ޔޫރޯ: އިންގްލެންޑް 1-0 ކްރޮއޭޝިއާ

މެޗުގެ އުސްއަލިތައް:

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 1-0ގެ ނަތީޖާއަކުން އިންގްލެންޑް ކުރީގައި އޮވެގެން.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

ލީޑާއެކު އިންގްލެންޑުން މި ފެންނަނީ ވަރަށް ބޮޑަށް ފަހަތަށް ސަމާލުކަން ދީގެން ކުޅެމުންދާތަން. އެހެންނަމަވެސް އެއީ ރިސްކީ ކުޅުމެކޭ ބުނެވިދާނެ. ހާއްސަކޮށް ކްރޮއޭޝިއާ ކަހަލަ ޓީމަކަށް ޖާގަ ދީފިނަމަ ނުރައްކާ ކުރާނެ. އިންގްލެންޑުން ދެވަނަ ގޯލެއް ނުޖަހައި މެޗު ނިންމާލަން ވިސްނައިފިނަމަ ކްރޮއޭޝިއާ ނުރައްކާ ކުރާނެ ކަމަށް ބެލެވޭ.

'66 - އިންގްލެންޑުގެ ހަމަލާއެއް. މައުންޓް ފޮނުވާލި ހިލޭ ޖެހުން، ހުރަސް ދަނޑީގެ ކުޑަ ތަންކޮޅެއް މަތިން ބޭރަށް.

މިއީ 17 މެޗުން ސްޓާލިން އިންގްލެންޑަށް ކާމިޔާބުކޮށްދިން 13 ވަނަ ގޯލު.

'57 - އިންގްލެންޑުން ލީޑު ނަގައިފި. ފިލިޕްސް ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ރަހީމް ސްޓާލިން.

'54 ކްރޮއޭޝިއާގެ ހަމަލާއެއް. ޕެނަލްޓީ އޭރިއާ ބޭރުން މޮޑްރިޗް ދުރުން ފޮނުވާލި ހަމަލާ އަމާޒުވީ ކީޕަރު ޕިކްފޯޑާ ދިމާއަށް. އޭނާ ވަނީ ފަސޭހަކަމާއެކު އެ ބޯޅަ ހޯދާފައި.

'47 މައުންޓަށް ކުރި ފައުލަކާ ގުޅިގެން ކްރޮއޭޝިއާގެ ކޮވަސިޗްއަށް ރީނދޫ ކާޑެއް.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'42 ކްރޮއޭޝިއާގެ ޕެނަލްޓީ އޭރިއާ ބޭރުން އެޓީމުގެ ކަލެޓާ ކާ، ބޯޅައިގައި އަތްލުމުން އޭނާއަށް ރީނދޫ ކާޑެއް. އިންގްލެންޑަށް ހިލޭ ޖެހުމަށް. ޓްރިޕިއާގެ ހިލޭ ޖެހުން ކްރޮއޭޝިއާގެ ވޯލުގައި ތިބި ކުޅުންތެރިން ގައިގައި ޖެހި ވަނީ ބްލޮކްވެފައި.

ދެ ޓީމުން ވެސް ކުޅެމުންދަނީ ވަރަށް ބޮޑަށް ޑިފެންސަށް ވިސްނައިގެން. އެޓޭކުގައި ބައިވެރިވުމަށްފަހު ދެ ޓީމުން ވެސް ގިނަ ކުޅުންތެރިން ޑިފެންސްގައި ބައިވެރިވޭ.

މިހާރު މެޗު ކޮންޓްރޯލްކޮށްގެން ކުޅެމުން އަންނަނީ ކްރޮއޭޝިއާ އިން. ނަމަވެސް ލަނޑުޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

ހުރަސްތަކެއް ނަގައި އިންގެލެންޑުގެ ގޯލަށް ނުރައްކާކުރުމަށް ކްރޮއޭޝިއާ އިން މަސައްކަތްކުރަމުން ދިޔަ ނަމަވެސް، މިހާތަނަށް މާބޮޑު ނުރައްކަލެއް ކުރިމަތިކުރެވިފައެއް ނުވޭ.

ފުރަތަމަ 20 ވަރަކަށް މިނެޓްގައި ފެނިގެން ދިޔައީ އިންގްލެންޑްގެ ހަމަލާތައް. އެހެންނަމަވެސް އެޓީމަށް ހަމަލާތަކުގެ ބޭނުން އެކްށީގެންވާ ގޮތެއްގައި ނުކުރެވި ދިޔަކަން ފާހަގަވި. ގިނަ ހަމަލާތަކެއް ބޭކާރުވަމުންދާނަމަ ގޯލެއް ޖެހުމަށް ޕްރެޝަރު ބޮޑުވެ، ގޭމްޕްލޭނަށް އަސަރުކުރުން އެކަށީގެންވޭ. އަވަހަށް ގޯލެއް ޖެހުން އިންގްލެންޑަށް މުހިއްމު. އެހެން ނޫންނަމަ މެޗުގެ އޮއިވަރު ބަދަލުވާނެ.

19' އިންގްލެންޑުން އަނެއްކާވެސް ފުރުސަތެއް ބޭކާރު ކޮށްލައިފި. ސްޓާލިންއަށް އޭރިއާ ތެރެއިން ހުސްކޮށް ބޯޅަ ލިބުނު ނަމަވެސް ލަސްކުރުމުން ރަނގަޅަށް ބޯޅަ ފޮނުވައިލެވޭ ގޮތެއް ނުވި.

16' ކޭންއަށް ރަނގަޅު ފުރުސަތެއް. ކެލްވިން ފިލިޕްސް އޭރިއާ ތެރެއަށް ނަގައިދިން ބޯޅައިގައި ބޮލުން ޖެއްސޭތޯ މަސައްކަތް ކުރި ނަމަވެސް ބޯޅަ ދިޔައީ ކުޑަ ތަންކޮޅެއް މަތިން.

މެޗަށް އިންގްލެންޑުން ނެގި ސްކޮޑުގައި ޖޯޑަން ސަންޗޯއާއި ބެން ޗިލްވެލްވެސް ހިމަނާފައެއް ނުވޭ. އެ ދެ ކުޅުންތެރިންނަކީވެސް މެޗުގެ ފުރަތަމަ 11 އިން ޖާގަ ލިބޭނެ ކަމަށް ކުރިން ބެލެވިފައި އޮތް ދެކުޅުންތެރިން.

9' އަަނެއްކާވެސް އިންގްލެންޑްގެ ހަމަލާއެއް. ކެލްވިން ފިލިޕްސް އޭރިއާ ބޭރުން ފޮނުވާލި ހަމަލާ ދިޔައީ ސީދާ ކީޕަރު އަތަށް. އިންގްލެންޑުން ދަނީ ގިނަ އެޓޭކްތަކެއް ކުރަމުން.

6' އިންގްލެންޑުން ލީޑު ނެގުމާ ގާތަށް. ފޮޑެންގެ ހަމަލާ އަމާޒުވީ ގޯލް ދަނޑިއަށް. ފޮޑެން ހަމަލާ އުފެއްދީ ސްޓާލިންގެ ޕާހަކުން.

މެޗުގެ ކުޅުން ފަށައިފި.