ވޯލްޑް ކަޕް: ޖަރުމަނު 1-2 ޖަޕާން (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. ފަހަތުން އަރައި ޖަރުމަން އަތުން ޖަޕާނަށް މޮޅެއް.

'90+8 - ޖަރުމަނަށް އިތުރު ފުރުސަތެއް. ކިމިޗް ނަގައިދިން ކޯނަރުން ޕެނަލްޓީ އޭރިއާ ތެރެއިން ލިބުނު ބޯޅައިން ސޫލާ ފޮނުވާލި ހަމަލާ، ޖަޕާންގެ އެންޑޯ ވަނީ ބްލޮކްކޮށްފައި.

'90+4 - ޖަރުމަނަށް ފުރުސަތެއް. ޕެނަލްޓީ އޭރިއާ ބޭރުން ގޮރެޓްޒްކާ ފޮނުވާލި ބާރު ހަމަލާ ދިޔައީ ޖަޕާން ގޯލުގެ އަރިމަތީ ދަނޑިކައިރިން ބޭރަށް.

ދެވަނަ ހާފުގެ އިތުރު ވަގުތުގެ ގޮތުގައި ހަތް މިނެޓުގެ ކުޅުން ދައްކައިފި

'83 - ޖަޕާނުން އިތުރު ގޯލެއް ޖަހައި، ލީޑު ހޯދައިފި. ކޯ އިޓަކޫރާ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ޖަޕާނަށް އެ ގޯލު ކާމިޔާބުކޮށްދިނީ ޓަކޫމާ އަސާނޯ.

'80 - ޖަރުމަނަށް ފުރުސަތެއް. ކިމިޗް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ ރުޑިގާ ބޮލުން ފޮނުވާލި ހަމަލާ ދިޔައީ ޖަޕާން ގޯލުގެ ހުރަސް ދަނޑިމަތިން ބޭރަށް.

'79 - ޖަރުމަނުން ދެ ބަދަލެއް. ހަވާޓްސް އާއި މުސިއާލާގެ ބަދަލުގައި ނިކްލަސް ފުލްކްރުގް އަދި މާރިއޯ ގޮޓްޒޭ.

'75 - ޖަޕާނުން ގޯލެއް ޖަހައި ނަތީޖާ ހަމަހަމަކޮށްފި. ވަރަށް ހުސްކޮށް ހުރެ ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ޖަޕާނަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ރިޓްސޫ ޑޮއާން. އޭނާ އެ ގޯލު ކާމިޔާބުކުރީ މިނަމީނޯ ފޮނުވާލި ހަމަލާއެއް ޖަރުމަން ކީޕަރު ނޯޔާ މަތަކުރުމާއެކު ލިބުނު ރީބައުންސް ބޯޅައިން.

'73 - ޖަޕާނަށް ރަނގަޅު ދެ ފުރުސަތެއް. ޕެނަލްޓީ އޭރިއާ ތެރެއިން އޮސާނޯ ފޮނުވާލި ހަމަލާ ކީޕަރު ނޯޔާ މަތަކުރި އިރު، ރީބައުންސް ބޯޅައިން ފޮނުވާލި ހަމަލާ ގޯލާ އަމާޒުވެފައެއް ނުވޭ.

'71 - ކައިރިކައިރީގައި ޖަރުމަނަށް ފުރުސަތުތަކެއް. ގްނަބްރީ ދިން ބޯޅައަކުން ގޮރެޓްޒްކާ ފޮނުވާލި ހަމަލާ ކީޕަރު ގޮންޑާ ވަނީ މަތަކޮށްފައި. އޭގެ ފަހުން ޕެނަލްޓީ އޭރިއާ ބޭރުން ގްނަބްރީ ފޮނުވާލި ހަމަލާ ވެސް ގޮންޑާ ވަނީ މަތަކޮށްފައި. އަދި ރާމް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ގްނަބްރީ ބޮލުން ފޮނުވާލި ހަމަލާ އާއި ރީބައުންސް ބޯޅައިން އޭނާ ފޮނުވާލި ހަމަލާ ވެސް ކީޕަރު ގޮންޑާ ވަނީ މަތަކޮށްފައި.

'69 - ޖަޕާނަށް ފުރުސަތެއް. ސަކާއީ ދިން ބޯޅައަކުން ޕެނަލްޓީ އޭރިއާ ތެރެއިން އޮސާނޯ ފޮނުވާލި ހަމަލާ މިފަހަރުވެސް ޖަރުމަން ޑިފެންޑަރު ރުޑިގާ ވަނީ ބްލޮކްކޮށްފައި.

'67 - ޖަރުމަނުން ދެ ބަދަލެއް. މުލާ އާއި ގުންޑޮގާންގެ ބަދަލުގައި ކުޅެން ނުކުތީ ޖޮނަސް ހޮފްމަން އާއި ލިއޯން ގޮރެޓްޒްކާ.

'66 - ޕެނަލްޓީ އޭރިއާ ތެރެއިން އޮސާނޯ ފޮނުވާލި ހަމަލާ، ޖަރުމަނުގެ ޑިފެންޑަރު ރުޑިގާ ދިފާއުކޮށްފި.

'59 - ޖަރުމަންގެ ނުރައްކާތެރި ހަމަލާއެއް. މުސިއާލާ ދިން ބޯޅައަކުން ޕެނަލްޓީ އޭރިއާ ތެރެއިން ގުންޑޮގާން ފޮނުވާލި ހަމަލާ އަމާޒުވީ ޖަޕާން ގޯލުގެ އަރިމަތީ ދަނޑިއަށް.

'57 - ޖަޕާނުގެ ދެ ބަދަލެއް. ނަގަޓޯމޯ އަދި މައޭޑާގެ ބަދަލުގައި ކުޅެން ނުކުތީ ކައޮރޫ މިޓޯމާ އަދި ޓަކޫމާ އަސާނޯ.

'56 - ރާމް ދިން ބޯޅައަކުން ޕެނަލްޓީ އޭރިއާ ތެރެއިން ހަވާޓްސް ނުރައްކާކުރުމުގެ ކުރިން ޖަޕާން ކީޕަރު ގޮންޑާ ވަނީ ހުރަސް އަޅާފައި.

'51 - ޖަރުމަނަށް ރަނގަޅު ފުރުސަތެއް. ޖަޕާނުގެ ހަތަރު ކުޅުންތެރިއެއް ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއިން މުސިއާލާ ފޮނުވާލި ހަމަލާ ދިޔައީ ޖަޕާން ގޯލުގެ ހުރަސްދަނޑި މަތިން ބޭރަށް.

'48 - ޖަރުމަންގެ ނުރައްކަލެއް. މުލާ ދިން ބޯޅައަކުން ގްނަބްރީ އަރިމަތިން ޕެނަލްޓީ އޭރިއާ ތެރެއަށް ވަދެ ފޮނުވާލި ބާރު ހަމަލާ އަމާޒުވީ ޖަޕާން ގޯލުގެ ހުރަސްދަނޑިއަށް.

ޖަޕާނުން ދެވަނަ ހާފަށް ނުކުތީ ބަދަލަކާއެކު. ކޫބޯގެ ބަދަލުގައި ކުޅެން ނުކުތީ ފުލްބެކް ޓެކެހީރޯ ޓޮމިޔާސޫ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފް ނިމިގެންދިޔައީ 1-0 ގެ ނަތީޖާއަކުން ޖަރުމަން ކުރީގައި އޮވެގެން.

'45+4 - ޖަރުމަނަށް ރަނގަޅު ފުރުސަތެއް. ޕެނަލްޓީ އޭރިއާ ބޭރުން ކިމިޗް ފޮނުވާލި ހަމަލާ ޖަޕާނުގެ ކީޕަރު ގޮންޑާ ވަނީ މަތަކޮށްފައި. ރީބައުންސް ބޯޅަ ލިބުމާއެކު ގްނަބްރީ ދިން ބޯޅައަކުން ކައި ހަވާޓްސް، ޖަޕާނުގެ ގޯލުގެ ތެރެއަށް ބޯޅަ ފޮނުވާލި ނަމަވެސް، ވީއޭއާރަށް ބަލައި ރެފްރީ ނިންމީ ހަވާޓްސް އޮފްސައިޑް މަގާމެއްގައި ހުރި ކަމަށް.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'45 - ޖަރުމަނަށް އިތުރު ފުރުސަތެއް. ސޫލާ ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު މުސިއާލާ ފޮނުވާލި ހަމަލާ ދިޔައީ ޖަޕާން ގޯލުގެ ހުރަސް ދަނޑިމަތިން ބޭރަށް.

'42 - ޖަރުމަންގެ ހަމަލާއެއް. މުލާ ދިން ބޯޅައަކުން ޕެނަލްޓީ އޭރިއާ ބޭރުން ކިމިޗް ފޮނުވާލި ހަމަލާ، ޖަޕާނުގެ ގޯލާ އަމާޒުވެފައެއް ނުވޭ.

'38 - މުސިއާލާގެ ހަމަލާ ޖަރުމަންގެ ޑިފެންޑަރުން ބްލޮކްކޮށްފި. ޖަރުމަނަށް ބޯޅަ ލިބުމާއެކު ޖަޕާންގެ ގިނަ ކުޅުންތެރިންތަކެއް ޑިފެންސަށް ފައިބާކަން ފާހަގަކޮށްލެވޭ،

'33 - ޖަރުމަނުން ލީޑު ހޯދައިފި. ޖަރުމަންގެ ޕެނަލްޓީ އެޓީމަށް ކާމިޔާބުކޮށްދިނީ އިލްކާއީ ގުންޑޮގަން.

'32 - ޕެނަލްޓީ އޭރިއާ ތެރެއިން ރާމްއަށް ޖަޕާން ކީޕަރު ގޮންޑާ ކުރި ފައުލަކާ ގުޅިގެން ޖަރުމަނަށް ޕެނަލްޓީއެއް.

'29 - ޖަރުމަނަށް އިތުރު ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ގުންޑޮގަން މިފަހަރު ފޮނުވާލި ހަމަލާ، ޖަޕާން ޑިފެންޑަރު ޔޮޝީޑާ ވަނީ ބްލޮކްކޮށްފައި.

'28 - ޖަރުމަންގެ ނުރައްކަލެއް. ގްނަބްރީ ދިން ބޯޅައަކުން ޕެނަލްޓީ އޭރިއާ ބޭރުން ޖަރުމަން މިޑްފީލްޑަރު ގުންޑޮގަން ފޮނުވާލި ބާރު ހަމަލާ، ގޮންޑޯ ވަނީ މަތަކޮށްފައި.

'21 - ޖަރުމަނުގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން ކިމިޗް ފޮނުވާލި ބާރު ހަމަލާ، ޖަޕާނުގެ ކީޕަރު ގޮންޑާ ވަނީ ހުޝިޔާރުކަމާއެކު މަތަކޮށްފައި.

ގިނަ ވަގުތު ބޯޅަ ހިފަހައްޓައިގެން ކުޅެމުންދަނީ ޖަރުމަނުން. އެޓޭކުގައި ވެސް ނުރައްކާކޮށް ފެންނަނީ ޖަރުމަން.

'17 - ޖަރުމަނަށް ރަނގަޅު ފުރުސަތެއް. ޖޯޝުއާ ކިމިޗް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ، ޖަރުމަން ޑިފެންޑަރު އެންޓޯނިއޯ ރުޑިގާ ބޮލުން ފޮނުވާލި ހަމަލާ ދިޔައީ ޖަޕާން ގޯލުގެ އަރިމަތީ ދަނޑި ކައިރިން ބޭރަށް.

'16 - ކައި ހަވާޓްސް ނަގައިދިން ހުރަސް، ޕެނަލްޓީ އޭރިއާ ތެރެއިން ޖަޕާނުުގެ އިޓަކޫރާ ދިފާއުކޮށްފި.

ޖަޕާނާއި ޖަރުމަނުގެ ކުރިމަތިލުންތަކަށް ނަޒަރެއް

'8 - ޖަޕާނުގެ ކައުންޓާ އެޓޭކެއް. ގުންޑޮގަން އަތުން ބޯޅަ ގެއްލުމާއެކު ޖަޕާނުގެ މިޑްފީލްޑުން ދިން ބޯޅައަކުން ޕެނަލްޓީ އޭރިއާ ތެރެއިން ޖަޕާން ފޯވަޑް މައޭޑާ، ޖަރުމަނުގެ ގޯލުގެ ތެރެއަށް ބޯޅަ ފޮނުވާލި ނަމަވެސް، އޭނާ ހުރީ އޮފްސައިޑް މަގާމެއްގައި.

މެޗުގެ ފުރަތަމަ ފަސް މިނެޓުގައި ދެ ޓީމުގެ ފަރާތުން ފެނުނީ ދާދި ހަމަހަމަ ކުޅުމެއް. ޖަޕާނުން ވެސް އަންނަނީ ޖަރުމަނުގެ ގޯލަށް ނުރައްކާކުރުމަށް މަސައްކަތްކުރަމުން.

މެޗުގެ ކުޅުން ފަށައިފި. ކިކްއޯފް ކުރީ ޖަރުމަނުން.