ޔޫރޯ: ވޭލްސް 2-0 ތުރުކީ

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 2-0ގެ ނަތީޖާއަކުން ވޭލްސް ކުރީގައި އޮވެގެން.

'90+5 - ވޭލްސް އިން ލީޑު ފުޅާކޮށްފި. ޕެނަލްޓީ އޭރިއާ ތެރެއަށް ވަނުމަށްފަހު ބޭލް ދިން ބޯޅައަކުން ވޭލްސްއަށް އެ ލަނޑު ކާމިޔާބުކޮށްދިނީ ކޮނާ ރޮބާޓްސް.

'90+3 - ވޭލްސްއަށް ފުރުސަތެއް. ބޭލް ދިން ބޯޅައަކުން ޕެނަލްޓީ އޭރިއާ ތެރެއިން ވިލްސަން ފޮނުވާލި ހަމަލާ، ތުރުކީގެ ޑިފެންޑަރު ޗެލްކް ވަނީ ޓެކަލްކޮށް ބްލޮކްކޮށްފައި.

'90 - ވޭލްސްގެ ގޯލު ކުރިމަތިން ހިނގި ހަމަނުޖެހުމަކާ ގުޅިގެން ތުރުކީގެ ކެޕްޓަން ޔިލްމާޒާއި ވޭލްސްގެ މެޕަން އަދި ބެން ޑޭވީސްއަށް ރީނދޫ ކާޑެއް.

'87 - ތުރުކީއަށް ރަނގަޅު ފުރުސަތެއް. ޗަލްހޮނޫގްލޫ ނަގައިދިން ކޯނަރަކުން ޕެނަލްޓީ އޭރިއާ ތެރެއިން ޑެމިރާލް ބޮލުން ފޮނުވާލި ހަމަލާ، ވޭލްސްގެ ކީޕަރު ޑެނީ ވޯޑް ވަނީ ހުޝިޔާރުކަމާއެކު މަތަކޮށްފައި.

'79 - ވޭލްސްއަށް ފުރުސަތެއް. ރަމްސީ ނަގައިދިން ހުރަހަކުން ޕެނަލްޓީ އޭރިއާ ތެރެއިން ބޭލް ބޮލުން ފޮނުވާލި ހަމަލާ، ތުރުކީގެ ކީޕަރު ޗަކީރް ވަނީ މަތަކޮށްފައި.

'71 - ޕެނަލްޓީ އޭރިއާ ތެރެއިން ޔިލްމާޒް ބޮލުން ފޮނުވާލި ހަމަލާ، ވޭލްސްގެ ކީޕަރު ވޯޑް ފަސޭހަކަމާއެކު ހޯދައިފި.

'61 - ވޭލްސްއަށް ލިބުނު ރަނުގެ ފުރުސަތު ނަގާލައިފި. ބޭލް ފޮނުވާލި ޕެނަލްޓީ ތުރުކީ ގޯލުގެ ހުރަސް ދަނޑިމަތިން ބޭރަށް.

'60 - ޕެނަލްޓީ އޭރިއާ ތެރެއިން ބޭލްއަށް ޗެލިކް ކުރި ފައުލަކާ ގުޅިގެން ވޭލްސްއަށް ޕެނަލްޓީއެއް.

'58 - ވޭލްސްއަށް ރަނގަޅު ފުރުސަތެއް. މެޕަން ދިން ބޯޅައަކުން ޕެނަލްޓީ އޭރިއާ ތެރެއިން ރަމްސީ ފޮނުވާލި ހަމަލާ، ތުރުކީގެ ކީޕަރު ޗަކީރް ވަނީ މަތަކޮށްފައި.

'55 - ތުރުކީއަށް ފުރުސަތެއް. އައިހާން ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ޔިލްމާޒް ފޮނުވާލި ހަމަލާ، ވޭލްސް ގޯލުގެ ހުރަސް ދަނޑިމަތިން ބޭރަށް.

'53 - ވޭލްސްގެ ހަމަލާއެއް. ޕެނަލްޓީ އޭރިއާ ބޭރުން ބޭލް ފޮނުވާލި ބާރު ހަމަލާ ދިޔައީ ތުރުކީގެ ގޯލާ އަމާޒުނުވެ ބޭރަށް.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0ގެ ނަތީޖާއަކުން ވޭލްސް ކުރީގައި އޮވެގެން.

މިއީ ރަމްސީއަށް ބޭލް ތަނަވަސްކޮށްދިން ތިންވަނަ ފުރުސަތު.

'42 - ވޭލްސް އިން ލީޑު ހޯދައިފި. މިފަހަރުވެސް ބޭލް އާއި ރަމްސީގެ ކޮމްބިނޭޝަނެއް. ބޭލް ދިން ރީތި ބޯޅަ، ވަރަށް ރީތިކޮށް މެއިން ކޮންޓްރޯލްކޮށްލުމަށްފަހު ރަމްސީ ވަނީ ޕެނަލްޓީ އޭރިއާ ތެރެއިން ތުރުކީގެ ގޯލުގެ ތިރީ ކަނަކަށް ބޯޅަ ފޮނުވާލާފައި.

'36 - ވޭލްސްގެ ހާފުގެ ތެރެއިން ބޯޅަ ހިފައިގެން ގޮސް ތުރުކީގެ ޕެނަލްޓީ އޭރިއާ ތެރެއަށް ވަދެ ބޭލް ހަމަލާއެއް ފޮނުވާލުމުގެ ތުރުކީގެ ޑިފެންޑަރު ސޮޔުންޗޫ ޓެކަލްކޮށް ބޯޅަ ހޯދައިފި.

މިހާރު ނުރައްކާތެރި އެޓޭކެއްގެ ގޮތުގައި ފެނިގެންދަނީ ތުރުކީގެ އެޓޭކް. ހާއްސަކޮށް ސެޓްޕީސްތަކުގައި އެޓީމު ފެންނަނީ ވަރަށް ނުރައްކާކޮށް.

'29 - ތުރުކީއަށް ފުރުސަތެއް. ޗަލްހޮނޫގްލޫ ނަގައިދިން ކޯނަރަކުން ޕެނަލްޓީ އޭރިއާ ތެރެއިން އައިހާން ބޮލުން ފޮނުވާލި ހަމަލާ، ވޭލްސް ގޯލުގެ އަރިމަތީ ދަނޑި ކައިރިން މޮރޭލް ވަނީ ދިފާއުކޮށްފައި.

'23 - ވޭލްސްއަށް ހުސް ފުރުސަތެއް. މިފަހަރުވެސް ބޭލް އާއި ރަމްސީގެ ކޮމްބިނޭޝަނެއް. ބޭލް ދިން ރީތި ބޯޅައަކުން ޕެނަލްޓީ އޭރިއާ ތެރެއިން ވަރަށް ހުސްކޮށް ހުރެ ރަމްސީ ފޮނުވާލި ހަމަލާ ތުރުކީގެ ގޯލާ އަމާޒުވެފައެއް ނުވޭ.

މެޗުގެ ފުރަތަމަ 20 މިނެޓުގައި ދެ ޓީމުގެ ފަރާތުން ވެސް ފެނިގެންދިޔައީ ދާދި ހަމަހަމަ ކުޅުމެއް. ދެ ޓީމަށް ވެސް ލަނޑުޖަހާނެ ރަނގަޅު ފުރުސަތެއް ލިބިގެންދިޔަ. ނަމަވެސް އެޓޭކުގައި ބޮޑަށް ނުރައްކާކޮށް ފެންނަނީ ވޭލްސް.

މިއަހަރުގެ އެންމެ ޒުވާން ސްކޮޑެއް އޮތް ޓީމަކީ ތުރުކީ. އެހެންނަމަވެސް ފުރަތަމަ 11 ގައި ހިމެނޭ ކުޅުންތެރިންނަށް ބަލައިލާ އިރު، ވޭލްސްއާ ތުރުކީގެ އެވަރެޖް އުމުރުގައި މާ ބޮޑު ފަރަގެއް ނެތް. އެވަރެޖް އުމުރު އުޅެނީ ގާތްގަނޑަކަށް 26 އަހަރުގައި.

'12 - ވޭލްސްގެ ހަމަލާއެއް. ޑެނިއަލް ޖޭމްސް ނަގައިދިން ހުރަހަކުން ޕެނަލްޓީ އޭރިއާ ތެރެއިން ކިއެފާ މޫ، ބޮލުން ފޮނުވާލި ހަމަލާ ތުރުކީގެ ގޯލާ އަމާޒުވެފައެއް ނުވޭ.

'9 - ތުރުކީއަށް ފުރުސަތެއް. އުންޑާ ދިން ބޯޅައަކުން ޕެނަލްޓީ އޭރިއާ ތެރެއިން ކެޕްޓަން ބުރަކް ޔިލްމާޒް ފޮނުވާލި ހަމަލާ، ވޭލްސް ޑިފެންޑަރު ކްރިސް މެޕަން ފައިގައި ޖެހިފައި ދިޔައީ ގޯލުގެ އަރިމަތީ ދަނޑި ކައިރިން ބޭރަށް.

'6 - ވޭލްސްއަށް ހުސް ފުރުސަތެއް. ބޭލް ދިން ރީތި ބޯޅައަކުން ޕެނަލްޓީ އޭރިއާ ތެރެއިން އާރޮން ރަމްސީ ފޮނުވާލި ހަމަލާ، ތުރުކީގެ ކީޕަރު ޗަކީރް ވަނީ މަތަކޮށްފައި.

'4 - ޑެނިއެލް ޖޭމްސް ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރެއިން ބެން ޑޭވިސް ބޮލުން ފޮނުވާލި ހަމަލާ، ތުރުކީގެ ގޯލާ އަމާޒެއް ނުވި.

މި މެޗު ބެއްލަވައިލެއްވުމަށް ތުރުކީގެ ރައީސް ރަޖަބް ތޮއްޔިބް އުރުދުގާން ވަނީ ދަނޑަށް ވަޑައިގެންފައި.

މެޗުގެ ކުޅުން ފަށައިފި. ކިކްއޯފް ކުރީ ވޭލްސް އިން.