ސޯނިކް ފްރެންޗައިޒްގެ އެންމެ ގިނަ ފައިސާ ހޯދި ފިލްމުގެ ގޮތުގައި ތާރީޚު ލިޔުމަށްފަހު، "ސޯނިކް ދަ ހެޖްހޮގް 3" މިހާރު އަމާޒު ހިފާފައިވަނީ އެއަށްވުރެވެސް މަތީ ލަނޑުދަނޑިއަކަށެވެ.
މިފަހަރު އެ ފްރެންޗައިޒް ފަހަނައަޅައި، ވީޑިއޯ ގޭމް އެޑެޕްޓޭޝަންތަކުގެ ތެރެއިން ދެވަނައަށް އެންމެ ގިނަ ފައިސާ ހޯދި ފިލްމުގެ ގޮތުގައި އޮތް "ޕޮކެމޮން: ޑިޓެކްޓިވް ޕިކާޗޫ" ވެސް ފަހަނައަޅައިދިއުމަށެވެ. ޖެފް ފައުލާ ޑައިރެކްޓްކުރި މި ފިލްމު މިހާރު ވަނީ އެ ލަނޑުދަނޑި ހާސިލުކުރުމާ ވަރަށް ގާތުގައެވެ.
ސޯނިކް 3 ވަނީ ޖުމްލަ 446.6 މިލިއަން ޑޮލަރު ހޯދާފައެވެ. މިއީ ޑިޓެކްޓިވް ޕިކާޗޫގެ 449.8 މިލިއަން ޑޮލަރުގެ ޖުމްލައާ އަޅައިބަލާއިރު ދެތިން މިލިއަން ޑޮލަރު މަދު އަދަދެކެވެ. ބޭރު ގައުމުތަކުގައި ދައްކަން ފެށިތާ ފަސްވަނަ ހަފްތާގައި، 62 މާކެޓެއްގައި މި ފިލްމު ވަނީ 10.6 މިލިއަން ޑޮލަރު ހޯދާފައެވެ. މިއާއެކު ބޭރު ގައުމުތަކުން ޖުމްލަ 220.5 މިލިއަން ޑޮލަރު ވަނީ ހޯދާފައެވެ. އެމެރިކާގެ އެތެރޭގެ މާކެޓުން 226.1 މިލިއަން ޑޮލަރު ލިބިފައިވެއެވެ.
2024 ވަނަ އަހަރުގެ ޑިސެމްބަރު މަހު ރިލީޒްކުރި "ސޯނިކް ދަ ހެޖްހޮގް 3" އަކީ ބެން ޝްވާޓްޒްގެ އަޑު އަޅާފައިވާ “ޓިޓުލާ ބްލޫ ބްލާ”ގެ އެޑްވެންޗާ ފެނިގެންދާ ފިލްމެކެވެ. މި ފިލްމުގައި ކުރީގެ ފިލްމުތަކަށް އަޑު އަޅައިދީފައިވާ ފަރާތްތަކުގެ ތެރެއިން ޖިމް ކެރީ (ޑރ. ރޮބޮޓްނިކް)، އިޑްރިސް އެލްބާ (ނަކްލްސް)، އަދި ކޮލީން އޯޝޯނެސީ (ޓެއިލްސް) ގެ އިތުރުން ކިއާނޫ ރީވްސް ފަދަ އާ އަޑުތައްވެސް ހިމެނެއެވެ. މި ފިލްމުގެ ވާހަކައަކީ ސޯނިކް، ޓެއިލްސް އަދި ނަކްލްސް، ޝެޑޯ ދަ ހެޖްހޮގްއާ ދެކޮޅަށް ކުރާ ހަނގުރާމައެކެވެ. ޝެޑޯ ވަނީ އިންސާނިއްޔަތުކަމާ ދެކޮޅަށް ބަދަލުހިފުމުގެ ރޭވުމެއްގައި ދެ ސައިންޓިސްޓުންނާ ގުޅިފައެވެ. އޭގެ ތެރެއިން އެކެއްގެ ރޯލު އަދާކުރަނީ ޖިމް ކެރީއެވެ. 120 މިލިއަން ޑޮލަރުގެ ޕްރޮޑަކްޝަން ބަޖެޓަކުން (މާކެޓިން ޚަރަދު ނުހިމަނައި) ހަދާފައިވާ ސޯނިކް 3 ވަނީ ވަރަށް ފައިދާ ބޮޑު މަސައްކަތަކަށް ވެފައެވެ.
ރޮބް ލެޓަމަން ޑައިރެކްޓްކޮށްފައިވާ 2019 ވަނަ އަހަރުގެ ފެންޓަސީ ފިލްމު ޑިޓެކްޓިވް ޕިކާޗޫ ވަނީ ގާތްގަނޑަކަށް ފަސް އަހަރު ވަންދެން ވީޑިއޯ ގޭމް އެޑެޕްޓޭޝަންތަކުގެ ތެރެއިން ދެވަނަ ސަފުގައި ހިފަހައްޓާފައެވެ.
2016 ވަނަ އަހަރުގެ ވީޑިއޯ ގޭމަކަށް ބިނާކޮށް ހަދާފައިވާ މި ފިލްމަކީ ފުރަތަމަ ފަހަރަށް ހަދާފައިވާ ލައިވް-އެކްޝަން ޕޮކެމޮން ފިލްމެވެ. މި ފިލްމުގައި ހިމެނޭ ނޮސްޓެލްޖިއާއާއި ވިޝުއަލް އިފެކްޓްސްތަކަށް ވަނީ ތައުރީފު ލިބިފައެވެ.
ސޯނިކް 3 ގެ ރަނގަޅު ދުވެލި ދަނީ ކުރިއަށެވެ. މި ފިލްމުގެ އާމްދަނީ ވަނީ 30.3 އިންސައްތަ ދަށްވެފައެވެ. އަންނަ ހަފުތާގައި ޑިޓެކްޓިވް ޕިކާޗޫ ފަހަނައަޅައިދާނެކަމަށް ލަފާކުރެވެއެވެ. އަދި ދުނިޔޭގެ ފެންވަރުގައި ޖުމްލަ 520 މިލިއަން ޑޮލަރު ހޯދުމުގެ ފުރުސަތު އެބައޮތެވެ.
މި ކަންކަން މިހެން ހުރި ނަމަވެސް، 2023 ވަނަ އަހަރު ނެރުނު "ދަ ސުޕަ މާރިއޯ ބްރަދަސް މޫވީ" އަކީ މިހާތަނަށް ވީޑިއޯ ގޭމަކަށް ބިނާކޮށް ހަދާފައިވާ ފިލްމުތަކުގެ ތެރެއިން އެންމެ ގިނަ ފައިސާ ހޯދި ފިލްމެވެ. މި ފިލްމު ވަނީ 1 ބިލިއަން ޑޮލަރަށްވުރެ ބޮޑު އާމްދަނީއެއް ހޯދާފައެވެ.
