ޔޫރޯ: ވޭލްސް 0-4 ޑެންމާކު

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 4-0ގެ ނަތީޖާއަކުން ޑެންމާކު ކުރީގައި އޮވެގެން.

'90+4 - ޑެންމާކުން ހަތަރުވަނަ ލަނޑެއް ކާމިޔާބުކޮށްފި. ކޯނެލިއަސް ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ޑެންމާކަށް އެ ލަނޑު ކާމިޔާބުކޮށްދިނީ ބްރެތުވެއިޓް. ވީއޭއާރުން އޭނާ އޮފްސައިޑު މަގާމެއްގައި ހުރިތޯ ބެލުމަށްފަހު، ނިންމީ ގޯލެއް ކަމަށް.

'90 - މައޭލާއަށް ކުރި ފައުލަކާ ގުޅިގެން ވޭލްސްގެ ހެރީ ވިލްސަންއަށް ރަތް ކާޑެއް ދައްކައިފި.

'88 - ޑެންމާކުން ތިން ލަނޑުގެ ލީޑެއް ހޯދައިފި. ޕެނަލްޓީ އޭރިއާ ތެރޭ ހުސްކޮށް ހުއްޓައި ޖެންސެން ދިން ބޯޅައަކުން ފޮނުވާލި ހަމަލާއަކުން ޑެންމާކަށް އެ ލަނޑު ކާމިޔާބުކޮށްދިނީ މައޭލާ.

'86 - ޑެންމާކަށް ހުސް ފުރުސަތުތަކެއް. ޖެންސެން ނަގައިދިން ހުރަހަކުން ޕެނަލްޓީ އޭރިއާ ތެރެއިން ކޯނެލިއަސް ބޮލުން ފޮނުވާލި ހަަމަލާ، ވޭލްސްގެ ކީޕަރު ވާޑް ދިފާއުކުރި އިރު، ރީބައުންސް ބޯޅައިން ބްރެތުވެއިޓް ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށް. ދަނޑީގައި ޖެހިފައި ނުކުތުމާއެކު ވެސްޓާގާޑަށް ފުރުސަތެއް ލިބުނު ނަމަވެސް، ޕެނަލްޓީ އޭރިއާ ތެރެއިން އޭނާ ފޮނުވާލި ހަމަލާ ގޯލާ އަމާޒުވެފައެއް ނުވޭ.

ޑެންމާކުން ދެ ލަނޑުގެ ލީޑެއްގައި އޮތުމުން އެޓީމުން އަންނަނީ ޑިފެންސަށް އިސްކަންދީ، ކައުންޓާ އެޓޭކުތަކުގައި ނުރައްކާ ކުރުމަށް މަސައްކަތްކުރަމުން.

'82 - ޑެންމާކަށް ފުރުސަތެއް. ބްރެތުވެއިޓް ދިން ބޯޅައަކުން ވޭލްސްގެ ޕެނަލްޓީ އޭރިއާ ތެރެއިން މައޭލާ ފޮނުވާލި ހަމަލާ، ރޮޑަން ވަނީ ދިފާއުކޮށްފައި.

'74 - ކައުންޓާ އެޓޭކެއްގައި ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ބޭލް ދިން ބޯޅަ، ޑެންމާކުގެ ޕެނަލްޓީ އޭރިއާ ތެރެއިން ވޭލްސްގެ އިތުރު ކުޅުންތެރިޔަކަށް ލިބުމުގެ ކުރިން ކެޕްޓަން ސިމޮން ކިއާ ދިފާއުކޮށްފި.

'65 - ޑެންމާކަށް ފުރުސަތެއް. ޕެނަލްޓީ އޭރިއާ ބޭރުން ޖެންސެން ފޮނުވާލި ހަމަލާ ދިޔައީ ވޭލްސް ގޯލުގެ އަރިމަތީ ދަނޑި ކައިރިން ބޭރަށް.

'63 - ވޭލްސްގެ ހަމަލާއެއް. ޕެނަލްޓީ އޭރިއާ ބޭރުން ޖޯ އެލަން ފޮނުވާލި ހަމަލާ ދިޔައީ ޑެންމާކުގެ ގޯލާ އަމާޒު ނުވެ ބޭރަށް.

'59 - ވޭލްސްއަށް ފުރުސަތެއް. ބޭލް ނަގައިދިން ހުރަހަކުން ޕެނަލްޓީ އޭރިއާ ތެރެއިން ލިބުނު ބޯޅައަކުން ޑިނިއެލް ޖޭމްސް ފޮނުވާލި ހަމަލާ، ކްރިސްޓެންސެން ވަނީ ބްލޮކްކޮށްފައި.

'53 - ވޭލްސްއަށް ފުރުސަތެއް. ނިކޯ ވިލިއަމްސް ނަގައިދިން ހުރަހަކުން ޕެނަލްޓީ އޭރިއާ ތެރެއިން ބޭލް ބޮލުން ފޮނުވާލި ހަމަލާ، ޑެންމާކުގެ ގޯލާ އަމާޒުވެފައެއް ނުވޭ.

ޑޮލްބާގަށް އެ ބޯޅަ ލިބުނީ ޕެނަލްޓީ އޭރިއާ ތެރެއަށް ވަނުމަށްފަހު ބެރެތުވެއިޓް ދިން ބޯޅަ، ވޭލްސްގެ ނިކޯ ވިލިއަމްސްއަށް ރަނގަޅަށް ދިފާއު ނުކުރެވުމުގެ ސަބަބުން.

'48 - ޑެންމާކުން ލީޑު ފުޅާކޮށްފި. ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ޑެންމާކުގެ ދެވަނަ ލަނޑުވެސް ކާމިޔާބުކޮށްދިނީ އެޓީމުގެ ފުރަތަމަ ލަނޑުވެސް ކާމިޔާބުކޮށްދިން ޑޮލްބާގް.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0ގެ ނަތީޖާއަކުން ޑެންމާކު ކުރީގައި އޮވެގެން.

'45 - ޑެންމާކަށް ހުސް ފުރުސަތެއް. ސްޓްރައިގާ ލާސަން ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ މޭލާ ފޮނުވާލި ހަމަލާ، ވޭލްސްގެ ޑިފެންޑަރުން ވަނީ ދިފާއުކޮށްފައި.

ވޭލްސްއަށް އަދިވެސް އެޓޭކުގައި ރަނގަޅު ކުޅުމެއް ދެއްކޭ ގޮތް ވަނީ ނުވެފައި. ޑެންމާކުގެ ލަނޑަށްފަހު، އެޓީމަށް ވެސް ރަނގަޅު ފުރުސަތެއް ތަނަވަސްކުރެވިފައެއް ނުވޭ.

'32 - ވޭލްސްގެ ޕެނަލްޓީ އޭރިއާ ތެރެއިން ޑެމްސްގާޑް ދިން ބޯޅަ، ޑޮލްބާގަށް ނިންމައިލެވޭ ގޮތެއް ނުވި.

ވީއޭއާރުން ބެލުމަށްފަހު ނިންމީ ގޯލެއް ކަމަށް.

'27 - ޑެންމާކުން ލީޑު ހޯދައިފި. ވޭލްސް ގޯލުގެ ތިރީ ކަނަކަށް އަމާޒުކޮށް، ޕެނަލްޓީ އޭރިއާ ބޭރުން ފޮނުވާލި ހަމަލާއަކުން ޑެންމާކަށް އެ ލަނޑު ކާމިޔާބުކޮށްދިނީ ޑޮލްބާގް.

'25 - ޑޮލްބާގަށް ކުރި ފައުލަކާ ގުޅިގެން ވޭލްސްގެ ޖޯ ރޮޑަންއަށް ރީނދޫ ކާޑެއް.

'23 - ޑެލެއިނީ ނަގައިދިން ހުރަސް، ޑެންމާކުގެ ކުޅުންތެރިޔަކަށް ލިބުމުގެ ކުރިން ވޭލްސްގެ ޕެނަލްޓީ އޭރިއާ ތެރެއިން ރޮބާޓްސް ދިފާއުކޮށްފި.

މެޗުގެ ކުރީކޮޅު ވޭލްސް އިން ވަރުގަދަ ކުޅުމެއް ދެއްކި ނަމަވެސް، މިހާރު ރަނގަޅު ކުޅުމެއް ދައްކަމުން އަންނަނީ ޑެންމާކުން. ނަމަވެސް ޑެންމާކަށް އަދި ލަނޑުޖަހާނެ ރަނގަޅު ފުރުސަތެއް ލިބިފައެއް ނުވޭ.

'14 - ވޭލްސްއަށް އިތުރު ފުރުސަތެއް. ބޭލް ދިން ބޯޅައަކުން ޕެނަލްޓީ އޭރިއާ ބޭރުން ރަމްސީ ފޮނުވާލި ހަމަލާ، ޑެންމާކް ޑިފެންޑަރުން ވަނީ ބްލޮކްކޮށްފައި.

12' އަނެއްކާވެސް ބޭލްގެ ނުރައްކާ. ދުރުން ފޮނުވާލި ހަމަލާ ދިޔައީ ގޯލާ އަމާޒުނުވެ. މެޗުގެ ކުރީކޮޅުގައި ވޭލްސްގެ އެންމެ ނުރައްކާތެރި ކުޅުންތެރިއެއްގެ ގޮތުގައި ފާހަގަކޮށްލެވެނީ ބޭލް. އޭނާ ހަމަޖެހިލައިގެން ހަމަލާތައް އުފައްދަމުން ދިޔުމަކީ ޑެންމާކުގެ ޑިފެންސަށް އުނދަގޫތަކެއް ކުރިމަތިވާނެ ކަމެއް.

10' ވޭލްސްގެ ނުރައްކާތެރި ހަމަލާއެއް. ރެމްސީ އޭރިއާ ތެރެއިން ފޮނުވާލި ހަމަލާ ޑެންމާކު ޑިފެންޑަރު ވަނީ ބްލޮކް ކޮށްފައި.

8' ބޭލްގެ ނުރައްކާތެރި ހަމަލާއެއް. އަރިމަތިން އޭރިއާ ކަނާ ދިމާލަށް ވަދެ ފޮނުވާލި ބާރު ހަމަލާ ދިޔައީ އަރިމަތީ ދަނޑި ކައިރިން ބޭރަށް.

6' ޑެންމާކުގެ އެޓޭކެއް. ބްރައިތުވެއިޓް އަރިމަތިން ކުރިއަށް ޖެހި ހުރަސްކޮށްދޭން މަސައްކަތް ކުރި ބޯޅަ ވޭލްސްގެ ޑިފެންޑަރު ވަނީ ބޭރު ކޮށްލާފައި.

މެޗުގެ ކުޅުން ފަށައިފި.