އަބުރު ރައްކާތެރިކުރުމުގެ ގާނޫނު އުވާލަން ފާސްކޮށްފި

އަބުރު ރައްކާތެރި ކުރުމާއި ޚިޔާލު ފާޅުކުރުމުގެ މިނިވަންކަމުގެ ޤާނޫނު އުވައިލަން ރައްޔިތުންގެ މަޖިލީސް ފާސްކޮށްފި އެވެ.

ރައްޔިތުންގެ މަޖިލީހުގައި މިއަދު އެ ބިލު އުވާލާފައިވަނީ މަޖިލީހުގެ ވޯޓުގައި ހާޒިރުވި ބޭފުޅުންގެ ތެރެއިން 38 މެމްބަރުންގެ ވޯޓާއެކުގައެވެ. އެ ގާނޫނު އުވާލުމާ ދެކޮޅަށް ވޯޓު ލާފައި ވަނީ 13 މެމްބަރުންނެވެ.

އެ ގާނޫނު ދިރާސާ ކުރުމަށް ކޮމިޓީއަށް ހުށަހެޅުމުން އެ ބިލަށް އެއްވެސް ބަދަލެއް ގެނެސްފައެއް ނުވެއެވެ.

އެޤާނޫނު އުވާލަން ރައްޔިތުންގެ މަޖިލީހަށް ހުށަހަޅާފައި ވަނީ ހެންވޭރު އުތުރު ދާއިރާގެ މެންބަރަ އަބްދުﷲ ޝާހިދުއެވެ. ބިލު ހުށަހަޅުއްވައި ވާހަކަ ދައްކަވަމުން ޝާހިދު ވިދާޅުވީ އަބުރުގެ ގާނުނު އުވާލުމަކީ އިންތިޚާބީ ރައީސް އިބްރާހީމް މުހައްމަދު ސޯލިހުގެ ރިޔާސީ ވައުދެއް ކަމަށާއި، އެއީ އެންމެ އިސްކަން ދެއްވި ވައުދު ކަމަށެވެ.

ޝާހިދު ވިދާޅުވީ އަބުރުގެ ގާނޫނު މިހާރު އޮތްގޮތުން ބައެއް މީޑިއާތަކަށް ވަރަށް ބޮޑެތި ގެއްލުންތައް ލިބިފައިވާ ކަމަށާއި، އެންމެ ބޮޑެތި ގެއްލުން ލިބުނު މީޑިއާގެ ތެރޭގައި ރާއްޖެ ޓީވީ ހިމެނޭ ކަމަށެވެ.

އަދި އެއީ ރައްޔިތުންނަށް ބޮޑު ވޭނެއް ތަހައްމަލު ކުރަންޖެހުނު ގާނޫނެއްކަން ފާހަގަކުރައްވައި ޝާހިދު ވިދާޅުވީ އަބުރުގެ ގާނޫނު މިހާރު އޮތްގޮތަށް ބާއްވަން ރައްޔިތުން ގަބޫލު ނުވާނެ ކަމަށެވެ.

މިބިލަށް ތާއީދުކުރައްވާ ބައެއް މެންބަރުން ދެއްކެވި ވާހަކައިގައި އަބުރުގެ ގާނޫނަކީ ވަކި މީހެއްގެ ދިފާއުގައި ހެދި ގާނޫނެއް ކަމަށް ވިދާޅުވިއެވެ.