ސްރީ ލަންކާ 4-4 ރާއްޖެ (ފުލްޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 4-4ގެ ނަތީޖާއަކުން ދެ ޓީމު އެއްވަރުވެގެން.

'+90 - ލަންކާއިން ނަތީޖާ ހަމަހަމަކޮށްފި. ލަންކާގެ ހަތަރު ލަނޑުވެސް ކާމިޔާބުކޮށްދިނީ ވަސީމް ރަޒީކް. އޭނާ އެ ލަނޑު ކާމިޔާބުކޮށްދިނީ ޕެނަލްޓީ އޭރިއާ ތެރޭ ހުއްޓައި ކޯނަރެއްގެ ތެރެއިން ލިބުނު ބޯޅައަކުން.

ދެވަނަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'87 - ރާއްޖެއަށް ފުރުސަތެއް. ޕެނަލްޓީ އޭރިއާ ތެރެއިން ހަމްޕު ފޮނުވާލި ހަމަލާ، ލަންކާގެ ކީޕަރު ސުޖަން ކުރިއަށް ނުކުމެ ވަނީ މަތަކޮށްފައި.

'79 - ރާއްޖެއިން ބަދަލެއް. ފޭދޫ އިއްބެގެ ބަދަލުގައި ކުޅެން ނުކުތީ ހަމްޒާ މުހައްމަދު (ހަމްޕު).

'73 - ރާއްޖެއިން އަދި ލަންކާ އިން ވެސް ބަދަލުތަކެއް ގެނެސްފި. ރާއްޖެއިން ނިހާޓުގެ ބަދަލުގައި އިބްރާހިމް ވަހީދު ހަސަން (އިއްބެ) އަދި ސެންޓޭގެ ބަދަލުގައި ނާއިޒް ހަސަން (ދާދު) ވަނީ ކުޅެން އަރުވާފައި.

'72 - ލަންކާގެ ތިންވަނަ ލަނޑު، ވަސީމް ރަޒީކްގެ ހެޓްރިކެއް. ޕެނަލްޓީ އޭރިއާ ތެރެއިން ލިބުނު ބޯޅަ، އޭނާ ވަނީ ރާއްޖޭގެ ގޯލުގެ ތިރީ ކަނަކަށް އަމާޒުކޮށްލާފައި.

'68 - ލަންކާގެ އިތުރު ލަނޑެއް. ޑިލޮން ޑި ސިލްވާ ދިން ބޯޅައަކުން ލަންކާއަށް އެ ލަނޑު ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ވަސީމް ރަޒީކް. އޭނާ އެ ލަނޑު ވެސް ކާމިޔާބުކުރީ ރާއްޖޭގެ ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން.

'64 - ސްރީ ލަންކާގެ ފުރަތަމަ ލަނޑު. ޕެނަލްޓީ އޭރިއާ ތެރެއިން ހުސްކޮށް ލިބުނު ބޯޅައަކުން ލަންކާއަށް އެ ލަނޑު ކާމިޔާބުކޮށްދިނީ ވަސީމް ރަޒީކް.

'61 - ލަންކާގެ ހަމަލާއެއް. ކޯނަރެއްގެ ތެރެއިން ޕެނަލްޓީ އޭރިއާ ތެރޭ ހުރެ، ޗަމޫދު ބޮލުން ފޮނުވާލި ހަމަލާ، ރާއްޖޭގެ ގޯލާ އަމާޒުވެފައެއް ނުވޭ.

'58 - ރާއްޖެއިން ހަތަރުވަނަ ލަނޑު ޖަހައިފި. ލަންކާގެ ދެ ކުޅުންތެރިއެއް ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއަށް ވަދެ ރާއްޖެއަށް އެ ލަނޑު ކާމިޔާބުކޮށްދިނީ ދަގަނޑޭ. އޭނާ އެ ބޯޅަ ފޮނުވާލީ ލަންކާ ގޯލުގެ ތިރީ ކަނަކަށް.

'51 - ރާއްޖެއަށް ހުސް ފުރުސަތެއް. ފޭދޫ އިއްބެ ދިން ބޯޅައިން ޕެނަލްޓީ އޭރިއާ ތެރޭ ހުސްކޮށް ހުރެ ސެންޓޭ ފޮނުވާލި ހަމަލާ، ލަންކާގެ ގޯލާ އަމާޒުވެފައެއް ނުވޭ.

'49 - ދަގަނޑޭގެ އިތުރު ހަމަލާއެއް. ޕެނަލްޓީ އޭރިއާ ބޭރުން ދަގަނޑޭ ފޮނުވާލި ހަމަލާ، ލަންކާގެ ގޯލާ އަމާޒުވެފައެއް ނުވޭ.

'47 - ދަގަނޑޭގެ ބާރު ހަމަލާއެއް. ދަގަނޑޭ ދުރުން ފޮނުވާލި ބާރު ހަމަލާ، ލަންކާގެ ކީޕަރު ސުޖަން ވަނީ ހުޝިޔާރުކަމާއެކު މަތަކޮށްފައި.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 3-0ގެ ނަތީޖާއަކުން ރާއްޖެ ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި އެއް މިނެޓުގެ ކުޅުން ދައްކައިފި.

މިހާރު ލަންކާއިން އަންނަނީ ކުރިއަށް ޖެހި ރާއްޖޭގެ ގޯލަށް ނުރައްކާކުރުމަށް މަސައްކަތްކުރަމުން.

'43 - ލަންކާއަށް ފުރުސަތެއް. ޕެނަލްޓީ އޭރިއާ ތެރެއިން ޑިލޮން ޑި ސިލްވާ ފޮނުވާލި ހަމަލާ، ރާއްޖޭގެ ކީޕަރު ނާޖިހު ވަނީ މަތަކޮށްފައި.

'42 - ލަންކާ އިން ބަދަލެއް. މުހައްމަދު އަމާންގެ ބަދަލުގައި ކުޅެން ނުކުތީ އަސީކުރް ރަހުމާން.

'40 - ލަންކާއަށް ފުރުސަތެއް. ޕެނަލްޓީ އޭރިއާ ތެރޭ ހުރެ، ޗަމޫދު ބޮލުން ފޮނުވާލި ހަމަލާ، ރާއްޖޭގެ ގޯލާ އަމާޒުވެފައެއް ނުވޭ.

'34 - ރާއްޖެއިން ތިން ލަނޑުގެ ލީޑެއް ހޯދައިފި. ލަންކާގެ ޑިފެންޑަރުން ކައިރިން ނައްޓާލުމަށްފަހު، ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ރާއްޖެއަށް އެ ލަނޑު ކާމިޔާބުކޮށްދިނީ ފޭދޫ އިއްބެ.

'33 - ޕެނަލްޓީ އޭރިއާ ތެރެއަށް ވަނުމަށްފަހު ފޭދޫ އިއްބެ ހަމަލާއެއް ފޮނުވާލުމުގެ ކުރިން ލަންކާގެ ޑިފެންޑަރު ޑަކްސަން ޓެކަލްކޮށް ހުރަސްއަޅައިފި.

'30 - ލަންކާގެ ޕެނަލްޓީ އޭރިއާ ތެރެއިން ސެންޓޭއަށް ހުސްކޮށް ބޯޅަ ލިބުނު ނަމަވެސް، އޭނާ ހުރީ އޮފްސައިޑް މަގާމެއްގައި.

'28 - ލަންކާގެ ޑިލޮން ޑި ސިލްވާގެ އިތުރު ހަމަލާއެއް. ރާއްޖޭގެ ޕެނަލްޓީ އޭރިއާ ތެރެއިން އޭނާ ފޮނުވާލި ހަމަލާގައި ބާރެއް ނެތް، ރާއްޖޭގެ ކީޕަރު ނާޖިހު ވަނީ ފަސޭހަކަމާއެކު އެ ބޯޅަ ހޯދާފައި.

'26 - ޕެނަލްޓީ އޭރިއާ ތެރެއިން ޑިލޮން ޑި ސިލްވާ ފޮނުވާލި ހަމަލާ، ރާއްޖޭގެ ޑިފެންޑަރުން ދިފާއުކޮށްފި.

'25 - ޑިލޮން ޑި ސިލްވާއަށް ކުރި ފައުލަކާ ގުޅިގެން ރާއްޖޭގެ ޑިފެންޑަރު ސަމުއްޓޭއަށް ރީނދޫ ކާޑެއް.

'24 - ލަންކާއަށް ހުސް ފުރުސަތެއް. ޕެނަލްޓީ އޭރިއާ ތެރެއިން ވަސީމް ރަޒީކް ފޮނުވާލި ހަމަލާ، ހައިޝަމް ވަނީ ބްލޮކްކޮށްފައި.

'17 - ލަންކާގެ ފުރަތަމަ ހަމަލާ. ޕެނަލްޓީ އޭރިއާ ބޭރުން ފަސަލް ފޮނުވާލި ހަމަލާ، ރާއްޖޭގެ ގޯލާ އަމާޒުވެފައެއް ނުވޭ.

ދެ ލަނޑަށްފަހު ވެސް ރަނގަޅު ކުޅުމެއް ދައްކަމުންދަނީ ރާއްޖެއިން. ރާއްޖޭގެ ފަރާތުން ފެންނަނީ ވަރަށް އެޓޭކިން ކުޅުމެއް.

'9 - ރާއްޖެއިން ލީޑު ފުޅާކޮށްފި. ކުރޯ ދިން ބޯޅަ ހިފައިގެން ވަރަށް ހުސްކޮށް ހުރެ ޕެނަލްޓީ އޭރިއާ ތެރެއަށް ވަނުމަށްފަހު ރާއްޖެއަށް އެ ލަނޑު ކާމިޔާބުކޮށްދިނީ ސެންޓޭ.

'8 - ރާއްޖެއިން ލީޑު ހޯދައިފި. ދަގަނޑޭ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން ރާއްޖެއަށް އެ ލަނޑު ކާމިޔާބުކޮށްދިނީ ކެޕްޓަން އަކޫ.

'7 - ރާއްޖޭގެ ހަމަލާއެއް. ދަގަނޑޭ ދިން ބޯޅައަކުން ޕެނަލްޓީ އޭރިއާ ތެރެއިން ފޭދޫ އިއްބެ ފޮނުވާލި ބާރު ހަމަލާ، ކީޕަރު ސުޖަން ވަނީ ހުޝިޔާރުކަމާއެކު މަތަކޮށްފައި.

މެޗުގެ ފުރަތަމަ ފަސް މިނެޓުގެ ތެރޭގައި ރާއްޖެއަށް އެންމެ އެދެވޭ ކުޅުމެއް ދެއްކިފައެއް ނުވޭ. ރަނގަޅަށް ބޯޅަ ހިފެހެއްޓޭ ގޮތް ވަނީ ނުވެފައި.

'4 - އުމައިރު ދިން ބޯޅަަ، ސެންޓޭއަށް ލިބުމުގެ ކުރިން ލަންކާގެ ކީޕަރު ސުޖަން ކުރިއަށް ނުކުމެ ދިފާއުކޮށްފި.

'3 - ކުރޯއަށް ލަންކާގެ އިޝާން ކުރި ފައުލަކާ ގުޅިގެން އަމިއްލަ ހާފުގެ ތެރެއިން ރާއްޖެއަށް ހިލޭ ޖެހުމެއް.

'2 - އިޝާން ދިން ބޯޅަ، ރާއްޖޭގެ ޕެނަލްޓީ އޭރިއާ ތެރެއިން ނުރައްކާވުމުގެ ކުރިން އަކޫ އެ ބޯޅަ ހޯދައިފި.

މެޗުގެ ކުޅުން ފަށައިފި. ކިކްއޯފް ކުރީ ރާއްޖެއިން.

މެޗުގައި ރާއްޖޭގެ ޓީމަށް ސަޕޯޓުކުރުމަށް ލަންކާގައި ދިރިއުޅޭ ގިނަ އަދަދެއްގެ ދިވެހި ރައްޔިތުން ވަނީ ދަނޑަށް ވަދެފައި.

މި މެޗަށް ނެރުނު ފުރަތަމަ 11ގައި ބަދަލުތަކެއް ފާހަގަކުރެވޭ. ރާއްޖޭގެ އެއް ނަންބަރު ގޯލްކީޕަރު މުހައްމަދު ފައިސަލް އަނިޔާގައި ހުރުމުން މި މެޗުގައި ރާއްޖޭގެ ގޯލު ބަލަހައްޓާނީ އަލީ ނާޖިހު. މިއީ ފުރަތަމަ 11 ގައި ނާޖިހު ކުޅޭ ފުރަތަމަ މެޗު. އޭގެ އިތުރުން ހަމްޒާ މުހައްމަދު (ހަމްޕު)ގެ ބަދަލުގައި ތަޖުރިބާކާރު މިޑްފީލްޑަރު މުހައްމަދު އުމައިރަށް ފުރަތަމަ 11 އިން ވަނީ ފުރުސަތު ދީފައި.

މުބާރާތް ހުޅުވުމުގެ ރަސްމިއްޔާތުގެ ޝަރަފުވެރި މެހެމާނަކީ ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު. ރައީސްގެ އިތުރުން ރާއްޖޭގެ ކުޅިވަރާ ބެހޭ ވަޒީރު އަހުމަދު މަހުލޫފާއި ލަންކާގެ ކުޅިވަރާ ބެހޭ ވަޒީރު ނަމާލް ރާޖަޕަކްސަ ވެސް މެޗު ބައްލަވައިލެއްވުމަށް ވަނީ ދަނޑަށް ވަޑައިގެންފައި.