ބަންގުލަދޭޝް 2-1 ރާއްޖެ

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-1ގެ ނަތީޖާއަކުން ބަންގުލަދޭޝް ކުރީގައި އޮވެގެން. މިއީ ރާއްޖެއަށް ލަދުވެތި ނަތީޖާއެއް. ބަންގުލަދޭޝް އަތުން ރާއްޖެ ބަލިވެފައި މިވަނީ 18 އަހަރަށް ފަހު.

'+90 - ރާއްޖޭގެ ހަމަލާއެއް. އަކޫ ނަގައިދިން ބޯޅައަކުން ޕެނަލްޓީ އޭރިއާ ތެރޭ ހުރެ ސަމުއްޓޭ ބޮލުން ފޮނުވާލި ހަމަލާ އަމާޒުވީ ބަންގުލަދޭޝްގެ ކީޕަރު އަނީސުރް ރަހުމާންގެ އަތަށް.

ދެވަނަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.

'88 - ބަންގުލަދޭޝް އިން އަލުން ލީޑު ހޯދައިފި. ބަންގުލަދޭޝަށް ޕެނަލްޓީ ކާމިޔާބުކޮށްދިނީ ޓޯޕޫ ބަރްމަން.

'86 - ބަންގުލަދޭޝަށް ޕެނަލްޓީއެއް. އެ ޕެނަލްޓީ ލިބުނީ ޕެނަލްޓީ އޭރިއާ ތެރެއިން ޖުވެލް ރަނާއަށް ރާއްޖޭގެ ކީޕަރު ނާޖިހު ކުރި ފައުލަކާ ގުޅިގެން. ބަންގުލަދޭޝަށް އެ ކައުންޓާ އެޓޭކަށް ފުރުސަތު ލިބުނީ ރާއްޖޭގެ ކެޕްޓަން އަކޫ އަތުން ބޯޅަ ގެއްލުމާއެކު ލިބުނު ބޯޅައިން.

'77 - ފާހިމް ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ރާއްޖޭގެ ގޯލުގެ ތެރެއަށް މަހްބުބުރް ރަހުމާން ބޯޅަ ފޮނުވާލި ނަމަވެސް، އޭނާ ހުރީ އޮފްސައިޑް މަގާމެއްގައި.

'76 - ރާއްޖެއިން އިތުރު ދެ ބަދަލު. ނިހާޓުގެ ބަދަލުގައި ކުޅެން ނުކުތީ އިސްމާއިލް އީސާ (މެސީ). އަދި ފޭދޫ އިއްބެގެ ބަދަލުގައި ކުޅެން ނުކުތީ ހަމްޒާ މުހައްމަދު (ހަމްޕު).

'74 - ބަންގުލަދޭޝް އިން ދެ ބަދަލެއް. ސުމަން ރެޒާގެ ބަދަލުގައި ކުޅެން ނުކުތީ މަހްބުބުރް ރަހުމާން. އަދި ރާކިބް ހުސައިންގެ ބަދަލުގައި ކުޅެން ނުކުތީ ޖުވެލް ރަނާ.

'66 - ބަންގުލަދޭޝަށް ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ފައިސަލް އަހުމަދު ފާހިމް ފޮނުވާލި ހަމަލާ ދިޔައީ ރާއްޖޭގެ ގޯލުގެ އަރިމަތީ ދަނޑި ކައިރިން ބޭރަށް. އޭނާގެ ހަމަލާގައި ބާރެއް ވެސް ނެތް.

މި ހާފުގައި ދެ ޓީމަށް ވެސް ލަނޑުޖަހާނެ ރަނގަޅު ފުރުސަތެއް އަދި ތަނަވަސްކުރެވިފައެއް ނުވޭ. ބަންގުލަދޭޝް އިން ކުޅެމުންދަނީ ވަރަށް ބޮޑަށް ޑިފެންސަށް ވިސްނައިގެން.

'58 - ރާއްޖެއިން އިތުރު ބަދަލެއް. އުމައިރުގެ ބަދަލުގައި ކުޅެން ނުކުތީ އަޝްއަދު އަލީ (އަޑުބަރޭ).

'51 - ރާއްޖެއިން ބަދަލެއް. ހައިޝަމްގެ ބަދަލުގައި ކުޅެން ނުކުތީ އަހުމަދު ނޫމާން (ހެލްމެޓް)/ ހައިޝަމްއަކީ ފުލް ބެކެއް. އަދި ހެލްމެޓަކީ ސެންޓާ ބެކެއް.

'50 - ޕެނަލްޓީ އޭރިއާ ތެރެއިން ސެންޓޭއަށް ރަނގަޅު ބޯޅައެއް ލިބުނު ނަމަވެސް، އޭނާ ހަމަލާއެއް ފޮނުވައިލުމުގެ ކުރިން ބަންގުލަދޭޝްގެ ޑިފެންޑަރުން ދިފާއުކޮށްފި.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ ބަންގުލަދޭޝް އިން.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1ގެ ނަތީޖާއަކުން ދެ ޓީމުން އެއްވަރުވެގެން.

'45 - ބަންގުލަދޭޝްގެ ޕެނަލްޓީ އޭރިއާ ތެރެއިން ދަގަނޑޭއަށް ރަނގަޅު ބޯޅައެއް ލިބުނު ނަމަވެސް، އޭނާ ހުރީ އޮފްސައިޑް މަގާމެއްގައި.

ރާއްޖެއިން އަދިވެސް ފެންނަނީ ވަރަށް އެޓޭކިން ކުޅުމެއް. ނަމަވެސް ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރުމަށް ވަނީ އުނދަގޫތަކަކާ ކުރިމަތިލާން ޖެހިފައި.

'39 - ޕެނަލްޓީ އޭރިއާ ބޭރުން ފޭދޫ އިއްބެ ފޮނުވާލި ހަމަލާގައި ބާރެއް ނެތް. ބަންގުލަދޭޝްގެ ގޯލާ އަމާޒުވެފައެއް ނުވޭ.

'38 - ދަގަނޑޭ ދިން ރީތި ބޯޅައެއް ސެންޓޭ ހޯދި ނަމަވެސް، އޭނާ ހުރީ އޮފްސައިޑް މަގާމެއްގައި.

'35 - ނިހާޓަށް ކުރި ފައުލަކާ ގުޅިގެން ބަންގުލަދޭޝްގެ ކެޕްޓަން ޖަމާލް ބުޔާނަށް ރީނދޫ ކާޑެއް.

'33 - ރާއްޖެއިން ނަތީޖާ ހަމަަހަމަކޮށްފި. ދަގަނޑޭ ނަގައިދިން ކޯނަރު ޕެނަލްޓީ އޭރިއާ ތެރެއިން އަކޫ ޖައްސާލުމާއެކު، ރާއްޖެއަށް އެ ލަނޑު ކާމިޔާބުކޮށްދިނީ އުމައިރު. މިއީ ރާއްޖެއިން ބަންގުލަދޭޝްގެ ގޯލަށް ފޮނުވާލި ފުރަތަމަ ހަމަލާ.

ރާއްޖޭގެ އެޓޭކު މިހާރު ވަރުގަދަ. ނަމަވެސް އަދިވެސް ބަންގުލަދޭޝްގެ ގޯލަށް ހަމަލާއެއް ފޮނުވައިލެވިފައެއް ނުވޭ. މެޗުގެ 30 މިނެޓު ނިމިގެންދިޔައީ ރާއްޖެއަށް ބަންގުލަދޭޝްގެ ގޯލަށް އެއްވެސް ހަމަލާއެއް ފޮނުވައިނުލެވި.

'29 - ރާއްޖެއަށް ރަނގަޅު ފުރުސަތެއް. ޕެނަލްޓީ އޭރިއާ ތެރެއިން ނިހާޓަށް ރަނގަޅު ބޯޅައެއް ލިބުނު ނަމަވެސް، ލަސްކުރުމުގެ ސަބަބުން މުހައްމަދު އިބްރާހިމް ވަނީ ދިފާއުކޮށްފައި. ނިހާޓަށް ވަނީ ހަމަލާއެއް ފޮނުވައިލުމަށް ވަގުތު ލިބިފައި.

'27 - ފޭދޫ އިއްބެ ނަގައިދިން ހުރަސް، ނުރައްކާވުމުގެ ކުރިން ބަންގުލަދޭޝްގެ ކީޕަރު އަނީސުރް ރަހުމާން ދިފާއުކޮށްފި.

'24 - ޖަމާލް ބުޔާން ނަގައިދިން ހިލޭ ޖެހުން ޕެނަލްޓީ އޭރިއާ ތެރެއިން ނުރައްކާވުމުގެ ކުރިން ރާއްޖޭގެ ޑިފެންޑަރު ބިޑި، އެ ބޯޅަ ދިފާއުކޮށްފި.

'19 - ކުރޯ ނަގައިދިން ހުރަސް، ބަންގުލަދޭޝްގެ ޕެނަލްޓީ އޭރިއާ ތެރެއިން ދަގަނޑޭއަށް ރަނގަޅަށް ފޮނުވައެއް ނުލެވުނު.

މެޗުގެ ފުރަތަމަ 15 މިނެޓުގެ ތެރޭގައި ރާއްޖެއަށް އެންމެ އެދެވޭ ކުޅުން ދެއްކިފައެއް ނުވޭ. ގިނަ ވަގުތު ބޯޅަ ހިފަހައްޓައިގެން ނުރައްކާކޮށްފައިވަނީ ބަންގުލަދޭޝް އިން. ރާއްޖެއަށް ބަންގުލަދޭޝްގެ ގޯލަށް އަދި ހަމަލާއެއް ފޮނުވައިލެވިފައެއް ނުވޭ.

'11 - ބަންގުލަދޭޝް އިން ލީޑު ހޯދައިފި. ރަހުމަތު މިއާގެ ދުރު އެއްލުމުން ޕެނަލްޓީ އޭރިއާ ތެރޭ ހުސްކޮށް ހުރެ ފޮނުވާލި ހަމަލާއަކުން ބަންގުލަދޭޝްއަށް އެ ލަނޑު ކާމިޔާބުކޮށްދިނީ ކެޕްޓަން ޖަމާލް ބުޔާން. އޮފްސައިޑެއް ކަމަށް ފުރަތަމަ ދެއްކި ނަމަވެސް، ފަހުން ލައިންސްމަނާ ވާހަކަދެއްކުމަށްފަހު ރެފްރީ ވަނީ އެ ނިންމުން ބަދަލުކޮށްފައި. ފަހުން ނިންމީ އެ ބޯޅަ ޖަމާލް ބުޔާންއަށް ލިބުނީ ރާއްޖޭގެ ޑިފެންޑަރެއްގެ ބޮލުގައި ޖެހިފައި ކަމަށް.

ބަންގުލަދޭޝް އިން މަސައްކަތްކުރަނީ ރާކިބް ހުސައިނަށް ބޯޅަތައް ދީގެން ރާއްޖޭގެ ގޯލަށް ނުރައްކާކުރަން.

'7 - ބޯޅަ ހިފަހައިގެން ޕެނަލްޓީ އޭރިއާ ތެރެއަށް ވަނުމަށްފަހު ރާކިބް ހުސައިން ނުރައްކާކުރުމުގެ ކުރިން ރާއްޖޭގެ ޑިފެންޑަރު ސަމުއްޓޭ، އެ ބޯޅަ ހޯދައިފި.

'4 - ދަގަނޑޭއަށް ފަހާދު ކުރި ފައުލަކާ ގުޅިގެން ބަންގުލަދޭޝްގެ ހާފުގެ ތެރެއިން ރާއްޖެއަށް ހިލޭ ޖެހުމެއް.

މި މެޗަށް ވެސް ރާއްޖޭގެ ކޯޗު މޮރިއޭރޯ ނެރުނީ ލަންކާއާ ދެކޮޅަށް ކުޅުނު މެޗުގައި ވެސް ނެރުނު ފުރަތަމަ 11.

'1 - ސެންޓޭ ނަގައިދިން ހުރަސް، ޕެނަލްޓީ އޭރިއާ ތެރެއިން ދަގަނޑޭއަށް ލިބުމުގެ ކުރިން ބަންގުލަދޭޝްގެ ޑިފެންޑަރު ޓޯޕޫ ދިފާއުކޮށްފި.

މެޗުގެ ކުޅުން ފަށައިފި. ކިކްއޯފް ކުރީ ރާއްޖެއިން.