ވޯޓާ ގުޅޭގޮތުން ގާނޫނާ ޚިލާފު ކަމެއް ކުރި ކަމުގެ ތުހުމަތު ކުރެވޭ އޯޑިއޯތަކެއް!

ނިމިދިޔަ ރިޔާސީ އިންތިޚާބުގައި ގާނޫނާ ޚިލާފު ކަމެއް ކުރި ކަމަށް ތުހުމަތު ކުރެވޭ އޯޑިއޯތަކެއް ލީކުވެއްޖެއެވެ.

މީސް މީޑިއާގައި މިހާރު ދައުރުވަމުންދަނީ އިލެކްޝަންސް ކޮމިޝަންގެ ރައީސް އަހުމަދު ޝަރީފް ކަމަށް ބެލެވޭ މީހަކާއި އެހެން މީހަކާ ދެމެދު ކޮށްފައިވާ ކަމަށް ބެލެވޭ ފޯން ކޯލްތަކެއްގެ ރެކޯޑިންއެވެ. އެ އޯޑިއޯތަކާ ގުޅޭގޮތުން އީސީގެ ރައީސް ޝަރީފްގެ ބަހެއް ލިބޭގޮތް ވަނީ ނުވެފައެވެ.

ލީކްކޮށްލާފައި ވަނީ އެކިފަހަރު މަތިން ކޮށްފައިވާ ފޯން ކޯލްތަކެކެވެ. އެ އޯޑިއޯ އަޑުއަހާލުމުން ރިޔާސީ އިންތިޚާބުގައި ގާނޫނާ ޚިލާފު ކަމެއް ކޮށްފައިވާ ކަމަށް ވަރަށް ބޮޑަށް ތުހުމަތު ކުރުމުގެ ޖާގަ އެބައޮތެވެ. އެ ކޯލްތަކުގައި ޝަރީފް ކަމަށް ބެލެވޭ މީހާއާއި އެހެން މީހަކާ ދެމެދު ދެކެވިފައިވާ ވާހަކައިގައި، ކޮށްފައިވަނީ ކޮން ކަމެއްކަން ނުބުނެއެވެ. ނަމަވެސް ކަމެއް ކޮށްފައިވާކަން އެ ވާހަކަތަކުން ސާފުކޮށް އެނގެއެވެ.

ޝަރީފް ކަމަށް ބެލެވޭ މީހާ އެ ކޯލްގައި ވާހަކަދައްކާ މީހާ ކައިރީ ބުނަނީ އެމީހާ ފުލުސް އޮފީހަށް ގެންދިޔަޔަސް ކުރެވޭ ތުހުމަތަށް އިންކާރު ކުރުމަށެވެ. އަދި އޭގެކުރިން ޝަރީފް ކަމަށް ބެލެވޭ މީހާ ބުނަނީ ރައީސް ކޮންމެފަދަ ކަމަކަށް ވެސް މީހަކު ގުރުބާންކޮށްފާނެ ކަމަށެވެ. ފުލުސް އޮފީހުން ކުރާ ތުހުމަތަކަށް އިންކާރުކޮށްފިނަމަ އެ މައްސަލަ ސާބިތުނުކުރެވޭނެ ކަމަށް ވެސް ޝަރީފް ކަމަށް ބެލެވޭ މީހާ ބުނެއެވެ.

ޝަރީފް ކަމަށް ބެލެވޭ މީހާއާ ވާހަކަ ދައްކާ މީހާ އެ ކޯލްގައި ބުނަނީ އެ ކުރިކަމަކީ އެމީހާއާއި ޝަރީފްއާ ރާވައިގެން ކުރި ކަމެއް ކަމަށާއި ތިކަމުން ސަލާމަތް ނުވެވޭނެ ކަމަށް ޕީޕީއެމްގެ މީހަކު އޭނައަށް ގުޅައި އިންޒާރުދޭ ކަމަށެވެ. އަދި އެކުރި ކަމެއްގައި އަކުރަމު ކިޔާ މީހެއްގެ އަތެއްވެސް އޮންނަ ކަމަށް އެ އިންޒާރުދިން މީހާ ބުނާކަމަށް ވެސް އެ ކޯލްގައި ޝަރީފް ކަމަށް ބެލެވޭ މީހާ އާއި ވާހަަކަ ދެއްކި މީހާ ބުންޏެވެ.

ޝަރީފް ކަމަށް ބެލެވޭ މީހާއާ ވާހަކަ ދެއްކި މީހާ ވަނީ ރައީސް ޔާމީނަށް ލިބެން އޮތް ވޯޓުތަކެއް ބަދަލުކޮށްފައި ކަމަށް އިންޒާރުދިން މީހާ ބުނާ ކަމަށް އެ ރެކޯޑިންގައި އެމީހާ ކިޔައިދެއެވެ.

ރިޔާސީ އިންތިޚާބަށްފަހު ރައީސް އަބްދުﷲ ޔާމީން އަބްދުލް ގައްޔޫމް ބަލި ގަބޫލުކުރި ނަމަވެސް، ޕީޕީއެމް އިން އަންނަނީ އިންތިޚާބުގެ ސައްހަ ކަމާ މެދު ސުވާލު އުފައްދަމުންނެވެ. އިންތިޚާބުގައި ވޯޓު އޮޅުވާލާފައިވާ ކަމަށް ވެސް އެ ޕާޓީން ތުހުމަތުކުރެއެވެ. ނަމަވެސް އިންތިޚާބުގެ ކުރިން އިދިކޮޅު އެމްޑީޕީން ބުނެފައިވަނީ ވޯޓުލާ މަރުކަޒު ކައިރީ އިލެކްޝަންސް ކޮމިޝަންގެ އޮފިޝަލުންގެ ގޮތުގައި ހަރަކާތްތެރިވެފައި ވަނީ ޕީޕީއެމްގެ އެކްޓިވިސްޓުން ކަމަށެވެ. އަދި އެމީހުން އޮފިޝަލުންގެ ގޮތުގައި ހަމަޖެއްސީ ޕީޕީއެމް އިން އެ ކޮމިޝަނަށް ލިސްޓެއް ފޮނުވުމުން ކަމަށް އެމްޑީޕީން ތުހުމަތުކޮށްފައިވެއެވެ.