ޔޫރޯ: އިޓަލީ 1-1 އިންގްލެންޑް (3-2)

އިޓަލީން ޔޫރޯގެ ތަށި އުފުލާލައިފި.

ޔޫރޯ 2020ގެ އެންމެ މޮޅު ކުޅުންތެރިޔާގެ މަގާމު އިޓަލީގެ ކީޕަރު ޑޮނަރޫމާއަށް.

ޔޫރޯ 2020ގެ ޗެމްޕިއަންކަން އިޓަލީއަށް.

އިންގްލެންޑް ފޯވަޑް ސަކާގެ ޕެނަލްޓީ، އިޓަލީގެ ކީޕަރު ޑޮނަރޫމާ މަތަކޮށްފި.

އިޓަލީ މިޑްފީލްޑަރު ޖޯޖީނިއޯގެ ޕެނަލްޓީ، އިންގްލެންޑްގެ ކީޕަރު ޕިކްފޯޑް މަތަކޮށްފި.

އިންގްލެންޑްގެ ސަންޗޯގެ ޕެނަލްޓީ، އިޓަލީގެ ކީޕަރު ޑޮނަރޫމާ މަތަކޮށްފި.

އިޓަލީ މިޑްފީލްޑަރު ބެނާޑެސްކީގެ ޕެނަލްޓީ ކާމިޔާބުކޮށްފި.

އިންގްލެންޑް ފޯވަޑް މާކަސް ރަޝްފާޑްގެ ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށް.

އިޓަލީ ޑިފެންޑަރު ބޮނޫޗީގެ ޕެނަލްޓީ ކާމިޔާބުކޮށްފި.

އިންގްލެންޑް ޑިފެންޑަރު ހެރީ މެގުއާގެ ފެނަލްޓީ ކާމިޔާބުކޮށްފި.

އިޓަލީ ފޯވަޑް ބެލޮއްޓީގެ ޕެނަލްޓީ، އިންގްލެންޑްގެ ކީޕަރު ޕިކްފޯޑް މަތަކޮށްފި.

އިންގްލެންޑް ކެޕްޓަން ހެރީ ކޭންގެ ޕެނަލްޓީ ކާމިޔާބުކޮށްފި.

ފުރަތަމަ ޕެނަލްޓީ ފޮނުވާލީ އިޓަލީން. އިޓަލީގެ ލޮކަޓެލީގެ ޕެނަލްޓީ ކާމިޔާބުކޮށްފި.

އިޓަލީން ފައިނަލަށް ދަތުރުކުރީ ސެމީ ފައިނަލުގައި ޕެނަލްޓީ ޖަހައިގެން ސްޕެއިން ބަލިކޮށްގެން. ޔޫރޯގެ ތާރީހުގައި އެއް މުބާރާތެއްގެ ދެ މެޗެއްގައި ޕެނަލްޓީ ޝޫޓްއައުޓުން އަދި އެއްވެސް ޓީމެއް މޮޅުވެފައެއް ނުވޭ.

އިތުރު ވަގުތުގެ ދެވަނަ ހާފުގެ ކުޅުން ވެސް ނިމުނީ 1-1ގެ ނަތީޖާއަކުން ދެ ޓީމު އެއްވަރުވެގެން. ޔޫރޯ 2020ގެ ފައިނަލުގެ ނަތީޖާ ދެން ނެރޭނީ ޕެނަލްޓީ ޝޫޓްއައުޓުން.

'113 - ގްރީލިޝްއަށް ކުރި ފައުލަކާ ގުޅިގެން އިޓަލީގެ މިޑްފީލްޑަރު ޖޯޖީނިއޯއަށް ރީނދޫ ކާޑެއް.

'111 - ޕެނަލްޓީ އޭރިއާ ތެރެއިން ސްޓާލިން ނުރައްކާކުރުމުގެ ކުރިން އިޓަލީގެ ކެޕްޓަން ކިއެލީނީ އެ ބޯޅަ ދިފާއުކޮށްފި.

'107 - އިޓަލީގެ ނުރައްކާތެރި ހަމަލާއެއް. ބެނާޑެސްކީ ފޮނުވާލި ބާރު ހިލޭ ޖެހުން އަމާޒުވީ އިންގްލެންޑް ކީޕަރު ޕިކްފޯޑްއާ ދިމާއަށް. ޕިކްފޯޑް އަތުން ދޫވި ބޯޅަ ހޯދުމަށް ޖޯޖީނިއޯ މަސައްކަތްކުރި ނަމަވެސް، ޕިކްފޯޑް ވަނީ ކުރިއަށް ނުކުމެ ބޯޅަ ހޯދާފައި.

އިތުރު ވަގުތުގެ ދެވަނަ ހާފުގެ ކުޅުން ފަށައިފި.

އިތުރު ވަގުތުގެ ފުރަތަމަ ހާފު ވެސް ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެން.

'103 - އެމަސަން ނަގައިދިން ނުރައްކާތެރި ހުރަހުން ޕެނަލްޓީ އޭރިއާ ތެރެއިން ބެނާޑެސްކީ ނުރައްކާކުރުމުގެ ކުރިން އިންގްލެންޑުގެ ކީޕަރު ޕިކްފޯޑް ދިފާއުކޮށްފި.

'97 - އިންގްލެންޑަށް ފުރުސަތެއް. ޕެނަލްޓީ އޭރިއާ ބޭރުން ލިބުނު ބޯޅައަކުން ފިލިޕްސް ފޮނުވާލި ބާރު ހަމަލާ ދިޔައީ އިންގްލެންޑު ގޯލުގެ އަރިމަތީ ދަނޑި ކައިރިން ބޭރަށް.

'96 - ހެންޑަސަން ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ސްޓާލިން ޖައްސާލި ބޯޅަ، އިންގްލެންޑްގެ ކުޅުންތެރިޔަކަށް ލިބުމުގެ ކުރިން ކިއެލީނީ ދިފާއުކޮށްފި.

އިތުރު ވަގުތުގެ ފުރަތަމަ ހާފުގެ ކުޅުން ފަށައިފި.

ދެވަނަ ހާފުގެ އުސްއަލިތައް

'90+6 - ސަކާއަށް ކުރި ފައުލަކާ ގުޅިގެން އިޓަލީ ކެޕްޓަން ކިއެލީނީއަށް ރީނދޫ ކާޑެއް.

ދެވަނަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެން. ނަތީޖާ ނެރުމަށް ދެން ކުޅެން ޖެހޭނީ 15 މިނެޓުގެ ދެ ހާފު.

މި ހާފުގައި އިންގްލެންޑުގެ ފަރާތުން ރަނގަޅު ކުޅުމެއް ނުފެނޭ. އިޓަލީން އަންނަނީ ގިނަ ވަގުތު ބޯޅަ ހިފަހައްޓައިގެން ރަނގަޅު ކުޅުމެއް ދައްކަމުން.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'84 - ފިލިޕްސްއަށް ކުރި ފައުލަކާ ގުޅިގެން އިޓަލީގެ އިންސީނިއާއަށް ރީނދޫ ކާޑެއް.

އިންގްލެންޑް ޑިފެންސަށް ސަމާލުވެ ފަހަތަށް ޖެހުމުގެ ފައިދާ ނަގައި، އިޓަލީން ދިޔައީ އެޓޭކަކަށްފަހު އެޓޭކެއް އުފައްދަމުން. ނަތީޖާއެއްގެ ގޮތުން އިޓަލީން ވަނީ އިންގްލެންޑަށް ނުރައްކާކޮށް ނަތީޖާ ހަމަހަމަ ކޮށްފައި. މެޗު މިހާރު ފެންނަނީ ވަރަށް ބޮޑަށް އޯޕަން ކޮށް. ހާއްސަކޮށް އިޓަލީން ކުރިއަށް ޖެހި އިތުރު ގޯލަކަށް ވަރަށް ބޮޑަށް މަސައްކަތް ކުރަމުންދޭ.

'74 - އިންސީނިއާ ދިން ބޯޅައަކުން ޕެނަލްޓީ އޭރިއާ ތެރެއިން ކްރިސްޓަންޓޭ، ނުރައްކާކުރުމުގެ ކުރިން އިންގްލެންޑުގެ ކީޕަރު ޕިކްފޯޑް އެ ބޯޅަ ހޯދައިފި.

މިއީ އިޓަލީގެ ޖާޒީގައި ބޮނޫޗީ ޖެހި އަށްވަނަ ލަނޑު.

'67 - އިޓަލީން ނަތީޖާ ހަމަހަމަކޮށްފި. ކޯނަރެއްގެ ތެރެއިން ވެރާޓީ ބޮލުން ފޮނުވާލި ހަމަލާ، އިންގްލެންޑްގެ ކީޕަރު ޕިކްފޯޑް މަތަކުރުމާއެކު ގޯލުގެ އަރިމަތީ ދަނޑީގައި ޖެހި ނުކުތުމުން ޕެނަލްޓީ އޭރިއާ ތެރެއިން ގޯލުގެ ތެރެއަށް ފޮނުވާލީ އިޓަލީގެ ޑިފެންޑަރު ބޮނޫޗީ.

'64 - އިންގްލެންޑަށް ފުރުސަތެއް. ޓްރިޕިއާ ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ ސްޓޯންސް ބޮލުން ފޮނުވާލި ހަމަލާ، އިޓަލީގެ ކީޕަރު ޑޮނަރޫމާ ވަނީ މަތަކޮށްފައި.

'62 - އިޓަލީއަށް ރަނގަޅު ފުރުސަތެއް، ޕިކްފޯޑުގެ މޮޅު ސޭވްއެއް. ޕެނަލްޓީ އޭރިއާ ތެރެއިން ގޯލުގެ ކަނަކާ އަމާޒުކޮށް ކިއޭސާ ފޮނުވާލި ހަމަލާ، އިންގްލެންޑުގެ ކީޕަރު ޕިކްފޯޑް ވަނީ ހުޝިޔާރުކަމާއެކު މަތަކޮށްފައި.

'57 - އިޓަލީގެ ހަމަލާއެއް. ކިއޭސާ ދިން ބޯޅައަކުން ޕެނަލްޓީ އޭރިއާ ތެރެއިން އިންސީނިއާ ފޮނުވާލި ހަމަލާ، އިންގްލެންޑުގެ ކީޕަރު ޕިކްފޯޑް ވަނީ މަތަކޮށްފައި.

'56 - އިންގްލެންޑަށް ފުރުސަތެއް. ލޫކް ޝޯ ނަގައިދިން ހިލޭ ޖެހުމުން ޕެނަލްޓީ އޭރިއާ ތެރޭ ހުރެ މެގުއާ ބޮލުން ފޮނުވާލި ހަމަލާ ދިޔައީ އިޓަލީ ގޯލުގެ ހުރަސް ދަނޑި މަތިން ބޭރަށް.

'55 - ސްޓާލިންއަށް ކުރި ފައުލަކާ ގުޅިގެން އިޓަލީގެ ޑިފެންޑަރު ބޮނޫޗީއަށް ރީނދޫ ކާޑެއް.

'53 - އެމަސަން ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު އިންސީނިއާ ފޮނުވާލި ހަމަލާ، އިންގްލެންޑުގެ ގޯލާ އަމާޒެއް ނުވި.

'50 - އިންސީނިއާ ފޮނުވާލި ހިލޭ ޖެހުން އިންގްލެންޑުގެ ގޯލާ އަމާޒެއް ނުވި.

'49 - އިންސީނިއާއަށް ސްޓާލިން ކުރި ފައުލަކާ ގުޅިގެން އިންގްލެންޑް ގޯލު ކުރިމަތިން އިޓަލީއަށް ހިލޭ ޖެހުމެއް.

'48 - އިޓަލީގެ ޕެނަލްޓީ އޭރިއާ ތެރެއަށް ސްޓާލިން ވެއްޓުނު ނަމަވެސް، ރެފްރީ ޕެނަލްޓީއެއް ނުދިން.

'47 - ކޭންއަށް ކުރި ފައުލަކާ ގުޅިގެން އިޓަލީ މިޑްފީލްޑަރު ބަރެއްލާއަށް ރީނދޫ ކާޑެއް ދައްކައިފި.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

ޔޫރޯ 2020ގެ ފައިނަލް މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0ގެ ނަތީޖާއަކުން އިންގްލެންޑް ކުރީގައި އޮވެގެން.

'45+1 - އިޓަލީއަށް ފުރުސަތެއް. ޑި ލޮރެންޒޯ ދިން ބޯޅައަކުން ޕެނަލްޓީ އޭރިއާ ތެރެއިން އިމޯބިލޭ ފޮނުވާލި ހަމަލާ، އިންގްލެންޑުގެ ޑިފެންޑަރު ސްޓޯންސް ވަނީ ބްލޮކްކޮށްފައި.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

ގްރޫޕު ސްޓޭޖު މެޗުތަކުގައި އިޓަލީގެ އެންމެ ކުރިއަށް ކުޅޭ އިމޯބިލޭގެ ފަރާތުން ރަނގަޅު ކުޅުމެއް ފެނިގެންދިޔަ ނަމަވެސް، ގަދަ 16 އިން ފެށިގެން އޭނާގެ ފަރާތުން އެންމެ އެދެވޭ ކުޅުމެއް ނުފެނޭ.

'36 - ލޫކް ޝޯ ދިން ބޯޅަ، އިޓަލީގެ ޕެނަލްޓީ އޭރިއާ ތެރެއިން މޭސަން މައުންޓަށް ލިބޭ ގޮތެއް ނުވި. އޭނާއަށް ބޯޅަ ލިބުނު ނަމަ، ނުރައްކާވީސް.

'35 - އިޓަލީއަށް ފުރުސަތެއް. ޑެކްލެން ރައިސް ކައިރިން ނައްޓާލުމަށްފަހު، ޕެނަލްޓީ އޭރިއާ ބޭރުން ކިއޭސާ ފޮނުވާލި ހަމަލާ ދިޔައީ އިންގްލެންޑް ގޯލުގެ އަރިމަތީ ދަނޑި ކައިރިން ބޭރަށް.

'32 - އިންގްލެންޑުން ގިނަ ވަގުތު ބޯޅަ ހިފަހައްޓައިގެން ކުޅެމުންދިޔަ ނަމަވެސް، ލަނޑު ޖަހާނެ ފުރުސަތު ތަނަވަސްކުރުމަށް އިންގްލެންޑުން ފުރުސަތެއް ނުދޭ. ކެޕްޓަން ކޭންއާއެކު އިންގްލެންޑުގެ ކުޅުންތެރިން ކުޅެނީ އަމިއްލަ ހާފު ތެރެއަށް ފާބައިގެން.

'28 - އިންސީނިއާ ދުރުން ފޮނުވާލި ހަމަލާ، އިންގްލެންޑުގެ ގޯލާ އަމާޒުނުވެ ބޭރަށް.

އިތުރު ފަރުވާއަށްފަހު، ޖޯޖީނިއޯ އަލުން ކުޅެން އަރައިފި.

'22 - އިޓަލީގެ މުހިންމު މިޑްފީލްޑަރު ޖޯޖީނިއޯއަށް އަނިޔާއެއްވެ، ދަނޑުމަތީގައި ފަރުވާ ހޯދުމަށްފަހު، އިތުރު ފަރުވާއަށް ދަނޑުން ފާބައިފި.

އިންގްލެންޑުގެ އަރިމަތިން ޓްރިޕިއާގެ ހުރަސްތައް ފެންނަނީ ވަރަށް ނުރައްކާކޮށް. ލަނޑު ޖެހުމަށް ލޫކް ޝޯއަށް އެސިސްޓްކޮށްދިނީ ވެސް އޭނާ.

'11 - އިންސީނިއާ ދިން ބޯޅަ، ޕެނަލްޓީ އޭރިއާ ތެރެއިން އިމޯބިލޭއަށް ލިބުމުގެ ކުރިން އިންގްލެންޑްގެ ކީޕަރު ޕިކްފޯޑް އެ ބޯޅަ ހޯދައިފި.

މެޗު ފެށުނީއްސުރެ އިންގްލެންޑުގެ އެންމެ ކުރިއަށް ކުޅޭ ކެޕްޓަން ހެރީ ކޭން ވެސް ފެންނަނީ ވަރަށް ބޮޑަށް ފަހަތަށް ފައިބައިގެން ކުޅޭތަން.

އިޓަލީން ފަހަތުން އަރަން ކުރަން ޖެހޭނީ ބުރަ މަސައްކަތެއް. އިންގްލެންޑް ވެމްބްލީއަށް މިރޭ ވަނީ 65،000 ސަޕޯޓަރުން ވެއްދުމަށް ހުއްދަ ދީފައި. އިންގްލެންޑުން ހޯމްގައި މިރޭގެ މެޗު ކުޅެމުން އަންނަ އިރު، މެޗުގައި އިޓަލީއަށް ދިމާވާނެ އެންމެ ބޮޑު އުނދަގުލަކަށް ވާނީ ވެމްބްލީގެ ބާރު އަޑު. އިންގްލެންޑުން ކުރީ ކޮޅުގައި ޖެހި ގޯލާއެކު ވެމްބްލީ ދަނީ ގުގުމަމުން. އިންގްލެންޑަށް އުންމީދީ ފެށުމެއް.

'8 - އިންސީނިއާ ފޮނުވާލި ހިލޭ ޖެހުން ދިޔައީ އިންގްލެންޑް ގޯލުގެ ހުރަސް ދަނޑި މަތިން ބޭރަށް.

'7 - ކިއޭސާއަށް ލޫކް ޝޯ ކުރި ފައުލަކާ ގުޅިގެން އިންގްލެންޑްގެ ޕެނަލްޓީ އޭރިއާ ބޭރުން އިޓަލީއަށް ހިލޭ ޖެހުމެއް.

މިއީ ރައިޓް ބެކް، ލޫކް ޝޯ އިންގްލެންޑްގެ ޖާޒީގައި ކާމިޔާބުކޮށްދިން ފުރަތަމަ ލަނޑު.

'2 - އިންގްލެންޑުން ލީޑު ނަގައިފި. ޓްރިފިއާ ނަގައިދިން ހުރަހަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ ލޫކް ޝޯ. އޭނާގެ ހަމަލާ އިޓަލީ ގޯލުގެ ތެރެއަށް ވަދެފައިވަނީ ގޯލުގެ އަރިމަތީ ދަނޑީގައި ޖެހިފައި.

ފަޔަށް ލިބުނު އަނިޔާއަކާ ގުޅިގެން މި މެޗުގައި އިންގްލެންޑްގެ ޓީމުން ފިލް ފޮޑެން ނުފެންނާނެ.

މެޗުގެ ކުޅުން ފަށައިފި. ކިކްއޯފް ކުރީ އިޓަލީން.