އިންޑިއާ 0-0 ސްރީ ލަންކާ

މެޗުގެ އުސްއަލިތައް:

މެޗުގެ ކުޅުން ނިންމާލައިފި. އިންޑިއާ އާއި ލަންކާގެ މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން. ލަންކާ ތިން މެޗުގެ ތެރެއިން ފުރަތަމަ ދެ މެޗުން ވަނީ ބަލިވެފައި. އަދި މިއަދުގެ ޕޮއިންޓަކީ އެޓީމަށް ލިބުނު ފުރަތަމަ ޕޮއިންޓް. އިންޑިއާ އިން ކުޅުނު ފުރަތަމަ މެޗުގައި ބަންގުލަދޭޝް އަތުން ވެސް އެއްވަރުވެފައިވުމުން، އެޓީމަށް ވަނީ ފައިނަލަށް ދިއުމަށް ކުރިއަށް ހުރި މެޗުތަކުން މޮޅުވުމަށް މަޖުބޫރުވެފައި.

'90+7 - އިންޑިއާއަށް ފުރުސަތެއް. ރާހުލް ބޭކޭ ދިން ބޯޅައަކުން ޕެނަލްޓީ އޭރިއާ ތެރެއިން ސަހަލް އަބްދުއްސަމަދު ފޮނުވާލި ހަމަލާ، ލަންކާގެ ކީޕަރު ސުޖަން ވަނީ ފަސޭހަކަމާއެކު ހޯދާފައި. އެ ބޯޅައިގައި ބާރެއް ނެތް.

'90+6 - ސުޖަންއަށް ފަރުވާދިނުމަށްފަހު އަލުން ކުޅުން ފަށައިފި.

'90+4 - ޕެނަލްޓީ އޭރިއާ ތެރެއިން ބޯޅަ ހޯދަން އުޅުމުގެ ތެރޭގައި ލަންކާގެ ކީޕަރު ސުޖަންއަށް އަނިޔާވެއްޖެ. ކުޅުން މެދުކެނޑިފައި.

ދެވަނަ ހާފުގެ އިތުރު ވަގުތުގެ ގޮތުގައި ދެއްކީ އަށް މިނެޓު. ނަމަވެސް އަނިޔާވެގެން މެޗުގެ ކުޅުން މެދުކަނޑާލީ ހަމައެކަނި ލަންކާގެ ޑިފެންޑަރު ޑަކްސަންއަށް ފަރުވާދިނުމަށް. އޭރު ފަރުވާދިނުމަށްފަހު މާ ގިނައިރުތަކެއް ނުވެ، ރެފްރީ ވަނީ ކުޅުން ފަށާފައި.

'89 - އިންޑިއާއަށް ހުސް ފުރުސަތެއް. ކޯނަރެއްގެ ތެރެއިން ޕެނަލްޓީ އޭރިއާ ތެރެއިން ޗެތުރީ ބޮލުން ފޮނުވާލި ބޯޅަ، ގޯލު ކުރިމަތިން ސުބާޝިޝް ބޯސް ގޯލަށް ފޮނުވާލަން ޖެހި ނަމަވެސް އެ ބޯޅަ ދިޔައީ ހުރަސް ދަނޑިމަތިން ބޭރަށް.

މި މުބާރާތުގައި އިންޑިއާގެ ކުޅުން ދަށްކަން ފާހަގަކޮށްލެވޭ. އިންޑިއާއަކީ ކޮންމެ ސާފް ޗެމްޕިއަންޝިޕެއްގައި ވެސް ފޭވަރިޓް ޓީމެއްގެ ގޮތުގައި. އޭގެ އިތުރުން ހަތް ފަހަރުގެ ޗެމްޕިއަން އިންޑިއާއަކީ މުބާރާތުގެ އެންމެ ކާމިޔާބު ޓީމު.

'72 - އިންޑިއާގެ ފަރުކް ލަންކާގެ ގޯލުގެ ތެރެއަށް ބޯޅަ ފޮނުވާލި ނަމަވެސް، ރެފްރީ ނިންމީ ގޯލެއް ނޫން ކަމަށް. ރެފްރީ ނިންމީ އޭގެ ކުރިން ؛ލަންކާގެ ޕެނަލްޓީ އޭރިއާ ތެރެއިން އިންޑިއާގެ ސުބާޝިޝް ބޯސް ފައުލްކޮށްފައިވާ ކަމަށް.

'70 - އިންޑިއާގެ ކޯޗަށް ރީނދޫ ކާޑެއް.

'68 - އިންޑިއާގެ ކެޕްޓަން ޗެތުރީ ދުރުން ފޮނުވާލި ހަމަލާ، ލަންކާގެ ޑިފެންޑަރު ޑަކްސަން ބްލޮކްކޮށްފި.

ދެވަނަ ހާފުގައި ވެސް ގިނަ ވަގުތު ބޯޅަ ހިފަހައްޓައިގެން ނުރައްކާކުރަމުން އަންނަނީ އިންޑިއާ އިން. ލަންކާއަށް ރަނގަޅު ކުޅުމެއް ދެއްކިފައި ނުވާ އިރު، ލަނޑު ޖަހާނެ ފުރުސަތެއް ވެސް ތަނަވަސްކުރެވިފައެއް ނުވޭ. ނަމަވެސް ލަންކާ އިން އަންނަނީ ވަރަށް ރަނގަޅަށް ޑިފެންސް ކުރަމުން.

'60 - އިންޑިއާއަށް ރަނގަޅު ފުރުސަތެއް. މަންދަރު ރާއޯ ނަގައިދިން ހުރަސް ގޯލު ހުރަސްކޮށް ބޭރަށް. އަނިރުދް ތާޕާ އެ ބޯޅައަށް މަސައްކަތްކުރި ނަމަވެސް، އޭނާގެ ފަޔަށް އެ ބޯޅަ އަރާ ގޮތެއް ނުވި.

'58 - ޕެނަލްޓީ އޭރިއާ ތެރެއިން އުދަންތާއަށް ހުސް ފުރުސަތެއް ލިބުނު ނަމަވެސް، ބޯޅަ ގޯލަށް ފޮނުވާލުމުގެ ބަދަލުގައި އޭނާ ނަގައިދިނީ ހުރަހެއް. އެ ހުރަސް، އިންޑިއާގެ ކުޅުންތެރިޔަކަށް ލިބުމުގެ ކުރިން ލަންކާގެ ކީޕަރު ސުޖަން ވަނީ އެ ބޯޅަ ހޯދާފައި.

'54 - އިންޑިއާގެ ކެޕްޓަން ޗެތުރީއަށް ރަނގަޅު ފުރުސަތެއް. ޔާސިރު ނަގައިދިން ހުރަހަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ޗެތުރީ ބޮލުން ފޮނުވާލި ހަމަލާ، ލަންކާގެ ކީޕަރު ސުޖަން ވަނީ މަތަކޮށްފައި. ޗެތުރީއަށް އެ ބޯޅަ ރަނގަޅަށް ފޮނުވައިލެވިފައެއް ނުވޭ.

'49 - އިންޑިއާއަށް ފުރުސަތެއް. ލޮސްޓަން ނަގައިދިން ހުރަހަކުން ޕެނަލްޓީ އޭރިއާ ތެރެއިން އުދަންތާ ފޮނުވާލި ހަމަލާ، ލަންކާގެ ކީޕަރު ސުޖަން ވަނީ މަތަކޮށްފައި. ކީޕަރު ސުޖަން ހުރީ އެ ބޯޅައަށް ވަރަށް ވިސްނައިގެން.

އިންޑިއާ އިން ދެވަނަ ހާފަށް ނުކުތީ ބަދަލަކާއެކު. ސުރޭޝްގެ ބަދަލުގައި ކުޅެން ނުކުތީ ޔާސިރު މުހައްމަދު.

ދެވަނަ ހާފުގެ ކުޅުން ފަށައިފި. ކިކްއޯފް ކުރީ ލަންކާއިން.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'45 - އިންޑިއާގެ ސުބާޝިސް ބޯސްގެ ހަމަލާ ގޯލާ އަމާޒުނުވެ ބޭރަށް.

އިންޑިއާއިން ކޮންޓްރޯލުކޮށް ކުޅެމުންދާ ނަމަވެސް އަދިވެސް ލަންކާ ގޯލްކީޕަރު ސުޖަން ޓެސްޓުކޮށްލެވޭ ވަރުގަދަ ހަމަލާއެއް އުފެއްދިފައެއް ނުވޭ.

މުހިއްމު ތަފާސް ހިސާބުތައް:

އިންޑިއާ އާއި ސްރިލަންކާ މިހާތަނަށް 16 ފަހަރު ބައްދަލުކޮށްފައިވޭ. އޭގެ ތެރެއިން އިންޑިއާ ވަނީ ނުވަ މެޗު ކާމިޔާބުކޮށްފައި. ލަންކާ މޮޅުވެފައިވަނީ ތިން މެޗުން. ހަތަރު މެޗު ނިމުނީ އެއްވަރު ވެގެން. އިންޑިއާ އަތުން ލަންކާ އެންމެ ފަހުން މޮޅުވީ 2000 ވަނަ އަހަރު ދިވެހިރާއްޖޭގައި އޮތް ގޯލްޑަން ޖުބުލީ މުބާރާތުގައި. މި ދެޓީމު އެންމެ ފަހުން ވާދަކުރީ 2018 ވަނަ އަހަރު ބަންގުލަދޭޝްގައި އޮތް ސާފް ޗެމްޕިއަންޝިޕްގައި. އެ މެޗު އިންޑިއާއިން ކާމިޔާބުކުރީ 2-0 ގެ ނަތީޖާއަކުން.

29' - އުދަންތާ ސިންހުގެ ބާރު ހަމަލާއެއް. އޭރިއާ ބޭރުން އޭނާ ފޮނުވާލި ހަމަލާ ދިޔައީ މާ ބޮޑަށްވެސް މަތިން ބޭރަށް.

22' - އިންޑިއާއަށް ފުރުސަތެއް. އަރިމަތިން ސެރިޓޮން ނަގައިދިން ހުރަސް އޭރިއާ ތެރޭގައި ހުސްކޮށް އޮތް ލިސްޓޮންއަށް ލިބުނު ނަމަވެސް އޭނާއަށް ރަނގަޅަށް ފޮނުވާ ނުލެވުނު.

މެޗުގެ ފުރަތަމަ 20 ވަރަކަށް މިނެޓު ނިމިގެން ދިޔަ އިރު، އިންޑިއާއިން ވަނީ 80 ޕަސެންޓް ޕޮސެޝަން ހިފަހައްޓާފައި. އެޓީމުން ގިނަ ވަގުތު ބޯޅަ ހިފެހެއްޓި ނަމަވެސް އަދި މާ ބޮޑު ނުރައްކަލެއް ފެނިފައެއް ނުވޭ.

8' - އަރިމަތިން ކަވިންދޫ އިޝާން ނަގައިދިން ހުރަސް ވަސީމް ރަޒީކް އޭރިއާ ތެރެއިން ބޯޅަ ފޮނުވާލި ނަމަވެސް ދިޔައީ އަރިމަތިން ބޭރަށް.

'5 އުދަންތާއަށް ކުރި ފައުލަކާ ގުޅިގެން ލަންކާގެ އަސީކުރް ރަހުމާނަށް ރީނދޫ ކާޑެއް.

މެޗުގެ ކުޅުން ފަށައިފި. ކިކްއޯފް ކުރީ އިންޑިއާ އިން.