ފެނަކައިގެ އެމްޑީގެ މަގާމުން މުއާޒު އިސްތިއުފާދެއްވައިފި

ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުން މުއާޒް މުހައްމަދު ރަޝީދު އިސްތިއުފާ ދެއްވައިފިއެވެ.

ރައީސް ޑރ. މުހައްމަދު މުއިއްޒަށް އެޑްރެސް ކުރައްވައި މުއާޒު މިއަދު ފޮނުއްވި ސިޓީއެއްގައި ވިދާޅުވީ ފެނަކައިގެ މެނޭޖިން ޑިރެކްޓަރުގެ މަސްއޫލިއްޔަތުތައް އިހުލާސްތެރިކަމާ އެކު އަދާކުރައްވައިފައިވާ ކަމަށެވެ. އަދި ވިދާޅުވީ ފެނަކައިގެ މެނޭޖިން ޑިރެކްޓަރުގެ މަގާމުގައި ހޭދަކުރެއްވި އެއް އަހަރު ދުވަހުގެ ތެރޭގައި ކުންފުނި ހިންގުމަށް ގިނަ ގޮންޖެހުންތަކެއް ދިމާވި ކަމަށާއި އެ ގޮންޖެހުންތަކާ އެކު ވެސް ކުންފުނީގެ ހިދުމަތް މެދުނުކެނޑި ރައްޔިތުންނަށް ފޯރުކޮށްދީފައިވާނެ ކަމަށެވެ.

މުއާޒް ވިދާޅުވީ ކުންފުނިތައް ހިންގަންވާނީ އެ ކުންފުންޏަކަށް ލިބޭ އާމްދަނީން ކަމަށްވި ނަމަވެސް ފެނަކައަށް މިހާރު ދިމާވެފައިވާ މާލީ ހާލަތުގެ ސަބަބުން އެއީ ކުރެވޭނެ ކަމެއް ނޫން ކަމަށެވެ.

އޭނާ ވިދާޅުވީ ފެނަކައިގެ މެނޭޖިން ޑިރެކްޓަރުގެ މަގާމުގައި ހުންނަވައި ކުންފުނީގެ ހިންގުން ވަރަށް ބޮޑަށް ހަރުދަނާކުރައްވާފައިވާނެ ކަމަށެވެ. އެގޮތުން 2023 ވަނަ އަހަރުގެ އޮކްޓޫބަރު މަހާއި އަޅައި ބަލާއިރު 2024 ވަނަ އަހަރުގެ އޮކްޓޫބަރު މަހުގެ ނިޔަލަށް 160 މިލިއަން ރުފިޔާއަށްވުރެ ބޮޑު އަދަދެއް ހިންގުމުގެ ހަރަދުތަކުން ސަލާމަތް ކުރެވިފައިވާ ކަމަށް އޭނާ ވިދާޅުވިއެވެ.

ނަމަވެސް ފެނަކައިގެ ދަރަނި ހުރި މިންވަރަށް އަޅައި ބަލާއިރު، ހިންގުމުގެ ހަރަދު ކުޑަކޮށްގެން ފެނަކައަށް ދިމާވެފައިވާ މާލީ ހާލަތުން އަރައި ނުގަނެވޭނެ ކަމަށެވެ. މާލީ ހާލަތުން އަރައިގަނެވޭނެ ގޮތުގެ ޕްލޭން ތައްޔާރުކޮށް ކަމާބެހޭ ފަރާތްތަކަށް ހިއްސާކުރި ނަމަވެސް އަލިމަގެއް ފެނިފައިނުވާ ކަމަށް އޭނާ ވިދާޅުވިއެވެ.

"ކުންފުނީގެ ބެލެނިވެރި ފަރާތް ކަމުގައިވާ މާލީ ވުޒާރާއަށް މިކަންކަމުގައި ހުރި ދަތިތަކާއި އިސްވެ ދެންނެވުނު ހާލަތުން އަރައިގަތުމަށްޓަކައި މަސްވަރާކޮށް ގޮތެއް ހޯދުމަށް ތަފާތު އެކިފަހަރު މަތިން ވަނީ ދެންނެވިފައެވެ. އެނގިވަޑައިގަންނަވާނެ ފަދައިން ރައްޔިތުންނަށް ފޯރުކޮށްދޭ މިފަދަ އަސާސީ ހިދުމަތްތަކުން އެންމެ ހިނދުކޮޅަކަށް ވެސް މަހުރޫމްވާން ޖެހުން އެއީ، އޭގެ ސަބަބުން އަޅުގަނޑާއި ކުންފުންޏާއި އަދި މަނިކުފާނަށް (ރައީސް މުއިއްޒު) ވެސް އޭގެ ބަދުނާމު ފޯރާނެ ކަމެއްގެ އިތުރުން އެތަކެއް ރައްޔިތުންނަށް އެކަމުގެ ތަކުލީފު އުފުލަން ޖެހޭނެ ކަމެކެވެ،" މުއާޒް ވިދާޅުވިއެވެ.

"ކުންފުންޏަށް ލިބޭ އާމްދަނީއަށްވުރެ ކުރަންޖެހޭ ހަރަދު ބޮޑުވުމުން ދެމެހެއްޓެނެވި ގޮތެއްގައި ހިދުމަތްތަށް ފޯރުކޮށް ނުދެވޭނެ ހާލަތަކަށް ކުންފުނީގެ އޮޕަރޭޝަން ހާލަތު ވެއްޓިފައިވާތީ، އަޅުގަނޑު ހުރެގެން އިތުރަށް މިކަން ރަނގަޅު ކުރެވޭނެ އަލި މަގެއް ފެންނަން ނެތުމުން، މިއަދުން ފެށިގެން ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރުގެ މަގާމުން އިސްތިއުފާ ދީފީމެވެ"

މުއާޒް ވިދާޅުވީ ފެނަކައިގެ 4.3 ބިލިއަން ރުފިޔާގެ ބޮޑު ދަރަންޏެއް އޮތް އިރު، ކުންފުނިން ހިދުމަތް ފޯރުކޮށްދޭ ގިނަ ރަށްރަށުގެ ކަރަންޓާއި ފެނާއި ނަރުދަމާގެ ހިދުމަތްތައް ފާއިތުވި އަހަރުތަކުގެ ތެރޭގައި އެކަށީގެންވާ ގޮތެއްގައި މެއިންޓަނަންސްކޮށް ނުބެލެހެއްޓުމުގެ ސަބަބުން ކުރިން އޮތް ބެކްލޮގް އެއްކޮށް ރަނގަޅު ކުރެވިފައިނުވާ ކަމަށެވެ. އަދި ކުންފުންޏަށް ބޭނުންވާ އަދަދަށްވުރެ އެތައް ގުނައެއް އިތުރަށް ވަޒީފާ ހަމަޖައްސައިފައިވާ ކަމަށް ވެސް އޭނާ ވިދާޅުވިއެވެ.

ފެނަކައަށް ލިބޭ އާމްދަނީއާ އަޅައި ބަލާއިރު، ކުރަންޖެހޭ ހަރަދު އިންތިހާއަށް އިތުރު ކަމަށެވެ. އަދި ފެނަކަ ރައިޓް ސައިޒް ކުރުމުގެ މަސައްކަތަށް ވެސް ކަމާ ގުޅުންހުރި އިދާރާތަކުން އެއްބާރުލުން ލިބެމުންނުދާ ކަމަށް މުއާޒް ވިދާޅުވިއެވެ.

ފާއިތުވި އޮކްޓޫބަރު އަދި ނޮވެމްބަރު މަހުގެ މުސާރަ މުވައްޒަފުންނަށް މަސް ފެށުނުއިރު ވެސް ޖަމާކޮށްދެވިފައި ނުވާ ކަމަށާއި އެއީ ފަހުގެ ތާރީހެއްގައި ކުންފުނީގައި ހިނގައިފައިވާ ކަމެއް ނޫން ކަމަށް މުއާޒް ވިދާޅުވިއެވެ.