ޔޫރޯ: އިޓަލީ 2-1 ބެލްޖިއަމް

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 2-1ގެ ނަތީޖާއަކުން އިޓަލީ ކުރީގައި އޮވެގެން. އިޓަލީ ސެމީ ފައިނަލަށް. ސެމީގައި އިޓަލީ ނުކުންނަން ޖެހޭނީ ސްޕެއިންއާ ދެކޮޅަށް.

ދެވަނަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.

'84 - ބެލްޖިއަމަށް ފުރުސަތެއް. އިޓަލީގެ ދެ ކުޅުންތެރިއެއް ކައިރިން ނައްޓާލުމަށްފަހު، ޕެނަލްޓީ އޭރިއާ ބޭރުން ޑޮކޫ ފޮނުވާލި ހަމަލާ، ބެލްޖިއަމްގެ ގޯލާ އަމާޒުވެފައެއް ނުވޭ.

'74 - އިޓަލީގެ ސްޕިނަޒޯލާއަށް އަނިޔާވެ، އޭނާގެ ބަދަލުގައި އެމަސަން ކުޅެން ނުކުމެއްޖެ. ބެލެވޭ ގޮތުގައި ސްޕިނަޒޯލާއަށް ވެފައިވަނީ ސީރިއަސް އަނިޔާއެއް.

'75 - ބެލްޖިއަމަށް ފުރުސަތެއް. ޑި ބްރޭނާ ދިން ބޯޅައަކުން އިޓަލީގެ ޕެނަލްޓީ އޭރިއާ ބޭރުން ލުކާކޫ ފޮނުވާލި ހަމަލާ، ޖޯޖީނިއޯ ވަނީ ބްލޮކްކޮށްފައި.

'70 - ބެލްޖިއަމަށް ފުރުސަތެއް. ޗެޑްލީ ދިން ބޯޅަ، އިޓަލީގެ ޕެނަލްޓީ އޭރިއާ ތެރޭ ހުސްކޮށް ހުރި ލުކާކޫ އަދި ތޯގަން ހަޒާޑަށް ވެސް ލިބޭ ގޮތެއް ނުވި.

'69 - އިޓަލީގެ ހަމަލާއެއް. ޕެނަލްޓީ އޭރިއާ ބޭރުން އިންސީނިއާ ފޮނުވާލި ހަމަލާ، ބެލްޖިއަމްގެ ކީޕަރު ކޯޓުއާ ވަނީ މަތަކޮށްފައި.

'63 - އިޓަލީއަށް ފުރުސަތެއް. ޕެނަލްޓީ އޭރިއާ ތެރެއިން ކިއޭސާ ފޮނުވާލި ހަމަލާ، ބެލްޖިއަމްގެ ކީޕަރު ކޯޓުއާ ވަނީ މަތަކޮށްފައި.

'61 - ބެލްޖިއަމަށް ހުސް ފުރުސަތެއް. ޑި ބްރޭނާ ދިން ރީތި ބޯޅައަކުން އިޓަލީގެ ޕެނަލްޓީ އޭރިއާ ތެރެއިން ލުކާކޫ ފޮނުވާލި ހަމަލާ، ސްޕިނަޒޯލާ ވަނީ ދިފާއުކޮށްފައި.

'52 - ކިއޭސާ ދިން ބޯޅަ، ބެލްޖިއަމްގެ ޕެނަލްޓީ އޭރިއާ ތެރެއިން އިމޯބިލޭއަށް ރަނގަޅަށް ފޮނުވައިލެވޭ ގޮތެއް ނުވި.

އިޓަލީން ދެވަނަ ހާފު ވެސް ފެށީ ވަރުގަދަކޮށް.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-1ގެ ނަތީޖާއަކުން އިޓަލީ ކުރީގައި އޮވެގެން.

'45+2 - ބެލްޖިއަމަށް ލުކާކޫ ޕެނަލްޓީ ކާމިޔާބުކޮށް، އިޓަލީން ދަމަހައްޓަމުންދިޔަ ލީޑު ހަނިކޮށްފި.

'45 - އިޓަލީގެ ޕެނަލްޓީ އޭރިއާ ތެރެއިން ޑޮކޫއަށް ޑި ލޮރެންޒޯ ކުރި ފައުލަކާ ގުޅިގެން ބެލްޖިއަމަށް ޕެނަލްޓީއެއް.

'44 - އިޓަލީން ލީޑު ފުޅާކޮށްފި. ބަރެއްލާ ދިން ބޯޅައަކުން ޕެނަލްޓީ އޭރިއާ ބޭރުން ފޮނުވާލި ހަމަލާއަކުން އިޓަލީއަށް އެ ލަނޑު ކާމިޔާބުކޮށްދިނީ އިންސީނިއާ. އޭނާގެ ހަމަލާ އަމާޒުވީ ގޯލުގެ ކަނަކަށް.

'41 - އިޓަލީއަށް ފުރުސަތެއް. ޕެނަލްޓީ އޭރިއާ ބޭރުން ލިބުނު ބޯޅައަކުން ކިއޭސާ ފޮނުވާލި ހަމަލާ ދިޔައީ ބެލްޖިއަމް ގޯލުގެ އަރިމަތީ ދަނޑި ކައިރިން ބޭރަށް.

'37 - ލަނޑަށްފަހު ވެސް އިޓަލީން އަންނަނީ ރަނގަޅު ކުޅުމެއް ދައްކަމުން. ނަމަވެސް ބެލްޖިއަމްގެ ގޯލަށް އިތުރު ހަމަލާއެއް ފޮނުވައިލެވިފައެއް ނުވޭ.

'31 - އިޓަލީން ލީޑު ހޯދައިފި. ވެރާޓީ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ބާރު ހަމަލާއަކުން އިޓަލީއަށް އެ ލަނޑު ކާމިޔާބުކޮށްދިނީ ބަރެއްލާ. އޭނާގެ ހަމަލާ އަމާޒުވީ ބެލްޖިއަމް ގޯލުގެ ތިރީ ކަނަކަށް.

'27 - އިޓަލީގެ ހަމަލާއެއް. ޕެނަލްޓީ އޭރިއާ ބޭރުން އިންސީނިއާ ފޮނުވާލި ހަމަލާ ދިޔައީ ބެލްޖިއަމް ގޯލުގެ ހުރަސް ދަނޑި މަތިން ބޭރަށް.

'26 - ބެލްޖިއަމަށް އިތުރު ފުރުސަތެއް. ކައުންޓާ އެޓޭކެއްގައި ޑި ބްރޭނާ ދިން ބޯޅައަކުން ޕެނަލްޓީ އޭރިއާ ތެރެއިން ލުކާކޫ ފޮނުވާލި ހަމަލާ، އިޓަލީގެ ކީޕަރު ޑޮނަރުއްމާ ވަނީ މަތަކޮށްފައި.

22' ޑިބްރޭނާގެ ނުރައްކާތެރި ހަމަލާއެއް. މެދުތެރެއިން ބާރު ދުވެލީގާއި ގޮސް އޭރިއާ ބޭރުން ފޮނުވާލި ބާރު ހަމަލާ މަތަކުރީ އިޓަލީ ގޯލްކީޕަރު ޑޮނަރޫމާ.

18' އަނެއްކާވެސް ބެލްޖިއަމްގެ ހަމަލާއެއް. ޑިބްރޭނާގެ ބާރު ހަމަލާވެސް ބޭރަށް ދިޔައީ ޑިފެންޑަރެއްގެ ގައިގައި ޖެހި ބްލޮކްވެގެން.

16' ބެލްޖިއަމްގެ ހަމަލާއެއް. ތީލަމަންސްގެ ބާރު ހަމަލާ އިޓަލީގެ ވެރާޓީ ވަނީ ބްލޮކްކޮށް ބޭރު ކޮށްލައިފައި.

12' އިންސީނިއާގެ ހިލޭ ޖެހުމަކުން އިޓަލީ ކެޕްޓަން ކިއެލީނީ ބޯޅަ ގޯލަށް ވައްދާލި ނަމަވެސް، އެ ބޯޅަ ފޮނުވާލިއިރު އޭނާ އޮފްސައިޑް ކަމަށް ރެފްރީ ވަނީ ވީއޭއާރުގެ އެހީގައި ނިންމާފައި.

މެޗުގައި މިހާތަނަށް ފެންނަމުން ދަނީ ދާދި ހަމަހަމަ ކުޅުމެއް. ބެލްޖިއަމްއިން ރަނގަޅަށް ފެށި ނަމަވެސް މިހާރު ބޯޅަ ގިނަ ވަގުތު ކޮންޓްރޯލް ކުރަމުން އަންނަނީ އިޓަލީން. އަދި ގޯލަށް އަމާޒުކޮށް މެޗުގައި ހަމަލާއެއް އުފައްދާފައެއް ނުވޭ.

މިއީ ގަދަ ދެބާރުގެ ކުރިމަތިލުމެއް. ފޯމުގައި އޮތް އިޓަލީއާ ދެކޮޅަށް މިރޭ ނުކުތްއިރު ބެލްޖިއަމްއަށް ލިބުނު އެންމެ ބޮޑު ހިތްވަރަކީ އަނިޔާއިން ރަނގަޅުވެ ޑިބްރޭނާ ޓީމާ ގުޅުން. އޭނާ މިރޭގެ ފުރަތަމަ 11 އިން ނުފެންނާނެ ކަމަށް ބެލެވުނު ނަމަވެސް ކޯޗު މާޓިނޭޒް ވަނީ ފުރަތަމަ 11 އަށް ޑިބްރޭނާ ނެރެފައި. އަދިވެސް ބެލްޖިއަމް ކެޕްޓަން އެޑެން ހަޒާޑް ހުރީ އަނިޔާގައި.

1' ލުކާކޫއަށް ފުރުސަތެއް. މެދުތެރެއިން ދުއްވާލި ބޯޅައަށް ކުރިއަށް ޖެހި ގޯލަށް ފޮނުވާލަން މަސައްކަތް ކުރި ނަމަވެސް އިޓަލީ ކީޕަރު ވަނީ ކުރިއަށް ޖެހި ބޯޅަ ހޯދާފައި.

މެޗުގެ ކުޅުން ފަށައިފި. މެޗުގެ ކުޅުން ފެށީ ބެލްޖިއަމްއިން.