ޔޫރޯ: ޕޯޗުގަލް 3-0 ހަންގޭރީ

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. ރޮނާލްޑޯގެ ދެ ގޯލާއެކު ޕޯޗުގަލުން މެޗު ކާމިޔާބުކުރީ 3-0ގެ ނަތީޖާއަކުން.

ރޮނާލްޑޯ އެ ލަނޑު ކާމިޔާބުކުރީ އަންދްރޭ ސިލްވާ ދިން ބޯޅައަކުން ގޯލު ކުރިމަތިން ފޮނުވާލި ހަމަލާއަކުން.

'90+2 - ޕޯޗުގަލުން ތިން ލަނޑުގެ ލީޑެއް ހޯދައިފި. ޕޯޗުގަލަށް އެ ލަނޑުވެސް ކާމިޔާބުކޮށްދިނީ ދެވަނަ ލަނޑުވެސް ޖެހި ކެޕްޓަން ރޮނާލްޑޯ.

ދެވަނަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.

އެ ގޯލާއެކު ރޮނާލްޑޯ ވެގެން ގޮސްފައިވަނީ ޔޫރޯގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާއަށް. އޭނާ ވަނީ ޔޫރޯގެ މުބާރާތްތަކުގައި ޖުމުލަ ދިހަ ގޯލު ޖަހާފައި. ދެން އެންމެ ގިނަ ގޯލު ޖަހާފައިވަނީ ފްރާންސްގެ ލެޖެންޑް މިޝެލް ޕްލެޓިނީ. އޭނާއަށް ކާމިޔާބުކުރެވުނީ ނުވަ ގޯލު.

'87 - ޕެނަލްޓީ ކާމިޔާބުކޮށް، ޕޯޗުގަލުން ލީޑު ފުޅާކޮށްފި. ޕޯޗުގަލަށް އެ ޕެނަލްޓީ ކާމިޔާބުކޮށްދިނީ ކެޕްޓަން ކްރިސްޓިއާނޯ ރޮނާލްޑޯ.

'86 - ޕޯޗުގަލަށް ޕެނަލްޓީއެއް. އެ ޕެނަލްޓީ ލިބުނީ ހަންގޭރީގެ ޕެނަލްޓީ އޭރިއާ ތެރެއިން ރަފާ ސިލްވާއަށް ހަންގޭރީގެ ޑިފެންޑަރު އޯބަން ކުރި ފައުލާ ގުޅިގެން.

'84 - ޕޯޗުގަލުން ލީޑު ހޯދައިފި. ޕޯޗުގަލަށް އެ ގޯލު ކާމިޔާބުކޮށްދިނީ ރަފައެލް ގުރޭރޯ. ޕެނަލްޓީ އޭރިއާ ތެރެއިން އޭނާ ފޮނުވާލި ހަމަލާ ގޯލުގެ ތެރެއަށް ވަދެފައިވަނީ ހަންގޭރީގެ ޑިފެންޑަރު އޯބަންގެ ފައިގައި ޖެހިފައި.

'80 - ބަދަލު ކުޅުންތެރިއެއްގެ ގޮތުގައި ކުޅެން ނުކުތް ހަންގޭރީގެ ޝޯން، ޕެނަލްޓީ އޭރިއާ ތެރެއަށް ވަނުމަށްފަހު، ގޯލުގެ ތެރެއަށް ބޯޅަ ފޮނުވާލި ނަމަވެސް، އޮފްސައިޑެއް ކަމަށް ރެފްރީ ވަނީ ނިންމާފައި.

ޕޯޗުގަލަށް ފުރަތަމަ ހާފުގައި ދެއްކި ކުޅުން ދެވަނަ ހާފުގައި ދެއްކޭ ގޮތެއް ނުވޭ. ގޯލު ޖަހާނެ ރަނގަޅު ފުރުސަތުތަކެއް ވެސް ތަނަވަސްކުރެވިފައެއް ނުވޭ. އެއާ ހިލާފަށް މި ހާފުގައި ހެންގޭރީން އަންނަނީ ރަނގަޅު ކުޅުމެއް ދައްކަމުން.

'67 - ޕޯޗުގަލްގެ ހަމަލާއެއް. ގޯލުގެ ތިރީ ކަނަކާ އަމާޒުކޮށް ޕެނަލްޓީ އޭރިއާ ބޭރުން ބްރޫނޯ ފެނާންޑޭ ހަމަލާ، ހަންގޭރީގެ ކީޕަރު ގުލަކްސީ ވަނީ މަތަކޮށްފައި.

'57 - ހަންގޭރީގެ ހަމަލާއެއް. ޕެނަލްޓީ އޭރިއާ ބޭރުން ރޮލާންޑް ސަލާއީ ފޮނުވާލި ބާރު ހަމަލާ، ޕޯޗުގަލްގެ ކީޕަރު ޕެޓްރީސިއޯ ވަނީ މަތަކޮށްފައި. މި ހާފުގައި ހެންގޭރީން އަންނަނީ ކުޅުން ރަނގަޅުކޮށް، އެޓޭކުތައް ގިނަކުރަމުން.

'49 - ހަންގޭރީ ކެޕްޓަން އެޑަމް ޒަލާއީ ދުރުން ފޮނުވާލި ބާރު ހަމަލާ އަމާޒުވީ ޕޯޗުގަލް ކީޕަރު ރުއި ޕެޓްރީސިއޯއާ ދިމާއަށް.

'47 - ޕޯޗުގަލަށް ފުރުސަތެއް. ބްރޫނޯ ފެނާންޑޭޒް ނަގައިދިން ހުރަހަކުން ޕެނަލްޓީ އޭރިއާ ތެރެއިން ޕެޕޭ ބޮލުން ފޮނުވާލި ހަމަލާ، ހަންގޭރީގެ ކީޕަރު ގުލަކްސީ ވަނީ ހުޝިޔާރުކަމާއެކު މަތަކޮށްފައި.

މެޗުގެ ދެވަނަ ހާފުގެ ކުޅުން ފަށައިފި.

މެޗުގެ ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'43 - ރޮނާލްޑޯއަށް ވަރަށް ހުސް ފުރުސަތެއް. ބްރޫނޯ ފެނާންޑޭޒް ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ރޮނާލްޑޯ ފޮނުވާލި ހަމަލާ ދިޔައީ ހަންގޭރީ ގޯލުގެ ހުރަސްދަނޑި މަތިން ބޭރަށް.

'39 - ޕޯޗުުގަލަށް ފުރުސަތެއް. ސެމޭޑޯ ދިން ބޯޅައަކުން ޕެނަލްޓީ އޭރިއާ ތެރެއިން ޖޮޓާ ފޮނުވާލި ހަމަލާ، ހަންގޭރީގެ ކީޕަރު ގުލަކްސީ ވަނީ މަތަކޮށްފައި. އެ ހަމަލާ ދިޔައީ ގުލަކްސީއާ ދިމާއަށް.

'36 - ހަންގޭރީގެ ފުރަތަމަ ހަމަލާ. ޝެފާ ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، ކެޕްޓަން އެޑަމް ސަލާއީ ބޮލުން ފޮނުވާލި ހަމަލާ، ޕޯޗުގަލްގެ ކީޕަރު ރުއި ޕެޓްރީސިއޯ ވަނީ މަތަކޮށްފައި. އެ ބޯޅަ ދިޔައީ ޕެޓްރީސިއޯއާ ދިމާއަށް.

'30 - ޕޯޗުގަލްގެ ކެޕްޓަން ރޮނާލްޑޯގެ ހަމަލާއެއް. ބެނާޑޯ ސިލްވާ ނަގައިދިން ހުރަހަކުން ޕެނަލްޓީ އޭރިއާ ތެރެއިން ރޮނާލްޑޯ ބޮލުން ފޮނުވާލި ހަމަލާ، ހަންގޭރީގެ ގޯލާ އަމާޒުވެފައެއް ނުވޭ.

ބުޑަޕެސްޓްގެ ޕުސްކާސް އެރިނާގައި ކުޅޭ މެޗެއް ކަމުން މި މެޗަށް ސްޓޭޑިއަމްގެ ފުލް ކެޕޭސިޓީގައި ސަޕޯޓަރުން ވަނީ ވައްދާފައި. ފުލް ކެޕޭސިޓީއަށް ސަޕޯޓަރުން ވައްދާ ހަމައެކަނި ސްޓޭޑިއަމްއަކީ ވެސް ޕުސްކާސް އެރީނާ.

'19 - ޕެޕޭ ދިން ރީތި ބޯޅައަކުން ޕެނަލްޓީ އޭރިއާ ތެރެއިން ޕޯޗުގަލް ކެޕްޓަން ރޮނާލްޑޯ ހަމަލާއެއް ފޮނުވާލި ނަމަވެސް، ބޯޅަ ލިބުނު އިރު އޭނާ ހުރީ އޮފްސައިޑުގައި. ރޮނާލްޑޯ ފޮނުވާލި ހަމަލާގައި ވެސް ބާރެއް ނެތް. ހަންގޭރީގެ ކީޕަރު ގުލަކްސީ ވަނީ އެ ހަމަލާ މަތަކޮށްފައި.

މެޗުގައި ގިނަ ވަގުތު ބޯޅަ ހިފަހައްޓައި، ރަނގަޅު ކުޅުމެއް ދައްކަމުންދަނީ އެންމެ ފަހުގެ ޗެމްޕިއަން ޕޯޗުގަލް. ނަމަވެސް ޕޯޗުގަލަށް ލިބޭ ފުރުސަތުތައް އެޓީމަށް ރަނގަޅަށް ނިންމައިލެވިފައެއް ނުވޭ.

'9 - ޕޯޗުގަލަށް އިތުރު ފުރުސަތެއް. ބްރޫނޯ ފެނާންޑޭޒް ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރެއިން ޖޮޓާ ފޮނުވާލި ހަމަލާ، ހަންގޭރީގެ ގޯލާ އަމާޒުވެފައެއް ނުވޭ.

'5 - ޕޯޗުގަލަށް ފުރުސަތެއް. ޕެނަލްޓީ އޭރިއާ ތެރެއިން ޖޮޓާ ފޮނުވާލި ހަމަލާ ހަންގޭރީގެ ކީޕަރު ގުލަކްސީ ވަނީ މަތަކޮށްފައި. ޖޮޓާ އެ ހަމަލާ ފޮނުވާލުމުގެ ކުރިން ރޮނާލްޑޯ ވެސް ހުރީ ވަރަށް ހުސްކޮށް.

މެޗުގެ ކުޅުން ފަށައިފި.