ޔޫރޯ: ސްޕެއިން 0-0 ސްވިޑެން

މެޗުގެ އުސްއަލިތައް

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.

'+90 - ސްޕެއިނަށް އިތުރު ފުރުސަތެއް. އަލްބާ ދިން ބޯޅައަކުން ޕެނަލްޓީ އޭރިއާ ތެރެއިން ސަރާބިއާ ފޮނުވާލި ހަމަލާ، މިފަހަރުވެސް ކީޕަރު އޮލްސަން ވަނީ މަތަކޮށްފައި. އޭރިއާ ތެރޭ ސަރާބިއާ ހުސްކޮށް ހުރި ނަމަވެސް، އޭނާއަށް އެ ބޯޅަ އެންމެ ރަނގަޅަށް ފޮނުވައިލެވިފައެއް ނުވޭ.

'90 - ސްޕެއިނުގެ ނުރައްކާތެރި ހަމަލާއެއް. ސަރާބިއާ ނަގައިދިން ހުރަހަކުން ޕެނަލްޓީ އޭރިއާ ތެރެއިން ޖެރާޑް މެރޭނޯ ބޮލުން ފޮނުވާލި ހަމަލާ، ސްވިޑެންގެ ކީޕަރު އޮލްސަން ވަނީ މަތަކޮށްފައި.

ސްވިޑެންގެ ވަރުގަދަ ޑިފެންސިވް ކުޅުމުގެ ސަބަބުން ސްޕެއިނަށް އަދިވެސް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

ދެވަނަ ހާފުގައި ސްވިޑެން ވަނީ ބޮޑަށް ކުރިއަށް ޖެހި ސްޕެއިންއަށް އުނދަގޫ ކޮށްލާފައި. ސްޕެއިންއިން ފުރަތަމަ ހާފްގައި ކުޅެމުންދިޔަ ޕޮސެޝަން ފުޓުބޯޅަ ކުޅެން މި ހާފްގައި ދަނީ އުނދަގޫތަކެއް ކުރިމަތިވަމުން. ސްޕެއިންއިން ގޯލަކަށް ކުރެވެން އޮތް ހުރިހާ މަސައްކަތެއް ދަނީ ކުރަމުން. ތަފާސްހިސާބުތަކަށް ބަލާއިރު އެންމެ ރަނގަޅު ފޯވަޑް މޮރޭނޯވެސް މިހާރު ވަނީ ދަނޑު މައްޗަށް ނެރެފައި. އޭނާއާ ނުލައި މެޗު ފަށަން އެންރީކޭ ވިސްނި ވިސްނުމާ މެދު ސުވާލުތަކެއް އުފެދޭ.

'73 - ސްޕެއިންގެ ހަމަލާއެއް. ލޮރެންޓޭ ދިން ބޯޅައަކުން ޕެނަލްޓީ އޭރިއާ ތެރެއިން އޮލްމޯ ފޮނުވާލި ހަމަލާ، ގޯލު ކުރިމަތިން ސްވިޑެން ޑިފެންޑަރު ޑެނިއެލްސަން ވަނީ ބްލޮކްކޮށްފައި.

'61 - ސްވިޑެންއަށް ރަނގަޅު ފުރުސަތެއް. ކައުންޓާ އެޓޭކެއްގައި އިސާކް ދިން ބޯޅައަކުން ޕެނަލްޓީ އޭރިއާ ތެރެއިން ބާގް ފޮނުވާލި ހަމަލާ ސްޕެއިންގެ ގޯލާ އަމާޒުވެފައެއް ނުވޭ.

ދެވަނަ ހާފުގައި ވެސް ގިނަ ވަގުތު ބޯޅަ ހިފަހައްޓައިގެން، ގިނަ ޕާސްތަކެއް ކޮށްގެން ކުޅެމުންދިޔަ ނަމަވެސް، ސްޕެއިނަށް އަދި ގޯލެއް ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ. ސްވިޑެންގެ ހުރިހާ ކުޅުންތެރިން އަންނަނީ ޑިފެންސްގައި ބައިވެރިވަމުން.

މި ހާފުގައި ވެސް ސްޕެއިންގެ ކީޕަރު ފިޔަވައި، އެޓީމުގެ ހުރިހާ ކުޅުންތެރިން ގިނަ ވަގުތު ފެނިގެންދަނީ ސްވިޑެންގެ ހާފުގެ ތެރެއިން.

'49 - ސްޕެއިނަށް ފުރުސަތެއް. ޕެނަލްޓީ އޭރިއާ ތެރެއިން މޮރާޓާ ފޮނުވާލި ހަމަލާ ދިޔައީ ސްވިޑެން ގޯލުގެ އަރިމަތީ ދަނޑި ކައިރިން ބޭރަށް.

ޑިފެންޑަރު ލަޕޯޓްއަކީ ފްރާންސަށް އުފަން ކުޅުންތެރިއެއް ނަމަވެސް، ސްޕެއިނަށް ކުޅުމަށް އޭނާ ވަނީ ރަށްވެހިކަން ބަދަލުކޮށްފައި. މިއީ ސްޕެއިންގެ ޖާޒީގައި އޭނާ ކުޅޭ ފުރަތަމަ މެޗު. މީގެ ކުރިން އޭނާ ވަނީ ފްރާންސްގެ ޔޫތު ޓީމުތަކަށް ކުޅެފައި.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ ސްޕެއިނުން.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމުނީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.

'44 - ސްޕެއިންގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން އޮލްމޯ ފޮނުވާލި ބާރު ހަމަލާ، ސްވިޑެންގެ ކީޕަރު އޮލްސަން ވަނީ ހުޝިޔާރުކަމާއެކު މަތަކޮށްފައި.

'41 - ސްވިޑެންގެ ނުރައްކާ. ޕެނަލްޓީ އޭރިއާ ތެރެއިން އިސާކް ފޮނުވާލި ފުރަތަމަ ހަމަލާ ލަޕޯޓް ދިފާއުކުރި އިރު، ރީބައުންސް ބޯޅައިން ފޮނުވާލި ހަމަލާ ލޮރެންޓޭ ވަނީ ދިފާއުކޮށްފައި. ލޮރެންޓޭ ދިފާއުކުރުމާއެކު އެ ބޯޅަ ގޯލުގެ އަރިމަތީ ދަނޑީގައި ޖެހި ލިބުނީ ސްޕެއިންގެ ކީޕަރު ސިމޮންއަށް.

'39 - ސްޕެއިންގެ ހަމަލާއެއް. ޕެނަލްޓީ އޭރިއާ ބޭރުން ފެރާން ޓޮރޭޒް ފޮނުވާލި ހަމަލާ އަމާޒުވީ ސްވިޑެން ކީޕަރު އޮލްސެންއާ ދިމާއަށް.

'38 - ސްޕެއިނަށް ހުސް ފުރުސަތެއް. އަލްބާ ދިން ބޯޅައަކުން ވަރަށް ހުސްކޮށް ހުރެ، މޮރާޓާ ފޮނުވާލި ހަމަލާ ދިޔައީ ގޯލާ އަމާޒު ނުވެ ބޭރަށް.

ސްޕެއިންއިން ކުޅެމުންދަނީ އެޓީމުގެ ރަސްމީ ފުޓުބޯޅަ. ޕާސްތައް ޖަހައި ޕޮސެޝަން ހިފަހައްޓައިގެން ސްޕެއިންއިން ކުޅެމުންދިޔަ ނަމަވެސް ސްވިޑެންގެ ފަހަތުން ކުރަމުންދާ ޕެކް ޑިފެންސްގެ ސަބަބުން ސްޕެއިންއަށް ވަނީ ހަމަލާތައް އުފައްދަން އުނދަގޫވެފައި. ސްޕެއިންއާ ދެކޮޅަށް ކުޅޭއިރު ޓީމުތަކުން އެއްކޮށް ފަހަތަށް ޖެހި ޑިފެންސް ކުރުމަކީ ސްޕެއިންގެ ފުޓުބޯޅައަށް އަބަދުވެސް ދިމާވާ އުނދަގޫ ކަމެއް.

މެޗުގެ ފުރަތަމަ 30 މިނެޓުގެ ކުޅުން ނިމުނު އިރު، ސްވިޑެންއަށް ގޯލެއް ޖަހާނެ އެއްވެސް ފުރުސަތެއް ތަނަވަސްކުރެވިފައެއް ނުވޭ.

'29 - ކޮކޭއަށް އިތުރު ފުރުސަތެއް. އޮލްމޯ ދިން ބޯޅައަކުން ޕެނަލްޓީ އޭރިއާ ތެރެއިން ކޮކޭ ފޮނުވާލި އެ ހަމަލާ ދިޔައީ ސްވިޑެންގެ ގޯލާ އަމާޒު ނުވެ ބޭރަށް.

'23 - ސްޕެއިނަށް އިތުރު ފުރުސަތެއް. ޕެނަލްޓީ އޭރިއާ ތެރޭ ވަރަށް ހުސްކޮށް ހުއްޓައި ކޮކޭއަށް ލިބުނު ބޯޅައަކުން ފޮނުވާލި ހަމަލާ ދިޔައީ ސްވިޑެން ގޯލުގެ އަރިމަތީ ދަނޑިކައިރިން ބޭރަށް.

ސްޕެއިނުން މިއަހަރުގެ ޔޫރޯއަށް ނެރެފައި ވަނީ ޒުވާން ކުޅުންތެރިން ގިނަ ސްކޮޑެއް. ކޯޗު އެންރީކޭއާއެކު ސްޕެއިން މަސައްކަތް ކުރަމުންދަނީ ސްޕެއިން އަނެއްކާވެސް ފުޓުބޯޅައިގެ ރަސްކަމަށް ގެނައުމަށް. މިއީ އެ މަގަށް ޓީމު ހާނަން މުހިއްމު މުބާރާތެއް. 2000 އަހަރުތަކުގެ ތެރޭގައި ސްޕެއިން ރަން ޒަމާނަށް އައި ނަމަވެސް މިއީ އެޓީމަށް އެންމެ ކާމިޔާބު ދުވަސްތަކެއް ނޫން. 2008 ވަނަ އަހަރާއި 2012 ވަނަ އަހަރުގެ ޔޫރޯ ވިދިވިދިގެން ސްޕެއިން ކާމިޔާބުކުރި ނަމަވެސް އެޓީމަށް އެ ފެންވަރު ދެމެހެއްޓުމަށް ފަހުން ވަނީ އުނދަގޫވެފައި. އެކަން ބަދަލުކުރަން ނުކުމެ ހުރީ ކޯޗު އެންރީކޭ.

'16 - ސްޕެއިނަށް ރަނގަޅު ފުރުސަތެއް. ކޮކޭ ނަގައިދިން ހުރަހަކުން ޕެނަލްޓީ އޭރިއާ ތެރެއިން އޮލްމޯ ބޮލުން ފޮނުވާލި ހަމަލާ، ސްވިޑެންގެ ކީޕަރު ރޮބިން އޮލްސަން ވަނީ ހުޝިޔާރުކަމާއެކު މަތަކޮށްފައި.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ދެ ޓީމުންކުރެ އެއްވެސް ޓީމަކަށް ލަނޑުޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ. ނަމަވެސް އަދިވެސް ގިނަ ވަގުތު ބޯޅަ ހިފަހައްޓައިގެން ކުޅެމުންދަނީ ސްޕެއިނުން.

'7 - ސްޕެއިންގެ ހަމަލާއެއް. ޕެނަލްޓީ އޭރިއާ ބޭރުން އޮލްމޯ ފޮނުވާލި ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށް.

ސްޕެއިންގެ ގޯލްކީޕަރު ފިޔަވައި ސްޕެއިންގެ ހުރިހާ ކުޅުންތެރިން ފެންނަނީ ސްވިޑެންގެ ހާފުގެ ތެރެއިން.

ސްޕެއިނުން ކުޅެމުން އަންނަނީ އެޓީމުން އާންމުކޮށް ފެންނަ ޓިކީޓަކާ ފުޓުބޯޅަ.

މެޗުގެ ފުރަތަމަ ހާފުގެ ކުޅުން ފަށައިފި. ކިކްއޯފް ކުރީ ސްވިޑެން އިން.