ޔޫރޯ: ސްކޮޓްލޭންޑް 1-3 ކްރޮއޭޝިއާ

މެޗުގެ އުސްއަލިތައް

މެޗުގެ ކުޅުން ނިންމާލައިފި. ކްރޮއޭޝިއާ މޮޅުވީ 3-1 ގެ ނަތީޖާއަކުން.

90+2 ސްކޮޓްލޭންޑްގެ ހަމަލާއެއް. މެކް ޓޮމިނޭ ފޮނުވާލި ބާރު ހަމަލާ ބްލޮކް ކުރީ ލޮވްރެން.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

މިރޭ ޖެހި ގޯލާއެކު މޮޑްރިޗް ވެފައިވަނީ ކްރޮއޭޝިއާ ޖާޒީގައި ޔޫރޯގައި ގޯލު ޖެހި އެންމެ ޒުވާން އަދި އެންމެ ދުވަސްވީ ކުޅުންތެރިޔާއަށް. އޭނާ ޔޫރޯގައި ޖެހި ފުރަތަމަ ގޯލު ޖެހީ 2008 ވަނަ އަހަރު. އޭރު އުމުރުން 23 އަހަރު. މިހާރު މޮޑްރިޗްގެ އުމުރުން 35 އަހަރު.

79' ސްކޮޓްލޭންޑްގެ ނުރައްކާތެރި ހަމަލާއެއް. ޗޭ އެޑަމްސް ހަނި އޭންގަލްއަކުން ފޮނުވާލި ބޯޅަ މަތަކުރީ ގޯލްކީޕަރު.

ތިންވަނަ ޓީމުގެ ގޮތުގައި ގަދަ 16 ޔަގީން ކުރުމަށް ކްރޮއޭޝިއާ ފިޔަވަޅެއް ގާތަށް. އެ ގޯލަކީ ބޮޑެތި މުބާރާތްތަކުގައި ޕެރަސިޗް ޖެހި ނުވަވަނަ ގޯލު.

77' ކްރޮއޭޝިއާ ލީޑު ފުޅާކޮށްފި. މޮޑްރިޗްގެ ކޯނަރު ބޮލުން ގޯލަށް ވައްދާލީ ޕެރަސިޗް.

73' ސްކޮޓްލޭންޑުން ދަނީ ނަތީޖާ ހަމަހަމަކުރުމަށް މަސައްކަތް ކުރަމުން. ފްރޭސާ ދުރުން ފޮނުވާލި ހަމަލާ މިފަހަރުވެސް ދިޔައީ މާ މަތިން.

67' ސްކޮޓްލޭންޑްގެ މެކްގްރެގާ ދުރުން ފޮނުވާލި ހަމަލާ ދިޔައީ މާ މަތިން ބޭރަށް.

61' މޮޑްރިޗްގެ ހިތްގައިމު ގޯލަކާއެކު ކްރޮއޭޝިއާ އަލުން ލީޑު ނަގައިފި. އޭރިއާ ބޭރުން ފައިގެ ބޭރު ފަޅިން ކާވް ކޮށްލި ބޯޅަ ވައްދާލީ ގޯލުގެ ކަނަށް.

58' ސްކޮޓްލޭންޑްގެ މެގިންއަށް ހުސް ފުރުސަތެއް. އަރިމަތިން އައި ހުރަހަށް އަރައި ބޯޅައިގައި ފައި ޖެއްސި ނަމަވެސް ގޯލާ އަމާޒެއް ނުވި.

55' އަނެއްކާވެސް ސްކޮޓްލޭންޑް ގޯލްކީޕަރު މާޝަލްގެ ވަރުގަދަ ސޭވްއެއް. ޕެރަސިޗް އޭރިއާ ތެރެއަށް ހުސްކޮށް ވަދެ ފޮނުވާލި ބޯޅަ މާޝަލް ނުކުމެ މަތަކުރީ މޫނު ބޯޅައާ ދިމާކޮށްގެން.

49' ކްރޮއޭޝިއާއަށް ލީޑު ފުޅާކުރަން ހުސް ފުރުސަތެއް. ޕެޓްކޮވިޗް ތުރޫ ބޯޅައަކަށް ހުސްކޮށް އަރައި ބޯޅަ ފޮނުވާލި ނަމަވެސް ކީޕަރު މާޝަލް ވަނީ ހުޝިޔާރުކަމާއެކު ކުރިއަށް ނުކުމެ އެ ބޯޅައަށް ހުރަސް އަޅާފައި.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެން.

އެ ގޯލަކީ ސްކޮޓްލޭންޑްގެ ތާރީހުގައިވެސް ބޮޑު މުބާރާތެއްގައި ޖެހި ފުރަތަމަ ގޯލު. ހޭމްޕްޑެން ޕާކު ދަނީ ގުގުމަމުން.

42' ސްކޮޓްލޭންޑް ނަތީޖާ ހަމަހަމަކޮށްފި. އެޓީމަށް ގޯލު ޖަހައިދިނީ މެކްގްރެގާ. ރޮބާޓްސަންގެ ހުރަސް ސާފުކޮށްލަން ކްރޮއޭޝިއާ ޑިފެންޑަރު ޖެހި ބޯޅަ ހޯދައި، އޭނާ ގޯލަށް ބޯޅަ ވައްދާލީ ޕެނެލްޓީ އޭރިއާ ބޭރުން ފޮނުވާލި ބާރު ހަމަލާއަކުން.

39' ޕެރަސިޗްގެ ނުރައްކާތެރިކަން ކްރޮއޭޝިއާއިން ފާހަގަވޭ. އަރިމަތިން ބާރު ދުވެލީގައި އޭރިއާ ބޭރަށް ކަނޑާލާފައި ޖެހި ބޯޅަ މިފަހަރު ދިޔައީ މަތިން.

37' ކްރޮއޭޝިއާގެ ޔުރާނޮވިޗް ދުރުން ފޮނުވާލި ހަމަލާ ދިޔައީ ގޯލާ އާމަޒުނުވެ މާ ބޮޑަށްވެސް މަތިން.

'37 - ގިނަ ވަގުތު ބޯޅަ ހިފަހައްޓައިގެން ކުޅެމުން ދަނީ ކްރޮއޭޝިއާއިން. އެހެންނަމަވެސް ދެޓީމުން ކުރެ އެއްވެސް ޓީމަކުން މިދިޔަ 10 ވަރަކަށް މިނެޓުގައި ހަމަލާއެއް އުފައްދައިފައެއް ނުވޭ.

މި ގްރޫޕުގައި ކުޅެމުންދާ ދެވަނަ މެޗުގައި އިންގްލެންޑުން ވަނީ ޗެކު ރިޕަބްލިކް ކައިރިން ލީޑު ނަގާފައި. އިތުރު ގޯލުތަކެއް ކްރޮއޭޝިއާއިން ޖަހައިފި ނަމަ، ދެވަނައަށް އެރުމުގެ ފުރުސަތު އެބައޮތް. އަދި އިންގްލެންޑުން ޗެކު ރިޕަބްލިކް ކޮޅަށް އިތުރު ގޯލެއް ޖެހުންވެސް ވާނީ ކްރޮއޭޝިއާއަށް ހިތްވަރަކަށް.

23' ސްކޮޓްލޭންޑަށް ފުލުފުލުގައި ދެ ފުރުސަތެއް. އާމްސްޓްރޯންގް ހުރަސްކޮށްލި ބޯޅަ ނުރައްކާކޮށް ދިޔަ ނަމަވެސް ކުޅުންތެރިޔަކު ފައިގައި ލައްވާ ނުލި. އެ ހަމަލާއިން ސަލާމަތް ނުވެވިގެން އުޅެނިކޮށް މެގިން ޖެހި ބޯޅަ މަތަކުރީ ގޯލްކީޕަރު.

21' މޮޑްރިޗްގެ ނުރައްކާތެރި ހަމަލާއެއް. ދުރުން އޭނާ ފޮނުވާލި ބާރު ހަމަލާ ދިޔައީ ހުރަސް ދަނޑި ކައިރިން ބޭރަށް.

17' ކްރޮއޭޝިއާގެ ފުރަތަމަ ހަމަލާއިން ލީޑު ނަގައިފި. ލީޑު ނަގައިދިނީ ވްލަޝިޗް. އޭރިއާ ތެރެއަށް މޮޑްރިޗް ނަގައިދިން ހުރަސް، ޕެރަސިޗް ބޮލުން ޖައްސާލުމުން ފަހިވީ ވްލަސިޗަށް. އޭނާ ބަލާލާފައި ތިރިތިރީން ބޯޅަ ވައްދާލީ ގޯލުގެ ކަނަށް.

ސްކޮޓްލޭންޑް ދަނީ ހަލުވި އެޓޭކިން ކުޅުމެއް ކުޅެމުން. ކްރޮއޭޝިއާއިން ބޮޑަށް މަޑުޖެހިގެން ކުޅެމުންދާ އިރު، މިހާތަަނަށް ކުޅުނު 10 ވަރަކަށް މިނެޓަށް ބަލާއިރު ސްކޮޓްލޭންޑް ފެންނަނީ ވަރުގަދަކޮށް.

9' އަނެއްކާވެސް ޗޭ އެޑަމްސްގެ ހަމަލާއެއް. ސްކޮޓްލޭންޑްގެ ފޯވަޑް ދުރުން ފޮނުވާލި ބޯޅަ ނުރައްކާކޮށް ދިޔައީ ގޯލު ދަނޑި ކައިރިން ބޭރަށް.

5' ސްކޮޓްލޭންޑަށް ރަނުގެ ފުރުސަތެއް. މެގިން އަރިމަތިން ނަގައިދިން ހުރަސް ޗޭ އެޑަމްސްއަށް ހުސްކޮށް ލިބުނު ނަމަވެސް އޭނާ ފަޔާ ބޯޅައާ ލައްވާ ނުލި. ބޯޅަ ބޭރުކޮށްލީ ކްރޮއޭޝިއާ ގޯލްކީޕަރު ޕަންޗުކޮށް.

މެޗުގެ ކުޅުން ފަށައިފި. ކުޅުން ފެށީ ސްކޮޓްލޭންޑުން.