ޔޫރޯ: އިންގްލެންޑް 4-0 ޔޫކްރެއިން

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 4-0ގެ ނަތީޖާއަކުން އިންގްލެންޑް ކުރީގައި އޮވެގެން. ސެމީ ފައިނަލުގައި އިންގްލެންޑް ނުކުންނަން ޖެހޭނީ ޑެންމާކްއާ ދެކޮޅަށް.

'74 - ޔޫކްރޭނަށް ފުރުސަތެއް. ޕެނަލްޓީ އޭރިއާ ބޭރުން މަކަރެންކޯ ފޮނުވާލި ބާރު ހަމަލާ އަމާޒުވީ އިންގްލެންޑްގެ ކީޕަރު ޕިކްފޯޑްއާ ދިމާއަށް.

'63 - އިންގްލެންޑުގެ ހަތަރުވަނަ ލަނޑު. މޭސަން މައުންޓް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ޖޯޑަން ހެންޑަސަން. މިއީ އިންގްލެންޑަށް ހެންޑަސަން ކާމިޔާބުކޮށްދިން ފުރަތަމަ ލަނޑު.

'62 - އިންގްލެންޑަށް ރަނގަޅު ފުރުސަތެއް. ޕެނަލްޓީ އޭރިއާ ބޭރުން ލިބުނު ބޯޅައަކުން ކޭން ފޮނުވާލި ބާރު ހަމަލާ، ޔޫކްރޭނުގެ ކީޕަރު ބުޝްޗާން ވަނީ މަތަކޮށްފައި.

'50 - އިންގްލެންޑުން ތިން ލަނޑުގެ ލީޑެއް ހޯދައިފި. ލޫކް ޝޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ އެޓީމުގެ ފުރަތަމަ ލަނޑުވެސް ކާމިޔާބުކޮށްދިން ކެޕްޓަން ހެރީ ކޭން.

'46 - އިންގްލެންޑުން ލީޑު ފުޅާކޮށްފި. ލޫކް ޝޯ ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ ހެރީ މެގުއާ.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0ގެ ނަތީޖާއަކުން އިންގްލެންޑް ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓު.

'43 - ޔޫކްރޭނުގެ ހަމަލާއެއް. ޕެނަލްޓީ އޭރިއާ ބޭރުން ލިބުނު ބޯޅައަކުން ޝަޕަރެންކޯ ފޮނުވާލި ހަމަލާ، އިންގްލެންޑްގެ ގޯލާ އަމާޒުވެފައެއް ނުވޭ.

'39 - އިންގްލެންޑަށް ފުރުސަތެއް. ލޫކް ޝޯ ދިން ބޯޅައަކުން ޕެނަލްޓީ އޭރިއާ ތެރެއިން ސަންޗޯ ފޮނުވާލި ހަމަލާ، ޔޫކްރޭނުގެ ކީޕަރު ބުޝްޗާން ވަނީ މަތަކޮށްފައި.

'33 - އިންގްލެންޑްގެ ނުރައްކާތެރި ހަަމަލާއެއް. ޕެނަލްޓީ އޭރިއާ ބޭރުން ޑެކްލަން ރައިސް ފޮނުވާލި ބާރު ހަމަލާ، ޔޫކްރޭނުގެ ކީޕަރު ބުޝްޗާން ވަނީ މަތަކޮށްފައި.

'29 - އިންގްލެންޑަށް ފުރުސަތެއް. ލޫކް ޝޯ ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރެއިން ކޭން ބޮލުން ފޮނުވާލި ހަމަލާ، ޔޫކްރޭނުގެ ގޯލާ އަމާޒުވެފައެއް ނުވޭ.

'25 - ގިނަ ވަގުތު ބޯޅަ ހިފަހައްޓައިގެން ރަނގަޅަށް ކުޅެމުންދަނީ އިންގްލެންޑުން. ނަމަވެސް ލަނޑުޖެހުމަށް އިންގްލެންޑަށް ރަނގަޅު ފުރުސަތުތަކެއް ތަނަވަސްކުރެވިފައެއް ނުވޭ. އިންގްލެންޑުން ލަނޑު ޖަހާފައިވަނީ އެޓީމަށް ލިބުނު ހަމައެކަނި ފުރުސަތުން.

'17 - ޔޫކްރޭނަށް ފުރުސަތެއް. ކައިލް ވޯކާއަށް ހެދުނު ގޯހަކުން ލިބުނު ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ޔަރެމްޗުކް ފޮނުވާލި ހަމަލާ، އިންގްލެންޑްގެ ކީޕަރު ޕިކްފޯޑް ވަނީ މަތަކޮށްފައި.

އިންގްލެންޑުން ލީޑު ހޯދުމާއެކު ޔޫކްރޭނުން އަންނަނީ ވަރަށް ބޮޑަށް ކުރިއަށް ޖެހި، ލަނޑެއް ޖެހުމަށް މަސައްކަތްތަކެއް ކުރަމުން. ޔޫކްރޭނަށް ބޯޅަ ލިބުމާއެކު އިންގްލެންޑުން ފަހަތަށް ޖެހެމުންދާތީ، ލަނޑުޖަހާނެ ފުރުސަތެއް ތަނަވަސްކުރަން ޔޫކްރޭނަށް ދަނީ އުނދަގޫތަކެއް ކުރިމަތިވަމުން.

އިންގްލެންޑުން އެ ލަނޑު ޖަހާފައިވަނީ ޔޫކްރޭނުގެ ހާފުގެ ތެރޭގައި ގިނައިރުތަކެއް ވަންދެން ބޯޅަ ގެންގުޅުމަށްފަހު. ޔޫކްރޭނަށް ބޯޅަ ހޯދުމަށް އިންގްލެންޑުން ފުރުސަތެއް ދީފައެއް ނުވޭ.

'4 - އިންގްލެންޑުން ލީޑު ހޯދައިފި. ސްޓާލިން ދިން ރީތި ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ ހެރީ ކޭން. މިއީ މި މުބާރާތުގައި އިންގްލެންޑް ކެޕްޓަން ކޭން ކާމިޔާބުކުރި ދެވަނަ ލަނޑު.

މެޗުގެ ކުޅުން ފަށައިފި. ކިކްއޯފް ކުރީ ޔޫކްރޭނުން.