ވޯލްޑް ކަޕް: އިންގްލެންޑް 6-2 އިރާން (ފުލްޓައިމް)

މެޗުގެ އުސްއަލިތައް:

މެޗުގެ ދެވަނަ ހާފު ނިންމާލައިފި. މެޗު ނިމިގެންދިޔައީ 6-2 ގެ ނަތީޖާއަކުން އިންގްލެންޑް ކުރީގައި އޮވެގެން.

އީރާނުން ދެވަނަ ގޯލު ޖަހައިފި. އީރާންގެ ޕެނަލްޓީ ކާމިޔާބުކޮށްދިނީ އެޓީމުގެ ފުރަތަމަ ގޯލު ވެސް ކާމިޔާބުކޮށްދިން މެހްދީ ޓަރޭމީ.

'45+11 - ވީއޭއާރުން ބެލުމަށްފަހު އީރާނަށް ޕެނަލްޓީއެއް.

އިންގްލެންޑްގެ ޕެނަލްޓީ އޭރިއާ ތެރެއިން އިންގްލެންޑްގެ ޖޯން ސްޓޯންސް ފައުލު ކުރިތޯ ބެލުމަށް ވީއޭއާރްއަށް ބަލަނީ.

'90+8 - އީރާނަށް ރަނގަޅު ފުރުސަތެއް. ޕެނަލްޓީ އޭރިއާ ތެރެއަށް ވަނުމަށްފަހު، ސަރްދާރް އަޒްމޫން ފޮނުވާލި ބާރު ހަމަލާ، ކީޕަރު ޕިކްފޯޑްގެ އަތުގައި ޖެހިފައި އަމާޒުވީ އިންގްލެންޑް ގޯލުގެ ހުރަސްދަނޑިއަށް.

މެޗުގެ ދެވަނަ ހާފުގެ އިތުރު ވަގުތުގެ ގޮތުގައި ދިހަ މިނެޓުގެ ކުޅުން ދައްކައިފި.

'90 - އިންގްލެންޑުގެ ހަ ވަނަ ގޯލު ޖަހައިފި. ވިލްސަން ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ޖެކް ގްރީލިޝް.

'78 - އީރާންގެ ހަ ވަނަ ބަދަލު. ނޫރައްލާހިގެ ބަދަލުގައި ކުޅެން ނުކުތީ ސަރްދާރް އަޒްމޫން.

'77 - އީރާނަށް ފުރުސަތެއް. ޕެނަލްޓީ އޭރިއާ ތެރެއަށް ވަނުމަށްފަހު ޓަރޭމީ ފޮނުވާލި ހަމަލާ ދިޔައީ އިންގްލެންޑް ގޯލުގެ ހުރަސް ދަނޑިމަތިން ބޭރަށް.

'76 - އިންގްލެންޑްގެ ފަސްވަނަ ބަދަލު. ކެޕްޓަން ހެރީ ކޭންގެ ބަދަލުގައި ކުޅެން ނުކުތީ ކެލަމް ވިލްސަން.

'71 - އިންގްލެންޑުން ފަސްވަނަ ގޯލު ޖަހައިފި. ޕެނަލްޓީ އޭރިއާ ތެރެއިން އީރާންގެ ޑިފެންޑަރެއް ކައިރިން ނައްޓާލުމަށްފަހު ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ރަޝްފާޑް. އޭނާ އެ ގޯލު ޖެހީ ކުޅެން ނުކުތްތާ މިނެޓެއް ވެސް ނުވަނީސް.

'71 - އިންގްލެންޑުން ހަތަރު ބަދަލެއް. މެގުއާ، ސަކާ، މައުންޓް އަދި ސްޓާލިންގެ ބަދަލުގައި ކުޅެން ނުކުތީ އެރިކް ޑަޔާ، ފިލް ފޮޑެން، ޖެކް ގްރީލިޝް އަދި މާކަސް ރަޝްފާޑް.

'70 - އީރާންގެ ދެ ހަމަލާއެއް. ޕެނަލްޓީ އޭރިއާ ބޭރުން ނޫރައްލާހި ފޮނުވާލި ހަމަލާ، އިންގްލެންޑްގެ ޑިފެންޑަރުން ވަނީ ބްލޮކްކޮށްފައި. ރީބައުންސް ބޯޅައިން ފޮނުވާލި ހަމަލާ އިންގްލެންޑްގެ ގޯލާ އަމާޒުވެފައެއް ނުވޭ.

'68 - އަނިޔާއަކާ ގުޅިގެން އިންގްލެންޑް ޑިފެންޑަރު ހެރީ މެގުއާ ދަނޑުން ފާބައިފި.

'65 - އީރާންގެ ގޯލެއް. ގޮލިޒަޑޭހް ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ބާރު ހަމަލާއަކުން އީރާނަށް އެ ގޯލު ކާމިޔާބުކޮށްދިނީ މެހްދީ ޓަރޭމީ. އިންގްލެންޑުގެ ގޯލުގެ ތެރެއަށް އެ ބޯޅަ ވަދެފައިވަނީ ގޯލުގެ ހުރަސް ދަނޑީގައި ޖެހިފައި.

'62 - ސަކާގެ ރީތި ގޯލެއް. ސްޓާލިން ދިން ބޯޅަ، ޕެނަލްޓީ އޭރިއާ ތެރެއިން ސަކާ ވަނީ ވަރަށް ބަލާލާފައި އީރާންގެ ގޯލުގެ ތެރެއަށް ފޮނުވާލާފައި. މިއީ މި މެޗުގައި ސަކާ ޖެހި ދެވަނަ ގޯލު.

'61 - އީރާންގެ އެޒަޓޮލާހީ ދުރުން ފޮނުވާލި ހަމަލާ، އިންގްލެންޑްގެ ގޯލާ އަމާޒު ނުވެ ބޭރަށް.

'59 - އިންގްލެންޑްގެ ނުރައްކަލެއް. ޕެނަލްޓީ އޭރިއާ ބޭރުން ލިބުނު ބޯޅައިން ލޫކް ޝޯ ފޮނުވާލި ހަމަލާ، އީރާންގެ ކަނާނީ ވަނީ ބްލޮކްކޮށްފައި.

'56 - ކޭން ދިން ބޯޅައެއް ހިފައިގެން ޕެނަލްޓީ އޭރިއާ ވަންނަން ދަނިކޮށް، އީރާންގެ ޑިފެންޑަރުން ބޯޅަ ދިފާއުކޮށްފި.

'54 - ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ބެލިންހަމް ދިން ބޯޅަ، އިންގްލެންޑްގެ ކުޅުންތެރިޔަކަށް ލިބުމުގެ ކުރިން އީރާންގެ ޑިފެންޑަރުން އެ ބޯޅަ ދިފާއުކޮށްފި.

'48 - އިންގްލެންޑް ކެޕްޓަން ހެރީ ކޭންއަށް ކުރި ފައުލަކާ ގުޅިގެން އީރާން ޕޫރަލިގަންޖީއަށް ރީނދޫ ކާޑެއް.

އީރާނުން ދެވަނަ ހާފަށް ނުކުތީ ދެ ބަދަލާއެކު. ކަރީމީ އާއި ޖަހަންބަކްޝް އަދި ޗެޝްމީގެ ބަދަލުގައި ކުޅެން ނުކުތީ އެޒަޓޮލާހީ އާއި ގޮލިޒަޑޭހް އަދި ކަނާނީ.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ އިންގްލެންޑުން.

މެޗުގެ ފުރަތަަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 3-0 ގެ ނަތީޖާއަކުން އީރާން ކުރީގައި އޮވެގެން.

'45+15 - ޝޯ ރީތި ހިލޭ ޖެހުމެއް އީރާންގެ ޕެނަލްޓީ އޭރިއާ ތެރެއަށް ނަގައިދިން ނަމަވެސް، މެގުއާއަށް އެ ބޯޅަ ނިންމައިލެވިފައެއް ނުވޭ. އޭނާ ހުރީ އެ ބޯޅަ ލިބޭނެ ކަމަށް ރަނގަޅަށް ނުވިސްނައި.

'45+11 - އީރާނަށް ހުސް ފުރުސަތެއް. ހަޖިސާފީ ނަގައިދިން ހުރަހަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ޖަހަންބަކްޝް ފޮނުވާލި ހަމަލާ ދިޔައީ އިންގްލެންޑް ގޯލުގެ ހުރަސްދަނޑި މަތިން ބޭރަށް.

މެޗުގެ ފުރަތަމަ ހާފުގެ އިތުރު ވަގުތުގެ ގޮތުގައި ދައްކާފައިވަނީ 14 މިނެޓުގެ ކުޅުން. އިތުރު ވަގުތުގެ ގޮތުގައި އެހާ ގިނަ ވަގުތު ދީފައިވަނީ އީރާންގެ ކީޕަރު ބެއިރަންވާންޑަށް ފަރުވާ ދިނުމަށް ގިނަ ވަގުތުތަކަކަށް ކުޅުން މެދުކެނޑިފައި އޮތުމުން.

'45 - އިންގްލެންޑުން ތިން ގޯލުގެ ލީޑެއް ހޯދައިފި. ކައުންޓާ އެޓޭކެއްގެ ތެރެއިން ކޭން ދިން ބޯޅައަކުން އިންގްލެންޑަށް އެ ގޯލު ކާމިޔާބުކޮށްދިނީ ރަހީމް ސްޓާލިން. ޕެނަލްޓީ އޭރިއާ ތެރެއިން ސްޓާލިން ޖެހި އެ ގޯލު ފާހަގަކޮށްލެވެނީ ރީތި ގޯލެއްގެ ގޮތުގައި.

'43 - އިންގްލެންޑުން ލީޑު ފުޅާކޮށްފި. ކޯނަރެއްގެ ތެރެއިން ލިބުނު ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ސަކާ.

މެޗުގެ ފުރަތަމަ ހާފު ނިމެން ކައިރިވެފައިވާ އިރު، އީރާނަށް އިންގްލެންޑްގެ ގޯލަށް އަދި ނުރައްކާކުރެވިފައެއް ނުވޭ.

މިއީ އިންގްލެންޑްގެ ޖާޒީގައި ބެލިންގްހަމް ޖެހި ފުރަތަމަ ގޯލު. އޭނާ ވެގެން ގޮސްފައިވަނީ ވޯލްޑް ކަޕެއްގައި އިންގްލެންޑަށް ގޯލެއް ކާމިޔާބުކޮށްދިން ދެވަނައަށް އެންމެ ހަގު ކުޅުންތެރިޔާއަށް. ބެލިންގްހަމް ގޯލު ޖެހި އިރު، އޭނާގެ އުމުރަކީ 19 އަހަރާއި 145 ދުވަސް. ވޯލްޑް ކަޕެއްގައި އިންގްލެންޑަށް ގޯލު ކާމިޔާބުކޮށްދިން އެންމެ ހަގު ކުޅުންތެރިޔަކީ މައިކަލް އޮވެން. ވޯލްޑް ކަޕް 1998 ގައި އޮވެން ގޯލު ޖެހި އިރު، އޭނާގެ އުމުރަކީ 18 އަހަރާއި 190 ދުވަސް.

'35 - އިންގްލެންޑުން ލީޑު ހޯދައިފި. ލޫކް ޝޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ޖޫޑް ބެލިންގްހަމް.

މިއަދުގެ މެޗުގެ ކުރިން ދަނޑު ބޭރުގެ ޑްރާމާ ދެގައުމަށްވެސް އޮތީ ބޮޑުކޮށް. އިރާނުން ނުކުތީ ގައުމުގައި އޮތް ބޮޑު ހަލަބޮލިކަން ހަނދާން ނައްތާލައި ފުޓުބޯޅައަށް ފޯކަސް ކުރުމަށް. އިރާނުގައި ބޮޑެތި މުޒާހަރާތައް ކުރިއަށްދަނީ ހައްޔަރުގައި ހުރި އަންހެނަކު މަރުވި މައްސަލައެއްގައި. އަނެއްކޮޅުން އިންގްލެންޑް ވެފައި އޮތީ ވޯލްޑް ކަޕާ ގުޅިގެން ގަތަރަށް އެންމެ ބޮޑަށް ފާޑުކިޔައި، ގަތަރުގެ އުސޫލުތަކަށް ގޮންޖަހަން އެންމެ ބޮޑަށް ބޭނުންވެގެން އުޅުނު ގައުމަށް.

'32 - އިންގްލެންޑްގެ ނުރައްކާތެރި ހަމަލާއެއް. ޓްރިޕިއާ ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ މެގުއާ ބޮލުން ފޮނުވާލި ހަމަލާ އަމާޒުވީ އީރާން ގޯލުގެ ހުރަސް ދަނޑިއަށް.

މެޗުގެ ފުރަތަމަ 30 މިނެޓުގެ ކުޅުން ނިމުނު އިރު، ބޯޅަ ހިފަހައްޓައިގެން މުޅިން ވެސް ހަމަލާތައް އުފައްދާފައިވަނީ އިންގްލެންޑުން. ނަމަވެސް އީރާންގެ ޑިފެންސް ފެންނަނީ ވަރުގަދަކޮށް.

'30 - އިންގްލެންޑަށް ހުސް ފުރުސަތެއް. ސަކާ ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، މޭސަން މައުންޓް ފޮނުވާލި ހަމަލާ ދިޔައީ ގޯލާ އަމާޒުނުވެ، އީރާން ގޯލުގެ އަރިމަތީ ދަނޑި ކައިރިން ބޭރަށް.

'27 - ޕެނަލްޓީ އޭރިއާ ބޭރުން އިންގްލެންޑްގެ ސަކާ ފޮނުވާލި ހަމަލާގައި ބާރެއް ނެތް. އީރާންގެ ކީޕަރު ހޮސެއިން ހޮސެއިނީ ފަސޭހަކަމާއެކު އެ ބޯޅަ ހޯދާފައި.

'25 - އިންގްލެންޑްގެ ލޫކް ޝޯއަށް ކުރި ފައުލަކާ ގުޅިގެން އީރާންގެ ޖަހަންބަކްޝްއަށް ރީނދޫ ކާޑެއް.

'19 - އަލީރެޒާ ބެއިރަންވާންޑްގެ ބަދަލުގައި ކުޅެން ނުކުންނަނީ ކީޕަރު ހޮސެއިން ހޮސެއިނީ.

'17 - ކީޕަރު އަލީރެޒާ ބެއިރަންވާންޑް، އިތުރަށް ކުޅުމުގައި ކުރިއަށް ނުގެންދެވޭނެތީ ބަދަލުކުރުމަށް އިޝާރާތްކޮށްފި.

އީރާންގެ ކީޕަރު އަލީރެޒާ ބެއިރަންވާންޑްއަކީ އެޓީމުގެ އެންމެ މުހިންމު އެއް ކުޅުންތެރިޔާ.

ބަދަލު ކީޕަރު ހޮސެއިން ހޮސެއިނީ ހުރީ ބެއިރަންވާންޑްގެ ބަދަލުގައި ކުޅެން ނުކުތުމަށް ތައްޔާރުވެގެން. ނަމަވެސް ބެއިރަންވާންޑް ވަނީ ފަރުވާއަށް ފަހު ކުޅުމުގެ ތެރެއަށް އެނބުރި އައިސްފައި.

އީރާންގެ ކީޕަރު ބެއިރަންވޭންޑްއަށް އަނިޔާވުމާ ގުޅިގެން ދަނޑު މަތީގައި އަންނަނީ އޭނާއަށް ފަރުވާދެމުން. އޭނާއަށް އަނިޔާވީ ކޭންގެ ހަމަލާ ދިފާއުކުރަން އުޅުމުގެ ތެރޭގައި އީރާން ޓީމުގެ ޑިފެންޑަރު ހޮސެއިނީއާ ދެ ކުޅުންތެރިން ޖެހިގެން.

މިއަދުގެ މެޗު ބެލުމަށް ގަތަރު ވޯލްޑް ކަޕްގެ އެމްބެސެޑަރު، އިންގްލެންޑްގެ ކުރީގެ ކެޕްޓަން ޑޭވިޑް ބެކަމްވެސް ސްޓޭޑިއަމްގައި އިންކަން ފާހަގަކުރެވޭ. އިންގްލެންޑް ކެޕްޓަން ބޭންޑްގައިވެސް ގިނަ މެޗުތަކެއް ކުޅުނު ބެކަމް ވަނީ 1996 އިން 2009 ވަނަ އަހަރާ ދެމެދު އިންގްލެންޑް ގައުމީ ޓީމަށް 115 މެޗު ކުޅެދީފައި.

'8 - އިންގްލެންޑުގެ ނުރައްކަލެއް. ޕެނަލްޓީ އޭރިއާ ތެރެއިން ހެރީ ކޭން ފޮނުވާލި ހަމަލާ، އިރާންގެ ކީޕަރު ބެއިރަންވޭންޑް ވަނީ މަތަކޮށްފައި. ރީބައުންސް ބޯޅަ، ހެރީ މެގުއާއަށް ލިބުނު ނަމަވެސް، އޭނާއަށް ރަނގަޅަށް ފޮނުވާލެވިފައެއް ނުވޭ.

އިންގްލެންޑްގެ ފުރަތަމަ 11 އަށް ސައުތުގޭޓް ނެރޭނެ ކުޅުންތެރިންނަށް ގިނަ ބަޔަކު ދިޔައީ އިންތިޒާރު ކުރަމުން. މެޗަށް ނެރުނު ކުޅުންތެރިންގެ ތެރޭގައި ޗެލްސީގެ މޭސަން މައުންޓާއި ޔުނައިޓެޑްގެ ހެރީ މެގެއާ ފާހަގަކޮށްލެވޭ، ފިލް ފޮޑެން ފެށީ ބެންޗުން.

'3 - ޓްރިޕިއާ ނަގައިދިން ކޯނަރު، އިންގްލެންޑްގެ އެއްވެސް ކުޅުންތެރިޔަކަށް ނުލިބި ގޯލް ކިކަކަށް ބޭރުވެއްޖެ.

'3 - މެޗުގެ ފުރަތަމަ ކޯނަރު އިންގްލެންޑަށް.

މެޗުގެ ކުޅުން ފަށައިފި. ކިކްއޯފް ކުރީ އީރާނުން.