ޔޫރޯ: ތުރުކީ 0-3 އިޓަލީ

މެޗުގެ އުސްއަލިތައް:

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 3-0ގެ ނަތީޖާއަކުން އިޓަލީ ކުރީގައި އޮވެގެން.

މެޗުގެ ދެވަނަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'79 - އިޓަލީން ތިން ގޯލުގެ ލީޑެއް ހޯދައިފި. އިޓަލީއަށް އެ ގޯލު ޖަހައިދިނީ އިންސީނިއޭ. އޭނާ އެ ގޯލު ކާމިޔާބުކުރީ އިމޯބިލޭ ދިން ބޯޅައަކުން ތުރުކީގެ ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން.

'66 - އިތުރު ގޯލެއް ޖަހައި، އިޓަލީން ލީޑު ފުޅާކޮށްފި. އިޓަލީއަށް އެ ގޯލު ޖަހައިދިނީ އިމޯބިލޭ. އޭނާ އެ ގޯލު ކާމިޔާބުކުރީ ކީޕަރު ފުރަތަމަ ހަމަލާ މަތަކުރުމާއެކު ލިބުނު ރީބައުންސް ބޯޅައިން.

'53 - އިޓަލީގެ އިތުރު ހަމަލާއެއް. ޕެނަލްޓީ އޭރިއާ ތެރެއަށް ވަނުމަށްފަހު، އިޓަލީގެ ސްޕިނަޒޯލާ ފޮނުވާލި ބާރު ހަމަލާގެ ހުރަހަކަށްވީ ތުރުކީގެ ކީޕަރު އުޖާން ޗެކަރް.

'52 - އިޓަލީން ލީޑު ހޯދައިފި. އެ ލަނޑަކީ ތުރުކީގެ ޑިފެންޑަރު މެރީހް ޑެމިރާލް އަތުން ބައިކޮޅަށް ވަން ލަނޑެއް. އިމޯބީލޭ ނަގައިދިން ބޯޅަ، ބައިކޮޅަށް ވަދެފައިވަނީ ޑެމިރޭލްގެ ގައިގައި ޖެހިފައި.

'51 - ކައުންޓާ އެޓޭކެއްގައި ތުރުކީގެ ހަމަލާއެއް. ތުރުކީގެ ހާފުގެ ތެރެއިން ބޯޅަ ހިފައިގެން އިޓަލީގެ ހާފުގެ ތެރެއަށް ވަދެ، ޕެނަލްޓީ އޭރިއާ ތެރެއަށް ވަނުމަށްފަހު ތުރުކީގެ ހަލުވި ފޯވަޑް އުންޑާ ފޮނުވާލި ހަމަލާ އިޓަލީގެ ކީޕަރު ޑޮނަރުއްމާ ވަނީ މަތަކޮށްފައި.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ އިޓަލީން.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. މެޗުގެ ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'43 - އިޓަލީގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން އިމޯބިލޭ ފޮނުވާލި ހަމަލާ، ތުރުކީގެ ކީޕަރު އުޖާން ޗެކަރް ވަނީ މަތަކޮށްފައި. އޭނާ ކުރިމަތީ ކުޅުންތެރިންތަކެއް ތިބި ނަމަވެސް، ކީޕަރު ހުރީ އެ ބޯޅައަށް ވަރަށް ވިސްނައިގެން.

އިޓަލީން ތުރުކީގެ ގޯލަށް ގިނަ ހަމަލާތަކެއް ފޮނުވާލި ނަމަވެސް، ކީޕަރު އުޖާން ޗެކަރް ފެންނަނީ ހުޝިޔާރުކޮށް.

'36 - އިޓަލީގެ އިތުރު ހަމަލާއެއް. ޕެނަލްޓީ އޭރިއާ ބޭރުން އިންސީނިއޭ ފޮނުވާލި ހަމަލާ، ތުރުކީގެ ކީޕަރު އުޖާން ޗެކަރް ވަނީ މަތަކޮށްފައި.

'32 - އިޓަލީގެ ހަމަލާއެއް. ބެރާޑީ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، އިމޯބީލް ބޮލުން ފޮނުވާލި ހަމަލާ ދިޔައީ ތުރުކީ ގޯލުގެ އަރިމަތީ ދަނޑިކައިރިން ބޭރަށް.

ފުރަތަމަ ކޮޅުގައި ދެޓީމުގެ ފަރާތުންވެސް ފެނިގެން މިދަނީ ފުރަތަމަ މެޗުގެ ޕްރެޝަރު. ވަރަށް އަވަސް ޕާސްތަކެއް ޖަހައިގެން ކުޅެން މަސައްކަތް ކުރާތަން އެބަފެނޭ. މިހާތަނަށް ފެނުނު ފެނުމުގައި ނުރައްކާތެރިކޮށް ފެންނަނީ އިޓަލީން. އަމިއްލަ ގައުމުގައި ކުޅުމަކީ އިޓަލީއަށް ލިބޭނެ ހިތްހަމަ ޖެހުމެއް.

'22 - އިޓަލީގެ ނުރައްކާތެރި ހަމަލާއެއް. ކޯނަރަކުން ޕެނަލްޓީ އޭރިއާ ތެރޭ ހުސްކޮށް ހުރެ ކިއެލީނީ ބޮލުން ފޮނުވާލި ހަމަލާގެ ހުރަހަކަށްވީ ތުރުކީގެ ކީޕަރު އުޖާން ޗެކަރް.

'19 - ތުރުކީގެ ޕެނަލްޓީ އޭރިއާ ބޭރުން އިޓަލީގެ ބޮނޫޗީ ފޮނުވާލި ހަމަލާ ވެސް ގޯލާ އަމާޒެއް ނުވި.

'17 - އިޓަލީއަށް ހުސް ފުރުސަތެއް. ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ އިންސީނިއާ ފޮނުވާލި ހަމަލާ ތުރުކީގެ ގޯލާ އަމަޒުވެފައެއް ނުވޭ.

16' ޕެނަލްޓީ އޭރިޔާ ބޭރުން އިޓަލީގެ ބެރާޑީ ތުރުކީގެ ގޯލަށް ނުރައްކާކުރަން މަސައްކަތްކުރަމުންދިޔަ ނަމަވެސް، އޭނާގެ ދެ ބޯޅައެއް ތުރުކީގެ ވަރުގަދަ ޑިފެންޑަރުން ވަނީ ދިފާއުކޮށްފައި. ތުރުކީގެ ޑިފެންސް ލައިނުގައި އެންމެ މުހިންމު ދައުރެއް އަދާކުރަނީ މިދިޔަ ސީޒަނުގައި ލިވަޕޫލުގެ ޑިފެންސް ލައިނުން ފެނުނު އޮޒާން ކަބާކް.

މެޗުގައި އަދިވެސް އިޓަލީގެ ޓީމަށް އެންމެ އެދެވޭ ކުޅުން ދެއްކިފައެއް ނުވޭ. މެޗުގެ ފުރަތަމަ ދިހަ މިނެޓު މެދުތެރެއިން ފޯވަޑު ލައިނަށް ރަނގަޅު ބޯޅައެއް ދެވިފައެއް ނުވޭ.

މެޗުގެ ފުރަތަމަ ފަސް މިނެޓުގެ ކުޅުން ނިމުނު އިރު، ގިނަ ވަގުތު ބޯޅަ ހިފަހައްޓައިގެން ކުޅެމުން އަންނަނީ އިޓަލީން. ނަމަވެސް ތުރުކީން ޑިފެންސިވް ކުޅުމެއް ކުޅެމުންދާތީ، އިޓަލީއަށް ތުރުކީގެ ގޯލަށް ނުރައްކާކުރެވޭ ގޮތެއް ނުވޭ.

މެޗުގެ ކުޅުން ފަށައިފި. ކިކްއޯފް ކުރީ ތުރުކީން.