ވޯލްޑް ކަޕް: މޮރޮކޯ 0-0 ކްރޮއޭޝިއާ (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ ކްރޮއޭޝިއާ އަދި މޮރޮކޯއަށް ވެސް ގޯލެއް ނުޖެހި އެއްވަރުވެގެން.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'90 - ކްރޮއޭޝިއާ އިން އިތުރު ބަދަލެއް. މެރިސިޗްގެ ބަދަލުގައި ކުޅެން ނުކުތީ އޯސިޗް.

'81 - މޮރޮކޯ އިން ދެ ބަދަލެއް. އެން ނަސީރީ އާއި އޫނާހީގެ ބަދަލުގައި ކުޅެން ނުކުތީ އަބްދުއްރައްޒާކް ހަމްދުﷲ އަދި އަބްދުލްހާމިދު ސަބީރީ.

'79 - ކްރޮއޭޝިއާ އިން ބަދަލެއް. ކޮވަސިޗްގެ ބަދަލުގައި ކުޅެން ނުކުތީ މާޖާ.

'78 - މޮޑްރިޗަށް ކުރި ފައުލަކާ ގުޅިގެން މޮރޮކޯގެ އަމްރަބާތަށް ރީނދޫ ކާޑެއް.

'71 - ކްރޮއޭޝިއާ ކެޕްޓަން މޮޑްރިޗްގެ ނުރައްކާތެރި ބޯޅައެއް. ހިލޭ ޖެހުމަކުން މޮޑްރިޗް ނަގައިދިން ބޯޅަ، މޮރޮކޯގެ ޕެނަލްޓީ އޭރިއާ ތެރެއިން ދިފާއުކުރީ އެން ނަސީރީ.

'65 - މޮރޮކޯ އިން ބަދަލެއް. ސޮފިއާން ބުފާލްގެ ބަދަލުގައި ކުޅެން ނުކުތީ އަބްދުއްސަމަދު އެޒަލްޒޫލީ.

'64 - މޮރޮކޯގެ ނުރައްކާތެރި ހަމަލާއެއް. ހިލޭ ޖެހުމުން ޒިޔެޗް ޖައްސާލި ބޯޅައިން ޕެނަލްޓީ އޭރިއާ ބޭރުން ހަކީމީ ފޮނުވާލި ބާރު ހަމަލާ، ކްރޮއޭޝިއާގެ ކީޕަރު ލިވަކޮވިޗް ވަނީ މަތަކޮށްފައި.

'63 - އާމަލާއަށް ކޮރޮއޭޝިއާ ކެޕްޓަން މޮޑްރިޗް ކުރި ފައުލަކާ ގުޅިގެން ނުރައްކާ ހިސާބަކުން މޮރޮކޯއަށް ހިލޭ ޖެހުމެއް.

'60 - މޮރޮކޯ އިން ބަދަލެއް. އަނިޔާއަކާ ގުޅިގެން މަޒްރާވީގެ ބަދަލުގައި ކުޅެން ނުކުތީ އާތިޔަތަﷲ.

'53 - ކްރޮއޭޝިއާއަށް ރަނގަޅު ފުރުސަތެއް. މޮޑްރިޗް ނަގައިދިން ކޯނަރެއްގެ ތެރެއިން ލިބުނު ބޯޅައަކުން ޕެނަލްޓީ އޭރިއާ ތެރެއިން ލޮވްރެން ފޮނުވާލި ހަމަލާ، މޮރޮކޯގެ އަމްރަބާތު ވަނީ ދިފާއުކޮށްފައި.

'51 - މޮރޮކޯއަށް ރަނގަޅު ފުރުސަތެއް. ބޫފާލް ފޮނުވާލި ހަމަލާ ކްރޮއޭޝިއާގެ ޑިފެންޑަރު ލޮވްރެން ވަނީ ބްލޮކްކޮށްފައި. ރީބައުންސް ބޯޅައިން ޕެނަލްޓީ އޭރިއާ ތެރޭ ހުރެ މަޒްރާވީ ބޮލުން ފޮނުވާލި ހަމަލާ ކްރޮއޭޝިއާގެ ކީޕަރު ލިވަކޮވިޗް ވަނީ މަތަކޮށްފައި.

ކްރޮއޭޝިއާ އިން ދެވަނަ ހާފަށް ނުކުތީ ބަދަލަކާއެކު. ވްލަސިޗްގެ ބަދަލުގައި ކުޅެން ނުކުތީ މާރިއޯ ޕަސަލިޗް.

މެޗުގެ ދެވަނަ ހާފުގެ ކުޅުން ފަށައިފި. ފެށީ ކްރޮއޭޝިއާ އިން.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުން ކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.

'45+2 - ކްރޮއޭޝިއާގެ އިތުރު ހަމަލާއެއް. ވްލަސިޗް ފޮނުވާލި ހަމަލާ، އަގުއާޑް ބްލޮކްކުރުމާއެކު ލިބުނު ރީބައުންސް ބޯޅައިން ޕެނަލްޓީ އޭރިއާ ބޭރުން މޮޑްރިޗް ފޮނުވާލި ހަމަލާ ދިޔައީ މޮރޮކޯ ގޯލުގެ ހުރަސްދަނޑި މަތިން ބޭރަށް.

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

'45 - ކްރޮއޭޝިއާގެ ނުރައްކާތެރި ހަމަލާއެއް. ސޮސާ ދިން ބޯޅައަކުން ޕެނަލްޓީ އޭރިއާ ތެރެއިން ވްލަސިޗް ފޮނުވާލި ހަމަލާ، މޮރޮކޯގެ ކީޕަރު ބޫނޯ ވަނީ ހުޝިޔާރުކަމާއެކު މަތަކޮށްފައި.

ޒިޔެޗް މިފަހަރުގެ ވޯލްޑް ކަޕަށް މޮރޮކޯއާއެކު ނުކުތީ މިދިޔަ އަހަރު ރިޓަޔާކުރަން ނިންމި ނިންމުން ބަދަލުކޮށްފައި. އެފަހަރު ޒިޔެޗް ރިޓަޔާކުރަން ނިންމީ އޭރުގެ ކޯޗު ވާހިދު ހަލީލްހޮޒިޗްއާ ބޮޑެތި މައްސަލަތަކެއް ޖެހިގެން. ޒިޔެޗް އެ ނިންމުން ބަދަލުކުރީ މިހާރުގެ ކޯޗު ވަލީދު ރެގްރަގޫގެ އެދުމަށް.

'40 - ހަކީމީއަށް މޮޑްރިޗް ކުރި ފައުލަކާ ގުޅިގެން މޮރޮކޯއަށް ހިލޭ ޖެހުމެއް.

'34 - ކޮވަސިޗް ދިން ބޯޅަ، ޕެނަލްޓީ އޭރިއާ ތެރެއިން ވްލަސިޗްއަށް ލިބުމުގެ ކުރިން މޮރޮކޯ ޑިފެންޑަރު ރޯމަން ސައިސް ދިފާއުކޮށްފި.

ދެ ޓީމުން ވެސް ކުޅެމުންދަނީ ވަރަށް ބޮޑަށް ޑިފެންސަށް ވިސްނައިގެން.

'31 - ޒިޔެޗް ދިން ބޯޅަ ކްރޮއޭޝިއާގެ ޕެނަލްޓީ އޭރިއާ ތެރެއިން މޮރޮކޯ ފޯވަޑް އެން ނަސީރީއަށް ލިބޭ ގޮތެއް ނުވި.

'25 - ޕެނަލްޓީ އޭރިއާ ތެރެއިން އެން ނަސީރީ ފޮނުވާލި ހަމަލާ، ކްރޮއޭޝިއާގެ ޑިފެންޑަރު ޑެޖާން ލޮވްރެން ބްލޮކްކޮށްފި.

'22 - ޕެނަލްޓީ އޭރިއާ ތެރެއިން ވްލަސިޗް ނުރައްކާކުރުމުގެ ކުރިން މޮރޮކޯގެ ޑިފެންޑަރުން އެ ބޯޅަ ދިފާއުކޮށްފި.

'17 - ކްރޮއޭޝިއާގެ ހަމަލާއެއް. ކްރޮއޭޝިއާގެ ޕެރިސިޗް ދުރުން ފޮނުވާލި ހަމަލާ ދިޔައީ މޮރޮކޯ ގޯލުގެ ހުރަސްދަނޑި މަތިން ބޭރަށް.

'14 - މޮޑްރިޗް ނަގައިދިން ހުރަސް، މޮރޮކޯގެ ޕެނަލްޓީ އޭރިއާ ތެރެއިން ކްރޮއޭޝިއާގެ ކުޅުންތެރިޔަކަށް ލިބޭ ގޮތެއް ނުވި.

'13 - މޮރޮކޯގެ ހަމަލާއެއް. ހަކީމީ ދިން ބޯޅައަކުން ޕެނަލްޓީ އޭރިއާ ބޭރުން ޒިޔެޗް ފޮނުވާލި ހަމަލާ، ކްރޮއޭޝިއާ ޑިފެންޑަރު ލޮވްރެން ވަނީ ބްލޮކްކޮށްފައި.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ދެޓީމުގެ ފަރާތުން ވެސް ފެނިގެން ގޮސްފައިވަނީ ދާދި ހަމަހަމަ ކުޅުމެއް. ދެ ޓީމަށް ވެސް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

'7 - އަމަލާ ދިން ބޯޅަ ކްރޮއޭޝިއާގެ ޕެނަލްޓީ އޭރިއާ ތެރެއިން މޮރޮކޯގެ އެން ނެސީރީއަށް ލިބުމުގެ ކުރިން ކްރޮއޭޝިއާގެ ޑިފެންޑަރުން ދިފާއުކޮށްފި.

މެޗުގެ ކުޅުން ފަށައިފި، ކިކްއޯފް ކުރީ މޮރޮކޯ އިން.