އައިއެމްޑީބީ: އެންމެ މަގުބޫލު އިންޑިއާ ފިލްމަކީ "ކަލްކީ 2898 އޭޑީ" ސީރީޒަކީ "ހީރަމަންޑީ"

ސައިންސް ފިކްޝަން އެޕިކް 'ކަލްކީ 2898 އޭޑީ' އާއި ސަންޖޭ ލީލާ ބަންސާލީގެ ޒަމާނީ ޑްރާމާ ސީރީޒް 'ހީރަމަންޑީ: ދަ ޑައިމަންޑް ބަޒާރު' އައިއެމްޑީބީގެ 2024 ވަނަ އަހަރުގެ އެންމެ މަގުބޫލު އިންޑިއަން ފިލްމުތަކާއި ވެބް ސީރީޒްތަކުގެ ލިސްޓުގެ އެންމެ މަތީ ދަރަޖަ ހޯދައިފިއެވެ.

މި ދަރަޖަތައް ކަނޑައަޅާފައިވަނީ މަހެއްގެ މައްޗަށް ސައިޓަށް ޒިޔާރަތްކުރާ ފަރާތްތަކުގެ ޕޭޖް ވިއުސް ތަކުގެ މައްޗަށް ބިނާކޮށް ކަމަށާއި އެންމެ މަތީ ދަރަޖައިގައި ހިމެނޭ ފިލްމުތަކުގެ ލިސްޓުން އިންޑިއާގެ ބަހުރުވަ ގިނަ ކޮންޓެންޓްތަކުގެ މައްޗަށް އަންނަ ކުރިއެރުން ފެނިގެންދާ ކަމަށް ރިޕޯޓުތައް ބުނެއެވެ. އެއީ ލިސްޓުގައި 'ސްޓްރީ 2'، 'ބޫލް ބުލައްޔާ 3'، އަދި 'ސިންގަމް އަގެއިން' ފަދަ ފްރެންޗައިޒް ފިލްމުތައް ހިމެނޭ ގޮތަށް ހިންދީ ބަހުގެ 7 ފިލްމު ހިމެނިފައި ވުމުގެ އިތުރުން، ތެލިނގު ބަހުގެ 'ކަލްކީ 2898 އޭޑީ'، ތަމަޅަ ފިލްމު 'މަހާރާޖާ'، އަދި މަލަޔާޅަމް ފިލްމު 'މަންޖުމްމެލް ބޯއިސް' ޓޮޕް 10 ގައި ހިމެނިފައިވުމުންނެވެ.

ސްޓްރީމިން ދާއިރާގައި، ނެޓްފްލިކްސް އަދި ޕްރައިމް ވީޑިއޯ ވަނީ އިސްދައުރެއް އަދާކޮށްފައެވެ. މި ދެ ޕްލެޓްފޯމުން ވެސް ލިސްޓުގައި ތިން ސީރީޒް ހިމަނާފައިވެއެވެ. 'ހީރަމަންޑީ: ދަ ޑައިމަންޑް ބަޒާރު' ވަނީ އެންމެ މަތީ ދަރަޖަ ހޯދައިފައެވެ. އަދި ގާނޫނީ ކޮމެޑީ 'މާމްލާ ލީގަލް ހެއި' އާއި 'ދަ ގްރޭޓް އިންޑިއަން ކަޕިލް ޝޯ' ވެސް ވަނީ ބޮޑު ކުރިއެރުމެއް ހޯދާފައެވެ. މިއީ މި ލިސްޓުގައި ހިމެނުނު ފުރަތަމަ ނޮން-ފިކްޝަން ޝޯ އެވެ.

ޕްރައިމް ވީޑިއޯއިން 'މިރްޒާޕުރް'، 'ޕަންޗާޔަތް'، އަދި 'ސިޓަޑެލް: ހަނީ ބަނީ' އާއެކު ވަރުގަދަ މަގާމުތަކެއް ހޯދައިފައިވެއެވެ. މިއީ އާ ސީރީޒްތަކާއި ކުރިން ވެސް ހުރި ފްރެންޗައިޒްތަކުގެ ދެމެދުގައި ވަރަށް ރަނގަޅު ބެލެންސެއް ދައްކުވައިދޭ ކަމެކެވެ.

އެކްޓްރެސް ދީޕިކާ ޕަދުކޯން އެންމެ ފާހަގަކޮށްލެވޭ ފަންނާނެއްގެ ގޮތުގައި ވަނީ ހޮވިފައެވެ. އޭނާ ވަނީ އެންމެ މަތީ ދަރަޖައިގައި ހިމެނޭ ތިން ފިލްމެއް ކަމަށްވާ 'ފައިޓަރ'، 'ކަލްކީ 2898 އޭޑީ'، އަދި 'ސިންގަމް އަގެއިން' ގައި ތަމްސީލުކޮށްފައެވެ.

97 ވަނަ އެކަޑަމީ އެވޯޑްސްގެ އިންޓަނޭޝަނަލް ފީޗާ ފިލްމް ކެޓަގަރީއަށް އިންޑިއާގެ ރަސްމީ އެންޓްރީއަށް ހޮވުނު 'ލާޕަތާ ލޭޑީސް' ވަނީ ފިލްމުތަކުގެ ތެރެއިން 10 ވަނައިގައި ހިމެނިފައެވެ.