މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ތަރައްގީކުރަމުން އަންނަ ވެލާނާ އިންޓަނޭޝަނަލް އެއާޕޯޓުގެ ސީޕްލޭން ޓާމިނަލްގެ ލައުންޖުތައް ކުއްޔަށް ދޫކުރާނެ އުސޫލުތައް ފިނޭންސް މިނިސްޓްރީން އާންމުކޮށްފިއެވެ.
ފިނޭންސް މިނިސްޓްރީން މިއަދު ނެރެފައިވާ ނޫސް ބަޔާނެއްގައި ބުނީ، އާ ސީޕްލޭން ޓާމިނަލަކީ ސަރުކާރުން ސޮވްރީން ގެރެންޓީ ދީގެން ކުރިއަށްގެންދާ މަޝްރޫއެއް ކަމަށެވެ. އަދި މި މަޝްރޫއު ކުރިއަށްގެންދިއުމަކީ އެއާޕޯޓް ބޮޑުކުރުމުގެ މަޝްރޫއު ކުރިއަށް ގެންދިއުމަށާއި، ފަސިންޖާ ޓްރެފިކް މެނޭޖުކުރުމަށް ކޮންމެހެން މުހިންމު މަޝްރޫއެއް ކަމަށެވެ.
ސީޕްލޭން އޮޕަރޭޓަރުންނަކީ ރާއްޖޭގެ ފަތުރުވެރިކަމުގެ ސިނާއަތު ދެމެހެއްޓުމުގައި އަދި ތަރައްގީކުރުމުގައި މުހިންމު ރޯލެއް އަދާކުރާ ބަޔަކަށްވާއިރު އެއާޕޯޓް ބޮޑުކުރުމުގެ މަޝްރޫއުގެ ތެރެއިން ސަރުކާރުން ސީޕްލޭން އޮޕަރޭޓް ކުރުމަށް ބޭނުންވާ އިންފްރާސްޓެކްޗާ ތަރައްގީކޮށް، ހުރިހާ އޮޕަރޭޝަރުންނަށް ބޭނުންކުރެވޭ ގޮތަށް އޮތުމަކީ މި ސިނާއަތުގެ ކުރިއެރުމަށާއި އަދި އިންވެސްޓަރުންގެ އިތުބާރު ހޯދުމަށް މުހިންމު ކަމެއް ކަމަށްވެސް މިނިސްޓްރީގެ ބަޔާނުގައި ފާހަގަކޮށްފައިވެއެވެ.
ފިނޭންސް މިނިސްޓްރީން ބުނީ އެމްއޭސީއެލްއިން ލޯނު ނަގައިގެން ތަރައްގީކޮށްފައިވާ ސީޕްލޭން ޓާމިނަލް ބޭނުންކުރުމާ ގުޅޭގޮތުން ސަރުކާރުން ގޮތްތަކެއް ނިންމައި އެ ނިންމުންތައް އެމްއޭސީއެލްގެ ބޯޑާ ހިއްސާކޮށްފައިވާ ކަމަށެވެ. މިގޮތުން ސަރުކާރުގެ ނިންމުންތައް ނިންމުމުގައި ބަލައިފައިވާނީ އެމްއޭސީއެލްއަށް ލިބެން އޮތް އާމްދަނީ އިތުރުކުރެވޭނެ ގޮތަކަށް އަމަލުކުރުމާއެކު ފަތުރުވެރިކަމުގެ ސިނާއަތުގެ ކުރިއެރުމަށް ސީޕްލޭން އޮޕަރޭޓަރުން މިހާރުވެސް ކުރަމުންގެންދާ މަސައްކަތަށް މަގުފަހިވާނެ ގޮތަށް އަމަލުކުރުމަށާއި އަދި ކުރިއަށް އޮތް ތަނުގައި އިތުރު ސީޕްލޭން އޮޕަރޭޓަރުން މި ސިނާއަތުގައި ހަރަކާތްތެރިވުމުގެ ފުރުސަތު ފަހިވެގެންދާނެ ގޮތަކަށް އަމަލު ކުރުމަށް ކަމަށް ބަޔާނުގައިވެއެވެ.
މީގެ އިތުރުން މިހާރު ސީޕްލޭން އޮޕަރޭޓްކުރަމުންދާ ބައެއް ފަރާތްތަކުން އެފަރާތްތަކަށް އަމިއްލައަށް އިންވެސްޓްކޮށްގެން މިހާރު ހަދާފައިވާ ޓާމިނަލްތައް ހުސްކުރަން ޖެހިފައިވުމާއި އަދި މިކަމާ ގުޅިގެން އެފަރާތްތަކަށް އެމްއޭސީއެލްއިން ދީފައިވާ ކޮމިޓްމެންޓްތަކަށް ރިޔާއަތްކޮށް އެފަރާތްތަކާ މެދު އިންސާފުވެރިކަމާއެކު އަމަލު ކުރުމުގެ އިތުރުން، މިފަރާތްތަކީ ފޮރިން އިންވެސްޓްމެންޓްތަކެއް ކަމަށް ވުމާއެކު ބޭރުގެ ފަރާތްތަކުން ރާއްޖޭގައި އިންވެސްޓް ކުރުމަށް އޮތް އިތުބާރާއި ޔަގީންކަން ދެމެހެއްޓޭނެ ފަދަ ގޮތަކަށް ނިންމުންތައް ބައްޓަން ކުރުމަށްވެސް ސަރުކާރުގެ މި ނިންމުމުގައި ރިއާޔަތްކޮށްފައިވާނެ ކަމަށް ފިނޭންސް މިނިސްޓްރީން ބުނެއެވެ.
އާ ސީޕްލޭން ޓާމިނަލްގެ ލައުންޖު ދޫކުރުމުގެ ކަންކަން ކުރިއަށްގެންދިއުމަށް ސަރުކާރުން ނިންމާފައިވާ ގޮތް:
- ޓީއެމްއޭއަށް މިހާރު އެ އޮޕަރޭޓަރު ބޭނުން ކުރަމުންދާ ލައުންޖުގެ ޖާގައިގެ ބޮޑުމިނާއި އެއްވަރަށް، މިހާރުވެސް އެފަރާތް ކުއްޔަށް ހިފާފައިވާ ރޭޓްގައި އާ ސީޕްލޭން ޓާމިނަލުން ދެ އަހަރު ދުވަހު މުއްދަތަށް ޖާގަ ކުއްޔަށް ދިނުން.
- މަންތާ އެއާއަށް އެފަރާތުގެ މިހާރުގެ އޮޕަރޭޝަނަށް އެކަށީގެންވާ ލައުންޖު ޖާގަ، މިހާރުވެސް އެފަރާތް ކުއްޔަށް ހިފާފައިވާ ރޭޓްގައި އާ ސީޕްލޭން ޓާމިނަލުން ދެ އަހަރު ދުވަހު މުއްދަތަށް ޖާގަ ކުއްޔަށް ދިނުން.
- މަތީގައިވާ ގޮތަށް އޮޕަރޭޓަރުންގެ ލައުންޖު ޖާގަ ހަމަޖެއްސުމަށް ފަހު ބާކީވާ ލައުންޖު ސްޕޭސްއަށްވާ ޖާގަ ޑިމާންޑަށް ބަލައި ޓެންޑާ އުސޫލުން އެމްއޭސީއެލްއިން ހުޅުވާލައި ވާދަވެރި ރޭޓްތަކެއް ދެމެހެއްޓޭނެ ފަދަ ގޮތަކަށް ދޫކުރުން.
- އައިލެންޑް އޭވިއޭޝަނުން މިހާރު ބޭނުން ކުރަމުންދާ ސީޕްލޭން ޓާމިނަލްގެ ޖާގަ ކުރިއަށް އޮތް ތަނުގައިވެސް އެފަރާތުން ބޭނުންކުރުމަށް ހަމަޖެހިފައިވާތީ، އެފަރާތަށް އެކަން ކުރެވޭނެ މަގުފަހިކުރުން.
- ދެ އަހަރުގެ މުއްދަތުގެ ތެރޭގައި އާ ސީޕްލޭން ޓާމިނަލްގެ ފުލް އޮޕަރޭޝަންސް އެމްއޭސީއެލްއިން އިންޑަސްޓްރީގެ އިތުބާރާއެކު ހިންގޭނެ ގޮތަށް ޕްލޭނެއް އެކުލަވާލައި އެގޮތަށް މަސައްކަތްތައް ކުރިއަށް ގެންދިއުން.
ފިނޭންސް މިނިސްޓްރީން ބުނީ އޮޑިޓަރ ޖެނެރަލްގެ އޮފީހުން މިކަމާ ގުޅިގެން ތައާރަފްކޮށްފައިވާ ރިޕޯޓުގައި ޓީއެމްއޭއިން މިހާރު ބޭނުންކުރަމުންދާ ސީޕްލޭން ޓާމިނަލްއަކީ އެ ފަރާތުން އަމިއްލައަށް އިންވެސްޓްކޮށްގެން ތަރައްގީކޮށްފައިވާ ސީޕްލޭން ޓާމިނަލްއަކަށް ވެފައި އެފަރާތުން ރިލޮކޭޓްކުރާއިރު އިތުރު ހަރަދުތަކެއް ހިނގާނެތީއާއި އެފަރާތުން މިހާރު ދެމުންގެންދާ ހިދުމަތްތައް ދިނުމަށް އެއާ އެއްވަރުގެ ޖާގައެއް އާ ސީޕްލޭން ޓާމިނަލްއިން ހަމަޖެއްސުމަކީ އެ އޮޕަރޭޓަރަށް އިންސާފުވެރި ގޮތްކަމަށް ސަރުކާރުން ދެކޭ ކަމަށެވެ.
އާ ސީޕްލޭން ޓާމިނަލް އަވަހަށް ހުޅުވައި ހިދުމަތްދޭން ފެށުމަކީ އާ ރަންވޭ ބޭނުންކުރުމަށް ކޮންމެހެން ކުރަން ޖެހޭ ކަމެއް ކަމަށާއި އާ ސީޕްލޭން ޓާމިނަލުގެ ސަބަބުން އެމްއޭސީއެލްއަށް ބޮޑު އާމްދަނީއެއް ލިބޭނެ ކަމަށްވެސް ފިނޭންސްއިން ބުނެފައިވެއެވެ.
އާ ސީޕްލޭން ޓާމިނަލްގެ މަސައްކަތް ހަވާލުކޮށްފައިވަނީ ޗައިނާގެ ބީޔޫސީޖީ އާއެވެ. ކޮންޓްރެކްޓުގެ އަގަކީ 40 މިލިއަން ރުފިޔާ އެވެ.
ސީޕްލޭން ޓާމިނަލްގެ އަމަލީ މަސައްކަތް ފަށާފައިވަނީ މިދިޔަ އަހަރުގެ ޖެނުއަރީ 29 ވަނަ ދުވަހުއެވެ. ޓާމިނަލްގެ ސްޓްރަކްޗާ މަސައްކަތް ނިމިފައިވާއިރު މިހާރު ކުރިއަށްދަނީ އިންޓީރިއާ މަސައްކަތްތަކެވެ.
ރޯދަ 28، އެސްޓީއޯ ރޯދަ ބާޒާރު: ދިވެހި ކަރާ މަދުވެ އަގު އުފުލިއްޖެ
ޖެނުއަރީ މަހުން ފެށިގެން މިހާތަނަށް 150 މިލިއަން ޑޮލަރު ބޭންކުތަކަށް މާރުކޮށްފި: ރައީސް
ޓީއެމްއޭ ގަންނަން ބްލެކްސްޓޯނުން 200 މިލިއަން ޑޮލަރުގެ ލޯނެއް ނަގަނީ
އެލައިޑުގެ އިފްތާރު ޕެކް ބެހުން މިސްކިތްތަކުގައި ކުރިއަށްދަނީ
