މަޖިލީހުގެ ރައީސާއި ނައިބު ރައީސް ހޮވުމަށް ބާއްވާ ޖަލްސާ

19 ވަނަ ރައްޔިތުންގެ މަޖިލީހުގެ ފުރަތަމަ ޖަލްސާ ނިންމާލައިފި.

ރައީސް ނަޝީދު ވަނީ 18 ވަނަ ރައްޔިތުންގެ މަޖިލީހުގެ ރައީސްކަން އަދާކުރެއްވި އަބްދުﷲ މަސީހު މުހައްމަދާއި ގާސިމް އިބްރާހިމް އަދި ނައިބު ރައީސްކަން އަދާކުރެއްވި މޫސާ މަނިކަށް ޝުކުރު އަދާކުރައްވާފައި.

މަޖިލީހުގެ ރިޔާސަތާ ރައީސް މުހައްމަދު ނަޝީދު ހަވާލުވެވަޑައިގެންފި.

މަޖިލީހުގެ ނައިބު ރައީސްކަމުގެ މަގާމަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲ އިންތިހާބުކޮށްފި.

އެ މަގާމަށް އިންތިހާބުކުރުމަށް ނެގި ސިއްރު ވޯޓުގައި އީވާ، އެ މަގާމަށް އިންތިހާބުކުރުމަށް ފެންނަ ކަމަށް ވޯޓުދީފައިވަނީ 76 މެމްބަރުން. ނުފެންނަ ކަމަށް ވޯޓު ދީފައިވަނީ ނުވަ މެމްބަރެއް. ޖަލްސާގައި ބައިވެރިވެވަޑައިގެންނެވި 86 މެމްބަރުންގެ ތެރެއިން 85 މެމްބަރުން ވޯޓުގައި ބައިވެރިވެވަޑައިގެންނެވި.

މިހާރު ކުރިއަށްދަނީ ނައިބު ރައީސްގެ މަގާމަށް ބޭފުޅަކަށް ހޮވުމަށް ނަގާ ސިއްރު ވޯޓު. އެ މަގާމަށް ކުރިމަތިލާފައިވަނީ ހަމައެކަނި ގަލޮޅު އުތުރު ދާއިރާގެ މެމްބަރު އީވާ އަބްދުﷲ.

ބޮޑު ތަފާތަކުން މާމިގިލީ ދާއިރާގެ މެމްބަރު ގާސިމް އިބްރާހީމް ބަލިކުރައްވައި، މަޖިލީހުގެ ރައީސްކަމުގެ މަގާމަށް މައްޗަންގޮޅި މެދު ދާއިރާގެ މެމްބަރު މުހައްމަދު ނަޝީދު ވަނީ އިންތިހާބުވެވަޑައިގެންފައި.

މަޖިލީހުގެ ރައީސަކު ހޮވުމަށް ނެގި ސިއްރު ވޯޓުގައި ނަޝީދަށް ލިބިވަޑައިގެންނެވީ 67 ވޯޓު. އަދި ގާސިމަށް ލިބިވަޑައިގެންނެވީ 17 ވޯޓު ބާތިލް ހިމެނެނީ އެއް ވޯޓު. ޖަލްސާގައި ބައިވެރިވެވަޑައިގެންނެވި 86 މެމްބަރުންގެ ތެރެއިން 85 މެމްބަރުން ވޯޓުގައި ބައިވެރިވެވަޑައިގެންނެވި.

މަޖިލީހުގެ ރައީސާއި ނައިބު ރައީސް ހޮވުމުގެ ކަންކަން ކުރިއަށްގެންދިއުމަށް ނެގި ފަސް މެމްބަރުންގެ ކޮމިޓީން މިހާރު ދަނީ ވޯޓު ގުނުމުގެ ކަންކަން ކުރިއަށްގެންދަމުން.

މަޖިލީހުގެ ރައީސް ހޮވުމަށް ނެގި ވޯޓުގައި ޖަލްސާގައި ބައިވެރިވެވަޑައިގެންނެވި 86 މެމްބަރުންގެ ތެރެއިން 85 މެމްބަރުން ބައިވެރިވެވަޑައިގެންނެވި.

މަޖިލީހުގެ ރައީސްކަމަށް ބޭފުޅަކު އިންތިހާބުކުރުމަށް ކުރިއަށްގެންދާ ވޯޓުލުން ފަށައިފި.

ފުރަތަމަ ކުރިއަށްދާނީ މަޖިލީހުގެ ރައީސަކު ހޮވުމަށް ކުރިއަށްގެންދާ ސިއްރު ވޯޓު. އެ މަގާމަށް ވާދަކުރައްވަނީ މައްޗަންގޮޅި މެދު ދާއިރާގެ މެމްބަރު މުހައްމަދު ނަޝީދާއި މާމިގިލީ ދާއިރާގެ މެމްބަރު ގާސިމް އިބްރާހީމް.

މަޖިލީހުގެ ރައީސާއި ނައިބު ރައީސް ހޮވުމަށް ހަމަޖެހިފައިވަނީ ސިއްރު ވޯޓަކުން.

ނައިބު ރައީސްކަމުގެ މަގާމަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲގެ ނަންފުޅު، ހިތަދޫ އުތުރު ދާއިރާގެ މުހައްމަދު އަސްލަމް ހުށަހަޅުއްވައިފި. އެ ހުށަހެޅުއްވުމަށް މެދުހެންވޭރު ދާއިރާގެ މެމްބަރު އަލީ އާޒިމް ވަނީ ތާއީދުކުރައްވާފައި.

މަޖިލީހުގެ ރައީސްކަމުގެ މަގާމަށް މާމިގިލީ ދާއިރާގެ މެމްބަރު ގާސިމް އިބްރާހިމްގެ ނަންފުޅު، މަހިބަދޫ ދާއިރާގެ މެމްބަރު އަހްމަދު ޠާރިގު ހުށަހަޅުއްވައިފި. އެ ހުށަހެޅުމަށް ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް ވަނީ ތާއީދުކުރައްވާފައި.

ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، މަޖިލީހުގެ ރައީސްކަމުގެ މަގާމަށް ހުށަހެޅުއްވީ މައްޗަންގޮޅި މެދު ދާއިރާގެ މެމްބަރު މުހައްމަދު ނަޝީދުގެ ނަންފުޅު. އެ ހުށަހެޅުމަށް މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ތާއީދުކުރައްވާފައި.

މަޖިލީހުގެ ރައީސާއި ނައިބު ރައީސް ހޮވުމުގެ ކަންކަން ކުރިއަށްގެންދިއުމަށް ފަސް މެމްބަރުންގެ ކޮމިޓީއެއް އެކުލަވާލައިފި.

އެ މެމްބަރުންގެ ނަންތައް ހުށަހެޅުއްވީ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ). އެ ހުށަހެޅުމަށް މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ވަނީ ތާއީދުކުރައްވާފައި.

ވޯޓުގައި ބައިވެރިވެވަޑައިގެންނެވި 85 މެމްބަރުންގެ އިއްތިފާގުން އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ)ގެ އެ ހުށަހެޅުން ވަނީ ފާސްވެފައި.

އެ ކޮމިޓީގައި ހިމެނިވަޑައިގަންނަވަނީ؛

ތުޅާދޫ ދާއިރާގެ މެމްބަރު ހިސާން ހުސައިން (އެމްޑީޕީ)

އިސްދޫ ދާއިރާގެ މެމްބަރު އަލީ ހަމީދު (ޖުމްހޫރީ ޕާޓީ)

ނައިފަރު ދާއިރާގެ މެމްބަރު އަހްމަދު ޝިޔާމް (ޕީޕީއެމް)

މާވަށު ދާއިރާގެ މެމްބަރު މުހައްމަދު ސައީދު (ޕީއެންސީ)

ވިލިނގިލި ދާއިރާގެ މެމްބަރު ސައުދު ހުސައިން (އަމިއްލަ)

މަޖިލީހުގެ ރައީސާއި ނައިބު ރައީސް ހޮވުމަށް ބާއްވާ ޖަލްސާ ފަށައިފި. ރިޔާސަތު ބަލަހައްޓަވަނީ މީދޫ ދާއިރާގެ މެމްބަރު އަހްމަދު ސިޔާމް މުހައްމަދު.

މަޖިލީހުގެ ރައީސާއި ނައިބު ރައީސްކަމަށް ކުރިމަތިލުމަށް މިރޭގެ ޖަލްސާގައި ހުޅުވާލާނެ. މަޖިލީހުގެ ރައީސާއި ނައިބު ރައީސްކަމަށް އެމްޑީޕީން ހުށަހަޅާ ނަންތައް މިހާރު ވަނީ ނިންމާފައި. އެމްޑީޕީން މަޖިލީހުގެ ރައީސްކަމަށް ހުށަހެެޅުމަށް ނިންމާފައިވަނީ ކުރީގެ ރައީސުލްޖުމްހޫރިއްޔާ އަދި މައްޗަންގޮޅި މެދު ދާއިރާގެ މެމްބަރު މުހައްމަދު ނަޝީދުގެ ނަންފުޅު. އަދި ނައިބު ރައީސްކަމަށް އެ ޕާޓީން ހުށަހެޅުމަށް ނިންމާފައިވަނީ ގަލޮޅު އުތުރު ދާއިރާގެ މެމްބަރު އީވާ އަބްދުﷲގެ ނަންފުޅު.

ހުވާކުރުމުގެ ރަސްމިއްޔާތަށްފަހު މަޖިލީހުގެ ރައީސާއި ނައިބު ރައީސް ހޮވުމަށް ބާއްވާ ޖަލްސާ ފެށޭނީ މިރޭ 10:30ގައި. އެ ޖަލްސާގެ ރިޔާސަތު ބަލަހައްޓަވާނީ މީދޫ ދާއިރާގެ މެމްބަރު އަހްމަދު ސިޔާމް މުހައްމަދު.

ހުވައިކުރުމުގެ ރަސްމިއްޔާތުގައި ގުރައިދޫ ދާއިރާގެ މެމްބަރު އިބްރާހިމް ރިޒާ ފިޔަވައި އެހެން ހުރިހާ މެމްބަރުން ހުވައިކުރެއްވި. ރިޒާ އުމްރާ ފުރިހަމަކުރައްވާތީ ބައިވެރިނުވެވޭނެކަން މަޖިލިސް އިދާރާއަށް ވަނީ އަންގާފައި.

މަޖިލީހަށް ހޮވުނު މެމްބަރުންނަށް ހުވައިލައިދެއްވަނީ އުއްތަމަ ފަނޑިޔާރު އަހްމަދު އަބްދުﷲ ދީދީ.