ޕެނަލްޓީ ޝޫޓްއައުޓް ކާމިޔާބުކޮށް، އިޓަލީ ފައިނަލަށް.
އިޓަލީގެ ޖޯޖީނިއޯގެ ޕެނަލްޓީ ވެސް ކާމިޔާބުކޮށްފި.
ސްޕެއިންގެ މޮރާޓާގެ ޕެނަލްޓީ، އިޓަލީގެ ކީޕަރު ޑޮނަރޫމާ މަތަކޮށްފި.
އިޓަލީގެ ބެނާޑެސްކީގެ ޕެނަލްޓީ ކާމިޔާބުކޮށްފި.
ސްޕެއިންގެ ތިއާގޯގެ ޕެނަލްޓީ ކާމިޔާބުކޮށްފި.
އިޓަލީގެ ބޮނޫޗީގެ ޕެނަލްޓީ ކާމިޔާބުކޮށްފި.
ސްޕެއިންގެ މޮރޭނޯގެ ޕެނަލްޓީ ކާމިޔާބުކޮށްފި.
އިޓަލީގެ ބެލޮޓީގެ ޕެނަލްޓީ ގޯލުގެ ކަނަށް.
ސްޕެއިންގެ އޮލްމޯގެ ޕެނަލްޓީ، ގޯލާ އަމާޒެއް ނުވި.
ފުރަތަމަ ޕެނަލްޓީ ފޮނުވާލީ އިޓަލީގެ ލޮކަޓެލީ. އޭނާގެ ޕެނަލްޓީ، ސްޕެއިންގެ ކީޕަރު ސިމޮން ވަނީ މަތަކޮށްފައި.
އިތުރު ވަގުތުގެ ދެވަނަ ހާފުވެސް ނިމުނީ 1-1ގެ ނަތީޖާއަކުން ދެ ޓީމު އެއްވަރުވެގެން. ދެން ނަތީޖާ ނެރޭނީ ޕެނަލްޓީ ޝޫޓްއައުޓުން.
'110 - ޕެނަލްޓީ އޭރިއާ ތެރެއިން ސްޕެއިންގެ ގޯލުގެ ތެރެއަށް ބެރާޑީ ބޯޅަ ފޮނުވާލި ނަމަވެސް، އޭނާ ހުރީ އޮފްސައިޑް މަގާމެއްގައި.
އިތުރު ވަގުތުގެ ދެވަނަ ހާފުގެ ކުޅުން ފަށައިފި.
އިތުރު ވަގުތުގެ ފުރަތަމަ ހާފު ވެސް ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެން.
މި ހާފުގައި އިޓަލީއަށް އަދި ރަނގަޅު ކުޅުމެއް ދެއްކޭ ގޮތެއް ނުވޭ. ލަނޑު ޖަހާނެ ފުރުސަތެއް ވެސް ތަނަވަސްކުރެވިފައެއް ނުވޭ. މި ހާފުގައި ވެސް ނުރައްކާކޮށް ފެންނަނީ ސްޕެއިން.
'102 - ލޮރެންޓޭ ނަގައިދިން ހުރަސް، ޕެނަލްޓީ އޭރިއާ ތެރެއިން ނުރައްކާވުމުގެ ކުރިން އިޓަލީގެ ކީޕަރު ދިފާއުކޮށްފި. ރީބައުންސް ބޯޅައިން ލޮރެންޓޭ ފޮނުވާލި ހަމަލާ ވެސް ވަނީ ބްލޮކްވެފައި.
'98 - ސްޕެއިނަށް ރަނގަޅު ދެ ފުރުސަތެއް. އޮލްމޯ ފޮނުވާލި ހިލޭ ޖެހުން އިޓަލީގެ ކީޕަރު ޑޮނަރޫމާ މަތަކުރި އިރު، ރީބައުންސް ބޯޅައިން ޕެނަލްޓީ އޭރިއާ ތެރެއިން މޮރާޓާ ފޮނުވާލި ހަމަލާ، އިޓަލީގެ ކެޕްޓަން ކިއޭލީނީ ވަނީ ބްލޮކްކޮށްފައި.
އިތުރު ވަގުތު ފުރަތަމަ ފަސް މިނެޓު ތެރޭ ދެ ޓީމުގެ ފަރާތުން ވެސް ފެނުނީ ދާދި ހަމަހަމަ ކުޅުމެއް. ދެ ޓީމަށް ވެސް ލަނޑުޖަހާނެ ފުރުސަތެއް ތަނަވަސްކުރެވިފައެއް ނުވޭ.
އިތުރު ވަގުތުގެ ފުރަތަމަ ހާފުގެ ކުޅުން ފަށައިފި.
ދެވަނަ ހާފުގެ އުސްއަލިތައް
- ސްޕެއިން ވަނީ ގިނަ ޕާސްތައް ޖަހައި އެޓީމުގެ ކުޅުން ފައްކާ ކޮށްފައި
- ކުރީކޮޅުގައި ސްޕެއިންގެ އޮޔާޒަބާލްއަށް ހުސް ފުރުސަތެއް ލިބި ބޭކާރުވި
- އިޓަލީގެ ފުރަތަމަ ހަމަލާ ފެނުނީ 20 ވަރަކަށް މިނެޓް ފަހުން، އެމަސަން ކުރިއަށް އަރައި އިމޯބިލޭއަށް ދިން ބޯޅަ އޭނާއަށް ނުޖެހުނު
- އޮލްމޯގެ ނުރައްކާތެރި ހަމަލާއެއް ފެނުނު، އޭރިއާ ތެރެއިން އޭނާ ޖެހި ބާރު ހަމަލާ މަތަކުރީ ޑޮނަރޫމާ
- ހާފުގެ ފަހުކޮޅުގައި ނުރައްކާތެރި ހަމަލާއެއް ނުފެނުނު ނަމަވެސް މެޗު ކޮންޓްރޯލް ކުރީ ސްޕެއިން
- ހާފު ނިމެން ދަނިކޮށް އެމަސަން ފޮނުވާލި ބާރު ހަމަލާ އަމާޒުވީ ދަނޑިއަށް
- ދެވަނަ ހާފް ފެށިގެން ކުޑައިރުކޮޅެއް ތެރޭގައި ޗިއޭސާ ޖެހި ހިތްގައިމު ގޯލާއެކު އިޓަލީ ލީޑު ނެގި
- އޭގެ ފަހުންވެސް ސްޕެއިން މެޗު ކޮންޓްރޯލްކޮށް ހަމަލާތައް އުފެއްދި
- އޮޔާޒަބާލަށް ލިބުނު ހުސް ފުރުސަތާއި އޮލްމޯގެ ހަމަލާވެސް ގޯލަށް އަމާޒުކުރެވޭ ގޮތެއް ނުވި
- އިޓަލީގެ ބެރާޑީ ޖެހި ދެ ބޯޅައެއް އުނައި ސިމޮން މަތަކުރި އިރު، ސްޕެއިންއަށް އުނދަގޫވީ އިޓަލީގެ ކައުންޓާ ހުއްޓުވަން
- މެޗު ނިމެން 10 މިނެޓަށް ވެފައި ވަނިކޮށް ސްޕެއިން ނަތީޖާ ހަމަހަމަ ކުރި، އެޓީމަށް ނަތީޖާ ހަމަހަމަކޮށްދިނީ މޮރާޓާ
- މެޗު އިތުރު ވަގުތަށް ދިޔައީ 1-1 އިން އެއްވަރުވެގެން
ދެވަނަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެން. ނަތީޖާ ނެރުމަށް ދެން ކުޅޭނީ 15 މިނެޓުގެ ދެ ހާފު.
ދެވަނަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.
'84 - ސްޕެއިންގެ ހަމަލާއެއް. މޮރާޓާ ދިން ބޯޅައަކުން ޕެނަލްޓީ އޭރިއާ ބޭރުން މޮރޭނޯ ފޮނުވާލި ހަމަލާ، އިޓަލީގެ ގޯލާ އަމާޒުވެފައެއް ނުވޭ.
'82 - ސްޕެއިނަށް ފުރުސަތެއް. އޮލްމޯ ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ ބުސްކެޓްސް ބޮލުން ފޮނުވާލި ހަމަލާ، އިޓަލީގެ ގޯލާ އަމާޒުވެފައެއް ނުވޭ.
'80 - ސްޕެއިނުން ނަތީޖާ ހަމަހަމަކޮށްފި. އޮލްމޯ ދިން ރީތި ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ސްޕެއިނަށް އެ ލަނޑު ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް މޮރާޓާ.
މި ހާފުގައި އިޓަލީން ފެންނަނީ ވަރަށް ބޮޑަށް ފަހަތަށް ޖެހި، ޑިފެންސިވް ކުޅުމެއް. އެޓީމުން ނުރައްކާކުރުމަށް މަސައްކަތްކުރަނީ ކައުންޓާ އެޓޭކުތަކުގައި. އިޓަލީން ލަނޑު ޖަހާފައިވަނީ ވެސް ކައުންޓާ އެޓޭކެއްގެ ތެރެއިން.
'76 - ޕެނަލްޓީ އޭރިއާ ތެރެއިން މޮރާޓާ ފޮނުވާލި ހަމަލާ، އިޓަލީގެ ޑިފެންޑަރު ބޮނޫޗީ ބްލޮކްކޮށްފި.
'68 - އިޓަލީއަށް ރަނގަޅު ފުރުސަތެއް. ޕެނަލްޓީ އޭރިއާ ތެރެއިން ބެރާޑީ ފޮނުވާލި ހަމަލާ، ސްޕެއިންގެ ކީޕަރު ސިމޮން ވަނީ މަތަކޮށްފައި.
'66 - ސްޕެއިނަށް ރަނގަޅު ފުރުސަތެއް. އޮޔާޒަބާލް ދިން ބޯޅައަކުން ޕެނަލްޓީ އޭރިއާ ބޭރުން އޮލްމޯ ފޮނުވާލި ހަމަލާ ދިޔައީ އިޓަލީ ގޯލުގެ އަރިމަތީ ދަނޑި ކައިރިން ބޭރަށް.
'65 - ސްޕެއިނަށް ފުރުސަތެއް. ކޮކޭ ދިން ބޯޅަ، ޕެނަލްޓީ އޭރިއާ ތެރޭ ވަރަށް ހުސްކޮށް ހުރި އޮޔާޒަބާލަށް ބޮލުން ފޮނުވައިލެވިފައެއް ނުވޭ.
'60 - އިޓަލީން ލީޑު ހޯދައިފި. ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިޓަލީއަށް އެ ލަނޑު ކާމިޔާބުކޮށްދިނީ ކިއޭސާ. ޕެނަލްޓީ އޭރިއާ ތެރެއިން އޭނާ ފޮނުވާލި ހަމަލާ އަމާޒުވީ އިޓަލީ ގޯލުގެ ތިރީ ކަނަކަށް.
58 - ސްޕެއިންގެ ހަމަލާއެއް. ކޮކޭ ދިން ބޯޅައަކުން ޕެނަލްޓީ އޭރިއާ ބޭރުން އޮޔާޒަބާލް ފޮނުވާލި ބާރު ހަމަލާ އަމާޒުވީ އިޓަލީގެ ކީޕަރު ޑޮނަރޫމާގެ އަތަށް.
'57 - ޕެނަލްޓީ އޭރިއާ ބޭރުން ފެރާން ޓޮރޭސް ފޮނުވާލި ހަމަލާ، އިޓަލީގެ ޑިފެންޑަރު ޑި ލޮރެންޒޯ ބްލޮކްކޮށްފި.
'53 - އިޓަލީއަށް ރަނގަޅު ފުރުސަތެއް. ބަރެއްލާ ދިން ބޯޅައަކުން ޕެނަލްޓީ އޭރިއާ ތެރެއިން ކިއޭސާ ފޮނުވާލި ހަމަލާ، ސްޕެއިންގެ ކީޕަރު ސިމޮން ވަނީ މަތަކޮށްފައި.
'52 - ސްޕެއިނަށް ރަނގަޅު ފުރުސަތެއް. ކައުންޓާ އެޓޭކެއްގައި އޮޔާޒަބާލް ދިން ބޯޅައަކުން ޕެނަލްޓީ އޭރިއާ ތެރެއިން ބުސްކެޓްސް ފޮނުވާލި ހަމަލާ ދިޔައީ އިޓަލީ ގޯލުގެ ހުރަސް ދަނޑި މަތިން ބޭރަށް.
'51 - މެޗުގެ ފުރަތަމަ ކާޑު ސްޕެއިންގެ ކެޕްޓަން ބުސްކެޓްސްއަށް. އޭނާއަށް ރީނދޫ ކާޑު ދައްކާފައިވަނީ އިމޯބިލޭއަށް ކުރި ފައުލަކާ ގުޅިގެން.
'50 - އޮލްމޯ ނަގައިދިން ހުރަސް، ފެރާން ޓޮރޭސްއަށް ލިބުމުގެ ކުރިން ޕެނަލްޓީ އޭރިއާ ތެރެއިން އިޓަލީގެ ޑިފެންޑަރު ޑި ލޮރެންޒޯ ދިފާއުކޮށްފި.
ދެވަނަ ހާފުގެ ކުޅުން ފަށައިފި.
ފުރަތަމަ ހާފުގެ އުސްއަލިތައް
- ސްޕެއިން ވަނީ ގިނަ ޕާސްތައް ޖަހައި އެޓީމުގެ ކުޅުން ފައްކާ ކޮށްފައި
- ކުރީކޮޅުގައި ސްޕެއިންގެ އޮޔާޒަބާލްއަށް ހުސް ފުރުސަތެއް ލިބި ބޭކާރުވި
- އިޓަލީގެ ފުރަތަމަ ހަމަލާ ފެނުނީ 20 ވަރަކަށް މިނެޓް ފަހުން، އެމަސަން ކުރިއަށް އަރައި އިމޯބިލޭއަށް ދިން ބޯޅަ އޭނާއަށް ނުޖެހުނު
- އޮލްމޯގެ ނުރައްކާތެރި ހަމަލާއެއް ފެނުނު، އޭރިއާ ތެރެއިން އޭނާ ޖެހި ބާރު ހަމަލާ މަތަކުރީ ޑޮނަރޫމާ
- ހާފުގެ ފަހުކޮޅުގައި ނުރައްކާތެރި ހަމަލާއެއް ނުފެނުނު ނަމަވެސް މެޗު ކޮންޓްރޯލް ކުރީ ސްޕެއިން
- ހާފު ނިމެން ދަނިކޮށް އެމަސަން ފޮނުވާލި ބާރު ހަމަލާ އަމާޒުވީ ދަނޑިއަށް
މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.
'45 - އިޓަލީގެ ނުރައްކާތެރި ހަމަލާއެއް. އިންސީނިއާ ދިން ބޯޅައަކުން ޕެނަލްޓީ އޭރިއާ ތެރެއިން އެމަސަން ފޮނުވާލި ހަމަލާ އަމާޒުވީ ސްޕެއިން ގޯލުގެ ހުރަސް ދަނޑިއަށް.
'39 - ސްޕެއިނަށް ރަނގަޅު ފުރުސަތެއް. ޖޯޑީ އަލްބާ ދިން ބޯޅައަކުން ޕެނަލްޓީ އޭރިއާ ތެރެއިން އޮޔާޒަބާލް ފޮނުވާލި ހަމަލާ، އިޓަލީގެ ގޯލާ އަމާޒުވެފައެއް ނުވޭ.
މެޗުގައި ސްޕެއިންގެ މިޑްފީލްޑާާއި އެޓޭކް ފެންނަނީ ނުރައްކާކޮށް. ނަމަވެސް އިޓަލީގެ ތަޖުރިބާކާރު ޑިފެންޑަރުން ކަމަށްވާ ކިއޭލީނީ އާއި ބޮނޫޗީ ފެންނަނީ ވަރުގަދަކޮށް.
'33 - ސްޕެއިންގެ ހަމަލާއެއް. ޕެނަލްޓީ އޭރިއާ ބޭރުން އޮލްމޯ ފޮނުވާލި ހަމަލާ، އިޓަލީގެ ގޯލާ އަމާޒުވެފައެއް ނުވޭ.
'25 - ސްޕެއިނަށް ރަނގަޅު ފުރުސަތެއް. ޕެނަލްޓީ އޭރިއާ ތެރެއިން އޮލްމޯ ފޮނުވާލި ފުރަތަމަ ހަމަލާ، ބޮނޫޗީ ބްލޮކްކުރުމާއެކު ލިބުނު ބޯޅައިން އޮލްމޯ ފޮނުވާލި ދެވަނަ ހަމަލާ، އިޓަލީގެ ކީޕަރު ޑޮނަރޫމާ ވަނީ ހުޝިޔާރުކަމާއެކު މަތަކޮށްފައި.
'21 - އިޓަލީއަށް ރަނގަޅު ފުރުސަތެއް. އެމަސަން އަތުން ބޯޅަ ހޯދުމަށް ސްޕެއިންގެ ކީޕަރު އުނައި ސިމޮން ކުރިއަށް ނުކުތުމުން އިޓަލީއަށް ފުރުސަތެއް ލިބުނު ނަމަވެސް، ގޯލަށް ނުރައްކާކުރުމުގެ ކުރިން ސްޕެއިންގެ ޑިފެންޑަރުން ވަނީ ހުރަސް އަޅާފައި.
މި މުބާރާތުގައި ސްޕެއިން ކުޅުނު މެޗުތަކުގެ ފުރަތަމަ 11ގައި ހިމެނި، އެންމެ ކުރިން މޮރާޓާ ފެނުނު ނަމަވެސް، މި މެޗުގައި އޭނާ އިނީ ބެންޗުގައި. މި މެޗުގައި ސްޕެއިންގެ އެންމެ ކުރިން ފެންނަނީ ޑެނިއެލް އޮލްމޯ.
'15 - ސްޕެއިނަށް ފުރުސަތެއް. ޕެނަލްޓީ އޭރިއާ ބޭރުން ފެރާން ޓޮރޭސް ފޮނުވާލި ހަމަލާ، ގޯލާ އަމާޒުވެފައެއް ނުވޭ.
'12 - ޕެޑްރީގެ ރީތި ބޯޅައަކުން އޮޔާޒަބާލްއަށް ހުސް ފުރުސަތެއް. އޭނާއަށް ވަނީ އިޓަލީގެ ޕެނަލްޓީ އޭރިއާ ތެރެއިން އެ ބޯޅަ ރަނގަޅަށް ކޮންޓްރޯލް ނުކުރެވިފައި.
'11 - ސްޕެއިނުން މިހާރު އަންނަނީ އެޓީމުގެ ރަސްމީ ކުޅުން ކުޅެމުން. ގިނަ ވަގުތު ބޯޅަ ހިފަހައްޓައިގެން އިޓަލީގެ ގޯލަށް ނުރައްކާކުރުމަށް ފުރުސަތެއް ހޯދުމަށް ސްޕެއިނުން އަންނަނީ މަސައްކަތްކުރަމުން.
ބެލްޖިއަމްއާ ދެކޮޅަށް ކުޅުނު ކުއާޓާ ފައިނަލުގެ މެޗުގައި އިޓަލީގެ ލެފްޓް ބެކް ސްޕިނަޒޯލާއަށް އަނިޔާވުމާ ގުޅިގެން މި މެޗުގައި އެ މަގާމަށް ކުޅެމުން އަންނަނީ އެމަސަން. މި މުބާރާތުގައި އިޓަލީގެ އެންމެ މުހިންމު އެއް ކުޅުންތެރިޔަކަށް ވެފައިވަނީ ސްޕިނަޒޯލާ. އޭނާއަށް ލިބުނު އަނިޔާއާ ގުޅިގެން މި މުބާރާތުގައި ދެން އޭނާއެއް ނުފެންނާނެ.
މެޗުގެ ފުރަތަމަ ފަސް މިނެޓު ތެރޭ ސްޕެއިނަށް އެޓީމުގެ ރަސްމީ ކުޅުން ކުޅެވޭ ގޮތް ވަނީ ނުވެފައި. ގިނަ ވަގުތު ބޯޅަ ހިފަހައްޓައިގެން ކުޅުމަށް ވަނީ އުނދަގޫތަކެއް ކުރިމަތިވެފައި.
'4 - ބަރެއްލާ ފޮނުވާލި ހަމަލާއެއް ސްޕެއިންގެ ގޯލުގެ އަރިމަތީ ދަނޑިއަށް. އޭނާ ހުރީ އޮފްސައިޑު މަގާމެއްގައި.
މެޗުގެ ކުޅުން ފަށައިފި. ކިކްއޯފް ކުރީ ސްޕެއިނުން.
ޔޫރޯ 2020 ގެ ސެމީ ފައިނަލުގައި އިޓަލީއާއި ސްޕެއިން ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!
މިއީ ދުނިޔޭގެ ފުޓުބޯޅައިގެ ގަދަ ދެ ބާރުގެ ކުރިމަތިލުމެއް. ސްޕެއިން ސެމީއަށް ގޮސްފައި ވަނީ އެންމެފަހުން ކުޅުނު ކުއާޓާ ފައިނަލް މެޗުގައި ޕެނަލްޓީ ޖަހައިގެން ސްވިޒަލޭންޑް ބަލިކޮށްގެން. މިހާތަނަށް މުބާރާތުގައި ސްޕެއިން ބަލިވެފައެއް ނުވޭ. އެޓީމުން ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެ މެޗު ވީ އެއްވަރު. ފަހު މެޗުން ބޮޑު ތަފާތަކުން ސްލޮވޭކިއާ ބަލިކޮށް، ގަދަ 16 ގައި ސްޕެއިން ވަނީ ކްރޮއޭޝިއާ ބަލިކޮށްފައި. އަނެއްކޮޅުން އިޓަލީ ވަނީ މިހާތަނަށް މުބާރާތުގައި ކުޅުނު ހުރިހާ މެޗަކުން މޮޅުވެފައި. އެޓީމުން ގްރޫޕް ސްޓޭޖުގެ ތިން މެޗުންވެސް މޮޅުވެ، ގަދަ 16 ގައި ވަނީ އޮސްޓްރިއާ ބަލިކޮށްފައި. އިޓަލީ ސެމީއަށް ދިޔައީ ކުއާޓާގައި ބެލްޖިއަމް ބަލިކޮށްގެން.
ދެޓީމު މިރޭގެ މެޗަށް ނުކުންނާނީ ވެމްބްލީ ސްޓޭޑިއަމްއަށް.
ތާރީހީ ކުރިމަތިލުންތަކެއް އޮތް ދެޓީމު
އިޓަލީއާއި ސްޕެއިން ވަނީ މީގެ ކުރިން ބޮޑެތި މުބާރާތްތަކުގައި 10 މެޗެއް ކުޅެފައި. އެ މެޗުތަކުގެ ތާރީހަށް ބަލާއިރު، އިޓަލީން އައީ 2008 ވަނަ އަހަރާ ހަމައަށް ސްޕެއިންގެ މައްޗަށް ކުރި ހޯދަމުން. އިޓަލީގެ އެ ޑޮމިނޭޝަނަށްފަހު، އިޓަލީގެ މައްޗަށް ސްޕެއިނުން ފުރަތަމަ ކުރި ހޯދީ 2008 ވަނަ އަހަރު ޔޫރޯގެ ކުއާޓާ ފައިނަލުގައި. އޭގެ ފަހުން އިޓަލީއާއި ސްޕެއިން 2012 ވަނަ އަހަރު ޔޫރޯ ފައިނަލުގައި ކުޅެ، ސްޕެއިން މޮޅުވީ 4-0 ގެ ނަތީޖާއަކުން.
އެންމެފަހުން ބޮޑު މުބާރާތެއްގައި އިޓަލީއާއި ސްޕެއިން ވާދަކުރީ 2016 ވަނަ އަހަރު ޔޫރޯގައި. ސްޕެއިނުން ޖެހިޖެހިގެން ދެ ޔޫރޯ ކާމިޔާބު ކުރުމަށްފަހު ފްރާންސްގައި އޮތް ޔޫރޯއަށް އެ އަހަރު ދިޔައީ ޖެހިޖެހިގެން ތިން ތަށި ހަމަކުރަން ނަމަވެސް އިޓަލީން ވަނީ އެޓީމު ކަޓުވާލާފައި.
މިޑްފީލްޑަރުންގެ ކުރިމަތިލުމެއް
- މާކޯ ވެރާޓީ
- އުމުރު: 28 އަހަރު
- ކްލަބު: ޕީއެސްޖީ
- 2012 ވަނަ އަހަރުން ފެށިގެން ޕީއެސްޖީއަށް ކުޅެމުން އަންނަ ވެރާޓީ ވަނީ 2020 ވަނަ އަހަރު ޔޫއެފާ ޗެމްޕިއަންސް ލީގުގެ ފައިނަލަށް ޕީއެސްޖީ ގެންގޮސްދިނުމުގައި އިސް ދައުރެއް އަދާކޮށްފައި.
- ޕީއެސްޖީއަށް ވެރާޓީ ވަނީ 346 މެޗު ކުޅެދީފައި.
- އިޓަލީއަށް 2012 އިން ފެށިގެން ކުޅެމުން އަންނަ ވެރާޓީ ވަނީ 2014ގެ ވޯލްޑް ކަޕުގައި ކުޅެފައި.
- މިފަހަރުގެ ޔޫރޯއަށް އިޓަލީ ކޮލިފައި ކޮށްދިނުމަށް ވެސް ވެރާޓީ އިސް ދައުރެއް އަދާކުރި.
- ސާޖިއޯ ބުސްކަޓްސް
- އުމުރު: 32 އަހަރު
- ކްލަބު: ބާސެލޯނާ
- ރެއާލް މެޑްރިޑްގެ ޑިފެންޑަރު ސާޖިއޯ ރާމޯސްގެ ލީޑާޝިޕް ނެތްތަން ފޫބައްދަން މިފަހަރު ގައުމީ ޓީމުގެ ބޭންޑް އަޅައިގެން ނުކުތީ ތަޖުރިބާކާރު މިޑްފީލްޑަރު ސާޖިއޯ ބުސްކަޓްސް.
- ބާސެލޯނާގެ ޔޫތު ސިސްޓަމްގެ ތެރެއިން ސްޕެއިން ފުޓުބޯޅައިގެ ތެރެއަށް ފައްކާވެގެން އައި ބުސްކަޓްސް ވަނީ މިހާތަނަށް އެ ކްލަބަށް 415 މެޗު ކުޅެދީފައި.
- ބާސާއާއެކު ތިން ފަހަރަށް ޗެމްޕިއަންސް ލީގު ހޯދުމުގެ އިތުރުން ބުސްކަޓްސް ވަނީ އެ ކްލަބާއެކު އެތައް ކާމިޔާބީތަކެއް ހޯދައިފައި.
- ގައުމީ ޓީމަށް 122 މެޗު އޭނާ ކުޅެދީފައިވާ އިރު، ބުސްކަޓްސް ވަނީ 2010 ވަނަ އަހަރުގެ ވޯލްޑް ކަޕް، އަދި 2012 ވަނަ އަހަރުގެ ޔޫރޯ ސްޕެއިނަށް ހޯދައިދިނުމުގައި މުހިއްމު ދައުރެއް އަދާކޮށްފައި.
- ހޯލްޑިން މިޑްފީލްޑަރެއްގެ ގޮތުގައި ބޮޑަށް ފާހަގަވި ނަމަވެސް ބުސްކަޓްސްއަކީ ކުދި ޕާސްތައް ޖެހުމުގައިވެސް ފާހަގަކޮށްލެވޭ ކުޅުންތެރިއެއް.
ވަރުގަދަ ބެލްޖިއަމުން ފުރުސަތުތައް ބޭކާރުކޮށްލައި, ސްލޮވާކިއާގެ އަތްދަށުވެއްޖެ
ދިރާގުން ޔޫރޯ އާއި އީދަށް ހާއްސަ އޮފާތަކެއް
ތުރުކީން އިޓަލީ އާއެކު 2032ގެ ޔޫރޯ ބާއްވަން ބިޑުކުރާތީ 2028ގެ ޔޫރޯ ޔޫކޭއާއި އަޔަލޭންޑްގައި
ވޯލްޑް ކަޕަށްފަހުވެސް ހުއްޓާނުލާނަން، ޔޫރޯ 2024 ގައިވެސް ކުޅެން ބޭނުން: ރޮނާލްޑޯ
ގެވެށި އަނިޔާގެ މައްސަލައެއް ތެރޭގައި ހުރި ގިގްސް، ވޭލްސްގެ ކޯޗުކަން ރަސްމީކޮށް ދޫކޮށްލައިފި
