ޔޫރޯ: ޕޯޗުގަލް 2-4 ޖަރުމަން

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 4-2ގެ ނަތީޖާއަކުން ޖަރުމަން ކުރީގައި އޮވެގެން.

މެޗުގެ ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'83 - ކައުންޓާ އެޓޭކެއްގައި ޕެނަލްޓީ އޭރިއާ ބޭރުން ގޮރެޓްޒްކާ ފޮނުވާލި ބާރު ހަމަލާ ދިޔައީ ޕޯޗުގަލް ގޯލުގެ ހުރަސް ދަނޑީގެ ކުޑަތަންކޮޅެއް މަތިން ބޭރަށް.

'78 - ޕޯޗުގަލަށް ފުރުސަތެއް. ރެނާޓޯ ސަންޗޭޒް ދުރުން ފޮނުވާލި ބާރު ހަމަލާ އަމާޒުވީ ޖަރުމަން ގޯލުގެ އަރިމަތީ ދަނޑިއަށް.

66' ޕޯޗުގަލްއިން ފަރަގު ކުޑަކޮށްފި. އަރިމަތިން މުޓީނިއޯ ނެގި ހުރަސް، ރޮނާލްޑޯ އޭރިއާ ތެރެއިން ޖައްސާލުމުން ބޮލުން ގޯލަށް ނިންމާލީ ޖޮޓާ.

65' އަރިމަތިން ކައި ހަވާޓްސް ރޮނާލްޑޯއަށް ފައުލް ކުރުމުން ޕޯޗުގަލްއަށް ހިލޭ ޖެހުމެއް.

މިއީ ޗެމްޕިއަން ޕޯޗުގަލަށް ފަހަތުން އަރަން އުނދަގޫވާނެ ނަތީޖާއެއް. މިއީ އެގައުމުގެ ތާރީހުގައިވެސް ޔޫރޯގައި ދަށް ނަތީޖާއަކަށް ވެގެންދާނެ.

59' ޖަރުމަނުން ހަތަރުވަނަ ގޯލެއް ޖަހައިފި. ކިމިޗްގެ ހިތްގައިމު ހުރަސް ގޯލަށް ވައްދާލީ ގޮސެންސް.

57' ޕޯޗުގަލްއިން އެޓޭކް ވަރުގަދަ ކުރުމަށް ދަނީ މަސައްކަތް ކުރަމުން. ވިލިއަމް ކާވާލިއޯގެ ބަދަލުގައި ކުޅެން ނުކުތީ ރަފާ ސިލްވާ.

52' ރޮނާލްޑޯ އަރިމަތިން ފޮނުވާލި ބާރު ހިލޭ ޖެހުން ގޯލުގެ ހުރަސް ދަނޑިމަތިން ބޭރަށް.

51' ޖަރުމަނުން ލީޑު ފުޅާކޮށްފި. ގޮސެންސް ނަގައިިދިން ހުރަސް މެދުތެރެއިން ހުހަށް އޮވެ ގޯލަށް ވައްދާލީ ކައި ހަވާޓްސް.

ދެވަނަ ހާފަށް ޕޯޗުގަލްއިން ނުކުތީ ބަދަލަކާއެކު. ބާނާޑޯ ސިލްވާގެ ބަދަލުގައި ނުކުތީ ރެނާޓޯ ސަންޗޭޒް.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

'45+3 - ޖަރުމަނަށް އިތުރު ފުރުސަތެއް. ބެނާޑޯ ސިލްވާ އަތުން ގެއްލުނު ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ގްނަބްރީ ފޮނުވާލި ހަމަލާ، ޕޯޗުގަލްގެ ކީޕަރު ރުއި ޕެޓްރީސިއޯ ވަނީ މަތަކޮށްފައި.

'45+3 - ޖަރުމަނަށް އިތުރު ފުރުސަތެއް. ބެނާޑޯ ސިލްވާ އަތުން ގެއްލުނު ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ގްނަބްރީ ފޮނުވާލި ހަމަލާ، ޕޯޗުގަލްގެ ކީޕަރު ރުއި ޕެޓްރީސިއޯ ވަނީ މަތަކޮށްފައި.

'45 - ޖަރުމަނަށް އިތުރު ފުރުސަތެއް. ހަވާޓްޒް ދިން ބޯޅައަކުން ޕެނަލްޓީ އޭރިއާ ތެރެއިން ގޮސެންސް ފޮނުވާލި ބާރު ހަމަލާ، ޕޯޗުގަލްގެ ކީޕަރު ރުއި ޕެޓްރީސިއޯ ވަނީ މަތަކޮށްފައި.

'39 - ޖަރުމަނުން ލީޑު ހޯދައިފި. ޕެނަލްޓީ އޭރިއާ ތެރެއަށް މުލާ ޖައްސާލި ބާރު ބޯޅަ ގޯލުގެ ތެރެއަށް ވަދެފައިވަނީ ޕޯޗުގަލް ޑިފެންޑަރު ގުރޭރޯ އަތުން ބައިކޮޅަށް.

'35 - ޖަރުމަނުން ނަތީޖާ ހަމަހަމަކޮށްފި. ކައި ހަވާޓްޒްއަށް ގޮސެންސް ޖައްސާލި ބޯޅަ ގޯލަށް ވަދެފައިވަނީ ޕޯޗުގަލް ޑިފެންޑަރު ރުބެން ޑިއާޒް އަތުން ބައިކޮޅަށް.

'28 - ޕޯޗުގަލަށް ފުރުސަތެއް. ގުރޭރޯ ނަގައިދިން ހިލޭ ޖެހުމުން ޕެނަލްޓީ އޭރިއާ ތެރެއިން ޖޮޓާ ބޮލުން ފޮނުވާލި ހަމަލާ ދިޔައީ ޖަރުމަނުގެ ގޯލާ އަމާޒުނުވެ ބޭރަށް.

'25 - ގްނަބްރީ ނަގައިދިން ހުރަސް، ޕޯޗުގަލް ޕެނަލްޓީ އޭރިއާ ތެރޭ ހުރި ޖަރުމަން ޑިފެންޑަރު ހުމެލްސްގެ ބޮލުގައި ލައްވައެއް ނުލި.

'22 - ޕޯޗުގަލަށް ފުރުސަތެއް. ޕެނަލްޓީ އޭރިއާ ބޭރުން ޖޮޓާ ފޮނުވާލި ހަމަލާ، ޖަރުމަނުގެ ކީޕަރު ނޯޔާ ވަނީ މަތަކޮށްފައި.

މި ލަނޑުގައި ބެނާޑޯ ސިލްވާގެ ހިއްސާ ވެސް ބޮޑު.

'15 - ޕޯޗުގަލުން ލީޑު ހޯދައިފި. ކައުންޓާ އެޓޭކެއްގައި ޖޮޓާ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ރޮނާލްޑޯ ފޮނުވާލި ހަމަލާއަކުން ޕޯޗުގަލަށް ލީޑު ހޯދައިދިނީ ކެޕްޓަން ރޮނާލްޑޯ. މިއީ މި މުބާރާތުގައި ރޮނާލްޑޯ ޖެހި ތިންވަނަ ލަނޑު.

11' އަނެއްކާވެސް ޖަރުމަނުން ނުރައްކާ ކޮށްފި. އަރިމަތިން ކްރޫސް ނަގައިދިން ބޯޅަ ކައި ހަވާޓްސް ފޮނުވާލި ނަމަވެސް ޕޯޗުގަލް ޑިފެންޑަރު ވަނީ ބްލޮކް ކޮށްލާފައި.

މެޗުގެ ރެފްރީއަކީ އެންތޮނީ ޓެއިލާ. އޭނާއަކީ ޑެންމާކާއި ފިންލޭންޑް ވާދަކުރި މެޗުގައި ހުރި ރެފްރީ. އެ މެޗުގައި ޑެންމާކުގެ ތަރި އެރިކްސަން ކާޑިއެކް އެރެސްޓެއް ޖެހިގެން ދަނޑު މައްޗަށް ވެއްޓުމުން ރެފްރީ ޓެއިލާ ނިންމި އަވަސް އަދި ރަނގަޅު ނިންމުންތަކަށް ގިނަ ބަޔަކު ވަނީ ތައުރީފު ކޮށްފައި.

9' އަނެއްކާވެސް ޖަރުމަނުން ނުރައްކާތެރި ހަމަލާއެއް. ކައި ހަވާޓްސް ދުރުން ފޮނުވާލި ހަމަލާ މަތަކުރީ ޕޯޗުގަލް ގޯލްކީޕަރު ޕެޓްރީޝިއޯ. ރީބައުންސްގައި ގްނަބެރީއަށް ހުރަހަކަށް ފުރުސަތު ލިބުނު ނަމަވެސް އޭނާ ނެގި ބޯޅަ ޑިފެންސުން ސާފު ކޮށްލި.

5' ފުރަތަމަ ހަމަލާގައި ޖަރުމަނު ލީޑު ނެގުމާ ގާތަށް. އަރިމަތިން ނެގި ހުރަހަކުން ގޯސެންސް ބޯޅަ ގޯލަށް ވައްދާލި ނަމަވެސް، އެ ހަމަލާ ތަނަވަސްކުރަން ކުރިއަށް ޖެހުނުއިރު ގްނަބްރީ އޮސްފައިޑްގައި ހުރުމުން ވީއޭއާރް އެހީގައި ރެފްރީ ވަނީ އެއީ ގޯލެއް ނޫން ކަމަށް ނިންމާފައި.

ފުރަތަމަ ފަސްވަރަކަށް މިނެޓުގައި މި ފެންނަނީ ދެޓީމުންވެސް ހަމަޖެހިލައިގެން ތިބެ ކުޅޭ މަންޒަރު. ހާއްސަކޮށް ޖަރުމަނުން ޕާސްތައް ގިނަކޮށްލައި ބޯޅަ ހިފަހައްޓައިގެން ކުޅެމުންދާއިރު، ޕޯޗުގަލްވެސް ފެންނަނީ ޖާގަ ދީގެން ތިބިތަން.

މެޗުގެ ކުޅުން ފަށައިފި. ކިކްއޯފް ކުރީ ޖަރުމަނުން.