ޔޫރޯ: ޕޮލެންޑް 1-2 ސްލޮވޭކިއާ

މެޗުގެ އުސްއަލިތައް

މެޗުގެ ފުރިހަަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 2-1ގެ ނަތީޖާއަކުން ސްލޮވާކިއާ ކުރީގައި އޮވެގެން.

'+90 - ޕޮލެންޑުގެ ހަމަލާއެއް. ލެވަންޑޯސްކީ ދިން ބޯޅައަކުން ގޯލު ކުރިމަތިން، ޕެނަލްޓީ އޭރިއާ ބޭރުން ސްވިޑާސްކީ ފޮނުވާލި ހަމަލާ، ސްލޮވާކިއާގެ ކީޕަރު ޑުބްރާވާކާ ވަނީ މަތަކޮށްފައި.

'+90 - ޕޮލެންޑަށް ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ބެޑްނަރެކް ފޮނުވާލި ހަމަލާ ދިޔައީ ސްލޮވާކިއާގެ އަރިމަތީ ދަނޑި ކައިރިން ބޭރަށް.

ސްލޮވޭކިއާއިން ވަރަށް ބޮޑަށް މެޗު ލަސްކޮށް، މަޑު ޖައްސާލަން މަސައްކަތް ކުރާކަން ފާހަގަވެގެންދޭ. އެޓީމުން ލީޑު ހިފަހައްޓަން ވަރަށް ބޮޑަށް ޑިފެންސަށް ސަމާލުކަން ދޭތަންވެސް މިހާރު ދަނީ ފެންނަމުން.

76' ޕޮލެންޑުން ހަމަލާއަކަށް ކުރި މަސައްކަތް ކާމިޔާބެއް ނުވި. އޭރިއާ ތެރެއަށް ނަގައިދިން ބޯޅަ ލެވަންޑޯސްކީ ބޮލުން ގޯލަށް ފޮނުވާލި ނަމަވެސް ބާރެއް ނެތް.

'69 - ސްލޮވޭކިއާ އަލުން ލީޑު ނަގައިފި. އެ ގޯލަކީ ކޯނަރަކުން ޑިފެންޑަރު ސްކްރީނިއާ ޖެހި ހިތްގައިމު ގޯލެއް. އޭރިއާ ތެރޭގައި ހުރެ ބޯޅަ ކޮންޓްރޯލް ކޮށްލި ގޮތަށް އަމާޒުކޮށްލީ ގޯލްގެ ކަނަށް.

ރަތް ކާޑާއެކު ފަހަތުން އަރަން ޕޮލެންޑް ކުރަމުން ދިޔަ މަސައްކަތަށް ވަނީ އުނދަގޫތަކެއް ކުރިމަތިވެފައި. މިއީ ސްލޮވޭކިއާއަށް ލިބުނު ވަރަށް ބޮޑަށް ހިތްވަރެއް. ބެލެވޭ ގޮތުގައި މެޗުގެ ފަހުބައި ފޯރިގަދަ ވެގެންދާނެ.

62' ޕޮލެންޑްގެ ކްރީކޯވިއާކަށް ދެވަނަ ރީނދޫ ކާޑަކާއެކު ރަތް ކާޑު ދައްކައިފި.

57' ލެވަންޑޯސްކީގެ ހިލޭ ޖެހުމަށް. ގޯލް ކައިރިން ލިބުނު ހިލޭ ޖެހުން ގޯލަށް އަމާޒުކުރުމަށް މަސައްކަތް ކުރި ނަމަވެސް އަމާޒުވީ ފާރަށް.

50' ލެނެޓީގެ އިތުރު ހަމަލާއެއް. އަރިމަތިން ނެގި ބޯޅަ ގޯލަށް ފޮނުވާލި ނަމަވެސް ދިޔައީ ކީޕަރު އަތަށް.

ޕޮލެންޑުން ދެވަނަ ހާފް ފެށީ ވަރުގަދަކޮށް. އެޓީމުން މިހާރު ކުޅެމުން އަންނަނީ ވަރަށް ބޮޑަށް ކުރިއަށް ޖެހިގެން.

46' ޕޮލެންޑުން ނަތީޖާ ހަމަހަމަކޮށްފި. ޕޮލެންޑްގެ ގޯލް ޖަހައިދިނީ ކެރޮލް ލެނެޓީ. އެ ގޯލަށް ފުރުސަތު ތަނަވަސްކޮށްދިނީ ރީބަސް.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0ގެ ނަތީޖާއަކުން ސްލޮވާކިއާ ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި އެއް މިނެޓުގެ ކުޅުން ދައްކައިފި.

'42 - ޕޮލެންޑް ކެޕްޓަން ލެވަންޑޯސްކީގެ ހަމަލާއެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން އޭނާ ފޮނުވާލި ހަމަލާ ސްލޮވާކިއާގެ ގޯލާ އަމާޒުވެފައެއް ނުވޭ.

'27 - ސްލޮވާކިއާގެ އިތުރު ހަމަލާއެއް. ޕެނަލްޓީ އޭރިއާ ބޭރުން ކުކާ ފޮނުވާލި ހަމަލާ ދިޔައީ ޕޮލެންޑްގެ ހުރަސްދަނޑީގެ ތަންކޮޅެއް މަތިން ބޭރަށް.

'26 - ސްލޮވާކިއާގެ ހަމަލާއެއް. ޕެނަލްޓީ އޭރިއާ ބޭރުން ޕެކަރިކް ފޮނުވާލި ބާރު ހަމަލާ، ޕެނަލްޓީ އޭރިއާ ތެރޭ ހުރި ޕޮލެންޑްގެ ޑިފެންޑަރެއް ވަނީ ބްލޮކްކޮފައި.

'18 - ސްލޮވާކިއާ އިން ލީޑު ހޯދައިފި. ޕޮލެންޑްގެ ދެ ކުޅުންތެރިއެއް ކައިރިން ނައްޓާލުމަށްފަހު ޕެނަލްޓީ އޭރިއާ ތެރެއަށް ވަދެ، ރޮބާޓް މަކް ފޮނުވާލި ހަމަލާ ގޯލުގެ ތެރެއަށް ވަދެފައިވަނީ ކީޕަރު ޝެޒްނީ އަތުން ބައިކޮޅަށް.

'14 - ސްލޮވާކިއާގެ ހަމަލާއެއް. ޕެނަލްޓީ އޭރިއާ ބޭރުން ޑުޑާ ފޮނުވާލި ހަމަލާ ދިޔައީ ޕޮލެންޑް ގޯލުގެ އަރިމަތީ ދަނޑި ކައިރިން ބޭރަށް،

'5 - ޕޮލެންޑްގެ ހަމަލާއެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ލެވަންޑޯސްކީ ފޮނުވާލި ހަމަލާ، ސްލޮވާކިއާ ޑިފެންޑަރެއް ގައިގައި ޖެހި ވަނީ ބްލޮކްވެފައި.

މެޗުގެ ކުޅުން ފަށައިފި.