ވޯލްޑް ކަޕް: ޓިއުނީޝިއާ 0-1 އޮސްޓްރޭލިއާ (ފުލްޓައިމް)

މެޗުގެ އުސްއަލިތައް:

'90 - މެޗުގެ ކުޅުން ނިންމާލައިފި. މެޗު ނިމިގެންދިޔައީ 1-0 ގެ ނަތީޖާއަކުން އޮސްޓްރޭލިއާ ކުރީގައި އޮވެގެން.

'90+2 - ބޯޅައިގައި އަތްލުމުން ޓިއުނީޝިއާގެ ސަސީއަށް ރީނދޫ ކާޑެއް.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'88 - ޓިއުނީޝިއާއަށް އިތުރު ފުރުސަތެއް. ކެޗްރީޑާ ދިން ބޯޅައަކުން ޕެނަލްޓީ އޭރިއާ ތެރެއިން ކަޒްރީ ފޮނުވާލި ހަމަލާގައި ބާރެއް ނެތް، އޮސްޓްރޭލިއާގެ ކީޕަރު މެޓް ރަޔަން ވަނީ ފަސޭހަކަމާއެކު އެ ބޯޅަ ހޯދާފައި.

'86 - ޓިއުނީޝިއާއަށް ފުރުސަތެއް. ޕެނަލްޓީ އޭރިއާ ތެރެއަށް ވަނުމަށްފަހު ސްލިޓީ ފޮނުވާލި ހަމަލާ، އޮސްޓްރޭލިއާ ޑިފެންޑަރު ސޫޓާ ވަނީ ދިފާއުކޮށްފައި.

'85 - އޮސްޓްރޭލިއާގެ އިތުރު ދެ ބަދަލެއް. ގުޑްވިން އާއި ލެކީގެ ބަދަލުގައި ކުޅެން ނުކުތީ އަވެރް މަބިލް އާއި ކީނޫ ބަކުސް.

'84 - ޓިއުނީޝިއާގެ ޓަލްބީ ދުރުން ފޮނުވާލި ހަމަލާ އަމާޒުވީ އޮސްޓްރޭލިއާ ކީޕަރު މެޓް ރަޔަންގެ އަތަށް.

'75 - އޮސްޓްރޭލިއާ އިން ވެސް ބަދަލެއް. ކަރަސިޗްގެ ބަދަލުގައި ކުޅެން ނުކުތީ މިލޮސް ޑެގެނެކް.

'73 - ޓިއުނީޝިއާ އިން އިތުރު ދެ ބަދަލެއް. ޖަބާލީގެ ބަދަލުގައި ކެނީސީ އަދި ބްރޮންގެ ބަދަލުގައި ކުޅެން ނުކުތީ ވަޖްދީ ކެޗްރީޑާ.

'72 - ޓިއުނީޝިއާއަށް ފުރުސަތެއް. ޕެނަލްޓީ އޭރިއާ ތެރެއިން ޓިއުނީޝިއާގެ ކެޕްޓަން ޔޫސުފް މަސާކްނީ ފޮނުވާލި ހަމަލާ، އޮސްޓްރޭލިއާގެ ކީޕަރު މެޓް ރަޔަން ވަނީ މަތަކޮށްފައި.

'72 - އޮސްޓްރޭލިއާގެ ނުރައްކަލެއް. މެކްލެރެން ދިން ނުރައްކާތެރި ބޯޅަ، ޓިއުނީޝިއާގެ ޕެނަލްޓީ އޭރިއާ ތެރެއިން ލެކީގެ ފައިގައި ލައްވާލާ ގޮތެއް ނުވި.

'67 - ޓިއުނީޝިއާ އިން ބަދަލެއް. ލައިޑޫނީގެ ބަދަލުގައި ކުޅެން ނުކުތީ ވަހްބީ ކަޒްރީ.

'65 - އާވައިންއަށް ކުރި ފައުލަކާ ގުޅިގެން ޓިއުނީޝިއާގެ އަބްޑިއަށް ރީނދޫ ކާޑެއް.

'64 - އޮސްޓްރޭލިއާ އިން ދެ ބަދަލެއް. މިޗެލް ޑޫކްގެ ބަދަލުގައި ޖެމީ މެކްލެރެން، އަދި ރައިލީ މެކްގްރީގެ ބަދަލުގައި އައިޑިން ހުރޫސްޓިޗް.

'61 - ޕެނަލްޓީ އޭރިއާ ބޭރުން ޓިއުނީޝިއާގެ ސަސީ ފޮނުވާލި ހަަމަލާ، އޮސްޓްރޭލިއާގެ ގޯލާ އަމާޒެއް ނުވި.

މެޗުގެ ދެވަނަ ހާފުގެ ފުރަތަމަ 15 މިނެޓުގެ ކުޅުން ނިމުނު އިރު، ގިނަ ވަގުތު ބޯޅަ ހިފަހައްޓައިގެން ނުރައްކާކޮށް ފެނިފައިވަނީ ޓިއުނީޝިއާ. ނަމަވެސް ގޯލު ޖަހާނެ ފުރުސަތެއް ތަނަވަސްކުރެވިފައެއް ނުވޭ.

'56 - ޓިއުނީޝިއާގެ ޕެނަލްޓީ އޭރިއާ ތެރެއަށް ކްރެއިގް ގުޑްވިން ނުރައްކާތެރި ހުރަހެއް ނަގައިދިން ނަމަވެސް، އެ ބޯޅަ ލިބޭ ހިސާބުން އޮސްޓްރޭލިއާގެ އެއްވެސް ކުޅުންތެރިޔަކު ނެތް.

'52 - ލައިޑޫނީއަށް އޮސްޓްރޭލިއާގެ އާވައިން ކުރި ފައުލަކާ ގުޅިގެން ޓިއުނީޝިއާއަށް ހިލޭ ޖެހުމެއް. އެ ހިލޭ ޖެހުމުގެ ބޭނުމެއް ޓިއުނީޝިއާއަށް ނުހިފުނު.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން އޮސްޓްރޭލިއާ ކުރީގައި އޮވެގެން.

'45+3 - ޓިއުނީޝިއާއަށް ހުސް ފުރުސަތެއް. އިސާމް ޖަބާލީ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ، ޓިއުނީޝިއާ ކެޕްޓަން ޔޫސުފް މަސާކްނީ ފޮނުވާލި ހަމަލާ، އޮސްޓްރޭލިއާގެ ގޯލާ އަމާޒުވެފައެއް ނުވޭ.

ފުރަތަމަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.

'41 - ޓިއުނީޝިއާއަށް ހުސް ފުުރުސަތެއް. ޔޫސުފް މަސާކްނީ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ މުހައްމަދު ޑްރޭގާ ފޮނުވާލި ހަމަލާ، އޮސްޓްރޭލިއާގެ ޑިފެންޑަރު ހެރީ ސޫޓާ ވަނީ ހުޝިޔާރުކަމާއެކު ޓެކަލްކޮށް ދިފާއުކޮށްފައި.

'40 - އޮސްޓްރޭލިއާގެ ނުރައްކަލެއް. ޕެނަލްޓީ އޭރިއާ ތެރެއަށް ވަނުމަށްފަހު، ލެކީ ނުރައްކާކުރުމުގެ ކުރިން ޓިއުނީޝިއާގެ ޑިފެންޑަރު ޓަލީބީ ވަނީ ދިފާއުކޮށްފައި.

'38 - ޓިއުނީޝިއާގެ ހަމަލާއެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ޓިއުނީޝިއާގެ ކެޕްޓަން މަސާކްނީ ފޮނުވާލި ހަމަލާ، އޮސްޓްރޭލިއާގެ ޑިފެންޑަރު ވަނީ ދިފާއުކޮށްފައި.

'31 - ޓިއުނީޝިއާ އިން ކުރިއަށް ޖެހި، އޮސްޓްރޭލިއާގެ ގޯލަށް ނުރައްކާކުރެވޭ ގޮތެއް ނުވޭ. މެޗުގައި ޓިއުނީޝިއާއަށް އަދި އޮސްޓްރޭލިއާގެ ގޯލަށް އެއްވެސް ހަމަލާއެއް ފޮނުވާލެވިފައެއް ނުވޭ.

'26 - ގުޑްވިންއަށް ކުރި ފައުލަކާ ގުޅިގެން ޓިއުނީޝިއާގެ އައިސާ ލައިޑޫނީއަށް ރީނދޫ ކާޑެއް.

'23 - އޮސްޓްރޭލިއާ އިން ގޯލެއް ޖަހައި، ލީޑު ހޯދައިފި. ކްރެއިގް ގުޑްވިން ނަގައިދިން ހުރަހަކުން ޓިއުނީޝިއާ ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އޮސްޓްރޭލިއާއަށް އެ ގޯލު ކާމިޔާބުކޮށްދިނީ މިޗެލް ޑޫކް.

'11 - އޮސްޓްރޭލިއާގެ ގުޑްވިން ނަގައިދިން ހުރަސް، ޕެނަލްޓީ އޭރިއާ ތެރެއިން ޓިއުނީޝިއާ ޑިފެންޑަރު މެރިއާ ދިފާއުކޮށްފި.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ގިނަ ވަގުތު ބޯޅަ ހިފަހައްޓައިގެން އެޓޭކުގައި ނުރައްކާކޮށް ފެންނަނީ އޮސްޓްރޭލިއާ. އޮސްޓްރޭލިއާ އިން ނުރައްކާކުރުމަށް މަސައްކަތްކުރަމުން ދަނީ ޓިއުނީޝިއާ ޕެނަލްޓީ އޭރިއާ ތެރެއަށް ހުރަސްތައް ނަގައިގެން.

މިއަދު ގްރޫޕް ޑީގައި ކުޅޭ މެޗުތަކުން ޓީމުތަކަށް ގަދަ 16 އަށް އޮތް ފުރުސަތު

'7 - އޮސްޓްރޭލިއާ އިން ހުރަސްތަކެއް ނަގަމުންދިޔަ ނަމަވެސް، ޕެނަލްޓީ އޭރިއާ ތެރެއިން ޓިއުނީޝިއާގެ ޑިފެންޑަރުން ދަނީ އެ ބޯޅަތައް ހުއްޓުވަމުން.

މެޗުގެ ކުޅުން ފަށައިފި. ކިކްކޯފް ކުރީ އޮސްޓްރޭލިއާ އިން.