ވަރީގެ އަޑުތައް ގަދަވެފައި ވަނިކޮށް އައިޝްވަރިޔާ އާއި އަބީޝެކް އެކުގައި އާ ފޮޓޯތަކަކުން

އެކްޓަރުންގެ ޖޯޑު ކަމުގައިވާ އަބިޝެކް ބަޗަން އަދި އައިޝްވަރިޔާ ރާއީ ވަރިވާ ކަމުގެ އަޑުތަކެއް ފެތުރެމުންދަނިކޮށް، މި ދެ ތަރީންގެ އާ ފޮޓޯތަކެއް ސޯޝަލް މީޑިއާގައި ފެންނަން ފަށައިފިއެވެ. ވިޔަފާރިވެރިޔާ އަނޫ ރަންޖަން އަދި އެކްޓަރު އައިޝާ ޖުލްކާ އެ މީހުންގެ އިންސްޓަގްރާމް އެކައުންޓްތަކުގައި އައިޝްވަރިޔާ އަދި އަބިޝެކް ބަޗަން ހިމެނޭ ފޮޓޯތަކެއް ޕޯސްޓްކޮށްފައިވެއެވެ.

އަނޫ ހިއްސާކުރި ފޮޓޯއެއްގައި، އައިޝްވަރިޔާ އޭނާގެ މަންމަ ބްރިންދްޔާ ރާއީގެ ކުރިމަތީގައި ހުރެ ސެލްފީއެއް ނަގާތަން ފެނެއެވެ. އަނޫ ބްރިންދްޔާގެ އަތުގައި ހިފަހައްޓައިގެން ހުންނައިރު އަބީޝެކް އެމީހުންގެ ފަހަތުގައި ހުއްޓެވެ. އެންމެން ހިނިތުންވެ ތިބެގެން ކެމެރާއަށް ޕޯސް ދެއެވެ. މި ހަފުލާގައި، އައިޝްވަރިޔާ އާއި އަބީޝެކް ތިބީ ކަޅު ހެދުން ލައިގެންނެވެ. އައިޝްވަރިޔާ ލައިގެން ހުރީ އިންޑިއަން ދޯޕައްޓާ ހެދުމެކެވެ. އަދި އަބީޝެކް ލައިގެން ހުރީ ކުރުތާ އާއި ޓްރައުޒަރެކެވެ.

އާއިޝާ ޖުލްކާ އޭނާގެ އިންސްޓަގްރާމް ސްޓޯރީގައި މި ހަފުލާއިން ނެގި ގިނަ އަދަދެއްގެ ފޮޓޯތަކެއް ހިއްސާކުރިއެވެ. މި ފޮޓޯތަކުގައި، އައިޝްވަރިޔާ ސެލްފީތައް ނަގާ މަންޒަރު ފެނެއެވެ. އާއިޝާ، އަބިޝެކް އަދި އައިޝްވަރިޔާ ވެސް ކެމެރާއަށް ޕޯސް ދެއެވެ. މި ހަފުލާއަށް، އާއިޝާ ލައިގެން ހުރީ ރަތް ސާރީއެކެވެ. މި ޕާޓީގައި ތުޝާރު ކަޕޫރު އަދި ސަޗިން ޓެންޑުލްކަރު ފަދަ އެހެން މީހުން ވެސް ބައިވެރިވިއެވެ. ޕާޓީ ބޭއްވި ތަނާއި އެހެނިހެން ތަފްސީލުތައް ރިޕޯޓުގައި ހިމަނައިފައެއް ނުވެއެވެ.

އައިޝްވަރިޔާ އާއި ބައްޗަން އާއިލާއާ ދެމެދު ހިނގަމުންދާ ހިޔާލުތަފާތުވުންތަކާ ބެހޭ އަޑުތައް ބޮޑަށް ފެތުރެން ފެށީ މި އަހަރުގެ ޖުލައި މަހު އަނަންތް އަމްބާނީގެ ކައިވެނީގެ ހަފުލާއަށްފަހުގައެވެ. މިކަން ފެށުނީ އައިޝްވަރިޔާ އާއި އޭނާގެ ދަރިފުޅު އާރާދްޔާ ބައްޗަން ވަކިން ހަފުލާ ބޭއްވި ތަނަށް ދިއުމުންނެވެ. ބައްޗަން އާއިލާގެ އެހެން މެންބަރުން، އެއީ އަމިތާބް ބައްޗަން، ޖަޔާ ބައްޗަން، އަބިޝެކް ބައްޗަން، ދަރިފުޅު ޝްވެތާ، ކާފަ ދަރިފުޅު އަގަސްތްޔާ ނަންދާ، އަދި ކާފަ ދަރިފުޅު ނަވްޔާ ނަވެލީ، އެކުގައި ފެނުނެވެ.

މި މަހުގެ ކުރީކޮޅު އައިޝްވަރިޔާގެ އުފަންދުވަހަށް އަބިޝެކް ނުވަތަ އޭނާގެ އާއިލާއިން ވެސް ހެޔޮއެދުން ފޮނުވާފައި ނުވުމާ ގުޅިގެން މި އަޑުތައް އިތުރަށް ފެތުރުނެވެ. އައިޝްވަރިޔާ އާއި އަބިޝެކް ކައިވެނިކުރީ 2007 ވަނަ އަހަރުއެވެ. އެމީހުންގެ ދަރިފުޅު އާރާދްޔާ ބައްޗަން އުފަންވީ 16 ނޮވެމްބަރު 2011 ގައެވެ.