ޔޫރޯ: ސްވިޑެން 1-0 ސްލޮވޭކިއާ

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިިމިގެންދިޔައީ 1-0ގެ ނަތީޖާއަކުން ސްވިޑެން ކުރީގައި އޮވެގެން.

ފަހު ވަގުތުކޮޅު ސްލޮވާކިއާ އިން ކުރިއަށް ޖެހި ގޯލެއް ޖެހުމަށް މަސައްކަތްތަކެއް ކުރި ނަމަވެސް، ސްވިޑެން ގޯލަށް ނުރައްކާ ކުރެވޭ ގޮތެއް ނުވި.

'82 - ސްވިޑެންއަށް ފުރުސަތެއް. އިސާކްއަށް ހަމަލާއެއް ފޮނުވައިނުލެވި، ޕެނަލްޓީ އޭރިއާ ތެރެއިން ކްލާސަން ފޮނުވާލި ހަމަލާ ސްލޮވާކިއާގެ ޑިފެންޑަރު ހުބޮޗާން ވަނީ ބްލޮކްކޮށްފައި.

'77 - ޕެނަލްޓީ ކާމިޔާބުކޮށް، ސްވިޑެން އިން ލީޑު ހޯދައިފި. ސްވިޑެންއަށް އެ ޕެނަލްޓީ ކާމިޔާބުކޮށްދިނީ ފޯސްބާގް.

'75 - ސްވިޑެންއަށް ޕެނަލްޓީއެއް. އެ ޕެނަލްޓީ ލިބުނީ ޕެނަލްޓީ އޭރިއާ ތެރެއިން ކުއައިސަންއަށް ސްލޮވާކިއާ ކީޕަރު ޑުބްރާވްކާ ކުރި ފައުލާ ގުޅިގެން.

'71 - ސްލޮވާކިއާ ކީޕަރު ޑުބްރާވްކާގެ މުހިންމު ސޭވްއެއް. ސްވިޑެން ފޯވަޑް އިސާކް ދެ ޑިފެންޑަރުން ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއަށް ވަދެ ފޮނުވާލި ހަމަލާ، ކީޕަރު ޑުބްރާވްކާ ވަނީ ހުޝިޔާރުކަމާއެކު މަތަކޮށްފައި.

'67 - ސްވިޑެންއަށް ފުރުސަތެއް. ލުސްޓިގް ނަގައިދިން ހުރަހަކުން ޕެނަލްޓީ އޭރިއާ ތެރެއިން އިސާކް ބޮލުން ފޮނުވާލި ހަމަލާ ދިޔައީ ސްލޮވާކިއާ ގޯލުގެ ހުރަސް ދަނޑިމަތިން ބޭރަށް.

'60 - ސްވިޑެންއަށް އިތުރު ފުރުސަތެއް. ކޯނަރެއްގެ ތެރެއިން ލިބުނު ބޯޅައަކުން ޕެނަލްޓީ އޭރިއާ ތެރޭ ހުރެ ޑެނިއެލްސަން ބޮލުން ފޮނުވާލި ހަމަލާ ދިޔައީ ސްލޮވާކިއާ ގޯލުގެ ހުރަސް ދަނޑިމަތިން ބޭރަށް.

'59 - ސްވިޑެންއަށް ރަނގަޅު ފުރުސަތެއް. ލާސަން ނަގައިދިން ހުރަހަކުން ޕެނަލްޓީ އޭރިއާ ތެރެއިން އޮގަސްޓިންސަން ބޮލުން ފޮނުވާލި ހަމަލާ، ސްލޮވާކިއާގެ ކީޕަރު ޑުބްރާވްކާ ވަނީ ހުޝިޔާރުކަމާއެކު މަތަކޮށްފައި.

'58 - ސްވިޑެން ކީޕަރު އޮލްސެންގެ މޮޅު ސޭވްއެއް. ހަމްޝިކް ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރެއިން ސްލޮވާކިއާގެ ކުޗްކާ ބޮލުން ފޮނުވާލި ހަމަލާ، ކީޕަރު އޮލްސެން ވަނީ ހުޝިޔާރުކަމާއެކު މަތަކޮށްފައި. ކުޗްކާ އޮތީ ވެސް އޮފްސައިޑް މަގާމެއްގައި.

'50 - ސްލޮވާކިއާއަށް ފުރުސަތެއް. ޕެކަރިކް ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ޑޫޑާ ފޮނުވާލި ހަމަލާ، ސްވިޑެންގެ ގޯލާ އަމާޒުވެފައެއް ނުވޭ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'43 - ސްލޮވާކިއާއަށް ފުރުސަތެއް. ޑޫޑާ ދިން ބޯޅައަކުން ޕެނަލްޓީ އޭރިއާ ބޭރުން ހަމްޝިކް ފޮނުވާލި ހަމަލާ ދިޔައީ ސްވިޑެން ގޯލުގެ ހުރަސް ދަނޑި މަތިން ބޭރަށް.

އެޓޭކުގައި ރަނގަޅަށް ކުޅެމުން އަންނަނީ ސްވިޑެން. ދެ ޓީމަށް ވެސް ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރެވިފައެއް ނުވޭ.

'13 - ސްވިޑެންއަށް ފުރުސަތެއް. ލާސަން ނަގައިދިން ހިލޭ ޖެހުމަކުން ޕެނަލްޓީ އެރިއާ ތެރެއިން ލުސްޓިގް ބޮލުން ފޮނުވާލި ހަމަލާ ދިޔައީ ސްލޮވާކީއާ ގޯލުގެ ހުރަސް ދަނޑި މަތިން ބޭރަށް.

މެޗުގެ ފުރަތަމަ ފަސް މިނެޓުގެ ތެރޭ ދެ ޓީމުގެ ފަރާތުން ވެސް ފެނިގެންދިޔައީ ދާދި ހަމަހަމަ ކުޅުމެއް.

'5 - ސްލޮވާކިއާއަށް ފުރުސަތެއް. ހަމްޝިކް ނަގައިދިން ކޯނަރަކުން ޕެނަލްޓީ އޭރިއާ ތެރެއިން ކުޗްކާ ބޮލުން ފޮނުވާލި ހަމަލާ، ސްވިޑެންގެ ގޯލާ އަމާޒުވެފައެއް ނުވޭ.

'3 - ސްވިޑެންގެ ހަމަލާއެއް. ޕެނަލްޓީ އޭރިއާ ބޭރުން ލާސަން ފޮނުވާލި ހަމަލާ، ސްލޮވާކިއާގެ ކީޕަރު ޑުބްރާވްކާ ވަނީ މަތަކޮށްފައި.

މެޗުގެ ފުރަތަމަ ހާފުގެ ކުޅުން ފަށައިފި. ކިކްއޯފް ކުރީ ސްލޮވަކިއާ އިން.