކިކްއޯފް ކުރީ ސްޕެއިނުން.