ފުލުހުންގެ ބިލަށް ހިޔާލު ހުށަހެޅުމުގެ ފުރުސަތު ހުޅުވާލައިފި

ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީގައި މިހާރު އޮތް "ދިވެހި ފުލުހުންގެ ހިދުމަތުގެ ބިލް" އަށް އާއްމުކޮށް ހިޔާލު ހުށަހެޅުމުގެ ފުރުސަތު ރައްޔިތުންގެ މަޖިލީހުގެ އިދާރާއިން ހުޅުވާލައިފިއެެވެ.

ފުލުހުންގެ ބިލު ސަލާމަތީ ހިދުމަތްތަކާބެހޭ ކޮމިޓީއަށް ފޮނުވާފައިވަނީ، އެ ބިލު މަޖިލީހަށް ބަލައިގަތުމަށްފަހު އިތުރަށް ދިރާސާ ކުރުމަށެެވެ.

މަޖިލިސް އިދާރާއިން މިއަދު ބުނީ، ފުލުހުންގެ ހިދުމަތުގެ ބިލަށް އާއްމުންގެ ހިޔާލު ހޯދުމަށް މިއަދުން ފެށިގެން ހުޅުވާލާފައިވާ ކަމަށެވެ.

ވީމާ މި ބިލަށް އެއްވެސް ހިޔާލެއް ނުވަތަ ކޮމެންޓެއް އޮތްނަމަ، 30 ޖޫން 2:00 ގެ ކުރިން ކޮމިޓީގެ މެއިލް އެޑްރެސް [email protected] އަށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ފޮނުއްވައި ދިނުމަށް އެދޭ ކަމަށްވެސް ބުނެފައިވެއެވެ.

ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީގެ ޗެއާޕާސަން ހަސަން ލަތީފު ހުށަހެޅުއްވި މި ބިލުގައި ވަނީ ކޮމިޝަނަރު އޮފް ޕޮލިސްގެ މަގާމަށް ކުރިމަތި ލުމުގެ ފުރުސަތު ގާނޫނުން އާއްމުކޮށް ހުޅުވާލަން ހިމަނައިފައެވެ.

މިހާރު ގާނޫނުގައި ބުނަނީ ކޮމިޝަނާ އޮފް ޕޮލިސްގެ މަގާމަށް މީހަކު އައްޔަން ކުރައްވާނީ ރައީސުލް ޖުމްހޫރިއްޔާ ކަމަށެވެ.

އެގޮތަށް ހިިމަނާފައި ވަނީ މިހާރު އަމަލު ކުރަމުން އަންނަ ފުލުހުންގެ ގާނޫނުގައެވެ. އެގާނޫނުގައި ކޮމިޝަނާ އޮފް ޕޮލިސްގެ މަގާމަށް މީހަކު އައްޔަން ކުރުމާއި ވަކި ކުރުމުގެ ބާރު ދީފައި ވަނީ ރައީސުލް ޖުމްހޫރިއްޔާ އަށެވެ.

ދިވެހި ފުލުހުންގެ ހިދުމަތުގެ ބިލަށް ހަސަން ލަތީފު ގެންނަން ހުށަހަޅާފައިވާ ބަދަލުގައި ބުނެފައިވަނީ، "ކޮމިޝަނަރުގެ މަގާމަށް މީހަކު އައްޔަން ކުރަން ޖެހޭ ކޮންމެ ހާލަތެއްގައި، އެކަމަށް އެދޭ ފަރާތްތަކުން، ކޮމިޝަނާ އޮފް ޕޮލިސްގެ މަގާމަށް ކުރިމަތިލާން ޕްރޮމޯޝަން ބޯޑުން ހުޅުވާލަން ވާނެ" ކަމަށެވެ. އަދި އެ މަގާމަށް ރައީސުލް ޖުމްހޫރިއްޔާ މީހަކު އައްޔަން ކުރައްވާނީ ޕްރޮމޯޝަން ބޯޑުން ވަޒަން ކޮށް މިނިސްޓަރަށް ހުށަހަޅާ ނަންތަކުގެ ތެރެއިން މިނިސްޓަރުގެ ލަފާގެ މަތިން ކަމަށްވެސް ބުނެފައި ވެއެވެ.

ބިލްގައި ބުނެފައިވަނީ، ކޮމިޝަނަރު އައްޔަން ކުރެވޭނީ ހަތަރު އަހަރު ދުވަހުގެ ދައުރަކަށް ކަމަށެވެ. އެ ދައުރު ފުރިހަމަ ވުމުން ހަތަރު އަހަރުގެ އިތުރު އެއް ދައުރަށް އޭނާ އެ މަގާމަށް އައްޔަން ކުރެވިދާނެ ކަމަށް ވެސް ބުނެފައި ވެއެވެ.

މި ބިލުގައި ބުނެފައިވަނީ ކޮމިޝަނަރު މަގާމުން ވަކި ކުރެވޭނީ، އޭނާ އެ މަގާމުން ވަކި ކޮށްދިނުމަށް އެދި މިނިސްޓަރު ރައީސުލް ޖުމްހޫރިއްޔާއަށް ހުށަހަޅާ ހުށަހެޅުމެއްގެ މައްޗަށް ބިނާކޮށް ރައީސުލް ޖުމްހޫރިއްޔާއަށް ކަމަށެވެ. ނަމަވެސް ކޮމިޝަނަރު މަގާމުން ވަކި ކުރުމަށް މިނިސްޓަރަށް، ރައީސުލް ޖުމްހޫރިޔާއަށް ހުށަހެޅޭނީ ވަކި ހާލަތްތަކެއްގައިކަން ބަޔާންކޮށް އެހާލަތު ބިލުގައި ތަފްސީލުކޮށް ވަނީ ހިމަނައިފައެވެ.

މިބިލުގައި ބުނެފައިވަނި ޑެޕިއުޓީ ކޮމިޝަނަރުގެ މަގާމަށް މީހަކު އައްޔަން ކުރުމަށްވެސް ހިނގާނީ ކޮމިޝަނަރު އައްޔަން ކުރުމާއި ވަކި ކުރުމާ ގުޅޭ ގޮތުން ހިމަނާފައިވާ އުސޫލުތައް ކަމަށެވެ.

މި ބިލުގައި ކޮމިޝަނަރުން އައްޔަން ކުރުމުގެ ކަންތަކުގައި ކުރަން ޖެހޭ ކަންތައްތައް ކުރުމާއި، ފުލުހުންނަށް މަގާމުގެ ކުރިއެރުން ދިނުމާއި، މަގާމުގެ ޝަރުތު ފުރިހަމަ ވޭތޯ ބެލުމާއި، މިނިސްޓަރަށް ލަފާ ދޭން ޖެހޭ ކަންކަމުގައި ލަފާ ދިނުމަށް އުފައްދާ ޕްރޮމޯޝަން ބޯޑަށް މެންބަރުން އައްޔަން ކުރުމުގެ ބާރު ބިލުން ދީފައިވަނިީ އޭރަކު ހުންނަވާ ޕޮލިސް ކޮމިޝަނަށެވެ.

ފުލުހުންގެ ހުވަޔަށް ބަދަލު ގެންނަން ވެސް މި ބިލުގައި ވަނީ ހުށަހަޅާފައި ވެއެވެ.