ޔޫރޯ: އިންގްލެންޑް 2-0 ޖަރުމަނު

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 2-0ގެ ނަތީޖާއަކުން އިންގްލެންޑް ކުރީގައި އޮވެގެން. ކުއާޓާގައި އިންގްލެންޑް ނުކުންނަން ޖެހޭނީ މިރޭ ސްވިޑެން އާއި ޔޫކްރޭން ބައްދަލުކުރާ މެޗުން މޮޅުވާ ޓީމަކާ ދެކޮޅަށް.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'86 - އިންގްލެންޑުން ލީޑު ފުޅާކޮށްފި. ގްރީލިޝް ދިން ބޯޅައަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ އެޓީމުގެ ކެޕްޓަން ހެރީ ކޭން.

'81 - ޖަރުމަނަށް ހުސް ފުރުސަތެއް. ހަވާޓްޒް ދިން ބޯޅައަކުން ވަރަށް ހުސްކޮށް ހުރެ ޕެނަލްޓީ އޭރިއާ ބޭރުން މުލާ ފޮނުވާލި ހަމަލާ ދިޔައީ އިންގްލެންޑް ގޯލުގެ އަރިމަތީ ދަނޑި ކައިރިން ބޭރަށް.

މުބާރާތުގައި އިންގްލެންޑުން މިހާތަނަށް ތިން ލަނޑު ޖަހާފައިވާ އިރު، އެޓީމަށް އެ ތިން ލަނޑުވެސް ޖަހައިދިނީ ރަހީމް ސްޓާލިން.

'75 - އިންގްލެންޑުން ލީޑު ހޯދައިފި. ލޫކް ޝޯ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ލަނޑު ކާމިޔާބުކޮށްދިނީ ރަހީމް ސްޓާލިން.

'72 - ޓްރިޕިއާއަށް ކުރި ފައުލަކާ ގުޅިގެން ޖަރުމަނުގެ ގޮސެންސްއަށް ރީނދޫ ކާޑެއް.

'69 - ދެ ޓީމުން ވެސް ބަދަލެއް ކޮށްފި. އިންގްލެންޑުން ސަކާގެ ބަދަލުގައި ކުޅެން ނެރުނީ ގްރީލިޝް. ޖަރުމަނުން ވާނާގެ ބަދަލުގައި ނެރުނީ ގްނަބްރީ.

އިންގްލެންޑުން ހުރަސްތަކެއް ނަގައި، ނުރައްކާކުރުމަށް މަސައްކަތްތަކެއް ކުރަމުންދިޔަ ނަމަވެސް، ޕެނަލްޓީ އޭރިއާ ތެރެއިން ކޭންއަށް އެ ބޯޅަތަކެއް ލިބޭ ގޮތެއް ނުވޭ. ޖަރުމަނުގެ ދެ ޑިފެންޑަރުން ކަމަށްވާ ހުމުލްސް އާއި ރުޑިގާގެ ސަބަބުން ކޭންއަށް ވަނީ މުޅި މެޗުގައި ވެސް އުނދަގޫތަކެއް ކުރިމަތިވެފައި.

'57 - ހަވާޓްޒް ދިން ބޯޅައަކުން ޕެނަލްޓީ އޭރިއާ ތެރެއިން ވާނާ ނުރައްކާކުރުމުގެ ކުރިން އިންގްލެންޑް ޑިފެންޑަރު ސްޓޯންސް، އެ ބޯޅަ ބޭރުކޮށްލައިފި.

މި ހާފުގައި ވެސް ދެޓީމުން އެޓޭކާއެކު ޑިފެންސަށް ވެސް އިސްކަންދޭކަން ފާހަގަކޮށްލެވޭ.

'48 - ޖަރުމަނަށް ރަނގަޅު ފުރުސަތެއް. ގޮސެންސް ނަގައިދިން ހުރަހަކުން ޕެނަލްޓީ އޭރިއާ ތެރެއިން ހަވާޓްޒް ފޮނުވާލި ބާރު ހަމަލާ، އިންގްލެންޑްގެ ކީޕަރު ޕިކްފޯޑް ވަނީ ހުޝިޔާރުކަމާއެކު މަތަކޮށްފައި.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެޓީމުން ކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'45 - އިންގްލެންޑަށް ހުސް ފުރުސަތެއް. ސްޓާލިން އަތުން ގެއްލުނު ބޯޅަ، ޕެނަލްޓީ އޭރިއާ ތެރޭ ހުސްކޮށް ހުރި ކޭންއަށް ލިބުނު ނަމަވެސް، އޭނާ ހަމަލާއެއް ފޮނުވައިލުމުގެ ކުރިން ޖަރުމަން ޑިފެންޑަރު ހުމުލްސް ވަނީ ދިފާއުކޮށްފައި.

'45 - ކްރޫސްއަށް ކުރި ފައުލަކާ ގުޅިގެން އިންގްލެންޑް މިޑްފީލްޑަރު ފިލިޕްސްއަށް ރީނދޫ ކާޑެއް.

ހިލޭ ޖެހުމުން ޓްރިޕިއާ ދިން ބޯޅަ، ޕެނަލްޓީ އޭރިއާ ތެރެއިން ކޭންއަށް ލިބުމުގެ ކުރިން ޖަރުމަން ޑިފެންޑަރު ހުމުލްސް ދިފާއުކޮށް، ބޭރުކޮށްލައިފި.

'42 - ކޭންއަށް ގޮރެއެޓްޒްކާ ކުރި ފައުލަކާ ގުޅިގެން އިންގްލެންޑަށް ހިލޭ ޖެހުމެއް.

'32 - ޖަރުމަނަށް ރަނގަޅު ފުރުސަތެއް. ހަވާޓްޒް ދިން ބޯޅައަކުން ޕެނަލްޓީ އޭރިއާ ތެރެއިން ވާނާ ފޮނުވާލި ހަމަލާ، އިންގްލެންޑްގެ ކީޕަރު ޕިކްފޯޑް ވަނީ މަތަކޮށްފައި.

'27 - ޓްރިޕިއާ ނަގައިދިން ހުރަހަކުން ޕެނަލްޓީ އޭރިއާ ތެރެއިން މެގުއާ ބޮލުން ފޮނުވާލި ހަމަލާ، ޖަރުމަނުގެ ގޯލާ އަމާޒެއް ނުވި.

'25 - ލޫކް ޝޯއަށް ކުރި ފައުލަކާ ގުޅިގެން ގިންޓާއަށް ރީނދޫ ކާޑެއް ދައްކައި، އިންގްލެންޑަށް ހިލޭ ޖެހުމެއް.

އިންގްލެންޑުން ކުޅުން ވަރުގަދަކޮށް، މިހާރު އަންނަނީ ޖަރުމަނުގެ ގޯލަށް ނުރައްކާކުރަމުން.

'17 - އިންގްލެންޑަށް އިތުރު ފުރުސަތެއް. ކޯނަރެއްގެ ތެރެއިން ޕެނަލްޓީ އޭރިއާ ތެރޭ ހުރެ މެގުއާ ބޮލުން ފޮނުވާލި ހަމަލާ އަމާޒުވީ ޖަރުމަނުގެ ކީޕަރު ނޯޔާގެ އަތަށް.

'16 - އިންގްލެންޑަށް ރަނގަޅު ފުރުސަތެއް. ޕެނަލްޓީ އޭރިއާ ބޭރުން ސްޓާލިން ފޮނުވާލި ހަމަލާ، ޖަރުމަނުގެ ކީޕަރު ނޯޔާ ވަނީ މަތަކޮށްފައި.

މެޗުގެ ފުރަތަމަ ދިހަ މިނެޓު ތެރޭ ނުރައްކާ ޓީމެއްގެ ގޮތުގައި ފެންނަނީ ޖަރުމަން. އިންގްލެންޑުގެ ފަރާތުން ފެންނަނީ ޑިފެންސިވް ކުޅުމެއް. އެޓީމަށް ލަނޑު ޖަހާނެ ފުރުސަތެއް ވެސް ތަނަވަސްކުރެވިފައެއް ނުވޭ.

'10 - ޖަރުމަނަށް ފުރުސަތެއް. ހިލޭ ޖެހުމުގެ ތެރެއިން ކައި ހަވާޓްޒް ފޮނުވާލި ހަމަލާ، އިންގްލެންޑުގެ ވޯލުގައި ތިބި ކުޅުންތެރިން ވަނީ ބްލޮކްކޮށްފައި.

'8 - އިންގްލެންޑްގެ ޕެނަލްޓީ އޭރިއާ ބޭރުން ގޮރެއެޓްޒްކާއަށް ޑެކްލެން ރައިސް ކުރި ފައުލަކާ ގުޅިގެން ޖަރުމަނަށް ހިލޭ ޖެހުމެއް.

'4 - ޖަރުމަނުގެ ހަމަލާއެއް. ޕެނަލްޓީ އޭރިއާ ބޭރުން ގޮރެއެޓްޒްކާ ފޮނުވާލި ހަމަލާ، އިންގްލެންޑްގެ ކީޕަރު ޕިކްފޯޑް ވަނީ ފަސޭހަކަމާއެކު ހޯދާފައި. އެ ބޯޅައިގައި ބާރެއް ނެތް.

'3 - ކިމިކް ނަގައިދިން ހުރަސް، ޕެނަލްޓީ އޭރިއާ ތެރެއިން ނުރައްކާވުމުގެ ކުރިން އިންގްލެންޑް ޑިފެންޑަރު ވޯކާ ދިފާއުކޮށްފި.

މެޗުގެ ކުޅުން ފަށައިފި. ކިކްއޯފް ކުރީ ޖަރުމަނުން.