ޔޫރޯ: ނެދަލޭންޑްސް 3-0 ނޯތު މެސަޑޯނިއާ

މެޗުގެ އުސްއަލިތައް

މި ނަތީޖާއާއެކު ނެދަލެންޑްސްއަށް ވަނީ ގްރޫޕުގެ އެއްވަނަ ކަށަވަރުވެފައި. ދެވަނައިގެ ގޮތުގައި ގަދަ 16ގެ ޖާގައެއް ކަށަވަރުކުރީ އޮސްޓްރިއާ.

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 3-0ގެ ނަތީޖާއަކުން ނެދަލެންޑްސް ކުރީގައި އޮވެގެން.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'88 - ނެދަލެންޑްސްއަށް ފުރުސަތެއް. ޑި ލިގްޓް ދުރުން ފޮނުވާލި ބާރު ހަމަލާ، ނޯތު މެސެޑޯނިއާގެ ކީޕަރު ޑިމިޓްރިއޭވްސްކީ ވަނީ މަތަކޮށްފައި.

'73 - ނެދަލެންޑްސްގެ ހަމަލާއެއް. ޕެނަލްޓީ އޭރިއާ ބޭރުން ޓިމްބާ ފޮނުވާލި ބާރު ހަމަލާ އަމާޒުވީ ނޯތު މެސެޑޯނިއާގެ ކީޕަރު ޑިމިޓްރިއޭވްސްކީގެ އަތަށް.

'72 - ޗުރްލިނޯވް ވަރަށް ރީތިކޮށް ނެދަލެންޑްސްގެ ގޯލުގެ ތެރެއަށް ބޯޅަ ފޮނުވާލި ނަމަވެސް، އޭނާ ހުރީ އޮފްސައިޑް މަގާމެއްގައި.

'68 - ނޯތު މެސެޑޯނިއާގެ ކެޕްޓަން ގޯރާން ޕަންޑޭވްއަށް ޓްރިބިއުޓެއް. މި މުބާރާތަށް ފަހު، ގައުމީ ޓީމަށް ކުޅުން ހުއްޓާލުމަށް އޭނާ ވަނީ ނިންމާފައި.

'67 - ނެދަލެންޑްސްއަށް ހުސް ފުރުސަތެއް. ޑި ޔޮންގް ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، ވެގްހޯސްޓް ފޮނުވާލި ހަމަލާ އަމާޒުވީ ނޯތު މެސެޑޯނިއާ ގޯލުގެ ހުރަސް ދަނޑިއަށް.

'61 - ނެދަލެންޑްސްއަށް ފުރުސަތެއް. ވެން އާންހޯލްޓް ދިން ބޯޅައަކުން ޕެނަލްޓީ އޭރިއާ ތެރެއިން ވައިނާލްޑަމް ފޮނުވާލި ހަމަލާ ދިޔައީ ނޯތު މެސެޑޯނިއާ ގޯލުގެ ހުރަސް ދަނޑިމަތިން ބޭރަށް.

'58 - ނެދަލެންޑްސް އިން ތިން ލަނޑުގެ ލީޑެއް ހޯދައިފި. ޑިޕާއީ ފޮނުވާލި ހަމަލާ ކީޕަރު ޑިމިޓްރިއޭވްސްކީ މަތަކުރުމާއެކު ޕެނަލްޓީ އޭރިއާ ތެރެއިން ލިބުނު ރީބައުންސް ބޯޅައިން ނެދަލެންޑްސްއަށް އެ ލަނޑު ކާމިޔާބުކޮށްދިނީ އެޓީމުގެ ދެވަނަ ލަނޑު ވެސް ކާމިޔާބުކޮށްދިން ވައިނާލްޑަމް. މިއީ މި މުބާރާތުގައި އޭނާ ޖެހި ތިންވަނަ ލަނޑު.

'56 - ނޯތު މެސެޑޯނިއާއަށް ފުރުސަތެއް. ބާދީ ފޮނުވާލި ހިލޭ ޖެހުން، ނެދަލެންޑްސްގެ ކީޕަރު ސްކެޓެލެންބާގް ވަނީ ހުޝިޔާރުކަމާއެކު މަތަކޮށްފައި.

ނެދަލެންޑްސް އިން އެ ލަނޑު ޖަހާފައިވަނީ ނޯތު މެސެޑޯނިއާ އިން ރަނގަޅު ކުޅުމެއް ދައްކަމުންދަނިކޮށް.

'50 - ނެދަލެންޑްސް އިން ލީޑު ފުޅާކޮށްފި. ޑިޕާއީ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ނެދަލެންޑްސްއަށް އެ ލަނޑު ކާމިޔާބުކޮށްދިނީ ކެޕްޓަން ވައިނަލްޑަމް.

'49 - ނެދަލެންޑްސްއަށް ފުރުސަތެއް. ބާގްހައުސް ނަގައިދިން ހުރަހަކުން ޕެނަލްޓީ އޭރިއާ ތެރެއިން ޑި ލިގްޓް ބޮލުން ފޮނުވާލި ހަމަލާ، ގޯލު ލައިން މަތިން ދިފާއުކުރީ ޓްރިޗްކޯވްސްކީ.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0ގެ ނަތީޖާއަކުން ނެދަލެންޑްސް ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

'42 - ވެލްކޯވްސްކީ ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއަށް ވަދެ، ޑިޕާއީ ދިން ބޯޅަ ނެދަލެންޑްސްގެ ކުޅުންތެރިޔަކަށް ލިބުމުގެ ކުރިން ނޯތު މެސެޑޯނިއާގެ ކީޕަރު ޑިމިޓްރިއޭވްސްކީ ވަނީ ދިފާއުކޮށްފައި.

ނޯތު މެސެޑޯނިއާ އިން އަންނަނީ ކުރިއަށް ޖެހި، ނަތީޖާ ހަމަހަމަކުރުމަށް މަސައްކަތްކުރަމުން.

'30 - ނެދަލެންޑްސްއަށް ހުސް ފުރުސަތެއް. މާލެން ދިން ބޯޅައަކުން ޕެނަލްޓީ އޭރިއާ ތެރެއިން ޑަމްފްރީސް ފޮނުވާލި ހަމަލާ، ނޯތު މެސެޑޯނިއާގެ ކީޕަރު ޑިމިޓްރިއޭވްސްކީ ވަނީ މަތަކޮށްފައި. ރީބައުންސް ބޯޅައިން ޑިޕާއީ ފޮނުވާލި ހަމަލާ، ނޯތު މެސެޑޯނިއާ ޑިފެންޑަރެއް ގައިގައި ޖެހި ވަނީ ބްލޮކްވެފައި.

އެ ގޯލު ޖެހުމުގެ ކުރިން ޕަންޑޭވްއަށް ފައުލް ކުރިތޯ ވީއޭއާރުން ބެލުމަށްފަހު ނިންމީ ފައުލެއް ނޫން ކަމަށް. އެހެންކަމުން ނެދަލެންޑްސްއަށް ވަނީ ޑިޕާއީގެ ގޯލު ދީފައި.

'24 - ނެދަލެންޑްސް އިން ލީޑު ހޯދައިފި. ކައުންޓާ އެޓޭކެއްގައި މާލެން ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ނެދަލެންޑްސްއަށް އެ ލަނޑު ކާމިޔާބުކޮށްދިނީ މެމްފިސް ޑިޕާއީ.

'22 - ނޯތު މެސެޑޯނިއާއަށް ރަނގަޅު ފުރުސަތެއް. ޕަންޑޭވް ދިން ބޯޅައަކުން ޕެނަލްޓީ އޭރިއާ ބޭރުން ޓްރަޖްކޯވްސްކީ ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށް.

ނޯތު މެސެޑޯނިއާ އިން އަންނަނީ ވަރަށް ރަނގަޅަށް ނެދަލެންޑްސްގެ އެޓޭކު ހިފަހަހައްޓަމުން. ޑިފެންސްކޮށް، އެޓޭކުކުރުމަށް މަސައްކަތްކުރޭ. މިއީ ނޯތު މެސެޑޯނިއާ އިން ބޮޑު މުބާރާތެއްގައި ވާދަކުރާ ފުރަތަމަ ފަހަރު.

'11 - ނެދަލެންޑްސްއަށް ފުރުސަތެއް. ޑިޕާއީ ދިން ބޯޅަ، ޕެނަލްޓީ އޭރިއާ ތެރެއިން ވައިނާލްޑަމްއަށް ލިބުމުގެ ކުރިން ނޯތު މެސެޑޯނިއާ އިން ދިފާއުކޮށްފި.

9' ޓްރަޖްކޯވްސްކީ ޕެނަލްޓީ އޭރިއާ ތެރެއިން ނެދަލެންޑްސް ގޯލުގެ ތެރެއަށް ބޯޅަ ފޮނުވާލި ނަމަވެސް، އޭނާ ހުރީ އޮފްސައިޑް މަގާމެއްގައި.

މެޗުގެ ކުޅުން ފަށައިފި.