ޔޫރޯ: ޔޫކްރެއިން 0-1 އޮސްޓްރިއާ

މެޗުގެ އުސްއަލިތައް

މެޗުގެ ކުޅުން ނިމިއްޖެ. އޮސްޓްރިއާ ވަނީ މެޗުން މޮޅުވެ ގަދަ 16 ޔަގީންކޮށްފައި.

87' ޔަރެމްޗުކްގެ ހަމަލާއެއް. ޔޫކްރެއިން ފޯވަޑުގެ ފޮނުވާލި ހަމަލާ ދިޔައީ ގޯލު ހުރަސްކޮށް ބޭރަށް.

މި ނަތީޖާއާއެކު ނިމިއްޖެނަމަ އޮސްޓްރިއާއަށް ތާރީހުގައިވެސް ފުރަތަމަ ފަހަރަށް ޔޫރޯގެ ގަދަ 16 އިން ޖާގަ ލިބޭނެ. އެއީ ބޮޑު ކާމިޔާބީއަކަށް ވާނެ.

76' ކޯނަރެއްގައި އޮސްޓްރިއާއަށް ފުރުސަތެއް. އޭރިއާ ތެރެއަށް އަލާބާ ނަގައިދިން ރީތި ކޯނަރު އާނޯޓޮވިޗް ބޮލުގައި ލައްވައެއް ނުލި.

މި ހާފްގައިވެސް ފެންނަނީ ހަމަލާތައް މަދުކޮށް. ހާއްސަކޮށް އޮސްޓްރިއާއިން މަސައްކަަތް ކުރަމުން އަންނަނީ ލީޑު ދަމަހައްޓަން. ބޮޑަށް ކުރިއަށް ޖެހިގެން ކުޅުނީ ޔޫކްރެއިން.

61' އޮސްޓްރިއާ ގޯލްކީޕަރު ބަޗްމަންގެ މޮޅު ސޭވްއެއް. ހިލޭ ޖެހުމަކުން ޔޫކްރެއިން ހުރަސް ކޮށްލި ބޯޅަ ލައިނާ ބޮލުން ޖެހި ނަމަވެސް ބަޗްމަން ވަނީ މަތަކޮށްފައި.

54' އާނޯޓޮވިޗަށް އަނެއްކާވެސް ފުރުސަތެއް. ހިލޭ ޖެހުމަކުން އޭނާއަށް ލިބުނު ފުރުސަތު ގޯލާ އަމާޒެއް ނުވި.

50' އޮސްޓްރިއާގެ ހަމަލާއެއް. ޝްލާގާ ދުރުން ފޮނުވާލި ހަމަލާ ސީދާ ކީޕަރު އަތަށް.

48' އޮސްޓްރިއާ އޭރިއާ ތެރެއިން ޔަރެމްޗުކް، އޮސްޓްރިއާގެ ޑިފެންޑަރު ހިންޓަރެގާ ބޯޅަ ނެތި ކޮއްޕާލުމުން ރެފްރީ ވަނީ ފައުލްއަށް ކަށިގަނޑުފުމެ، ކާޑެއް ދައްކަން ޖެހޭތޯ ވީއޭއާރް އެހީގައި ބަލާފައި. ބެލުމަށްފަހު ކާޑެއް ނުދައްކައި ރެފްރީ ވަނީ ދެކުޅުންތެރިންނަށް ނަސޭހަތް ދީފައި.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

ފުރަތަމަ ހާފްގެ ކުޅުން ނިންމާލައިފި. ކުރީގައި އޮތީ އޮސްްޓްރިއާ.

45+1' އާނޯޓޮވިޗަށް އަނެއްކާވެސް ފުރުސަތެއް. އޭރިއާ ތެރެއަށް ވަދެ އޭނާ ފޮނުވާލި ހަމަލާ ރަނގަޅަށް ފޮނުވާނުލެވި ދިޔައީ ގޯލްކީޕަރު އަތަށް.

ފުރަތަމަ ހާފްގެ އިތުރު ވަގުތަށް ތިން މިނެޓް ދައްކައިފި.

41' އޮސްޓްރިއާގެ އާނޯޓޮވިޗަށް މުޅިން ހުސް ފުރުސަތެއް. އަރިމަތިން ހުރަސް ވެގެން ދިޔަ ބޯޅަ އޭރިއާ ތެރޭގައި ހުސްކޮށް ހުރި އާނޯޓޮވިޗަށް ލިބުނު ނަމަވެސް އޭނާ ފޮނުވާލި ހަމަލާ ދިޔަައީ އަރިމަތިން ބޭރަށް.

34' އޮސްޓްރިއާއަށް ފުރުސަތެއް. ލައިމާ ދުރުން ފޮނުވާލަން މަސައްކަތް ކުރި ބޯޅަ ޔޫކްރެއިންގެ ޑިފެންޑަރު ވަނީ މަތަކޮށްފައި.

ގޯލަށްފަހުވެސް ބޯޅަ ކޮންޓްރޯލްކޮށް ކުޅެމުންދަނީ އޮސްޓްރިއާ. ޔޫކްރެއިން ފެންނަނީ ވަރަށް ބޮޑަށް ފަހަތަށް ޖެހި ކުޅެމުންދާ ތަން.

28' ޔޫކްރެއިންގެ ނުރައްކާތެރި ހަމަލާއެއް. ޝަޕަރެންކޯ އަރިމަތިން ވަދެ ފޮނުވާލި ބާރު ހަމަލާ އޮސްޓްރިއާ ގޯލްކީޕަރު ބަޗްމަން ދިފާއުކުރި އިރު، ރީބައުންސް ފުރުސަތު ޔާމަލެންކޯއަށް ނުލިބުނީ ކިރިޔާ.

21' އޮސްޓްރިއާ ލީޑު ނަގައިފި. އަލާބާގެ ކޯނަރުން ގޯލު ޖެހީ ބާމްގޭޓްނާ.

15' އާނޯޓޮވިޗްގެ ޝޮޓެއް. އޭނާ އޭރިއާ ބޭރުން ފޮނުވާލި ހަމަލާ ގޯލާ އަމާޒެއް ނުވި. މެޗުގައި އަދި ގޯލަށް ޝޮޓެއް ފެނިފައެއް ނުވޭ.

މެޗުގެ ފުރަތަމަ 10 މިނެޓުގައި ނުރައްކާތެރި ހަމަލާއެއް ފެނިފައެއް ނުވޭ. ކުރިއަށް ޖެހި ގިނަ ވަގުތު ބޯޅަ ހިފަހައްޓައިގެން ކުޅެނީ އޮސްޓްރިއާ.

މިފަހަރު ޔޫރޯގެ އެންމެ ހަގު ކޯޗަކީ ޔޫކްރެއިން ކޯޗު ޝެވްޗެންކޯ. އޭނާގެ އުމުރުން 44 އަހަރު. ޝެވްޗެންކޯއަކީ ޔޫކްރެއިންގެ ފުޓުބޯޅަ އައިކަންއެއް. އޭނާ ވަނީ ކުޅުންތެރިއެއްގެ ގޮތުގައި ގިނަ ކާމިޔާބީތަކެއް ހޯދާ ބެލޮންޑިއޯވެސް ހޯދާފައި.

3' ޔާމަލެންކޯގެ ނުރައްކާތެރި ހުރަހެއް. އަރިމަތިން ވަދެ އޭނާގެ ޕާޓްނާ ޔަރެމްޗުކަށް ނަގައިދެން މަސައްކަތް ކުރި ބޯޅަ ދިޔައީ ގޯލްކީޕަރު އަތަށް.

މިރޭގެ މެޗަކި ދެޓީމަށްވެސްް މުހިއްމު މެޗެއް. ދެގައުމުގެ ތާރީހުގައިވެސް ފުރަތަމަ ފަހަރަށް ޔޫރޯގެ ގަދަ 16 އަށް ދަތުރު ކުރުމަށް މިރޭގެ މެޗަކީ މަރުގެ މެޗެއް. ޔޫކްރެއިންއަށް ބޭނުންވަނީ ޕޮއިންޓެއް. އޮސްޓްރިއާއަށް މޮޅެއް މަޖުބޫރު.

މެޗުގެ ކުޅުން ފަށައިފި.