ޔޫރޯ: ޖަރުމަނު 2-2 ހަންގޭރީ

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-2ގެ ނަތީޖާއަކުން ދެ ޓީމު އެއްވަރުވެގެން. ޖަރުމަން ގަދަ 16 އަށް، ހަންގޭރީއަށް ވަނީ ޖާގަ ގެއްލިފައި.

84' ޖަރުމަނުން އަނެއްކާވެސް ނަތީޖާ ހަމަހަމަ ކޮށްފި. އެޓޭކަށް އަރައި ކުރި ޕްރެޝަރުގައި ހޯދި ފުރުސަތުގައި ޖަރުމަނަށް ނަތީޖާ ހަމަހަަމަކޮށްދިނީ ގޮރެޓްސްކާ.

81' ޓޯނީ ކުރޫސްގެ ނުރައްކާތެރި ހަމަލާއެއް. އޭރިއާ ތެރެއަށް ވަދެ ފޮނުވާލި ހާފް ވޮލީގައި ބޯޅަ ގޯލަށް އަމާޒުނުވެ ބޭރަށް ދިޔައީ ކިރިޔާ.

79' ކްރޫސްގެ ހުރަހަކުން މުލާ ބޮލުން ޖެހި ބޯޅަ ދިޔައީ ގޯލާ އަމާޒުނުވެ ބޭރަށް.

73' ޖަރުމަނުން ހަމަލާތައް އުފައްދަން ބޮޑެތި ބޯޅަތަކެއް ކުރިއަށް ލާތަން ފެންނަމުންދޭ. މުލާ ކުޅުމަށް ނެރެ އެޓީމުން ވަނީ އެޓޭކް ވަރުގަދަކޮށްފައި.

67' އަނެއްކާވެސް ހަންގޭރީން ލީޑު ނަގައިފި. ކޮއްޓައިގެން އަރައި މަޑުވެސް ކޮށްނުލައި އުފެއްދި ހަމަލާގައި ހަންގޭރީން ލީޑު ނެގީ ޝޭފާ.

66' ޖަރުމަނުން ނަތީޖާ ހަމަހަމަކޮށްފި. ހިލޭ ޖެހުމެއްގެ ބޭނުން ހިފައި ބޯޅަ ގޯލަށް ވައްދާލީ ކައި ހަވާޓްސް.

61' ސަލާއީގެ ހިލޭ ޖެހުމެއް ގޯލުގެ ދަނޑިއަށް. ހަންގޭރީގެ ނުރައްކާތެރި ހަމަލާއެއް.

51' ކައި ހަވާޓްސްގެ ބާރު ހަމަލާއެއް. އޭރިއާ ބޭރުގައި ހުރެ އެނބުރިލާފައި އޭނާ ފޮނުވާލި ހަމަލާ އަމާޒުވީ ހަންގޭރީ ގޯލްކީޕަރު އަތަށް.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި. 1-0 އިން ކުރީގައި އޮތީ ހަންގޭރީ.

44' ކައި ހަވާޓްސްއަށް ފުރުސަތެއް. އޭނާ ފުރުތަމަ ފޮނުވާލި ހަމަލާ ޑިފެންޑަރު ބްލޮކް ކޮށްލި ނަމަވެސް ހުސްކޮށް އޮވެ ފޮނުވާލި ދެވަނަ ބޯޅަ ދިޔައީ އަރިމަތިން ބޭރަށް.

37' ހަންގޭރީގެ ހަމަލާއެއް. ދުރުން ޝޭފާ ފޮނުވާލި ހަމަލާ ދިޔައީ ގޯލަށް އަމާޒުނުވެ މަތިން.

ޖަރުމަނުގެ އެލިއާންޒް އެރީނާއަށް ދަނީ ވަރަށް ބޯކޮށް ވާރޭ ވެހެމުން. ކުޅުންތެރިންނަށް ބޯޅަ ކޮންޓްރޯލް ކުރަން ކޮންމެވެސް ވަރެއްގެ އުނދަގޫތަކަކާ ދިމާވަމުންދޭ.

27' ކްރޫސްގެ ހިލޭ ޖެހުމަކުން ހުރަސް ކުރި ބޯޅައިން ހަމުލްސް ފޮނުވާލި ހަމަލާ ދިޔައީ ގޯލާ އަމާޒުނުވެ މަތިން.

21' ޖަރުމަނުން ގޯލަކާ ގާތަށް. ކޯނަރަކުން މެޓްސް ހަމުލްސް ބޮލުން ފޮނުވާލި ހަމަލާ އަމާޒުވީ ގޯލުގެ ދަނޑިއަށް.

16' ޖަރުމަނުގެ ނުރައްކާތެރި ހަމަލާއެއް. ކައި ހަވާޓްސް އަރިމަތިން އޭރިއާ ތެރެއަށް ވަދެ ނުރައްކާތެރި ހުރަހެއް ކުރި ނަމަވެސް އެ ބޯޅައިގައި ފައިޖައްސާލާނެ ޖަރުމަނު ކުޅުންތެރިޔަކު ނެތް.

ހަންގޭރީގެ ގޯލަށްފަހު ޖަރުމަނުން ދަނީ ބޯޅަ ހިފަހައްޓައި ހަމަލާއެއް އުފެއްދުމަށް ބުރަކޮށް މަސައްކަތް ކުރަމުން. އެހެންނަމަވެސް ހަންގޭރީގެ ޑިފެންސް ތެރެއިން ޖާގައެއް ނުލިބޭ. ހަންގޭރީން ދަނީ ވަރުގަދައަށް ޑިފެންސް ކުރަމުން.

އެ ޓީމަށް ގޯލް ޖަހައިދިނީ އެޑަމް ޒަލާއީ. އޭރިއާ ތެރެއަށް ހުރަސްވި ބޯޅަ ޒަލާއީ ގޯލަށް ވައްދާލީ ބޮލުން.

11' ހަންގޭރީގެ ފުރަތަމަ ހަމަލާގައި ލީޑު ނަގައިފި.

ހަންގޭރީން ބޭނުން ކުރަމުން ދަނީ ގްރޫޕްގެ އެހެން މެޗުތަކުގައިވެސް ބޭނުންކުރި ޓެކްޓިކްސް. އިދިކޮޅު ޓީމަށް އެޓޭކް ކުރަން އުނދަގޫވާނެހެން ފަހަތުގައި ގިނަ ކުޅުންތެރިންތަކެއް މަޑުކޮށްގެން ހަންގޭރީން ކުޅެމުންދަނީ ކައުންޓާގައި އެޓޭކް ކުރަން ވިސްނައިގެން. ޖަރުމަނުން ޕާސްތައް ޖެހި ނަމަވެސް ހަންގޭރީގެ ޑިފެންސް ފޫއަޅުވާލަން އުނދަގޫވާނެ ކަމަށް ބެލެވޭ.

3' ޖަރުމަނުގެ ފުރަތަމަ ނުރައްކާތެރި ހަމަލާ. މަތިން ކުރިއަށް ލީ ބޯޅައަކަށް އޭރިއާ ތެރެއަށް ވަދެ ކިމިޗް ހަނި އޭންގަލްއަކުން ފޮނުވާލި ހަމަލާ މަތަކުރީ ހަންގޭރީގެ ގޯލްކީޕަރު.

މެޗުގެ ކުޅުން ފަށައިފި. ކުޅުން ފެށީ ޖަރުމަނުން.