ސާފް ޗެމްޕިއަންޝިޕް 2021 ފައިނަލް: އިންޑިއާ 3-0 ނޭޕާލް

އިންޑިއާއަށް ތަށި ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު.

ޗެމްޕިއަން އިންޑިއާއަށް ފައިސާގެ އިނާމެއްގެ ގޮތުގައި 50،000 ޑޮލަރު.

ރަނަރަޕް ނޭޕާލަށް ފައިސާގެ އިނާމެއްގެ ގޮތުގައި 25،000 ޑޮލަރު.

މުބާރާތުގެ އެންމެ މޮޅު ކުޅުންތެރިޔަކަށް ވެސް އިންޑިއާގެ ކެޕްޓަން ސުނިލް ޗެތުރީ.

އެންމެ ގިނަ ގޯލު ޖެހި ކުޅުންތެރިޔަކަށް ވެސް އިންޑިއާގެ ކެޕްޓަން ސުނިލް ޗެތުރީ. ޗެތުރީ ވަނީ މުބާރާތުގައި ފަސް ލަނޑު ކާމިޔާބުކޮށްފައި.

ފައިނަލް މެޗުގެ މޮޅު ކުޅުންތެރިޔަކަށް އިންޑިއާގެ ކެޕްޓަން ސުނިލް ޗެތުރީ.

ފެއާޕްލޭ އެވޯޑު ރާއްޖެއަށް. އެވޯޑާ ހަވާލުވީ ރާއްޖޭގެ ގައުމީ ޓީމުގެ ކެޕްޓަން އަކުރަމް އަބްދުލްޤަނީ.

ތައްޓާއި މެޑަލް ހަވާލުކޮށްދެއްވާނީ ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު. އެމަނިކުފާނުގެ އަރިހުގައި ކުޅިވަރާ ބެހޭ ވަޒީރު އަހުމަދު މަހުލޫފާއި އެފްއޭއެމްގެ ރައީސް ބައްސާމް އަދީލް ޖަލީލު ބައިވެރިވެވަޑައިގަންނަވާ.

މެޗުގެ އުސްއަލިތައް

މެޗު ކުޅުން ނިންމާލައިފި. ފަސޭހަކަމާއެކު ނޭޕާލު ބަލިކޮށް، ޗެމްޕިއަންކަން އިންޑިއާއަށް. މިއީ އިންޑިއާ އިން ސާފް ޗެމްޕިއަންޝިޕް ކާމިޔާބުކުރި އަށްވަނަ ފަހަރު.

ދެވަނަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'90 - އިންޑިއާ އިން ތިން ލަނޑުގެ ލީޑެއް ހޯދައިފި. ނޭޕާލުގެ ޑިފެންޑަރުން ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންޑިއާއަށް އެ ލަނޑު ކާމިޔާބުކޮށްދިނީ ބަދަލު ކުޅުންތެރިޔާ ސަހަލް އަބްދުލް ސަމަދު.

'88 - ނޭޕާލުގެ ނަވަޔުގް ޝްރެސްތާއަށް ޕެނަލްޓީ އޭރިއާ ތެރެއިން ހުސްކޮށް ބޯޅަ ލިބުމުގެ ކުރިން އިންޑިއާގެ ކީޕަރު ގުރަޕްރީތު ސިންހް ކުރިއަށް ނުކުމެ ދިފާއުކޮށްފި.

'83 - ނޭޕާލުގެ މަނީޝް ޑަންގީ ދުރުން ފޮނުވާލި ހަމަލާ، އިންޑިއާގެ ގޯލާ އަމާޒެއް ނުވި.

'80 - ޕެނަލްޓީ އޭރިއާ ތެރެއިން އިންޑިއާގެ އުދަންތާ ފޮނުވާލި ބާރު ހަމަލާ، ނޭޕާލުގެ ރޯހިތު ޗާންދު ބްލޮކުކޮށްފި.

'77 - ނޭޕާލުގެ ނުރައްކާތެރި ހަމަލާއެއް. ޕެނަލްޓީ އޭރިއާ ތެރޭ ހުރެ ނޭޕާލުގެ ރޯހިތު ޗާންދު ފޮނުވާލި ހަމަލާ އަމާޒުވީ އިންޑިއާ ގޯލުގެ ހުރަސް ދަނޑިއަށް.

'73 - އިންޑިއާގެ ނުރައްކަލެއް. އިންޑިއާގެ އަނިރުދް ތާޕާ ފޮނުވާލި ހަމަލާ، ނޭޕާލުގެ ކީޕަރު ކިރަން ވަނީ މަތަކޮށްފައި. އެ ބޯޅައަށް ޕެނަލްޓީ އޭރިއާ ތެރެއިން ޗެތުރީ ވެސް މަސައްކަތްކުރި.

'69 - އިންޑިއާގެ ހަމަލާއެއް. ޕެނަލްޓީ އޭރިއާ ތެރެއިން ސުރޭޝް ފޮނުވާލި ހަމަލާ، ނޭޕާލުގެ ގޯލާ އަމާޒުވެފައެއް ނުވޭ.

'67 - އިންޑިއާގެ ކެޕްޓަން ޗެތުރީގެ ނުރައްކަލެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ޗެތުރީ ފޮނުވާލި ހަމަލާ، ނޭޕާލުގެ ކީޕަރު ކިރަން ވަނީ މަތަކޮށްފައި.

'65 - އިންޑިއާގެ ތޭޖް ތަމަންގް ހުސްކޮށް ޕެނަލްޓީ އޭރިއާ ތެރެއަށް ވަދެ، ހަމަލާއެއް ފޮނުވައިލުމުގެ ކުރިން ރޯހިތު ޗާންދު ޓެކަލްކޮށް ދިފާއުކޮށްފި.

މިރޭގެ މެޗުގައި ޗެތުރީ ޖެހި ގޯލަކީ ގައުމީ ޓީމަށް އޭނާ ޖަހައިދިން 80 ވަނަ ގޯލު. އެ ގޯލާއެކު ޗެތުރީ ވަނީ އާޖެންޓީނާގެ ލިއޮނެލް މެސީ ގައުމީ ޓީމަށް ޖެހި ގޯލުގެ އަދަދާ އެއްވަރުކޮށްފައި. މެސީއާއި ޗެތުރީއަކީ މިހާރު ތާރީހުގައި ގައުމީ ޓީމަށް އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ ފަސްވަނަ.

'53 - އިންޑިއާއަށް އިތުރު ފުރުސަތެއް. ޗެތުރީ ދިން ބޯޅައަކުން ޕެނަލްޓީ އޭރިއާ ތެރެއިން މަންވީރު ސިންހް ފޮނުވާލި ހަމަލާ، ނޭޕާލުގެ ޑިފެންޑަރު ދިނޭޝް ވަނީ ދިފާއުކޮށްފައި.

އިންޑިއާ އިން ލީޑު ފުޅާކޮށްފައި މިވަނީ ފުރަތަމަ ލަނޑު ޖެހިތާ މިނެޓެއް ވެސް ނުވަނީސް.

'50 - އިންޑިއާ އިން ލީޑު ފުޅާކޮށްފި. ޔާސިރު މުހައްމަދު ދިން ބޯޅައަކުން ނޭޕާލުގެ ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންޑިއާއަށް އެ ލަނޑު ކާމިޔާބުކޮށްދިނީ ސުރޭޝް ސިންހް.

'49 - އިންޑިއާ އިން ލީޑު ހޯދައިފި. ޕްރިތަމް ކޮޓާލް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންޑިއާއަށް އެ ލަނޑު ކާމިޔާބުކޮށްދިނީ ކެޕްޓަން ސުނިލް ޗެތުރީ.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

ނޭޕާލުގެ ކީޕަރު ކިރަންއަށް ލިބުނު އަނިޔާއަކާ ގުޅިގެން ދަނޑުމަތީގައި އޭނާއަށް ފަރުވާދިނުމަށް ކުޅުން މެދުކަނޑާލުމަށްފަހު އަލުން ކުޅުން ފަށައިފި.

ފުރަތަމަ ހާފުގެ އިތުރު ވަގުތުގެ ގޮތުގައި އެއް މިނެޓުގެ ކުޅުން ދައްކައިފި.

'44 - އިންޑިއާގެ ކެޕްޓަން ސުނިލް ޗެތުރީއަށް ހުސް ފުރުސަތެއް. ޕްރިތަމް ކޮޓާލް ނަގައިދިން ހުރަހުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ޗެތުރީ ފޮނުވާލި ހަމަލާ ދިޔައީ ނޭޕާލު ގޯލުގެ ހުރަސް ދަނޑިމަތިން ބޭރަށް.

'43 - އިންޑިއާގެ ކީޕަރު ގުރަޕްރީތު ސިންހުގެ ފަރާތުން ގޯހެއް. އޭނާ ކުރިއަށް ފޮނުވާލި ބޯޅަ، ތޭޖް ތަމަންގް ވަނީ ބްލޮކްކޮށްފައި. އެ ބޯޅަ ނޭޕާލުގެ އެހެން ކުޅުންތެރިޔަކަށް ލިބުމުގެ ކުރިން ކީޕަރު ގްރަޕްރީތު ވަނީ ހޯދާފައި.

'42 - ޕެނަލްޓީ އޭރިއާ ތެރެއަށް ވަނުމަށްފަހު އަނިރުދް ތާޕާ، ނޭޕާލުގެ ގޯލަށް ނުރައްކާކުރުމުގެ ކުރިން ގޯތަމް ޝްރެސްތާ ޓެކުލްކޮށް ދިފާއުކޮށްފި.

'40 - ޕްރިތަމް ނަގައިދިން ހިލޭ ޖެހުން، ނޭޕާލުގެ ޕެނަލްޓީ އޭރިއާ ތެރޭ ހުސްކޮށް ހުރި އިންޑިއާގެ ޑިފެންޑަރު ރާހުލް ބެކޭއަށް ލިބުނު ނަމަވެސް، އޭނާގެ ފައިގައި ރަނގަޅަށް ބޯޅަ ލައްވާލައިފައެއް ނުވޭ.

'40 - ޕްރިތަމްއަށް ނޭޕާލުގެ ސޫޖަލް ކުރި ފައުލަކާ ގުޅިގެން ނޭޕާލުގެ ހާފުގެ ތެރެއިން އިންޑިއާއަށް ހިލޭ ޖެހުމެއް.

އިންޑިއާގެ ފަރާތުން ފެންނަނީ ވަރަށް ހަމަޖެހިލައިގެން، ރީތި ކުޅުމެއް ކުޅެމުންދާ ތަން. ނަމަވެސް އިންޑިއާއަށް ލަނޑު ޖަހާނެ ގިނަ ފުރުސަތުތަކެއް ތަނަވަސްކުރެވިފައެއް ނުވޭ.

ނޭޕާލުގެވެސް އެންމެ މުހިއްމު އެއް ކުޅުންތެރިޔާ އަންޖަން ބިސްތާވެސް މިރޭގެ މެޗަށް ހުރީ ސަސްޕެންޝަންގައި. އެންމެފަހުން ނޭޕާލުން ބަންގުލަދޭޝާ ދެކޮޅަށް ކުޅުނު މެޗުގައިވެސް ގޯލު ޖެހީ އޭނާ.

ފައިނަލަށް ނުކުންނަ އިރު، އިންޑިއާ ޓީމަށް ބައެއް އަނިޔާގެ މައްސަލަތަކުގެ އިތުރުން ސަސްޕެންޝަންގެ މައްސަލަތައްވެސް ވަނީ ކުރިމަތިވެފައި. އިންޑިއާ ޓީމުން މުހިންމު ކުޅުމެއް ދައްކަމުން ދިޔަ ފާރުކް ޗޯދުރީއަށް އޭސީއެލްގެ އަނިޔާއަކާ ކުރިމަތިވެ ގިނަ ދުވަސްތަކަކަށް ކުޅުމާ ދުރަށް ދާން ޖެހިފައިވާ އިރު، ބްރޭންޑަން ފެނާންޑޭސްވެސް ހުރީ އަނިޔާގައި. އަދި އިންޑިއާގެ އެންމެ މުހިންމު ޑިފެންޑަރު ސުބަހަޝީޝް ބޯސްއަށް ރާއްޖެ މެޗުގައި ދެއްކި ރަތްކާޑާއެކު އޭނާ ހުރީ ސަސްޕެންޝަނުގައި.

27' - ޗެތުރީގެ ހަމަލާއެއް. އަރިމަތިން އޭރިއާ ތެރެއަށް ވަދެ ތިރިތިރިން ފޮނުވާލި ހަމަލާ ކިރަން ވަނީ މަތަކޮށްފައި.

23' - އިންޑިއާއިން އަނެއްކާވެސް ނުރައްކާކޮށްފި. އަނީރުދު ތާޕާ އޭރިއާ ތެރެއަށް ވަދެ ފޮނުވާލި ހަމަލާ ބްލޮކް ކުރީ ޑިނޭޝް. އަދި ދުރުން ޔާސިރު ފޮނުވާލި ހަމަލާ ބޭރުކޮށްލީ ކިރަން.

16' ނޭޕާލަށް ހުސް ފުރުސަތެއް. އަރިމަތިން ނަގައިދިން ހުރަސް އިންޑިއާގެ ޑިފެންޑަރު ރާހުލް ފައިގައި ޖެހި ކަހާލައިގެން ގޮސް ލިބުނީ ނޭޕާލްގެ ރޯހިތު ޗާންދަށް. ގޯލު ކުރިމަތީގައި ހުސްކޮށް ހުރި ޗާންދަށްވެސް ބޯޅަ ފޮނުވައި ނުލެވުނީ ކައްސާލައިގެން.

އިންޑިއާއަކީ ތާރީހުގައި ބޭއްވި ފުރަތަމަ ސާފް ޗެމްޕިއަންޝިޕްގެވެސް ޗެމްޕިއަނުން. ޕާކިސްތާނުގެ ލާހޯރުގައި 1993 ވަނަ އަހަރު ބޭއްވި އެ ސާފް ޗެމްޕިއަންޝިޕްގައި ހަތަރު ޓީމަކުން ވާދަކުރި. އެ ހަތަރު ޓީމަކީ ޕާކިސްތާން، އިންޑިއާގެ އިތުރުން ސްރީ ލަންކާއާއި ނޭޕާލް. ލީގު އުސޫލުން ކުޅުނު މުބާރާތުގެ ތަށި އިންޑިއާއިން ނެގީ މެޗަކުން ބަލިނުވެ. އެ މުބާރާތުގައި އިންޑިއާގެ އެންމެ ފާހަގަކޮށްލެވުނު ކުޅުންތެރިޔަކީ ފޯވަޑް އައި އެމް ވިޖާޔަން. އޭނާއަކީ އެގައުމުގެ އެންމެ މޮޅު ކުޅުންތެރިޔާގެ މަގާމު ތިން ފަހަރު ހޯދި ފޯވަޑެއް.

އިންޑިއާއާއި ނޭޕާލުން ލީގު ބުރުގައި ކުޅުނު މެޗު އިންޑިއާއިން ކާމިޔާބުކުރީ 1-0 ގެ ނަތީޖާއަކުން. މެޗުގެ ހަމައެކަނި ގޯލު ކާމިޔާބުކޮށްދިނީ ސުނިލް ޗެތުރީ. އެ މެޗުގައި ނޭޕާލުން ވަރަށް ބޮޑަށް ޑިފެންސިވް ކުޅުމެއްގައި. އެހެންނަމަވެސް މިރޭގެ މެޗުގައި ނޭޕާލްވެސް ފެންނަނީ ކުރީ މެޗަށްވުރެ ބޮޑަށް އެޓޭކިންގައި ކުޅެމުންދާ ތަން.

މިރޭގެ މެޗަށް އިންޑިއާ އަދި ނޭޕާލުގެ ސަޕޯޓަރުންވެސް ކޮންމެވެސް ވަރަކަށް ދަނޑަށް ވަދެފައިވޭ. އެހެން ނަމަވެސް ދަނޑުގެ ބޮޑު ބައި އޮތީ ހުސްކޮށް. މެޗު ކުޅެމުން ދަނީ ވިއްސާރައިގަ ކަން ފާހަގަކޮށްލެވޭ. ގައުމީ ދަނޑަށް މިހާރު ދަނީ ބޯކޮށް ވާރޭ ވެހެމުން.

6' - ނޭޕާލަށް ހުސް ފުރުސަތެއް. ލާމާ ނެގި ހުރަސް އިންޑިއާގެ ގޯލްކީޕަރު ގްރަޕްރީތު އަތުން ދޫވުމުން ނުވަޔުގް ފޮނުވާލި ބޯޅަ އަމާޒުވީ ދަނޑިއަށް. އެ ހަމަލާ ފޮނުވާލަން އުޅުމުގެ ތެރޭގައި ނުވަޔުގް ފައުލް ކުރި ކަމަށް ރެފްރީ ޖެހުން ދިން.

4' - އިންޑިއާގެ ނުރައްކާތެރި ހަމަލާއެއް. ޔާސިރު ދުރުން ފޮނުވާލި ހަމަލާ ގޯލްކީޕަރު ކިރަން ކުމާރު މަތަކުރި. އަދި ރީބައުންސްގައި ޝްރެސްތާ އޭރިއާ ތެރެއަށް ވަދެ ޖެހި ބޯޅަވެސް ހުޝިޔާރުކަމާއެކު ކިރަން މަތަކުރި.

މެޗު ފެށިއްޖެ. މެޗުގެ ކުޅުން ފެށީ އިންޑިއާއިން.