ނޭޕާލް 0-1 އިންޑިއާ

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 1-0ގެ ނަތީޖާއަކުން އިންޑިއާ ކުރީގައި އޮވެގެން. އިންޑިއާ އިން މިވަނީ ފައިނަލަށް ދަތުރުކުރުމުގެ އުންމީދެއް ހޯދާފައި. މިރޭގެ މެޗުން މޮޅުވެގެން ނޭޕާލަށް ފައިނަލުގެ ޖާގައެއް ކަށަވަރުވާ ގޮތަށް އޮތް ނަމަވެސް، އެއްވަރުވުމުން ނޭޕާލަށް ވަނީ އަންނަ ބުދަ ދުވަހުގެ ހަވީރު ބަންގުލަދޭޝްއާ ދެކޮޅަށް ކުޅޭ މެޗަށް އިންތިޒާރު ކުރަން ޖެހިފައި.

ދެވަނަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'86 - ނޭޕާލަށް ރަނގަޅު ފުރުސަތެއް. ތޭޖް ތަމަންގް ދިން ބޯޅައަކުން ޕެނަލްޓީ އޭރިއާ ބޭރުން އަންޖަން ފޮނުވާލި ހަމަލާ ދިޔައީ އިންޑިއާގެ ގޯލާ އަމާޒު ނުވެ ބޭރަށް. އޭނާ ހަމަލާ ފޮނުވާލި އިރު، އިންޑިއާގެ ޕެނަލްޓީ އޭރިއާ ތެރޭ ނޭޕާލުގެ އެހެން ކުޅުންތެރިޔަކު ވެސް ހުސްކޮށް ހުރި.

'82 - އިންޑިއާ އިން ލީޑު ހޯދައިފި. ބްރެންޑަން ނަގައިދިން ހުރަސް، ފާރޫކު ބޮލުން ޖައްސާލުމާއެކު ޕެނަލްޓީ އޭރިއާ ތެރެއިން ނޭޕާލުގެ ގޯލުގެ ތެރެއަށް ބޯޅަ ފޮނުވައިލީ އިންޑިއާގެ ކެޕްޓަން ސުނިލް ޗެތުރީ.

'80 - އިންޑިއާގެ ކެޕްޓަން ސުނިލް ޗެތުރީއަށް އަނެއްކާވެސް ހުސް ފުރުސަތެއް. ބްރެންޑަން ނަގައިދިން ކޯނަރުން ޕެނަލްޓީ އޭރިއާ ތެރޭ ހުސްކޮށް ހުރެ ބޮލުން ފޮނުވާލި ހަމަލާ ދިޔައީ ނޭޕާލު ގޯލުގެ ހުރަސް ދަނޑި މަތިން ބޭރަށް.

'77 - އިންޑިއާއަށް ހުސް ފުރުސަތެއް. ބްރެންޑަން ނަގައިދިން ހިލޭ ޖެހުން ޕެނަލްޓީ އޭރިއާ ތެރޭ ހުރެ ޗެތުރީއަށް ބޮލުން ރަނގަޅަށް ފޮނުވައިނުލެވި ލިބުނީ އިންޑިއާގެ ޑިފެންޑަރު ސުބާސިޝް ބޯސްއަށް. ޕެނަލްޓީ އޭރިއާ ތެރެއިން އޭނާ ބޮލުން ފޮނުވާލި ހަމަލާ އަމާޒުވީ ނޭޕާލުގެ ކީޕަރު ކިރަންއާ ދިމާއަށް.

'72 - އިންޑިއާގެ ޕެނަލްޓީ އޭރިއާ ތެރެއަށް ވަނުމަށްފަހު ނޭޕާލުގެ އަންޖަން، އިންޑިއާގެ ގޯލަށް ނުރައްކާކުރުމުގެ ކުރިން ޑިފެންޑަރު ޕްރިތަމް ކޮޓާލް ޓެކަލްކޮށް، ބޯޅަ ބޭރުކޮށްލައިފި.

'69 - ޔާސިރު ނަގައިދިން ބޯޅަ، ޕެނަލްޓީ އޭރިއާ ތެރެއިން އިންޑިއާގެ ކެޕްޓަން ޗެތުރީއަށް ލިބުމުގެ ކުރިން ނޭޕާލުގެ ކީޕަރު ކިރަން ހޯދައިފި.

'64 - އިންޑިއާގެ ހަމަލާއެއް. އުދަންތާ ދިން ބޯޅައަކުން ޕެނަލްޓީ އޭރިއާ ތެރެއިން އިންޑިއާގެ ބްރެންޑަން ފޮނުވާލި ހަމަލާ، ނޭޕާލުގެ ރޯހިތު ޗާންދު ވަނީ ބްލޮކުކޮށްފައި.

'63 - އިންޑިއާގެ ޔާސިރު ދުރުން ފޮނުވާލި ބާރު ހަމަލާ، ނޭޕާލުގެ ގޯލާ އަމާޒެއް ނުވި.

'57 - ނޭޕާލުގެ ކީޕަރު ކިރަންގެ މޮޅު ސޭވްއެއް. ޔާސިރު ނަގައިދިން ހުރަސް، ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ އިންޑިއާގެ ފޯވަޑް މަންވީރު ސިންހް ބޮލުން ފޮނުވާލި ހަމަލާ، ނޭޕާލުގެ ކީޕަރު ކިރަން ވަނީ ވަރަށް ހުޝިޔާރުކަމާއެކު މަތަކޮށްފައި.

'56 - ޕެނަލްޓީ އޭރިއާ ބޭރުން ބްރެންޑަން ފެނާންޑޭޒް ފޮނުވާލި ހިލޭ ޖެހުން ނޭޕާލުގެ ގޯލާ އަމާޒު ނުވެ ބޭރަށް.

މެޗުގެ ދެވަނަ ހާފުގެ ފުރަތަމަ ފަސް މިނެޓުގެ ތެރޭގައި ދެ ޓީމުގެ ފަރާތުން ވެސް ފެނިގެންދިޔައީ ވަރަށް އާދައިގެ ކުޅުމެއް. ދެ ޓީމަށް ލަނޑުޖަހާނެ ރަނގަޅު ފުރުސަތެއް ވެސް ތަނަވަސްކުރެވިފައެއް ނުވޭ.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ ނޭޕާލުން.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'43 - އިންޑިއާއަށް ރަނގަޅު ފުރުސަތެއް. ޗެތުރީ ދިން ބޯޅައަކުން ޕެނަލްޓީ އޭރިއާ ތެރެއިން އިންޑިއާގެ ފޯވަޑް މަންވީރު ސިންހަށް ރަނގަޅަށް ގޯލަށް ފޮނުވައިލެވިފައެއް ނުވޭ. އެ ބޯޅަ، ނޭޕާލުގެ ކީޕަރު ކިރަން ވަނީ ފަސޭހަކަމާއެކު ހޯދާފައި.

މެޗުގެ ފުރަތަމަ ހާފު ނިމެން ތިން މިނެޓަށް ވެފައިވާ އިރު، ނޭޕާލަށް ލަނޑުޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

'34 - އިންޑިއާގެ ކެޕްޓަން ސުނިލް ޗެތުރީއަށް ހުސް ފުރުސަތެއް. ސުރޭޝް ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ޗެތުރީ ފޮނުވާލި ހަމަލާ ދިޔައީ ނޭޕާލު ގޯލުގެ އަރިމަތީ ދަނޑި ކައިރިން ބޭރަށް.

'26 - މަންވީރު ނަގައިދިން ބޯޅަ، ޕެނަލްޓީ އޭރިއާ ތެރެއިން އިންޑިއާގެ ކެޕްޓަން ޗެތުރީއަށް ލިބުމުގެ ކުރިން ނޭޕާލުގެ ކީޕަރު ކިރަން ހޯދައިފި.

'24 - ޕެނަލްޓީ އޭރިއާ ބޭރުން އިންޑިއާގެ ބްރެންޑަން ފެނާންޑޭޒް ފޮނުވާލި ހަމަލާ، ނޭޕާލުގެ ގޯލާ އަމާޒެއް ނުވި.

'22 - އިންޑިއާގެ ކެޕްޓަން ޗެތުރީއަށް އިތުރު ފުރުސަތެއް. ކޯނަރެއްގެ ތެރެއިން ޕެނަލްޓީ އޭރިއާ ތެރޭ ހުރެ އޭނާ ބޮލުން ފޮނުވާލި ހަމަލާ، ނޭޕާލުގެ ގޯލާ އަމާޒުވެފައެއް ނުވޭ.

'19 - އިންޑިއާއަށް ފުރުސަތެއް. ޕެނަލްޓީ އޭރިއާ ތެރެއިން އިންޑިއާގެ ކެޕްޓަން ޗެތުރީ ފޮނުވާލި ހަމަލާ، ކީޕަރު ކިރަން ވަނީ މަތަކޮށްފައި. އޭނާއަށް ފުރުސަތު ލިބުނީ ވަރަށް ހަނި އޭންގަލަކުން ބޯޅަ ފޮނުވާލަން.

'18 - ސުރޭޝް ދިން ބޯޅަ ޕެނަލްޓީ އޭރިއާ ތެރެއިން ޔާސިރަށް ލިބުމުގެ ކުރިން ނޭޕާލުގެ ކީޕަރު ކިރަން ކުރިއަށް ނުކުމެ، ބޯޅަ ހޯދައިފި.

'15 - ޕެނަލްޓީ އޭރިއާ ތެރެއިން ނޭޕާލުގެ ކީޕަރު ކިރަންއަށް އިންޑިއާގެ ކެޕްޓަން ސުނިލް ޗެތުރީ ކުރި ފައުލަކާ ގުޅިގެން ނޭޕާލަށް ހިލޭ ޖެހުމެއް.

'10 - އިންޑިއާގެ ޔާސިރު ދުރުން ފޮނުވާލި ބާރު ހަމަލާ، ޕެނަލްޓީ އޭރިއާ ތެރޭ ހުރި ނޭޕާލުގެ ރޯހިތު ޗާންދު ބްލޮކްކޮށްފި.

'7 - އިންޑިއާގެ ގޯހަކުން ނޭޕާލުން ކައުންޓާ އެޓޭކުގައި ނުރައްކާކުރަން މަސައްކަތްކުރި ނަމަވެސް، ފަހަތުން އިންޑިއާގެ ޑިފެންޑަރު ރާހުލް ބެކޭ ވަނީ ދިފާއުކޮށްފައި.

މެޗުގެ ކުޅުން ފަށައިފި. ކިކްއޯފް ކުރީ އިންޑިއާ އިން.

މެޗަށް ދެ ޓީމުން ވެސް ދަނޑަށް ނުކުމެއްޖެ.