ޔޫރޯ: ނޯތު މެސަޑޯނިއާ 1-3 އޮސްޓްރިއާ

މެޗުގެ އުސްއަލިތައް:

މެޗުގެ ފުރަތަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 3-1ގެ ނަތީޖާއަކުން އޮސްޓްރިއާ ކުރީގައި އޮވެގެން.

'90 - އޮސްޓްރިއާއަށް އިތުރު ފުރުސަތެއް. އެލްމާސް ދިން ބޯޅައަކުން ޕެނަލްޓީ އޭރިއާ ތެރެއިން ލެއިމާ ފޮނުވާލި ހަމަލާ، ނޯތު މެސެޑޯނިއާގެ ކީޕަރު ޑިމިޓްރިއެވްސްކީ ވަނީ މަތަކޮށްފައި.

'89 - އޮސްޓްރިއާ އިން ލީޑު ފުޅާކޮށްފި. އެޓީމަށް އެ ގޯލު ކާމިޔާބުކޮށްދިނީ އާނާޓޮވިޗް. އޭނާ އެ ގޯލު ޖެހީ ލައިމާ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން. އާނާޓޮވިޗް އަކީ ވެސް ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ކުޅުންތެރިއެއް.

ޔޫރޯ މުބާރާތްތަކުގައި އޮސްޓްރިއާ އިން ޖެހި ގޯލުގެ އަދަދު މިހާރު މިވަނީ ހަތަރަކަށް އަރާފައި. މި މެޗުގައި ޖެހި ދެ ގޯލުގެ އިތުރުން ދެން ހިމެނެނީ ޔޫރޯ 2008ގައި ޖެހި ގޯލަކާއި ޔޫރޯ 2016ގައި ޖެހި ގޯލެއް.

އޮސްޓްރިއާ އިން އަލުން ލީޑު ހޯދުމަށް ކެޕްޓަން އަލަބާގެ މަސައްކަތް ފާހަގަކޮށްލެވޭ. މެޗު ފެށުނު އިރު، އަލަބާ ސެންޓާ ބެކް މަގާމަށް ކުޅުނު ނަމަވެސް މިހާރު އޭނާ ފެންނަނީ ލެފްޓް ބެކުން އެޓޭކުތަކުގައި ބައިވެރިވާ ކުޅުންތެރިއެއްގެ ގޮތުގައި.

'78 - އޮސްޓްރިއާ އިން އަލުން ލީޑު ހޯދައިފި. އަލަބާ ނަގައިދިން ހުރަހަކުން ޕެނަލްޓީ އޭރިއާ ތެރެއިން އޮސްޓްރިއާއަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ގްރެގޯރިޗް. އޭނާ ވަނީ ފަސޭހަކަމާއެކު ގޯލުގެ ތެރެއަށް އެ ބޯޅަ ފޮނުވާލާފައި.

'72 - ނޯތު މެސެޑޯނިއާގެ ކައުންޓާ އެޓޭކެއް. ޕެނަލްޓީ އޭރިއާ ތެރެއިން އަލިއޮސްކީ ފޮނުވާލި ބާރު ހަމަލާ، އޮސްޓްރިއާގެ ލައިންހާޓް ވަނީ ބްލޮކްކޮށްފައި.

'64 - އޮސްޓްރިއާގެ ނުރައްކާތެރި ހަމަލާއެއް. އާނާޓޮވިޗް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ގްރެގޯރިޗް ބޮލުން ފޮނުވާލި ހަމަލާ، ނޯތު މެސެޑޯނިއާގެ ކީޕަރު ޑިމިޓްރިއޭވްސްކީ ވަނީ ހުޝިޔާރުކަމާއެކު މަތަކޮށްފައި.

'62 - ނޯތު މެސެޑޯނިއާއަށް ފުރުސަތެއް. އެލްމާސް ދިން ތުރޫ ޕާހަކުން ޕެނަލްޓީ އޭރިއާ ތެރެއިން ނިކޮލޯވް ފޮނުވާލި ހަމަލާ، އޮސްޓްރީގެ ކީޕަރު ބެކްމަން ވަނީ މަތަކޮށްފައި. ރީބައުންސް ބޯޅައިން ޕަންޑޭވް ފޮނުވާލި ހަމަލާ ދިޔައީ ހުރަސްދަނޑި މަތިން ބޭރަށް.

އޮސްޓްރިއާ އިން އަލުން ލީޑު ހޯދުމަށް، ކުރިއަށް ޖެހި އަންނަނީ މަސައްކަތްތަކެއް ކުރަމުން. ނަމަވެސް ނޯތު މެސެޑޯނިއާގެ ގިނަ ކުޅުންތެރިންތަކެއް ޑިފެންސަށް ފައިބައިގެން ކުޅޭތީ ވަނީ އުނދަގޫތަކަކާ ކުރިމަތިވެފައި.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެން.

މި މެޗުގައި އޮސްޓްރިއާގެ ލައިނާ، އޭނާގެ ގޯލު ހާއްސަކުރީ ފިންލޭންޑާ ދެކޮޅަށް ކުޅުނު މެޗުގައި ހަބަރު ހުސްވެގެން ރޭ ދަނޑުމައްޗަށް ވެއްޓުނު ޑެންމާކުގެ ތަރި ކްރިސްޓިއަން އެރިކްސަންއަށް. އެރިކްސަންއަށް މިހާރު ފަރުވާދެމުން އަންނަނީ ހޮސްޕިޓަލުގައި. އޭނާގެ ހާލު ސްޓޭބަލް ކަމަށް ޔޫއެފާ އިން މައުލޫމާތުދޭ.

އޮސްޓްރިއާގެ ގޯލަކީ ޔޫރޯއެއްގެ ފުރަތަމަ ހާފުގައި ފެނުނު އެޓީމުގެ ފުރަތަމަ ގޯލު. ޔޫރޯ 2008 އާއި ޔޫރޯ 2016ގައި އެޓީމުން ޖެހި ދެ ގޯލު ވެސް ފެނުނީ ދެވަނަ ހާފުގައި.

މިއީ ނޯތު މެސެޑޯނިއާގެ ފުރަތަމަ ޔޫރޯ. އަދި ޕަންޑޭވްގެ ގޯލަކީ ޔޫރޯގައި އެޓީމުން ޖެހި ފުރަތަމަ ގޯލު.

ޕެނަލްޓީ އޭރިއާ ތެރެއިން ކީޕަރު ބެޗްމަން ވަނީ އެ ބޯޅަ ހޯދުމަށް މަސައްކަތްކޮށްފައި. ނަމަވެސް އޭނާ އަތުން އެ ބޯޅަ ވަނީ ދޫވެފައި. ޕަންޑޭވްއަށް ބޯޅަ ލިބުމާއެކު އޭނާ ވަނީ ފަސޭހަކަމާއެކު އެ ބޯޅަ ގޯލުގެ ތެރެއަށް ފޮނުވާލާފައި.

'28 - ނޯތު މެސަޑޯނިއާ އިން ނަތީޖާ ހަމަހަމަކޮށްފި. އޮސްޓްރިއާގެ ޑިފެންސަށް ހެދުނު ގޯހަކުން ނޯތު މެސެޑޯނިއާއަށް މި ގޯލު ކާމިޔާބުކޮށްދިނީ ކެޕްޓަން ގޯރާން ޕަންޑޭވް.

'22 - އޮސްޓްރިއާއަށް އިތުރު ފުރުސަތެއް. ސަބިޓްޒާއަށް ޕެނަލްޓީ އޭރިއާ ތެރެއިން ލިބުނު ބޯޅައަކުން ގޯލަށް ފޮނުވާލި ހަމަލާ، ކީޕަރު ޑިމިޓްރިއެވްސްކީ ވަނީ މަތަކޮށްފައި.

'18 - އޮސްޓްރިއާ އިން ލީޑު ހޯދައިފި. ސަބިޓްޒާ ދިން ބޯޅައަކުން އޮސްޓްރިއާއަށް އެ ގޯލު ކާމިޔާބުކޮށްދިނީ ސްޓެފަން ލައިނާ. އޭނާ އެ ގޯލު ކާމިޔާބުކުރީ ނޯތު މެސެޑޯނިއާ ޕެނަލްޓީ އޭރިއާ ތެރެއިން ވަރަށް ހަނި އޭންގަލްއަކުން ގޯލުގެ ތެރެއަށް ބޯޅަ ފޮނުވާލައިގެން.

8' މިހާތަނަށް އެއްވެސް ޓީމަކުން ހަމަލާއެއް އުފައްދާފައެއް ނުވޭ. ދެޓީމުންވެސް ފެންނަނީ ހަމަޖެހިލައިގެން ހަމަލާއަކަށް މަސައްކަތް ކުރާ މަންޒަރު.

އޮސްޓްރިއާގެ ކެޕްޓަން އަލާބާ ބަޔާން މިއުނިކަށް އާންމުކޮށް އަރިމަތިން ފަހަތަށް ނޫނީ މެދުތެރެއަށް ކުޅުނު ނަމަވެސް، ގައުމީ ޓީމުގައި ފެންނަނީ ސެންޓަ ބެކެއްގެ ރޯލުން. އޭނާ ވެގެންދާނި ޓީމުގެ ތަނބަށް.

މެޗުގެ ކުޅުން ފަށައިފި.