ޑައިރެކްޓަރު ވިކާސް ބާލްގެ ފަންނީ ކާމިޔާބީތަކުގެ ތެރޭގައި "ޗިއްލަރ ޕާޓީ"، "ކުއީން"، "ސުޕަރ 30" އަދި "ޝައިތާން" ފަދަ، ހަނދާންތަކުގައި ދެމިހުންނަ ފިލްމުތައް ހިމެނެއެވެ. މި އުފެއްދުން ތަކަކީ ބޮލީވުޑްގެ މަޝްހޫރު ފިލްމުތަކުގެ ގޮތުގައި ރަސްމީކޮށް ސިފަކުރެވިފައިވާ އުފެއްދުންތަކެކެވެ. މީގެ ތެރެއިން ހާއްސަކޮށް ފާހަގަކުރެވެނީ ކަންގަނާ ރަނާއުތް ލީޑް ރޯލުން ފެނިގެންދިޔަ "ކުއީން" އެވެ.
"ކުއީން" ފިލްމު ފްރެންޗައިޒެއްގެ ގޮތުގައި ނެރުމާ ގުޅޭގޮތުން މަޝްވަރާތައް ކުރެވެމުންދާތާ ދުވަސްތަކެއް ވެފައިވީ ނަމަވެސް، އެކަން ޔަގީންވެފައެއް ނުވެއެވެ. އެހެންނަމަވެސް، ޕިންކްވިލާ މާސްޓަރ ކްލާހުގައި ވިކާސް ވަނީ "ކުއީން 2" ގެ އުފެއްދުމުގެ މަސައްކަތް ފަށައިފައިވާކަން ކަށަވަރުކޮށްދީފައެވެ.
ކުރިއަށް ރޭވިފައިވާ ޕްރޮޖެކްޓްތަކާ ބެހޭގޮތުން ވާހަކަދައްކަމުން، ވިކާސް ބުނީ "ކުއީން 2" ގެ ތައްޔާރީތައް ފެށިތާ ގިނަ ދުވަސްތަކެއް ވެފައިވާ ކަމަށާއި، މިހާރު ވަނީ އަމަލީ މަސައްކަތްތަކެއް ވެސް ފެށިފައި ކަމަށެވެ. މީގެ އިތުރުން، "ޝައިތާން 2" އުފެއްދުމުގެ މަޝްރޫއުތަކެއްވެސް އޭނާގެ ވިސްނުމުގައި އެބަހުރި ކަމަށް ވިކާސް ބުންޏެވެ.
2013 ވަނަ އަހަރު ރިލީސްކުރި "ކުއީން" އަކީ ބޮލީވުޑަށް އައި ވަރަށް އާދަޔާ ހިލާފު މޮޅު ފިލްމެއްގެ ގޮތުގައި މީހުން ގަބޫލުކޮށްފައިވެއެވެ. މި ފިލްމަކީ އަހަރުތަކެއް ވަންދެން ކަންގަނާގެ އެންމެ ފާހަގަކޮށްލެވޭ އެއް މަސައްކަތްކަމުގައި ބެލެވިފައިވާ އުފެއްދުމެކެވެ.
