ވިޔަފާރި

އެސްއީޒެޑުގައި ތަރައްގީކުރާ ގެތައް އެންމެ މަތީ ފަންތީގެ މީހުންނަށް ހާއްސަކޮށްފި

މުހައްމަދު އިޝާން

ސްޕެޝަލް އިކޮނޮމިކް ޒޯނު (އެސްއީޒެޑް) ތަކުގައި ތަރައްގީ ކުރާ ސަސްޓެއިނަބަލް ޓައުންޝިޕްތަކަކީ އެންމެ މަތީ ފަންތީގެ ބޯހިޔާވަހިކަމަށް ހާއްސަކުރާ ތަންތަނަށް ވާން ޖެހޭގޮތަށް ބޯޑު އޮފް އިންވެސްޓުމެންޓުން ނިންމައި ގެޒެޓުކޮށްފިއެވެ.

ބޯޑް އޮފް އިންވެސްޓުމެންޓުން އިއްޔެ ވަނީ ސްޕެޝަލް އިކޮނޮމިކް ޒޯނު ފްރޭމްވޯކުގެ ދަށުން ތަރައްގީ ކުރާ ޓައުންޝިޕްތަކުގައި ހުންނަން ޖެހޭނެ ޝަރުތުތައް ބަޔާންކޮށް ގެޒެޓުކޮށްފައެވެ.

އެ ޝަރުތުތަކުގައިވާ ގޮތުން ސްޕެޝަލް އިކޮނޮމިކް ޒޯންތަކުގައި ތަރައްގީ ކުރާ ސަސްޓެއިނަބަލް ޓައުންޝިޕްތަކަށް މަދުވެގެން 500 މިލިއަން ޑޮލަރު އިންވެސްޓު ކުރަން ޖެހޭނެ ކަމަށް ވަނީ ބަޔާންކޮށްފައެވެ.

އަދި އެއީ އެންމެ މަތީ ފަންތީގެ މީހުން ރާއްޖޭގައި ދިރިއުޅެން ކަމުދާނެ ގޮތަކަށް ތަރައްގީ ކުރާ ތަންތަނަށް ވާން ޖެހޭނެ ކަމަށް ވެސް ވަނީ ޝަރުތުކޮށްފައެވެ.

ސްޕެޝަލް އިކޮނޮމިކް ޒޯނު ޕްރޮޖެކްޓުގައި ހުންނަން ޖެހޭ ބައެއް ޝަރުތުތައް:

އާއިލާތަކަށް ހާއްސަ އެންމެ މަތީ ފަންތީގެ ވިލާ ނުވަތަ ގެތައް
ސައުތު އޭޝިއާގެ ގައުމުތަކުގެ އެންމެ ކުރީ ސަފުގައި ހަރަކާތްތެރިވާ ތައުލީމު ނުވަތަ ހެލްތު ޓޫރިޒަމް ގައުމަކަށް ރާއްޖެ ވާނެ ފަދަ ދުނިޔޭގެ ފެންވަރުގެ މަތީ ފަންތީގެ ތައުލީމީ އަދި ސިއްހީ ހިދުމަތްތައް ހުރުން
އެންމެ މަތީ ފަންތީގެ ލަގްޒަރީ ރިސޯޓާއި ހޮޓާ އަދި މެރީނާ ހުރުން
މަދުވެގެން 60 ޕަސަންޓަކީ ދެމެހެއްޓެނިވި ހަކަތައަށްވުން / ކުނި މެނޭޖްކުރުމަށް ބޭނުންވާ އިންފްރާސްޓްރަކްޗާ ހުންނަން ޖެހޭ
އެންމެ ފަހުގެ ޒަމާނީ ދަނޑުވެރިކަމުގެ ވަސީލަތްތަކާއި އެކުއަކަލްޗާ މެދުވެރިކޮށް ފުޑް ސެކިއުރިޓީ ޔަގީން ކުރުމުގެ ގޮތުން މަދުވެގެން ދެ ބާވަތެއް އުފެއްދުން
މަތީ ފަންތީގެ މީހުންގެ ދިރިއުޅުން ބިނާ ކުރުމަށް ބޭނުންވާނެ އެހެނިހެން ތަންތަން ގާއިމުކޮށްފައި ހުންނަން ޖެހުން
އެސްއީޒެޑުގައި މަސައްކަތްކުރާ މުވައްޒަފުންނަށާއި އެ މީހުންގެ އާއިލާތަކަށް ބޭނުންވާނެ ސިއްހީ، ތައުލީމީ އަދި ރެކްރިއޭޝަނަލް ވަސީލަތްތައް ގާއިމުކޮށްފައި ހުރުން

ރާއްޖޭގައި ގާއިމުކުރާ އެސްއީޒެޑް އެއްގައި 500 މިލިއަން ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓް ހިމެނޭ ގޮތަށް ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތައް ހިންގިދާނެ ކަމަށް ކަނޑައަޅައިފައިވަނީ މިއަހަރުގެ ޖެނުއަރީ މަހުގެ 12 ވަނަ ދުވަހުއެވެ.

ސްޕެޝަލް އިކޮނޮމިކް ޒޯނުގެ ގާނޫނުގެ ދަށުން ކޮންމެ އަހަރެއްގައި ވެސް އެ އަހަރެއްގައި އެސްއީޒެޑްގައި އިންވެސްޓް ކުރެވޭނެ މިންވަރު ކަނޑައަޅައި އިއުލާން ކުރަންޖެހެއެވެ.

އެގޮތުން ރައީސް ޑރ. މުހައްމަދު މުއިއްޒު، މިއަހަރުގެ ޖެނުއަރީ މަހުގެ 12 ވަނަ ދުވަހު ވަނީ އެސްއީޒެޑެއްގައި ހިންގިދާނެ އިގުތިސޯދީ މަސައްކަތްތަކާއި އެއިން ޒޯނެއްގައި ހިމެނޭ އިންވެސްޓްމަންޓްގެ އެންމެ ކުޑަ މިންގަނޑު ކަނޑައަޅުއްވައި ގަރާރެއް ނެރުއްވައިފައެވެ.

ރައީސްގެ ގަރާރުގައިވާ ގޮތުގައި އެސްއީޒެޑްގައި ގާއިމުކުރެވޭނީ ސްޓްރެޓީޖިކް އިންވެސްޓްމަންޓްތަކުގެ ތެރެއިން އިންވެސްޓްމަންޓެއް ހިމެނޭ ގޮތުން ގާއިމުކުރުމަށް ހުށަހަޅާ ޖުމުލަ 100 މިލިއަން ޑޮލަރަށްވުރެ ކުޑަ ނޫން އަދަދެއްގެ އިންވެސްޓްމަންޓެވެ. އެއީ މިދިޔަ އަހަރުވެސް ކަނޑައެޅި އަދަދެވެ.

ގަރާރުގައި ބުނެފައިވާ ގޮތުން ޖުމުލަ 500 މިލިއަން ޑޮލަރަށްވުރެ ކުޑަ ނޫން އަދަދެއްގެ އިންވެސްޓްމަންޓް ހިމެނޭގޮތަށް ތަރައްގީ ކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކުގައި މިނިމަމް އިންވެސްޓްމަންޓުގެ ގޮތުގައި ކަނޑައަޅައިފައިވާ 500 މިލިއަން ޑޮލަރު ހާއްސަ ކުރަންވާނީ ސަސްޓެއިނަބަލް ޓައުންޝިޕް ޑިވެލޮޕްމަންޓުގެ ކޮމްޕޯނަންޓްތަކަށެވެ.

އެސްއީޒެޑްގައި ހިންގޭނެ އިންވެސްޓްމަންޓްތައް:

އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ އެކި ބާވަތުގެ މަސައްކަތްތައް
ޓްރާންޝިޕްމަންޓް ޕޯޓް، އިންޓަނޭޝަނަލް ލޮޖިސްޓިކްސް، ޕޯޓް، އެއާޕޯޓް، ބަލްކް ބެރޭކިން، ބަންކަރިން، ޑޮކިން ސާވިސަސް މަސައްކަތްތައް
ޔުނިވާސިޓީ، ޓާޝަރީ ހޮސްޕިޓަލް، ސުޕާ ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމަންޓް ފެސިލިޓީތައް
ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައިސީޓީ) ޕާކް އަދި އައިސީޓީއާ ގުޅޭ ފެސިލިޓީތައް
އިންޓަނޭޝަނަލް ފައިނޭންޝަލް ސާވިސަސް އަދި އިންޓަނޭޝަނަލް ޓްރޭޑް ސެންޓަރުތައް
އިޔާދަކުރަނިވި ހަކަތަ އާއި ހަކަތައިގެ ދާއިރާ
ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމު ކުރުމަށް ހިންގޭ މަސައްކަތްތައް
ފުޑް ސެކިއުރިޓީގެ ދާއިރާ
ގޭސް އެކްސްޕްލޮރޭޝަންގެ މަސައްކަތްތައް